1, 2. ¿Chucoch yom mi laj cʌn tiʼ tojlel Sansón?

 ¿CHUQUI jiñi ñaxam bʌ miʼ tilel ti a jol cheʼ bʌ maʼ wubin i cʼabaʼ Sansón? ¿Chaʼan ba juntiquil pʼʌtʌl bʌ wiñic? I sujmʌch, pero cheʼ jaʼel ili wiñic tsaʼʌch i taja i sajtemal i tsiʼ ñusa wocol. Anquese cheʼ bajcheʼ jiñi, Jehová tsiʼ chʼʌmʌ ti ñuc jiñi i ñopoñel i tsiʼ yʌcʼʌ chaʼan miʼ tsʼijbuntel yaʼ ti Biblia chaʼan an chuqui mi laj cʌn.

² Jehová tsiʼ cʼʌñʌ Sansón chaʼan miʼ coltan i tejclum, i cheʼ bʌ añix ora tsaʼ chʌmi, tsiʼ cʼʌñʌ jiñi apóstol Pablo chaʼan miʼ tsʼijbun tiʼ tojlel bajcheʼ juntiquil tsaʼ bʌ i pʌsʌ i ñopoñel (Heb. 11:​32-34). Sansón tiʼ sʌcla i coltaya Jehová tiʼ pejtelel ora, jinto cheʼ wen wocol woli (choncol) i ñusan. Ti ili estudio mi caj laj qʼuel bajcheʼ jiñi tsaʼ bʌ i ñusa miʼ wen coltañonla i chuqui tac miʼ mejlel laj cʌn tiʼ tojlel.

3. ¿Chuqui ti eʼtel tsaʼ aqʼuenti Sansón?

³ Cheʼ bʌ Sansón tsiʼ yila pañimil (tsaʼ chʼocʼa) jiñi israelitajob wen wocol jax woli (yʌquel) i ñusañob come añob tiʼ cʼʌb jiñi filisteojob i miʼ wen ticʼlʌntelob (Jue. 13:1). Jin chaʼan Jehová tsiʼ yajca Sansón chaʼan miʼ «coltan jini israelob tiʼ tojlel filisteojob» (Jue. 13:5). ¡Wen wocolʌch jiñi eʼtel  (troñel) tsaʼ bʌ aqʼuenti! Pero Sansón tsaʼʌch i sʌcla i coltʌntel ti Jehová.

4. ¿Bajcheʼ tsaʼ coltʌnti Sansón? (Jueces 15:​14-16).

⁴ Laʼ laj qʼuel junsujtel cheʼ bʌ Sansón tsiʼ pʌsʌ chaʼan miʼ ñop Jehová. Ti jumpʼejl bʌ qʼuin, junmojt soldadojob filisteojoʼ bʌ tsaʼ majliyob ti Lehí, tajol am bʌ ti Judá, chaʼan miʼ chucob Sansón. Jiñi wiñicob ti Judá tsiʼ bʌcʼñayob i tsiʼ yʌcʼʌyob Sansón tiʼ cʼʌb i contrajob. Tsiʼ cʌchʌyob ti chaʼtʼujm chij wen tsijibto bʌ i tsiʼ pʌyʌyob majlel baʼan jiñi filisteojob (Jue. 15:​9-13). Pero «tsaʼ cʼoti i yEspíritu lac Yum tiʼ tojlel Sansón», i tsaʼ tsʼojqui jiñi lazo tac. Cheʼ jiñi tsiʼ taja i xʌcʼtiʼ juncojt burro i jin tsiʼ cʼʌñʌ chaʼan miʼ tsʌnsan mil filisteojob (pejcan Jueces 15:​14-16).

5. ¿Bajcheʼ tsiʼ pʌsʌ Sansón chaʼan miʼ ñop Jehová?

⁵ ¿Chucoch tsiʼ cʼʌñʌ i xʌcʼtiʼ juncojt burro? Come yujil chaʼan jiñi ñumen ñuc bʌ i cʼʌjñibal jiñʌch cheʼ miʼ ñop Jehová, mach jiñic chuqui mi caj i cʼʌn chaʼan miʼ coltan i bʌ. Jin chaʼan ili xucʼul bʌ wiñic tsiʼ cʼʌñʌ jiñi tsaʼ bʌ i taja, tsiʼ ñopo ti Jehová i weñʌch tsaʼ loqʼui.

