1. ¿Chuqui tsiʼ yʌlʌ Jesús yicʼot jiñi xcʌntʼañob i chaʼan ti jiñi cojix bʌ yicʼotob?

CHEʼ bʌ Jesús yaʼan yicʼot jiñi xcʌntʼañob i chaʼan ti jiñi cojix bʌ acʼʌlel, lʌcʼʌ 30 tsiʼ taja ti tʼan chaʼan jiñi cʼuxbiya. Wen tsiquil tiʼ subeyob chaʼan yom miʼ cʼuxbiñob i bʌ (Jn. 15:12, 17). Jiñi cʼuxbiya jiñʌch muʼ bʌ caj i ñumen acʼ ti cʌjñel chaʼan isujm bʌ xcʌntʼañob i chaʼan (Jn. 13:34, 35). Jiñi cʼuxbiya tsaʼ bʌ i taja ti tʼan Jesús mach jin jach muʼ bʌ laj cubin ti lac pusicʼal, jumpʼejlʌch melbalʌl (chaʼlebal) am bʌ i pʼʌtʌlel yicʼot majqui jach miʼ mejlel ti pʌsbentel. Tsiʼ yʌlʌ: «Jiñʌch ñuc bʌ cʼuxbiya cheʼ an majch miʼ yʌcʼ i bʌ ti chʌmel chaʼan i piʼʌlob. Maʼanic majch ñumen cabʌl i cʼuxbiya bajcheʼ jini. Jatetla c piʼʌletla cheʼ mi laʼ chaʼlen chuqui mic subeñetla» (Jn. 15:13, 14).

2. a) ¿Chuqui jiñi muʼ bʌ i yʌcʼ ti cʌjñel i wiñicob Dios ili ora? b) ¿Chuqui tac ti cʼajtiya mi caj lac jacʼ ti ili temaj?

² Ili ora, jiñi isujm bʌ cʼuxbiya añoʼ bʌ i chaʼan jiñi i wiñicob Dios yicʼot cheʼ wen muchʼulob, jiñʌch muʼ bʌ i yʌcʼob ti cʌjñel (1 Jn. 3:10, 11). Anquese mach junlajalic baqui tilemonla, jiñi lac lumal, lac tʼan o bajcheʼ tsaʼ cosʌntiyonla, mi lac chaʼlen wersa chaʼan mi lac pʌs jiñi cʼuxbiya. Pero tajol mi laj cʼajtiben lac bʌ:  «¿Chucoch ñuc i cʼʌjñibal jiñi cʼuxbiya ili ora? ¿Bajcheʼ miʼ pʼʌtʼesañonla Jehová yicʼot Jesús? I ¿bajcheʼ miʼ mejlel lac tsajcan i melbal Jesús yicʼot mi lac pʌs jiñi cʼuxbiya yujil bʌ ‹coltaya›?» (1 Co. 8:1).

3. ¿Bajcheʼ miʼ ticʼlan jiñi quixtañujob cheʼ wen wocol jax bajcheʼ chumulonla?

³ Come ili qʼuin wen wocol jax i mi lac chaʼlen «tsʌts tac bʌ eʼtel», cabʌl wiñicob xʼixicob (quixtañujob) miʼ wen cʼojoʼtañob i bʌ (2 Ti. 3:1-5; Sal. 90:10). An cabʌl mach bʌ yomobix chumtʌl. Miʼ ñaʼtʌntel chaʼan ñumen ti 800 mil miʼ tsʌnsañob i bʌ ti jujumpʼejl jab, jajayajl miʼ ñumel 40 segundo, miʼ tsʌnsan i bʌ juntiquil. Miʼ yʌcʼ chʼijiyemlel, pero an hermanojob jaʼel cheʼ bʌ miʼ yubiñob i bʌ bajcheʼ jiñi i miʼ tsʌnsañob i bʌ.

4. ¿Majqui muʼ bʌ i yʌjlelob yaʼ ti Biblia tsiʼ cʼajtiyob chʌmel?

