1. ¿Chucoch wen tijicñayob jiñi i testigojob Jehová? (Qʼuele jiñi foto).

TIʼ sujm, jiñi i testigojob Jehová wen tijicñayob. Wen tsiquil chaʼan tseʼtseʼñayob yicʼot miʼ ñuqʼuesʌbeñob i bʌ i pusicʼal cheʼ miʼ tempañob i bʌ chaʼan miʼ chʼujutesañob Dios o cheʼ woliyob (choncolob) ti jumucʼ ñusaqʼuin. ¿Chucoch wen tijicñayon? Come i cʌñʌyob, miʼ melbeñob i yeʼtel (troñel) yicʼot miʼ lajiñob Jehová, jiñi «tijicña bʌ Dios» (1 Ti. 1:11, TNM; Sal. 16:11). Jiñi tijicñʌyel tilem ti Jehová, i yom chaʼan tijicñayonla jaʼel yicʼot miʼ subeñonla chucoch (Dt. 12:7; Ec. 3:12, 13).

2, 3. a) ¿Chuqui yom i yʌl cheʼ tijicñayonla? b) ¿Chuqui tac miʼ mejlel i chilbeñonla lac tijicñʌyel?

² Pero ¿chuqui mi mejlel laj cʌl ti lac tojlel? ¿Tijicñayon ba la? ¿Chuqui miʼ mejlel lac mel (chaʼlen) chaʼan tijicñayonla? Cheʼ tijicñayonla yom i yʌl chaʼan wen mi laj cubin lac bʌ, maʼañic mi laj cʼojoʼtan chuqui maʼañic lac chaʼan o cheʼ wen tseʼtseʼñayonla. Jiñi Biblia miʼ pʌs chaʼan yom mi lac sujtel tiʼ yamigo Dios chaʼan mi lac taj jiñi isujm bʌ tijicñʌyel. Pero wocolʌch chaʼan mi lac taj ti ili pañimil. ¿Chucoch?

³ Cabʌl chuqui miʼ mejlel i chilbeñonla lac tijicñʌyel, cheʼ  mi lac sʌt la queʼtel, jiñi divorcio, o cheʼ juntiquil muʼ bʌ lac wen cʼuxbin miʼ chaʼlentel ti expulsar o miʼ chʌmel (sajtel). Miʼ mejlel i mʌctan lac tijicñʌyel jaʼel jiñi wocol tac ti lac familia, wajlentel tiʼ tojlel lac piʼʌlob ti eʼtel o tiʼ escuela, contrajintel tiʼ tojlel lac ñopbal o cheʼ mi la cotsʌntel ti cárcel. I cheʼʌch miʼ mejlel ti ujtel jaʼel cheʼ miʼ jilel majlel jiñi laj cʼocʼlel o cheʼ an tsʌts bʌ lac cʼamʌjel o cʌlʌx pensal. Pero Jesús, jiñi «tijicña bʌ Yumʌl, jini cojach bʌ am bʌ i pʼʌtʌlel», yom i coltan yicʼot i tijicñesʌben i pusicʼal jiñi quixtañujob (1 Ti. 6:15; Mt. 11:28-30). Yaʼ ti Cʌntesa yaʼ ti bujtʌl tiʼ tsictesa chuqui tac miʼ mejlel i yʌqʼueñonla lac tijicñʌyel anquese mi lac ñusan tsʌts tac bʌ wocol tiʼ pañimil Satanás.

4, 5. ¿Chuqui yom mi lac mel chaʼan mi lac taj lac tijicñʌyel i maʼañic miʼ jilel?

⁴ Jiñi tsaʼ bʌ i ñaxan mele Jesús wen ñuc i cʼʌjñibal. Tsiʼ yʌlʌ: «Tijicña jiñi muʼ bʌ i ñaʼtañob chaʼan ñucʌch i cʼʌjñibal i chaʼan bʌ Dios. Come i chaʼañob i yumʌntel jiñi am bʌ ti panchan» (Mt. 5:3, TNM). ¿Bajcheʼ mi lac pʌs chaʼan i cʼʌjñibalʌch mi laj cʌn Dios yicʼot miʼ tojʼesañonla? Jiñʌch cheʼ mi lac pejcan jiñi Biblia, mi lac jacʼ i mandar tac i mi la cʌcʼ ti ñaxan i melol i yeʼtel. Mi mucʼʌch lac mel, mi caj lac ñumen taj lac tijicñʌyel i mi caj i pʼʌtʼan lac ñopoñel ti jiñi wʌn albil bʌ i chaʼan Jehová. Cheʼ jaʼel, jiñi lac pijtaya muʼ bʌ lac taj yaʼ tiʼ Tʼan Dios miʼ yʌqʼueñonla lac pʼʌtʌlel chaʼan mi laj cuch jiñi wocol tac (Tit. 2:13).