6. Alʌ junchajp muʼ bʌ laj cʌn tiʼ tojlel Sansón.

⁶ Jehová mi caj i coltañonla jaʼel chaʼan miʼ mejlel lac tsʼʌctesan baqui jach bʌ eʼtel mi la cʌqʼuentel tiʼ yorganización anquese mi lac ñaʼtan chaʼan maʼañic mi lac mejlel. Tajol mach pijtʌbil lac chaʼan bajcheʼ miʼ coltañonla i toj sajtel lac pusicʼal cheʼ bʌ mi laj qʼuel chaʼan luʼ wen miʼ loqʼuel. Mi mucʼʌch a ñop Jehová, mi caj i coltañet chaʼan maʼ melben i yeʼtel i mi caj i yʌqʼueñet a pʼʌtʌlel, cheʼ bajcheʼ tsiʼ mele tiʼ tojlel Sansón (Pr. 16:3).

7. ¿Chuqui ti ejemplo miʼ pʌs chaʼan weñʌch cheʼ mi lac sʌclan laj coltʌntel ti Jehová?

⁷ Cabʌl hermanojob muʼ bʌ i chaʼleñob coltaya ti construcción an i pʌsʌyob chaʼan mucʼʌch i ñopob Jehová. Ti wajali, jiñi organización miʼ chʼʌm ti wenta chaʼan miʼ chaʼlen ti diseñar yicʼot miʼ mel jiñi yotlel tac tempa bʌ yicʼot yan tac bʌ. Pero, come jiñi i tejclum Jehová woliʼ ñumen colel majlel, an chuqui tac yom miʼ qʼuextʌyel. Jiñi hermanojob añoʼ bʌ tiʼ wenta jiñi construcción  tiʼ sʌclayob i coltaya Jehová i tsiʼ qʼueleyob yan tac bʌ muʼ bʌ i mejlel i melob. Jumpʼejl ejemplo, tsaʼ caji i mʌñob otot tac i miʼ tsijibtesañob. Robert, añix bʌ ora i cajel ti eʼtel ti construcción, miʼ yʌl: «Ti ñaxan wocolʌch tsaʼ lon cubi chaʼan mi lon c mel cheʼ bajcheʼ miʼ yʌjlel come ñoj qʼuexelʌch cheʼ bajcheʼ woliʼ mejlel tilel. Pero jiñi hermanojob tsaʼʌch i jacʼʌyob i tsiquil tsaʼ cʌli chaʼan Jehová wolʌch i chaʼlen ti bendecir ili eʼtel». Ili miʼ pʌs chaʼan Jehová wolʌch i tojʼesan majlel i tejclum chaʼan miʼ melben i yeʼtel. Jin chaʼan, wen cheʼ muqʼuic laj cʼajtiben lac bʌ: «¿Muʼ ba c sʌclan i coltaya Jehová i mic chaʼlen wersa c jacʼ muʼ bʌ c subentel?».

8. ¿Chuqui tsiʼ mele Sansón cheʼ bʌ tsiʼ wen aqʼue tiquin tiʼ?

⁸ Tajol cʼajal a chaʼan yan tac bʌ tsaʼ bʌ i mele Sansón. Jumpʼejl ejemplo, tiʼ tsʌnsa juncojt bajlum i cheʼ jiñi tiʼ tsʌnsa 30 wiñicob yaʼ ti Asquelón (Jue. 14:​5, 6, 19). Cojach yicʼot i coltaya Jehová tsaʼ mejli i mel pejtelel iliyi. ¿Bajcheʼ la cujil chaʼan tsaʼʌch i sʌcla i coltʌntel ti Jehová? Cheʼ bʌ tsaʼ ujti i tsʌnsan mil filisteojob i tsiʼ wen aqʼue tiquin tiʼ, maʼañic tsiʼ bajñel sʌcla baqui miʼ mejlel i tajeʼ jaʼ, tsiʼ cʼajtibe i coltaya Jehová (Jue. 15:18).

9. ¿Chuqui tsiʼ mele Jehová chaʼan miʼ coltan Sansón? (Jueces 15:19).