⁴ Ti wajali, an i wiñicob Dios tsaʼ bʌ i tajayob i chʼijiyemlel i tsiʼ ñaʼtayob chʌmel (sajtel). Jumpʼejl ejemplo jiñʌch tiʼ tojlel Job, tsiʼ yʌlʌ chaʼan cʼojyemix tiʼ cuxtʌlel i chaʼan yomix chʌmel come mach cujchix miʼ yubin woli (choncol) bʌ i ñusan (Job 10:1; 14:13). Cheʼ bʌ Jonás mach cheʼic tsaʼ ujti bajcheʼ tsiʼ lon pijta chaʼan i subtʼan, mach tijicñayic tsiʼ yubi i tsiʼ yʌlʌ: «Wʌle c Yum, a wocolic mic subeñet laʼix chʌmicon come mach tijicñayonic cheʼ cuxulon to. Ñumen utsʼat mi tsaʼ chʌmiyon» (Jon. 4:3). Ti jumpʼejl bʌ qʼuin, jiñi xʼaltʼan Elías tsiʼ wen taja i chʼijiyemlel jaʼel, jin chaʼan tsiʼ cʼajtibe Dios chaʼan miʼ yʌcʼ ti chʌmel. Tsiʼ yʌlʌ: «Jasʌlix, c Yum, tsʌnsañonix, come mach ñumen weñonic bajcheʼ c ñojteʼel» (1 R. 19:4). Pero Jehová tsiʼ wen qʼueleyob ti ñuc i mach yomic chaʼan miʼ chʌmelob. Maʼañic tsiʼ yʌʼleyob chaʼan bajcheʼ tsiʼ yubiyob i bʌ, yicʼot cʼuxbiya tsiʼ ñuqʼuesʌbeyob i pusicʼal i tsiʼ coltayob chaʼan miʼ chaʼ qʼuelob ti ñuc i cuxtʌlel yicʼot chaʼan miʼ chʌn melbeñob i yeʼtel (troñel).

5. ¿Chucoch yom mi lac wen pʌsben laj cʼuxbiya jiñi laj quermañojob ili ora?

⁵ Anquese yonlel la quermañojob maʼañic miʼ cʌyob i bʌ, pero tsʌtsʌch muʼ bʌ i ñusañob i yom mi lac ñuqʼuesʌbeñob i pusicʼal yicʼot mi lac pʌsbeñob cʼuxbiya. An muʼ bʌ i contrajintelob yicʼot miʼ wajlentelob. An yambʌlob muʼ bʌ i lecoj subentelob tiʼ tojlel i piʼʌlob ti eʼtel. O tajol an lujbobix bʌ come yom miʼ wen chaʼleñob eʼtel o tiʼ caj wen tsʌts i yeʼtelob. Cheʼ jaʼel, an añoʼ bʌ tsʌts bʌ i wocol tiʼ familia, tajol chaʼan mach xñoptʼañic i piʼʌl i miʼ wen jajtsʼelob tiʼ tʼan. Jin tac tiʼ caj iliyi cheʼ cabʌl hermanojob lujbix miʼ yubiñob i bʌ. ¿Chuqui miʼ mejlel i coltañob chaʼan miʼ chʌn chaʼleñob wersa?

6. ¿Bajcheʼ miʼ pʼʌtʼesan Jehová jiñi i wiñicob?

⁶ ¿Bajcheʼ miʼ pʼʌtʼesan Dios jiñi i wiñicob? Junchajp miʼ wen qʼuel bajcheʼ yom miʼ chʌn pʌsbeñob i cʼuxbiya. Jiñi tejclum Israel tsaʼʌch i wen pʼʌtʼesayob ili tsaʼ bʌ i yʌlʌ Jehová: «Come cʼuxbibiletla c chaʼan, [...] utsʼatax mij qʼuelet. Ñuquet tic wut». Tiʼ sube jaʼel: «Mach a chaʼlen bʌqʼuen, come añon quicʼotet» (Is. 43:4, 5). Jatet miʼ mejlel a ñop chaʼan Dios miʼ cʼuxbiñet yicʼot miʼ wen qʼuelet ti ñuc. * Jehová miʼ yʌqʼuen i tʼan i tejclum: «Jini Pʼʌtʌl Bʌ mi caj i coltañet. Tijicña mi caj i yubin yicʼotet» (Sof. 3:16, 17).