⁵ Chaʼan mi lac taj lac tijicñʌyel yicʼot chaʼan maʼañic miʼ jilel yom mi lac ñumen lʌcʼtesan lac bʌ ti Jehová. Jiñi apóstol Pablo tiʼ tsʼijbu: «Tijicñesan laʼ pusicʼal ti lac Yum tiʼ pejtelel ora. Mic chaʼ subeñetla: Tijicñesan laʼ pusicʼal» (Fil. 4:4). Chaʼan ñumen lʌcʼʌlonla ti Jehová, yom mi lac taj lac ñaʼtʌbal. Jiñi i Tʼan Dios miʼ yʌl: «Tijicña muʼ bʌ i taj wen bʌ i ñaʼtʌbal chaʼan miʼ chʼʌmben isujm». I tsiʼ chaʼ alʌ: «Come lajalʌch i ñaʼtʌbal bajcheʼ teʼ muʼ bʌ i yʌqʼuen i cuxtilel majqui jach miʼ taj. Tijicñayob jini muʼ bʌ i chʌn lotob tiʼ pusicʼal» (Pr. 3:13, 18).

6. ¿Chuqui yom mi lac mel chaʼan bej an lac tijicñʌyel?

⁶ Chaʼan maʼañic mi lac sʌt lac tijicñʌyel, ñuc i cʼʌjñibal chaʼan mi lac bej jacʼ muʼ bʌ i subeñonla jiñi Biblia. Jesús tiʼ subu chaʼan añʌch i cʼʌjñibal cheʼ bʌ tsiʼ yʌlʌ: «Mi laʼ wujilʌch chuqui tsac subeyetla, tijicñayetla cheʼ mi laʼ mel» (Jn. 13:17; pejcan Santiago 1:25). Iliyi ñucʌch i cʼʌjñibal chaʼan pʼʌtʌlonla tiʼ chaʼan bʌ Dios yicʼot chaʼan tijicñayonla tiʼ pejtelel ora. Pero ¿bajcheʼ miʼ mejlel lac taj lac tijicñʌyel cheʼ cabʌl chuqui miʼ yʌcʼ lac chʼijiyemlel? Laʼ lac tsajin chuqui tsiʼ bej alʌ Jesús ti jiñi Cʌntesa yaʼ ti Bujtʌl.

7. ¿Chucoch tijicñayob jiñi woliyoʼ bʌ ti uqʼuel?

⁷ «Tijicñayob jini woliyoʼ bʌ ti uqʼuel, come muqʼuix i ñuqʼuesʌbentelob i pusicʼal» (Mt. 5:4). Tajol an muʼ bʌ i cʼajtibeñob i bʌ: «¿Bajcheʼ miʼ mejlelob i taj i tijicñʌyel jiñi muʼ bʌ i chaʼleñob uqʼuel?» Tiʼ sujm, Jesús maʼañic woliʼ taj ti tʼan jiñi wiñicob xʼixicob (quixtañujob) muʼ bʌ i tajob i chʼijiyemlel tiʼ caj chuqui tac jach miʼ yujtel. An quixtañujob jontoloʼ bʌ i melbal muʼ bʌ i tajob i chʼijiyemlel tiʼ caj jiñi wocol tac muʼ bʌ i yujtel ti ili «cojix bʌ qʼuin» wen bʌbʌqʼuen bʌ (2 Ti. 3:1). Pero jin jach miʼ bajñel ñaʼtañob i bʌ i maʼañic miʼ ñaʼtañob Jehová, jin chaʼan maʼañic miʼ mejlel i lʌcʼtesañob i bʌ tiʼ tojlel, mi muqʼuic i mejlelob i taj i tijicñʌyel.  Jesús jin woli (yʌquel) i ñaʼtan jiñi muʼ bʌ i cʌñob chaʼan yomob i coltʌntel tiʼ chaʼan bʌ Dios, jin chaʼan cʼux miʼ yubiñob cheʼ miʼ qʼuel chaʼan jiñi yambʌ quixtañujob ñajt añob ti Dios. Yujilob chaʼan xmulilobʌch i chaʼan miʼ yujtel cabʌl jontolil ila ti pañimil (mulawil) tiʼ caj jiñi mulil. Jehová miʼ chʼʌm ti ñuc jiñi quixtañujob yomoʼ bʌ i cʌn, miʼ ñuqʼuesʌbeñob i pusicʼal yicʼot jiñi Biblia, miʼ coltañob i taj i tijicñʌyel yicʼot miʼ yʌqʼueñob i pijtaya chaʼan miʼ chumtʌlob tiʼ pejtelel ora (pejcan Ezequiel 5:11; 9:4).

