1, 2. a) ¿Bajcheʼ yilal miʼ mel Jehová tiʼ tojlel jiñi quixtañujob? b) ¿Chuqui mi caj laj qʼuel ti ili temaj?

CABɅL wiñicob xʼixicob (quixtañujob) ñucoʼ bʌ i yeʼtel «cʼax ñuc miʼ pʌsob i bʌ» tiʼ tojlel yambʌlob o miʼ ticʼlañob (Mt. 20:25; Ec. 8:9). ¡Pero Jehová mach lajalic! Anquese maʼañic i pʼisol i pʼʌtʌlel, miʼ wen chʼʌm ti ñuc jiñi quixtañujob. Miʼ pʌsbeñonla i yutslel, miʼ chʼʌm ti ñuc bajcheʼ yubil mi la cubin lac bʌ yicʼot miʼ wen qʼuel chuqui i cʼʌjñibal lac chaʼan. Cheʼ jaʼel, mach ñumeñic ti pʼis chuqui miʼ cʼajtibeñonla come «yujil melbilonla ti tsʼubejn» (Sal. 103:13, 14).

² Yaʼ ti Biblia, cabʌl baqui miʼ yʌl chaʼan Jehová tiʼ chʼʌmʌ ti ñuc jiñi i wiñicob. Mi caj laj qʼuel uxpʼejl. Ñaxan bʌ, jin cheʼ Jehová tsiʼ colta jiñi chʼiton Samuel chaʼan miʼ suben jiñi ñuc bʌ xmotomaj Elí chaʼan mi caj i yʌqʼuentel i toj i mul. I chaʼpʼejlel, jin cheʼ wen jach tiʼ ñʌchʼtʌbe i tʼan Moisés cheʼ bʌ mach weñic tsiʼ jacʼʌ cheʼ woli (choncol) i waʼchocontel tiʼ wenta jiñi tejclum Israel. I yuxpʼejlel, jiñʌch cheʼ Jehová tsiʼ colta loqʼuel jiñi israelob yaʼ ti Egipto. Cheʼ bʌ mi laj qʼuel majlel ili ejemplo tac, laʼ lac ñaʼtan chuqui miʼ cʌntesañonla tiʼ tojlel Jehová i chuqui ñuc tac bʌ i cʼʌjñibal miʼ mejlel laj cʌn.

3. a) ¿Chuqui tsaʼ ujti tiʼ tojlel Samuel ti jumpʼejl bʌ acʼʌlel? (Qʼuele jiñi dibujo am bʌ tiʼ tejchibal). b) ¿Chuqui bʌ cʼajtiya miʼ mejlel lac melben lac bʌ?

³ Samuel wen chʼitonto cheʼ bʌ ti caji i melben i yeʼtel (troñel) Jehová yaʼ ti tabernáculo (1 S. 3:1). Ti jumpʼejl bʌ acʼʌlel, cheʼ bʌ Samuel tsaʼix majli ti wʌyel, an chuqui tsaʼ ujti (Pejcan 1 Samuel 3:2-10). * Tsaʼ caji i yubin chaʼan an majqui woli (yʌquel) i pʌy i tsiʼ ñaʼta chaʼan jiñʌch jiñi ñuc bʌ xmotomaj Elí. Come miʼ wen jacʼ tʼan, orajach tsaʼ majli i tiʼ sube: «Um baʼ añon. ¿Chuqui a wom? ¿Chucoch tsaʼ pʌyʌyon?». Elí tiʼ sube chaʼan mach jiñic tsaʼ bʌ i pʌyʌ. Chaʼyajl tsaʼ ujti bajcheʼ iliyi. Pero cheʼ i yuxyajlelix, Elí tsaʼ cʼoti i cʌn chaʼan jiñʌch Dios woli bʌ i pʌy Samuel. Jin chaʼan tiʼ sube bajcheʼ yom miʼ jacʼben, i Samuel cheʼʌch tsiʼ mele (chaʼle). ¿Chucoch Jehová maʼañic tiʼ wʌn alʌ chaʼan jiñʌch woli bʌ i pejcan Samuel? Jiñi Biblia maʼañic miʼ yʌl. Pero jiñi tsaʼ bʌ ujti miʼ pʌs chaʼan junchajp tajol jiñʌch chaʼan tsiʼ chʼʌmʌ ti ñuc bajcheʼ miʼ yubin i bʌ Samuel. ¿Chucoch mi laj cʌl iliyi?