7. ¿Bajcheʼ lajal jiñi i cʼuxbiya Jehová tiʼ tojlel i wiñicob yicʼot i cʼuxbiya juntiquil ñaʼʌl tiʼ tojlel i yalobil? (Qʼuele jiñi dibujo am bʌ tiʼ tejchibal).

⁷ Mach yʌlʌyic baqui bʌ wocol miʼ ñusan  jiñi i wiñicob Dios, miʼ yʌcʼ i tʼan chaʼan mi caj i coltañob yicʼot miʼ ñuqʼuesʌbeñob i pusicʼal. Yaʼ ti libro i chaʼan Isaías, tsiʼ yʌlʌ: «Mi caj i weʼsañetla. Mi caj i meqʼuetla, mi caj i xixbañetla tiʼ pix. Cheʼ bajcheʼ miʼ xixban i yalobil xʼixic, cheʼʌch mi caj c tijicñesañetla jaʼel» (Is. 66:12, 13). Iliyi miʼ yʌqʼueñonla lac ñaʼtan juntiquil ñaʼʌl muʼ bʌ i mecʼ i yalobil i miʼ chaʼlen alas yicʼot. Cheʼ bajcheʼ iliyi, Jehová miʼ pʌs bajcheʼ cʼamel miʼ cʼuxbin i wiñicob. Mach yomic mi lac wis ñaʼtan chaʼan mach ñuquic laj cʼʌjñibal tiʼ tojlel (Jer. 31:3).

8, 9. ¿Bajcheʼ miʼ yʌqʼueñonla lac pʼʌtʌlel jiñi i cʼuxbiya Cristo?

⁸ Jiñi isujm bʌ xñoptʼañonla an yambʌ chucoch miʼ mejlel lac ñop chaʼan Jehová miʼ cʼuxbiñonla. Juan 3:16 miʼ yʌl: «Tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel». Cheʼ bʌ Jesús tsiʼ yʌcʼʌ i cuxtʌlel ti laj caj, tsiʼ pʌsʌ chaʼan miʼ wen cʼuxbiñonla. Jiñi i Tʼan Dios miʼ yʌl chaʼan jiñi wocol o chuqui tac mi laj cʼojoʼtan maʼañic mi caj i tʌtsʼ «i cʼuxbiya Cristo ti lac tojlel» (Ro. 8:35, 38, 39). ¿Mach ba muqʼuic i ñijcañonla jiñi i cʼuxbiya chaʼan mi lac chʌn chaʼlen wersa?

⁹ Cheʼ woli (yʌquel) lac ñusan wocol tac muʼ bʌ i lujbʼesan lac bʌcʼtal, ti bajcheʼ mi la cubin lac bʌ o ti chaʼan bʌ Jehová, miʼ mejlel i yʌqʼueñonla lac pʼʌtʌlel chaʼan mi laj cuch cheʼ mi laj cʼajtesan i cʼuxbiya Cristo ti lac tojlel (pejcan 2 Corintios 5:14, 15). Ili cʼuxbiya miʼ ñijcañonla chaʼan mi lac chʌn qʼuel ti ñuc laj cuxtʌlel yicʼot mi lac bej melben i yeʼtel Jehová. Miʼ mejlel i coltañonla chaʼan maʼañic mi laj cʼunʼesan la bʌ anquese mi lac ñusan wocol bajcheʼ icʼ jaʼal, contrajintel, chʼijiyemlel o cʌlʌx pensar.

10, 11. ¿Majqui an tiʼ wenta chaʼan miʼ ñuqʼuesʌben i pusicʼal jiñi chʼijiyemoʼ bʌ? Tsictesan.