8. Tsictesan bajcheʼ miʼ coltañonla lac taj lac tijicñʌyel cheʼ mi lac pʌs la cutslel.

⁸ «Tijicñayob jiñi utsoʼ bʌ i pusicʼal, come mi caj i yʌqʼuentelob pañimil» (Mt. 5:5, Jiñi tsijiʼ bʌ wen tʼañ chaʼañ estudio). ¿Chucoch miʼ coltañonla lac taj lac tijicñʌyel cheʼ mi lac pʌs la cutslel? An quixtañujob tsʌtsoʼ bʌ i pusicʼal ti ñaxan, muʼ bʌ i melob jontolil yicʼot orajach bʌ miʼ michʼañob. Pero tsaʼ cʼoti i cʌñob jiñi i sujmlel am bʌ ti Biblia, tsiʼ qʼuextayob i melbal i tsiʼ xojoyob ‹jini tsijiʼ bʌ i pusicʼal› (Col. 3:9-12). Jin chaʼan, ili ora tijicñayob yicʼot utsʼat añob yicʼot yambʌlob. Cheʼ jaʼel, yaʼ tiʼ Tʼan Dios miʼ yʌl chaʼan jiñi quixtañujob «mi caj i yʌqʼuentelob pañimil» (Sal. 37:8-10, 29).

9. a) ¿Chuqui yom i yʌl cheʼ «jiñi utsoʼ bʌ i pusicʼal» mi caj i yʌqʼuentelob Pañimil? b) ¿Chucoch miʼ mejlelob i taj i tijicñʌyel «jini añoʼ bʌ i wiʼñal i pusicʼal yicʼot i tiquin tiʼ chaʼan chuqui toj»?

⁹ ¿Chuqui yom i yʌl cheʼ jiñi utsoʼ bʌ i pusicʼal «mi caj i yʌqʼuentelob pañimil»? Jiñi xcʌntʼañob i chaʼan Jesús bombiloʼ bʌ o yajcʌbiloʼ bʌ ti espíritu mi caj i yʌqʼuentelob ili Pañimil cheʼ ba ora mi caj i waʼchocontelob bajcheʼ motomajob yicʼot reyob (Ap. 20:6). I jiñi maʼañobic bʌ i pijtaya chaʼan miʼ majlelob ti panchan, ñʌchʼʌl yicʼot tijicña mi caj i chumtʌlob tiʼ pejtelel ora ila ti Pañimil. Cheʼ jaʼel, Jesús tsiʼ yʌlʌ tiʼ tojlel ili chaʼmojt quixtañujob: «Tijicñayob jini añoʼ bʌ i wiʼñal i pusicʼal yicʼot i tiquin tiʼ chaʼan chuqui toj» (Mt. 5:6). Tsʼʌcʌl mi caj i tajob pejtelel chuqui yomob yaʼ ti tsijiʼ bʌ pañimil (2 P. 3:13). Cheʼ bʌ Dios miʼ jisan jiñi jontolil, jiñi tojoʼ bʌ tijicña mi caj i yajñelob i maʼañix mi caj i tajob i chʼijiyemlel tiʼ caj jontolil yicʼot ti mach bʌ tojic (Sal. 37:17).

10. ¿Chuqui yom i yʌl cheʼ la cujil pʼuntaya?

¹⁰ «Tijicñayob muʼ bʌ i chaʼleñob pʼuntaya, come mi caj i pʼuntʌntelob» (Mt. 5:7). Cheʼ la cujil pʼuntaya, yom i yʌl chaʼan cʼux mi la cubin bajcheʼ woliʼ ñusan juntiquil lac piʼʌl. Pero mach cojach yom i yʌl jiñi, jiñi Biblia miʼ pʌs chaʼan cheʼ an lac pʼuntaya yom i yʌl jaʼel chaʼan an chuqui mi lac mel chaʼan mi laj coltan.