4, 5. a) ¿Chuqui tsiʼ mele Samuel cheʼ bʌ Jehová tiʼ sube chaʼan an chuqui yom miʼ suben jiñi Elí? b) ¿Chuqui miʼ cʌntesañonla tiʼ tojlel Jehová ili relato?

⁴ (Pejcan 1 Samuel 3:11-18). Jiñi i Mandar Jehová tsiʼ yʌlʌ chaʼan jiñi alpʼeñelob yom miʼ qʼuelob ti ñuc jiñi añobix bʌ i jabilel, ñumento jiñi «am bʌ i yeʼtel» o yumʌl (Éx. 22:28; Lv. 19:32). Jin chaʼan, tajol Samuel wocolʌch tsiʼ yubi chaʼan miʼ majlel i suben Elí cheʼ ti sʌcʼan chaʼan mi caj i yʌqʼuentel i toj i mul yicʼot i familia. Jiñi relato miʼ yʌl chaʼan Samuel «mach yomic i suben Elí» tsaʼ bʌ subenti ti Jehová. Pero Dios tsiquil tsiʼ pʌsbe Elí chaʼan jiñʌch tsaʼ bʌ i pejca jiñi Samuel. Jin chaʼan, Elí tsiʼ colta i tiʼ sube chaʼan maʼañic chuqui yom miʼ mucben. Samuel tsaʼʌch i jacʼʌ i «tsiʼ laj tsictesʌbe chuqui tsiʼ sube lac Yum».

⁵ Elí mach toj sajtelic i pusicʼal cheʼ bʌ tsiʼ yubi jiñi tʼan, come «juntiquil i winic Dios» añix i tsictesʌbe jaʼel lʌcʼʌ lajal bʌ bajcheʼ jiñi (1 S. 2:27-36). Ili relato miʼ cʌntesañonla chaʼan Jehová cabʌl i ñaʼtʌbal i miʼ chʼʌmonla ti ñuc.

6. ¿Chuqui mi laj cʌn chaʼan bajcheʼ tsiʼ colta Dios jiñi Samuel?

⁶ Ti jiñi relato chaʼan Samuel miʼ mejlel laj cʌn jaʼel chaʼan Jehová mucʼʌch i ñaʼtan jiñi wocol tac muʼ bʌ i ñusan jiñi xcolelob i yujil bajcheʼ miʼ yubiñob i bʌ. xColel, ¿muqʼuet ba ti bʌqʼuen yicʼot wocol maʼ wubin chaʼan maʼ suben wen tʼan jiñi ñucobix bʌ o chaʼan yʌñʌlet bajcheʼ a piʼʌlob ti escuela? Ñaʼtan chaʼan Jehová yomʌch i coltañet, jin chaʼan, jamben a pusicʼal i suben pejtelel bajcheʼ maʼ wubin a bʌ (Sal. 62:8). Ñaʼtan tiʼ tojlel jiñi xcolelob muʼ bʌ i yʌjlel yaʼ ti Biblia bajcheʼ Samuel, i chaʼlen tʼan yicʼot yambʌ hermanojob tsaʼ bʌ i ñusayob jiñi wocol tac bajcheʼ jatet, tajol añobix bʌ i jabilel o lajal bʌ a jabilel a wicʼot. Tajol mi caj i subeñetob bajcheʼ tsiʼ coltayob Jehová cheʼ mach pijtʌbilic i chaʼañob.

7, 8. ¿Bajcheʼ tsiʼ pʌsʌ Jehová chaʼan mucʼʌch i chʼʌm ti ñuc bajcheʼ miʼ yubin i bʌ Moisés?

⁷ Cheʼ bʌ añix 80 i jabilel Moisés, Jehová tsiʼ yʌqʼue ñuc bʌ i yeʼtel: Miʼ coltan loqʼuel ti Egipto jiñi israelob (Éx. 3:10). Moisés tsaʼ ajñi 40 jab yaʼ ti Madián bajcheʼ xcʌnta tiñʌmeʼ, i toj sajtel i pusicʼal cheʼ tsaʼ aqʼuenti jiñi eʼtel. Jin chaʼan tiʼ sube Jehová: «¿Chuqui to j cʼʌjñibal? Maʼanic cabʌl c ñaʼtʌbal. ¿Muʼ ba mejlel c majlel joñon baʼan Faraón chaʼan mic pʌy loqʼuel ti  Egipto jini israelob? Mach mejlicon». Pero Dios tiʼ sube: «Mi caj cajñel awicʼot» (Éx. 3:11, 12). Cheʼ jaʼel, tiʼ sube chaʼan jiñi ancianojob mucʼʌch caj i ñʌchʼtʌbeñob i tʼan. Pero Moisés tsiʼ yʌlʌ: «Maʼanic mi caj i ñopoñob» (Éx. 3:18; 4:1). Moisés mach tojic bajcheʼ tsiʼ jacʼbe i tʼan Jehová. Pero Jehová mach cojach tsiʼ pʌsʌ chaʼan yujil pijt, tsaʼʌch i yʌqʼue i pʼʌtʌlel chaʼan miʼ mel milagro tac. Moisés jiñʌch ñaxam bʌ muʼ bʌ i yʌjlel yaʼ ti Biblia chaʼan tsaʼ aqʼuenti ili pʼʌtʌlel (Éx. 4:2-9, 21).