¹⁰ Yambʌ chuqui miʼ cʼʌn Jehová chaʼan miʼ pʼʌtʼesañonla yicʼot cʼuxbiya jiñʌch jiñi congregación. Cheʼ mi laj cʼuxbin la quermañojob mi lac pʌs chaʼan mi laj cʼuxbin Dios. Mi lac chaʼlen wersa laj coltañob i qʼuel chaʼan Jehová miʼ chʼʌmob ti ñuc yicʼot miʼ cʼuxbiñob (1 Jn. 4:19-21). Jiñi apóstol Pablo tiʼ sube jiñi xñoptʼañob:  «Ñuqʼuesʌben laʼ bʌ laʼ pusicʼal. Pʼʌtʼesʌben laʼ bʌ laʼ pusicʼal ti utsʼat cheʼ bajcheʼ woli laʼ mel» (1 Ts. 5:11). Tiʼ sujm, mach cojach jiñi ancianojob, ti lac pejtelel mi lac mejlel lac ñuqʼuesʌbeñob i pusicʼal yicʼot lac pʼʌtʼesan laj quermañojob cheʼ bajcheʼ miʼ mel Jehová yicʼot Jesús (pejcan Romanos 15:1, 2).

¹¹ An hermanojob añoʼ bʌ i wocol tiʼ jol i yom miʼ coltʌntelob tiʼ tojlel doctorob yicʼot miʼ chʼʌmob tsʼac (Lc. 5:31). Jiñi ancianojob yicʼot yambʌ hermanojob yujilob chaʼan mach doctorobic. Pero yujilob jaʼel chaʼan i cʼʌjñibalʌch mi lac jacʼ ili mandar: «Ñuqʼuesʌbeñob i pusicʼal jini cʼuñoʼ bʌ [o chʼijiyemoʼ bʌ]. Coltanla jini mach bʌ añobic i pʼʌtʌlel. Cuchbenla i sajtemal pejtelel winicob» (1 Ts. 5:14). Ti lac pejtelel yom mi lac pʌs cʼuxbiya, mi la cubin bajcheʼ miʼ yubin i bʌ jiñi chʼijiyemoʼ bʌ, la cujil pijt tiʼ tojlelob yicʼot wen mi lac pejcañob chaʼan mi lac ñuqʼuesʌbeñob i pusicʼal. Laʼ laj cʼajtiben lac bʌ: «¿Muʼ ba i pʼʌtʼesan yambʌlob chuqui mi cʌl? ¿Chuqui yom mic mel chaʼan mic ñumen coltan quermañojob?».

12. Alʌ jumpʼejl ejemplo bajcheʼ tsiʼ colta juntiquil hermana i cʼuxbiya jiñi congregación.

¹² ¿Bajcheʼ miʼ mejlel i coltan laj cʼuxbiya juntiquil wen chʼijiyem bʌ? Juntiquil hermana chʼoyol bʌ ti Europa miʼ yʌl: «An i tajol mic ñaʼtan c tsʌnsan c bʌ. Pero cabʌl baqui mic taj wem bʌ j coltʌntel. Jiñi j congregación an i colta j cuxtʌlel. Miʼ wen pʼʌtʼesañon jiñi hermanojob yicʼot i cʼuxbiyajob. Mach cabʌlic yujilob chaʼan mic wen taj c chʼijiyemlel, pero tiʼ pejtelelob yomob i chʌn coltañon. An jumpʼejl xñujpuñel lajaloʼ bʌ bajcheʼ c tac yicʼot ñaʼ, miʼ wen cʌntañoñob. Chajpʌbilob chaʼan miʼ coltañon ti qʼuiñil o ti acʼʌlel». Isujmʌch, mach ti lac pejtelelic junlajal mi lac mejlel ti coltaya. Pero cheʼ mi lac pʌs chaʼan la comʌch laj coltañob jiñi chʼijiyemoʼ bʌ, miʼ mejlel i ñuqʼuesʌbeñob i pusicʼal. *

13. ¿Chuqui ñuc i cʼʌjñibal chaʼan miʼ mejlel lac pʼʌtʼesan laj quermañojob?