⁹ ¿Chuqui tsiʼ mele Jehová? Tsiʼ mele milagro chaʼan miʼ loqʼuel jaʼ yaʼ ti lum. Sansón tsiʼ japʌ i «tsiʼ chaʼ taja i pʼʌtʌlel» (pejcan Jueces 15:19). Jiñi jaʼ maʼañic tsaʼ tiqui, yaʼto bej an cheʼ bʌ Jehová tsiʼ yʌcʼʌ ti tsʼijbuntel jiñi libro chaʼan Jueces tiʼ yorajlel Samuel. Tajol cheʼ bʌ jiñi israelitajob miʼ qʼuelob jiñi jaʼ miʼ cʼajtesañob chaʼan Jehová mi caj i coltañob cheʼ bʌ miʼ ñusañob wocol.

10. ¿Chuqui yom mi lac mel chaʼan mi laj coltʌntel ti Jehová? (Qʼuele jaʼel jiñi foto tac).

¹⁰ Cheʼ bajcheʼ Sansón, ti lac pejtelel yom mi lac sʌclan i coltaya Jehová. Mach yʌlʌyic chuqui la cujil melol o añix bʌ lac mele tiʼ yeʼtel Jehová, yom an lac pecʼlel i mi lac ñaʼtan chaʼan cojach wen mi caj i loqʼuel tiʼ coltaya Jehová. Sansón tsiʼ chaʼ taja i pʼʌtʌlel cheʼ bʌ tsiʼ japʌ jiñi jaʼ tsaʼ bʌ i yʌqʼue Jehová. Joñonla jaʼel pʼʌtʌl mi caj la cajñel mi mucʼʌch lac chʼʌm pejtelel laj coltʌntel muʼ bʌ i yʌqʼueñonla Jehová (Mat. 11:28).

11. ¿Chuqui yom mi lac mel chaʼan mi lac chʼʌm laj coltʌntel ti Jehová, i chuqui mi laj cʌn tiʼ tojlel jumpʼejl xñujpuñel?

¹¹ Laʼ laj qʼuel tiʼ tojlel Alexéi, juntiquil hermano ti Rusia woli bʌ i ñusan tsʌts bʌ contrajintel. ¿Chuqui jiñi am bʌ i colta chaʼan miʼ cuch? Alexéi yicʼot i yijñam an i chaʼleyob wersa chaʼan chʌn pʼʌtʌl miʼ yajñelob. Miʼ yʌl: «Mic chaʼlen wersa chaʼan mic pejcan c Biblia ti jujumpʼejl qʼuin. Cheʼ jaʼel, cheʼ ti sʌcʼan, joñon quicʼot quijñam mi lon c pejcan jiñi texto chaʼan jujumpʼejl qʼuin i mi lon c tem chaʼlen oración». ¿Chuqui mi laj cʌn? Chaʼan yom mi lac sʌclan laj coltʌntel ti Jehová. Jin chaʼan, yom mi lac pʼʌtʼesan lac ñopoñel cheʼ bʌ mi lac pejcan jiñi Biblia, mi lac chaʼlen oración, mi lac majlel ti tempa bʌ yicʼot ti subtʼan. Mi mucʼʌch lac mel pejtelel iliyi, Jehová mi caj i yʌqʼueñonla i bendición i mi caj i coltañonla chaʼan mi lac bej melben i yeʼtel. Jehová tsaʼʌch i yʌqʼue i pʼʌtʌlel Sansón i mi caj i yʌqʼueñonla jaʼel.

12. ¿Chuqui jiñi mach bʌ weñic tsiʼ mele Sansón, i chucoch?

¹² Sansón xmulilʌch jaʼel, jin chaʼan an i tajol  mach weñic chuqui tsiʼ yajca i mel i tsiʼ taja i sajtemal. Junchajp tsaʼ bʌ i mele tsiʼ chʼʌmʌ tilel cabʌl wocol come maʼañic tsiʼ ñaʼta chuqui yom bʌ Jehová. Cheʼ bʌ añix ora cajel i mel i yeʼtel bajcheʼ juez, tsiʼ mulaj juntiquil xʼixic chʼoyol bʌ ti Sorec i cʼabaʼ Dalila (Jue. 16:4). Pero cheʼ bʌ maxto i cʌñʌ Dalila, tsiʼ mulaj i pʌy juntiquil xʼixic filistea bʌ. Jiñi Biblia miʼ yʌl chaʼan «chʼoyolʌch ti lac Yum pejtelel iliyi, come Dios tsiʼ ñaʼta i yʌqʼueñob wocol jini filisteojob». Ti wiʼil, Sansón tsaʼ majli ti Gaza i yaʼ tsaʼ cʌyle tiʼ yotot juntiquil xʼixic muʼ bʌ i chon i bʌ. Ti jimbʌ ora, Jehová tsiʼ yʌqʼue i pʼʌtʌlel Sansón chaʼan miʼ qʼuech loqʼuel jiñi i puertajlel jiñi tejclum i jamʌl miʼ cʌytʌl (Jue. 14:​1-4; 16:​1-3). Pero tiʼ tojlel Dalila qʼuexelʌch. Ili xʼixic tajol juntiquil israelita, i jiñi maʼañic bajcheʼ mi caj i coltan Sansón chaʼan miʼ contrajin jiñi filisteojob.