⁸ Anquese cheʼ bajcheʼ jiñi, Moisés mach tojic tsiʼ bej jacʼʌ i tsiʼ yʌlʌ chaʼan wocol miʼ yubin chaʼan miʼ chaʼlen tʼan. Jin chaʼan Jehová tsiʼ yʌlʌ: «Mi caj cajñel yicʼot a wej. Mi caj cʌntesañet chuqui mi caj a sub». ¿Weñix ba tsiʼ jacʼʌ cheʼ jiñi? Maʼañic yilal, come tsaʼto i cʼajtibe Dios chaʼan miʼ choc majlel yambʌ quixtañu. Jin chaʼan, Jehová tsaʼ michʼa. Pero tsaʼʌch i chʼʌmbe isujm, i tiʼ chʼʌmʌ ti ñuc bajcheʼ miʼ yubin i bʌ Moisés, jin chaʼan tiʼ sube chaʼan Aarón mi caj i chaʼlen tʼan tiʼ tojlel (Éx. 4:10-16).

9. ¿Bajcheʼ tsiʼ colta Moisés cheʼ Jehová tsiʼ pʌsbe chaʼan yujil pijt yicʼot cheʼ tsiʼ chʼʌmʌ ti ñuc?

⁹ ¿Chuqui miʼ cʌntesañonla tiʼ tojlel Jehová ili relato? Come Dios maʼañic i pʼisol i pʼʌtʌlel, tajol tsaʼ mejli i cʼʌn chaʼan miʼ bʌcʼtesan Moisés yicʼot chaʼan miʼ wersa xiqʼueʼ i jacʼben i tʼan. Pero mach cheʼic tsiʼ mele, tsiʼ pʌsʌ chaʼan yujilʌch pijt yicʼot chaʼan an i yutslel. Yujil chaʼan Moisés añʌch i pecʼlel i yom miʼ coltʌntel chaʼan maʼañic chuqui miʼ cʼojoʼtan. Jin chaʼan tiʼ sube chaʼan mi caj i yajñel yicʼot. ¿Tsaʼ ba i colta Moisés cheʼ Dios tsiʼ mele bajcheʼ jiñi? Tsaʼcu, come tsaʼ sujti ti juntiquil chʼejl bʌ yumʌl i tsiʼ chaʼle wersa chaʼan wen jach chuqui miʼ mel tiʼ tojlel yambʌlob yicʼot miʼ qʼuelob ti ñuc cheʼ bajcheʼ Jehová tsiʼ mele tiʼ tojlel (Nm. 12:3).

10. ¿Bajcheʼ miʼ coltañonla cheʼ mi lac lajiben i melbal Jehová yicʼot cheʼ mi laj qʼuel ti ñuc yambʌlob?

¹⁰ Jiñi relato añʌch chuqui miʼ cʌntesañonla jaʼel. Mi ñujpuñemonla, tatʌlonla, ñaʼʌlonla o ancianojonla ti congregación, añʌch la queʼtel tiʼ tojlel yambʌlob. Mi cheʼʌchi, ñuc i cʼʌjñibal cheʼ mi lac chʼʌm ti  ñuc yambʌlob, cheʼ an la cutslel yicʼot la cujil pijt, cheʼʌch bajcheʼ miʼ mel Jehová (Col. 3:19-21; 1 P. 5:1-3). Mi mucʼʌch lac chaʼlen wersa lac lajin Jehová yicʼot Jesús, mach wocolic mi caj i pejcañoñobla jiñi yambʌlob i mi caj lac ñuqʼuesʌbeñob i pusicʼal (Mt. 11:28, 29). Cheʼ jaʼel, mi caj i tsajcañob lac melbal (He. 13:7).