¹³ Yom mi lac ñʌchʼtañob (Stg. 1:19). Mi lac pʌs laj cʼuxbiya cheʼ mi lac ñʌchʼtan jiñi yambʌlob yicʼot cheʼ mi la cubin bajcheʼ yubil miʼ yubiñob i bʌ. ¿Bajcheʼ miʼ mejlel lac pʼʌtʼesan juntiquil chʼijiyem bʌ? Laʼ lac ñaʼtan bajcheʼ yubil mi la cubin cheʼ joñoñicla woli lac ñusan jiñi i wocol i laʼ lac melben wen jach bʌ cʼajtiya tac chaʼan mi lac chʼʌmben isujm bajcheʼ miʼ yubiñob i bʌ. Yom tsiquil ti lac wut chaʼan mucʼʌch laj qʼuel ti ñuc yicʼot mi laj cʼuxbin. Mi jiñi hermano yom i tsictesʌbeñonla ti wen chuqui woliʼ ñusan, yom mi lac wen ñʌchʼtan i maʼañic mi lac waʼ otsan lac tʼan. Mi utsʼat mi lac ñʌchʼtan tajol mi caj lac ñumen chʼʌmben isujm bajcheʼ miʼ yubin i bʌ. Cheʼ jaʼel, mi caj i ñumen chʼʌmonla ti ñuc yicʼot mi caj i ñʌchʼtan ti wen chuqui mi lac suben. Cheʼ mi lac pʌs chaʼan mi lac chʼʌm ti ñuc yambʌlob, mi caj i tajob i tijicñʌyel i pusicʼal ti lac tojlel.

14. ¿Chucoch mach yomic mi lac jatsʼob ti lac tʼan jiñi yambʌlob?

¹⁴ Mach lac jatsʼob ti lac tʼan. Mi juntiquil chʼijiyem bʌ miʼ qʼuel chaʼan mucʼ jach lac jatsʼ ti tʼan, ñumen chʼijiyem mi caj i yubin. Anquese la com lac lon coltan, ñumen wocol mi caj i mejlel lac pʼʌtʼesan. Jiñi Biblia miʼ yʌl: «An winicob xʼixicob mach bʌ utsic i tʼan. Miʼ jecʼonla bajcheʼ espada. I tʼan jini weñoʼ bʌ i pusicʼal i wentajʌch tsʼac muʼ bʌ  i lajmesañonla» (Pr. 12:18). Tiʼ sujm, maʼañic majqui la com lac low ti lac tʼan, pero mi maʼañic mi lac wen ñaʼtan chuqui mi caj la cʌl, mucʼʌch caj lac mel. Chaʼan mi lac pʼʌtʼesan yambʌlob yicʼot cʼuxbiya, laʼ lac chaʼlen wersa laj cʌcʼ lac bʌ ti chuqui woliʼ ñusañob (Mt. 7:12).

15. ¿Chuqui tac ti eʼtijib miʼ mejlel laj cʼʌn chaʼan mi lac ñuqʼuesʌben i pusicʼal yambʌlob?

¹⁵ Laʼ laj cʼʌn i Tʼan Dios (pejcan Romanos 15:4, 5). Jiñi Biblia jiñʌch baqui mi lac taj i ñuqʼuesʌntel lac pusicʼal i maʼañic i jilibal, come chʼoyol ti jiñi Dios «muʼ bʌ i yʌqʼueñonla i xucʼtilel yicʼot i ñuqʼuesʌntel lac pusicʼal». Chaʼan wen miʼ mejlel laj cʼʌn, an lac chaʼan jiñi BIBLIOTECA TI INTERNET yicʼot laj Coltʌntel chaʼan estudio, miʼ mejlel i coltañonla lac taj texto tac yicʼot jun tac chaʼan mi lac ñuqʼuesʌben i pusicʼal laj quermañojob.

16. ¿Baqui bʌ lac melbal yom an lac chaʼan chaʼan miʼ mejlel lac tijicñesan juntiquil chʼijiyem bʌ?

¹⁶ Yom utsonla. Jehová «jiñʌch lac Tat jaʼel muʼ bʌ i pʼuntañonla, muʼ bʌ i ñuqʼuesan lac pusicʼal tiʼ pejtelel wocol», miʼ wen pʼuntan jiñi muʼ bʌ i melbeñob i yeʼtel (pejcan 2 Corintios 1:3-6; Lc. 1:78; Ro. 15:13). Pablo jiñʌch juntiquil wem bʌ ejemplo chaʼan bajcheʼ yom mi lac pʌs ili melbalʌl tac come tsiʼ laji Jehová. Tiʼ tsʼijbu: «Uts tsaʼ ajniyon lojon ti laʼ tojlel cheʼ bajcheʼ xʼixic muʼ bʌ i cʼuxbin i yalobilob. Cheʼʌch tsac wen cʼuxbiyet lojon cheʼ bʌ tsac subeyet lojon i wen tʼan Dios. Mach cojic jach jini, pero chajpʌbilon lojon chaʼan mic tsʌnsʌntel lojon chaʼañetla, come wen cʼuxbibiletla c chaʼan lojon» (1 Ts. 2:7, 8). Mi utsonla bajcheʼ Dios, mi lac mejlel ti sujtel bajcheʼ i jacʼbal i yoración juntiquil wen chʼijiyem bʌ.