13. ¿Chuqui tsiʼ mele Dalila chaʼan miʼ lotin Sansón?

¹³ Jiñi filisteojob yomob chaʼan Dalila miʼ lotin Sansón, jin chaʼan tsiʼ yʌqʼueyob cabʌl taqʼuin, i tsaʼʌch i chʼʌmʌ. ¿Chucoch Sansón maʼañic tsiʼ ñaʼta chaʼan Dalila woli jach i lotin? ¿Chaʼan ba miʼ wen cʼuxbin? Mach la cujilic, pero Dalila tsaʼʌch i wersa cʼajtibe baqui miʼ tilel jiñi i pʼʌtʌlel, i ti wiʼil Sansón tsaʼʌch i sube. Jiñi tsaʼ bʌ i mele tsaʼ jach i yʌcʼʌ chaʼan miʼ ñusan wocol come tiʼ sʌtʌ i pʼʌtʌlel i mach utsʼatix tsaʼ qʼuejli ti Jehová (Jue. 16:​16-20).

14. ¿Chuqui ti wocol tsiʼ ñusa Sansón cheʼ jin tsiʼ ñumen ñopbe i tʼan Dalila?

¹⁴ Sansón tsiʼ wen ñusa wocol, come jin tsiʼ ñopbe i tʼan Dalila i maʼañic tiʼ sʌclʌbe i coltaya Jehová. Jiñi filisteojob tsiʼ chucuyob i tsiʼ locʼsʌbeyob i bʌcʼ i wut. Cheʼ jiñi tsiʼ yotsayob ti cárcel yaʼ ti Gaza, jiñi tejclum tsaʼ bʌ i locʼsʌbe i puertajlel ti ñaxan,  i yaʼi tiʼ sujtesayob ti xyaj xʼeʼtel. Cheʼ jiñi, jiñi filisteojob tsiʼ meleyob jumpʼejl qʼuiñijel i tsaʼ caji i yʌqʼueñob i majtan jiñi dios Dagón, come tsiʼ ñaʼtayob chaʼan jiñʌch tsaʼ bʌ i coltayob chaʼan miʼ mejlel i chucob Sansón. Tsiʼ locʼsayob yaʼ ti cárcel i tsiʼ wen wajleyob (Jue. 16:​21-25).

15. ¿Chuqui tsiʼ mele Sansón chaʼan miʼ chaʼ sʌclan i coltʌntel ti Jehová? (Jueces 16:​28-30, qʼuele jiñi dibujo am bʌ tiʼ tejchibal).

¹⁵ Anquese Sansón tsiʼ mele mach bʌ weñic, tsiʼ chʌn chaʼle wersa come yom i tsʼʌctesan jiñi eʼtel tsaʼ bʌ i yʌqʼue Jehová, jiñʌch cheʼ miʼ jisan jiñi filisteojob (pejcan Jueces 16:​28-30). Jin chaʼan tsiʼ cʼajtibe i coltaya Jehová chaʼan miʼ yʌqʼueñob i toj i mul jiñi filisteojob. Jehová tsaʼʌch i ñʌchʼta i tsiʼ chaʼ aqʼue i pʼʌtʌlel. Ti jimbʌ ora, Sansón tsaʼ mejli i tsʌnsan cabʌl filisteojob.

16. ¿Chuqui mi laj cʌn tiʼ tojlel Sansón?