11. ¿Chuqui miʼ mejlel laj cʌn tiʼ tojlel jiñi samaritano?

¹¹ (Pejcan Lucas 10:30-37). Jiñi relato chaʼan jiñi samaritano wen miʼ pʌs chuqui yom i yʌl cheʼ an lac pʼuntaya. Cheʼ bʌ jiñi samaritano tsiʼ qʼuele jiñi wiñic tsaʼ bʌ wen jajtsʼi, tsiʼ pʌsbe i yutslel yicʼot tsiʼ colta. Cheʼ bʌ Jesús tsaʼ ujti i yʌl jiñi relato, tsiʼ yʌlʌ chaʼan cheʼʌch yom mi lac mel jaʼel. Jin chaʼan yom mi laj cʼajtiben lac bʌ: «¿Cheʼ ba mic mel bajcheʼ jiñi samaritano? Cheʼ bʌ an majqui woliʼ ñusan wocol, ¿am ba chuqui miʼ mejlel c ñumen mel chaʼan mij coltan? Jumpʼejl ejemplo, ¿muʼ ba j coltan jiñi hermanojob añobix i jabilel, mebaʼ xʼixicob yicʼot jiñi xcolelob mach bʌ xñoptʼañobic i tat i ñaʼ? ¿Muʼ ba i bajñel tilel ti c pusicʼal chaʼan mic ñuqʼuesʌben i pusicʼal jiñi wen chʼijiyemoʼ bʌ?» (1 Ts. 5:14; Stg. 1:27).

12. ¿Chucoch miʼ yʌqʼueñonla lac tijicñʌyel cheʼ la cujil pʼuntaya?

¹² ¿Chucoch miʼ yʌqʼueñonla lac tijicñʌyel cheʼ la cujil pʼuntaya? Cheʼ an chuqui mi lac  mel tiʼ tojlel yambʌlob, mi laj qʼuel chaʼan «ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hch. 20:35; pejcan Hebreos 13:16). Jiñi rey David tsiʼ yʌlʌ tiʼ tojlel jiñi yujil bʌ pʼuntaya: «Lac Yum mi caj i cʌntan, mi caj i coltan» (Sal. 41:1, 2). Mi mucʼʌch lac pʼuntan yambʌlob, Jehová mi caj i pʌsbeñonla i pʼuntaya jaʼel, i mi caj lac taj lac tijicñʌyel tiʼ pejtelel ora (Stg. 2:13).

13, 14. ¿Chucoch tijicñayob jiñi sʌcoʼ bʌ i pusicʼal?

¹³ Jesús tsiʼ yʌlʌ: «Tijicñayob jini sʌc bʌ i pusicʼal, come mi caj i qʼuelob Dios» (Mt. 5:8). Chaʼan sʌc miʼ yajñel lac pusicʼal, yom sʌc jaʼel jiñi lac ñaʼtʌbal yicʼot chuqui mi lac mulan lac mel. Ñuc i cʼʌjñibal cheʼ mi lac mel iliyi chaʼan Jehová miʼ chʼʌm jiñi lac chʼujutesaya (pejcan 2 Corintios 4:2; 1 Ti. 1:5).

¹⁴ Jiñi quixtañujob sʌcoʼ bʌ i pusicʼal tijicñayob come utsʼat miʼ qʼuejlelob ti Jehová, tsaʼ bʌ i yʌlʌ: «Tijicñayob muʼ bʌ i wutsʼob i pislel» (Ap. 22:14). ¿Chuqui yom i yʌl cheʼ miʼ wutsʼob i pislel? Tiʼ tojlel jiñi bombiloʼ bʌ yom i yʌl chaʼan Jehová sʌc miʼ qʼuelob yicʼot mi caj i yʌqʼueñob i cuxtʌlel mach bʌ mejlic ti jilel, i tijicña mi caj i yajñelob tiʼ pejtelel ora yaʼ ti panchan. Pero tiʼ tojlel jiñi yonlel wiñicob xʼixicob, woli bʌ i pijtañob chumtʌl ila ti Lum, yom i yʌl chaʼan mi caj i mejlelob ti sujtel tiʼ yamigo Dios come mach xmulilobix miʼ qʼuelob. Jiñi Biblia miʼ yʌl chaʼan «tsaʼix i wutsʼuyob i pislel. Tsiʼ sʌqʼuesayob tiʼ chʼichʼel jini Tiñʌmeʼ» (Ap. 7:9, 13, 14).