17. ¿Bajcheʼ yilal yom mi laj qʼuel jiñi laj quermañojob chaʼan mi lac bej pʼʌtʼesañob yicʼot cʼuxbiya?

¹⁷ Mach lac pijtan chaʼan toj pejtelel chuqui miʼ mel jiñi hermanojob. Pʼisbil jach bajcheʼ yom mi laj qʼuelob. Mach weñic cheʼ mi lac pijtan chaʼan maʼañic mi caj i wis tajob i sajtemal (Ec. 7:21, 22). Yom mi laj cʼajtesan chaʼan pʼisbil jach chuqui miʼ cʼajtin Jehová ti lac tojlel. Cheʼ mi lac lajiben i melbal, chajpʌbilonla chaʼan miʼ mejlel laj cuchben i sajtemal yambʌlob (Ef. 4:2, 32). Mach la cʌqʼueñob i ñaʼtan chaʼan maʼañic bajcheʼ cʼamel woliʼ melbeñob i yeʼtel Jehová mi yomic mi lac lajiñob yicʼot yambʌlob, come mi caj i yubiñob i chʼijiyemlel. Yom bʌ mi lac mel jiñʌch mi lac ñʌmtesan lac bʌ la cʌqʼueñob i yubin i tijicñʌyel chaʼan muʼ bʌ i melob. Ili mi caj i pʼʌtʼesañob yicʼot i coltañob chaʼan tijicña miʼ melbeñob i yeʼtel Jehová (Gá. 6:4).

18. ¿Chucoch la com lac chʌn pʼʌtʼesañob yicʼot cʼuxbiya jiñi la quermañojob?

¹⁸ Jehová miʼ wen qʼuel ti ñuc pejtelel i wiñicob. Jesús cheʼʌch miʼ qʼuelob jaʼel, come tsiʼ yʌcʼʌ i cuxtʌlel (Gá. 2:20). Joñonla ti jumpʼejl lac pusicʼal mi laj cʼuxbin laj quermañojob jaʼel i mi laj cʌntañob yicʼot cʼuxbiya. Chaʼan miʼ chʌn tajob i ñuqʼuesʌntel i pusicʼal ti lac tojlel, «laʼ lac ñaʼtan chuqui tac yom chaʼan ñʌchʼʌl mi la cajñel chaʼan mi lac pʼʌtʼesʌben lac bʌ lac pusicʼal» (Ro. 14:19). Wen la comix ajñel yaʼ ti Paraíso, baqui maʼañic chuqui mi caj i yʌqʼueñonla lac chʼijiyemlel. Mi caj i jilel jiñi cʼamʌjel tac, jiñi guerra, chʌmel tiʼ caj mulil, contrajintel, wocol ti lac familia yicʼot pejtelel muʼ bʌ i yʌcʼ chʼijiyemlel. Cheʼ miʼ yujtel jiñi mil jab, pejtelel quixtañujob mach chʌn xmulilobix miʼ cajel. Jiñi xucʼul bʌ miʼ ñumelob yaʼ ti cojix bʌ wocol, Jehová mi caj i qʼuelob tiʼ yalobil wʌʼ bʌ añob ti Lum (Ro. 8:21). Laʼ lac chʌn pʌs jiñi cʼuxbiya muʼ bʌ i coltañonla o i pʼʌtʼesañonla i laʼ laj coltan yambʌlob chaʼan miʼ yochelob yaʼ ti tsijiʼ bʌ pañimil (mulawil) albil bʌ i chaʼan Dios.