11, 12. Cheʼ bʌ Jehová tsiʼ locʼsa jiñi israelob ti Egipto, ¿chuqui tsiʼ mele chaʼan maʼañic miʼ chaʼleñob bʌqʼuen?

¹¹ Cheʼ bʌ jiñi israelob tsaʼ loqʼuiyob ti Egipto, ti jabil 1513 cheʼ bʌ maxto tilemic Cristo, tajol ñumeñob ti 3 millón. Mach junlajalobic i jabilel, an alpʼeñelob yicʼot ñoxobix bʌ, i tajol an cʼamoʼ bʌ yicʼot mach bʌ weñobic tiʼ bʌcʼtal. Chaʼan wen miʼ tojʼesan majlel yonlel quixtañujob, Moisés yom miʼ cʌmbeñob i wocol yicʼot miʼ chʼʌmbeñob isujm. Jehová cheʼʌch tsiʼ mele tiʼ tojlel. Jin chaʼan, jiñi israelob mach i bajñelobic tsiʼ yubiyob i bʌ cheʼ bʌ tsaʼ loqʼuiyob yaʼ baqui chumulob (Sal. 78:52, 53).

¹² ¿Chuqui tsiʼ mele Jehová chaʼan maʼañic miʼ chaʼleñob bʌqʼuen? Lajal bajcheʼ «chajpʌbilob chaʼan guerra» tsiʼ pʌyʌyob loqʼuel yaʼ ti Egipto (Éx. 13:18). Cheʼ wen chajpʌbil bajcheʼ tsiʼ pʌyʌyob loqʼuel, tsiʼ pʌsbeyob chaʼan wen yujil chuqui woliʼ mel. Cheʼ jaʼel, Jehová tsiʼ pʌsʌ chaʼan yaʼan yicʼotob cheʼ tsiʼ cʼʌñʌ «tocal» ti qʼuiñil yicʼot «cʼajc» cheʼ ti acʼʌlel (Sal. 78:14). Lajal bajcheʼ woliʼ subeñob: «Mach laʼ chaʼlen bʌqʼuen, mi caj tojʼesañetla majlel yicʼot mi caj cʌntañetla». Pero mach wen jalix mi caj i pʌsob chaʼan mucʼʌch i ñopob.

13, 14. a) ¿Chuqui tsiʼ mele Jehová tiʼ tojlel israelob yaʼ ti Chʌchʌc bʌ mar? b) ¿Bajcheʼ tsiʼ pʌsʌ i pʼʌtʌlel Jehová tiʼ contra egiptojob?

¹³ (Pejcan Éxodo 14:19-22). Laʼcu lac ñaʼtan chaʼan yaʼañonla la quicʼot jiñi israelob, joyolonla tiʼ tojlel i soldadojob faraón yicʼot ti Chʌchʌc bʌ mar. Pero cheʼ jiñi, Dios miʼ coltañonla. Jiñi tocal miʼ yʌcʼ i bʌ tiʼ tojel jiñi egiptojob i miʼ mʌctʌbeñob i bijlel. Icʼchʼipan miʼ cʌytʌlob, pero tiʼ pʼʌtʌlel Jehová wen sʌc pojan yaʼ baqui añonla. Cheʼ jiñi, mi laj qʼuel chaʼan Moisés miʼ chʼuy letsel i cʼʌb tiʼ tojel jiñi mar, i miʼ tilel pʼʌtʌl bʌ icʼ muʼ bʌ i tʼox ti chaʼwejl. I yaʼi, temel la quicʼot lac familia yicʼot pejtelel la cʌlacʼ yicʼot yambʌ israelob mi lac tech lac xʌn yaʼ ti Mar, i wen chajpʌbil bajcheʼ mi lac mel. Ti orajach mi lac taj laj qʼuel chaʼan maʼañic ocʼol, mach bojyic jiñi bij yicʼot wen tʌquin, i mach wocolic mi lac mejlel ti xʌmbal. Jinto jaʼel jiñi cʼunteʼ jach bʌ miʼ chaʼleñob xʌmbal mach wocolic miʼ cʼotelob yaʼ ti yambʌ junwejl.

¹⁴ (Pejcan Éxodo 14:23, 26-30). Pero jiñi faraón, chan bʌ miʼ mel i bʌ i mach bʌ yujil jacʼol tʼan, miʼ yochel jaʼel chaʼan miʼ yajñesañonla. Cheʼ jiñi, Moisés miʼ chaʼ chʼuy letsel i cʼʌb tiʼ tojel jiñi Mar. I jiñi jaʼ miʼ chaʼ yajlel jubel. Faraón yicʼot i soldadojob maʼañix miʼ mejlel i coltañob i bʌ (Éx. 15:8-10).