15, 16. ¿Bajcheʼ miʼ qʼuelob Dios jiñi sʌcoʼ bʌ i pusicʼal?

¹⁵ Jiñi Biblia miʼ yʌl chaʼan maʼañic majqui miʼ mejlel i qʼuel Dios i cheʼ jiñi bej cuxul (Éx. 33:20). Jin chaʼan, ¿chucoch tsiʼ yʌlʌ Jesús chaʼan jiñi sʌcoʼ bʌ i pusicʼal «mi caj i qʼuelob Dios»? Jiñi tʼan am bʌ ti griego muʼ bʌ i yʌjlel bajcheʼ «qʼuel» yom i yʌl chaʼan «mi lac ñaʼtan, mi lac chʼʌmben isujm yicʼot mi laj cʌn». Jin chaʼan, cheʼ mi laj qʼuel Dios yom i yʌl chaʼan mi lac chʼʌmben isujm bajcheʼ yilal yicʼot mi laj qʼuel ti ñuc i melbal tac (Ef. 1:18). Jesús utsʼat tiʼ tsajcʌbe i melbal Dios. Jin chaʼan, tsiʼ yʌlʌ: «Jini tsaʼ bʌ i qʼueleyon, tsaʼix i qʼuele c Tat» (Jn. 14:7-9).

¹⁶ Yambʌ bajcheʼ miʼ mejlel laj qʼuel Dios jiñʌch cheʼ mi lac wen tsajin chuqui miʼ mel chaʼan miʼ coltañonla (Job 42:5). Miʼ mejlel laj qʼuel jaʼel cheʼ mi lac wen ñaʼtan jiñi bendición tac muʼ bʌ caj i yʌqʼuen jiñi muʼ bʌ i chaʼleñob wersa chaʼan chʌn sʌc yicʼot xucʼul miʼ yajñelob. Pero jiñi bombiloʼ bʌ miʼ mejlelob i yoque qʼuel Jehová cheʼ bʌ miʼ majlelob ti panchan (1 Jn. 3:2).

17. ¿Chucoch tijicñayob jiñi muʼ bʌ sʌclañob i ñʌchʼtʌlel?

¹⁷ Jesús tsiʼ yʌlʌ jaʼel: «Tijicñayob jini muʼ bʌ i ñʌchʼchocoñob xleto» (Mt. 5:9). Cabʌl chucoch yom miʼ yubiñob i tijicñʌyel jiñi quixtañujob muʼ bʌ i sʌclañob ñʌchʼtʌlel, jiñi xcʌntʼan Santiago tsiʼ yʌlʌ: «Jini chʌncol bʌ i yajñel ti ñʌchʼʌl chʌncox i cotyan i yajñel ti ñʌchʼtyʌlel yañoʼ bʌ. Mi quej i yajñelob ti wen» (Stg. 3:18, Jini wen bʌ tʼan). Mi tsaʼ lac taja wocol la quicʼot juntiquil la quermaño o ti lac familia, miʼ mejlel laj cʼajtiben ti wocol tʼan i coltaya Jehová chaʼan mi lac chaʼ utsʼan la quicʼot. Mi caj i yʌqʼueñonla chʼujul bʌ i yespíritu i mi caj i coltañonla lac pʌs wen tac bʌ lac melbal yicʼot chaʼan mi lac ñumen taj lac tijicñʌyel. Jesús tsiʼ yʌlʌ chaʼan ñucʌch i cʼʌjñibal cheʼ ñʌchʼʌl mi la cajñel cheʼ bʌ tsiʼ yʌlʌ: «Cheʼ wolaʼ wʌqʼuen i majtan Dios tiʼ yajñib, mi tsaʼ cʼajtiyi a chaʼan an chuqui tsaʼ chaʼle tiʼ contra a piʼʌl, cʌyʌ i majtan Dios tiʼ tʼejl i yajñib. Cucu, ñaxan mele a bʌ a wicʼot a piʼʌl. Ti wiʼil laʼ aqʼuen i majtan Dios tiʼ yajñib» (Mt. 5:23, 24).

18, 19. ¿Chucoch miʼ tajob i tijicñʌyel jiñi xñoptʼañob cheʼ añob i contrajintel?