¹⁶ Sansón tsaʼʌch i ñusa wocol chaʼan jiñi tsaʼ bʌ i mele, pero tsiʼ chʌn chaʼle wersa i melben i yeʼtel Jehová. Joñonla jaʼel yom mi lac chʌn chaʼlen wersa anquese mi lac mel mach bʌ weñic i tajol mi lac tojʼesʌntel o mi lac sʌt la queʼtel yaʼ ti congregación. Laʼ laj cʼajtesan chaʼan Jehová miʼ ñusan lac mul (Sal. 103:​8-10). Anquese mi lac taj lac sajtemal, Jehová miʼ mejlel i bej cʼʌñonla, cheʼ bajcheʼ tsiʼ mele tiʼ tojlel Sansón.

17, 18. ¿Bajcheʼ miʼ coltañet jiñi ejemplo chaʼan Michael? (Qʼuele jaʼel jiñi foto tac).

¹⁷ Laʼ laj qʼuel tsaʼ bʌ ujti tiʼ tojlel juntiquil xcolel i cʼabaʼ Michael. An bajcheʼ siervo ministerial yicʼot precursor regular, i woliʼ wen melben i yeʼtel Jehová, pero tsiʼ mele mach bʌ weñic i tiʼ sʌtʌ i yeʼtel yaʼ ti congregación. Miʼ yʌl: «Cujil chaʼan Jehová maʼañic mi caj i cʌyon. Pero tsaʼ j cʼajtibe c bʌ mi muqʼuixto caj c chaʼ mejlel ti sujtel tiʼ yamigo o mic chaʼ melben i yeʼtel ti congregación cheʼ bajcheʼ ti ñaxan».

¹⁸ Michael tsaʼʌch i chaʼle wersa, maʼañic tsiʼ cʌyʌ i bʌ. Miʼ yʌl: «Tsaʼ c ñumen lʌcʼtesa c bʌ ti Jehová cheʼ bʌ tsaʼ c chaʼle oración ti jumpʼejl c pusicʼal, mic wen pejcan jiñi Biblia, i mic wen ñaʼtan chuqui miʼ yʌl». Ti wiʼil, Michael tsiʼ chaʼ taja i yeʼtel yaʼ ti congregación, ili ora añix bajcheʼ anciano yicʼot precursor regular. Miʼ bej al: «Jiñi hermanojob tsaʼʌch i wen coltayoñob, ñumento jiñi ancianojob, jiñi tsiʼ yʌqʼueyon j qʼuel chaʼan Jehová muqʼuixto  i bej cʼuxbiñon. Ili ora tijicña mic mejlel c melben i yeʼtel Jehová. Jiñi tsaʼ bʌ c ñusa tsiʼ pʌsbeyon chaʼan Jehová miʼ mejlel i ñusʌbeñonla lac mul mi mucʼʌch lac chaʼ ñaʼtan lac bʌ». Joñonla jaʼel miʼ mejlel lac ñop chaʼan, anquese mi lac taj lac sajtemal o mi lac mel mach bʌ weñic, Jehová mi caj i bej cʼʌñonla yicʼot mi caj i yʌqʼueñonla i bendición mi mucʼʌch lac tojʼesan lac melbal (chaʼlibal) i mi lac chʌn sʌclan i coltaya (Sal. 86:5; Pr. 28:13).

19. ¿Bajcheʼ an i coltayet jiñi ejemplo chaʼan Sansón?

¹⁹ Ti ili estudio tsaʼ lac tsʼitaʼ qʼuele chuqui tsiʼ ñusa Sansón. Anquese xmulilʌch i tsiʼ mele mach bʌ weñic, tsaʼʌch i chʌn chaʼle wersa i melben i yeʼtel Jehová. I Jehová tsaʼʌch i ñusʌbe i mul i tsiʼ cʼʌñʌ chaʼan miʼ mel ñuc tac bʌ. Jin chaʼan, tsiʼ yʌcʼʌ ti tsʼijbuntel tiʼ tojlel yaʼ ti capítulo 11 chaʼan Hebreos bajcheʼ juntiquil wiñic tsaʼ bʌ i wen pʌsʌ i ñopoñel. Miʼ wen ñuqʼuesan lac pusicʼal cheʼ la cujil chaʼan jiñi lac Tat am bʌ ti panchan miʼ cʼuxbiñonla i yom i yʌqʼueñonla lac pʼʌtʌlel, ñumento cheʼ bʌ woli lac ñusan wocol. Jin chaʼan, cheʼ bajcheʼ Sansón, laʼ laj cʼajtiben Jehová: «C Yum Dios, pʼuntañon ti ili ora. Ti wocol tʼan mij cʼajtibeñet pʼʌtʼesañon» (Jue. 16:28).