15. Cheʼ maʼ wen ñaʼtan ili relato, ¿chuqui maʼ cʌn tiʼ tojlel Jehová?

¹⁵ Ili relato miʼ cʌntesañonla chaʼan Jehová wen chajpʌbil chuqui miʼ mel, i jiñi miʼ coltañonla chaʼan maʼañic chuqui mi lac bʌcʼñan (1 Co. 14:33). Miʼ cʌntesañonla jaʼel chaʼan juntiquilʌch wen uts bʌ xcʌnta tiñʌmeʼ i utsʼat miʼ cʌntañonla. Miʼ coltañonla tiʼ cʼʌb laj contrajob. Cheʼ la cujil iliyi, miʼ yʌqʼueñonla lac ñʌchʼtʌlel come lʌcʼʌlix añonla tiʼ jilibal ili pañimil (mulawil) (Pr. 1:33).

16. Cheʼ mi lac wen tsajin bajcheʼ tsiʼ colta Jehová jiñi israelob, ¿bajcheʼ miʼ coltañonla?

¹⁶ Jehová miʼ cʌntan i wiñicob jaʼel ili ora bajcheʼ junmujchʼ añob, miʼ coltañob chaʼan  chʌn lʌcʼʌl miʼ yajñelob tiʼ tojlel yicʼot miʼ cʌntañob tiʼ tojlelob i contra. I cheʼʌch mi caj i bej mel ti jiñi ñuc bʌ wocol, wen lʌcʼʌlix bʌ an (Ap. 7:9, 10). Jin chaʼan, anquese xcolelontola o añix lac jabilel, mi cʼocʼonla o an lac cʼamʌjel o an mach bʌ weñic ti lac bʌcʼtal, maʼañic chuqui mi caj lac bʌcʼñan ti jiñi ñuc bʌ wocol. * Ti lac pejtelel mi caj la cʼajtesan tsaʼ bʌ i yʌlʌ Jesucristo: «Letsan laʼ wut, letsan laʼ jol, come lʌcʼʌlix laʼ coltʌntel» (Lc. 21:28). Cheʼ bʌ miʼ tech i contrajiñonla jiñi Gog, junmojt tejclum tac ñumen pʼʌtʌl bʌ bajcheʼ faraón, maʼañic mi caj laj cʌy lac ñop tiʼ coltaya Jehová (Ez. 38:2, 14-16). ¿Chucoch maʼañic mi caj lac chaʼlen bʌqʼuen? Come la cujil chaʼan Jehová maʼañic miʼ qʼuextʌyel. Mi caj i chaʼ sujtel ti xcoltaya lac chaʼan yujil bʌ cʼuxbiya yicʼot muʼ bʌ i chʼʌmonla ti ñuc (Is. 26:3, 20).

17. a) ¿Chuqui yom mi lac mel chaʼan mi lac locʼsʌben i wenlel jiñi relato tac am bʌ ti Biblia chaʼan bajcheʼ yilal miʼ cʌntan i tejclum Jehová, i baqui tac bʌ jiñi i wenlel? b) ¿Chuqui mi caj la qʼuel yaʼ ti yambʌ temaj?

¹⁷ Ti ili temaj, tsaʼ laj qʼuele uxpʼejl ejemplo muʼ bʌ i pʌs bajcheʼ cʼamel miʼ cʼuxbin yicʼot miʼ chʼʌm ti ñuc Jehová i tejclum, cheʼ miʼ cʌntan, miʼ pʌsben jiñi bij yicʼot miʼ coltan. Laʼ lac wen ñaʼtan pejtelel iliyi. Cheʼ bʌ mi lac mel, laʼ lac wen qʼuel chuqui tac miʼ cʌntesañonla chaʼan bajcheʼ yilal Jehová. Cheʼ bajcheʼ ili mi caj i ñumen cʌytʌl ti lac jol yicʼot ti lac pusicʼal jiñi utsʼatax bʌ i melbal tac, i mi caj i ñumen pʼʌtʼan lac ñopoñel yicʼot laj cʼuxbiya tiʼ tojlel. Yaʼ ti yambʌ temaj mi caj laj qʼuel bajcheʼ miʼ mejlel lac lajin Dios yicʼot chaʼan mi lac chʼʌm ti ñuc yambʌlob ti lac familia, ti congregación yicʼot ti subtʼan.