¹⁸ «Tijicñayetla cheʼ miʼ tsʼaʼleñetla winicob cheʼ miʼ ticʼlañetla, cheʼ miʼ pʌqʼuetla ti jujunchajp jontolil chaʼan tsaʼ laʼ ñopoyon». ¿Chucoch cheʼ tsiʼ yʌlʌ Jesús bajcheʼ iliyi? Tsiʼ jacʼʌ: «Laʼ ñucʼac laʼ pusicʼal. Melela ti tijicña laʼ pusicʼal, come ñuc laʼ chobejtʌbal ti panchan, come cheʼ jaʼel tsiʼ ticʼlayob xʼaltʼañob wajali» (Mt. 5:11, 12). Cheʼ bʌ jiñi apóstolob ti jajtsʼiyob yicʼot ti subentiyob chaʼan miʼ cʌyob subtʼan, tijicñayob jax i pusicʼal «cheʼ bʌ tsaʼix loqʼuiyob tiʼ tojlel añoʼ bʌ i yeʼtel». Tiʼ sujm, maʼañic tsiʼ mulayob chaʼan tsaʼ jajtsʼiyob, pero tijicñayob «come Dios tsiʼ yʌqʼueyob i xucʼtilel i pusicʼal chaʼan miʼ ñusañob i tsʼaʼlentel tiʼ cʼabaʼ Jesús» (Hch. 5:41).

¹⁹ Ili ora, jiñi i wiñiconbʌla Jehová tijicña mi laj cuch jaʼel cheʼ mi lac ñusan tsʌts tac bʌ wocol o cheʼ mi laj contrajintel chaʼan mi lac melben i yeʼtel Dios (pejcan Santiago 1:2-4). Tiʼ sujm maʼañic mi lac mulan cheʼ mi laj quilan wocol. Pero mi xucʼuloñʌchla cheʼ mi lac ñusan wocol tac, Jehová mi cajel i coltañonla chaʼan mi laj cuch ti lac chʼejlel. Laʼ laj qʼuel jumpʼejl ejemplo. Cheʼ ti agosto i chaʼan 1944, jiñi yumʌlob tiʼ chocoyob majlel jiñi hermano Henryk Dornik yicʼot i yʌscun ti jumpʼejl campo baqui miʼ mʌjquel quixtañujob. Jiñi i contrajob tsiʼ yʌlʌyob: «Mach mejlic laj qʼuextʌbeñob i pensar. Miʼ mulañob i ñusan wocol yilal». Pero jiñi hermano Dornik miʼ tsictesan: «Maʼañic tsaʼ c mulaj jiñi wocol tac tsaʼ bʌ c ñusa, pero tsiʼ yʌqʼueyon c tijicñʌyel cheʼ cujil chaʼan pejtelel jiñi ticʼlʌntel tsaʼ bʌ j cuchu tic chʼejlel chaʼañʌch xucʼul com ajñel tiʼ tojlel Jehová». I tsiʼ chaʼ alʌ: «Jiñi oración jiñʌch tsaʼ bʌ i coltayon, come ñumen lʌcʼʌl tsaʼ cubi c bʌ ti Jehová. ¡Jiñʌch i coltaya com bʌ!».

20. ¿Chucoch miʼ yʌqʼueñonla lac tijicñʌyel cheʼ mi lac melben i yeʼtel jiñi «tijicña bʌ Dios»?

²⁰ Cheʼ bʌ utsʼat miʼ qʼuelonla jiñi «tijicña bʌ Dios», mi lac taj lac tijicñʌyel anquese mi laj contrajintel tiʼ caj lac ñopbal, an lac tsʼaʼlentel ti lac familia, tiʼ caj cʼamonla o ñoxoñixla (1 Ti. 1:11, TNM). Mi laj cubin lac tijicñʌyel jaʼel come mi lac ñop chaʼan jiñi Dios «mach bʌ yujilic lot» mucʼʌch caj i tsʼʌctesan pejtelel chuqui albil i chaʼan (Tit. 1:2). Cheʼ baʼ ora miʼ tsʼʌctesan i tʼan, ñumen ñuc miʼ cajel jiñi bendición tac cheʼ bajcheʼ jiñi wocol tac am bʌ ili ora. Mach mejlic lac ñaʼtan pejtelel chuqui mi caj i yʌqʼueñonla Jehová yaʼ ti paraíso. Tiʼ sujm, mi caj lac wen taj ñʌchʼtʌlel yicʼot tijicña mi caj lac chumtʌl (Sal. 37:11).