1. ¿Chuqui miʼ mejlel i cʼajtibeñoñobla jiñi lac piʼʌlob ti eʼtel o ti escuela?

 ¿BAJCHEʼ yubil maʼ wubin cheʼ bʌ juntiquil a piʼʌl ti eʼtel o ti escuela an chuqui miʼ cʼajtibeñet chaʼan bʌ a ñopbal? Tajol miʼ toj sajtel a pusicʼal. I mach jatet jach, tajol cheʼʌch luʼ ujtemonla bajcheʼ jiñi. Pero cheʼ an majqui miʼ melbeñonla jumpʼejl cʼajtiya miʼ pʌsbeñonla jaʼel chaʼan jiñi lac piʼʌlob añʌch chuqui yomob i ñaʼtan, i joñonla miʼ mejlel lac subeñob jiñi wen tʼan. Pero an lac piʼʌlob toj michʼ bʌ miʼ techob tʼan, tajol come an chuqui an i yubiyob ti lac tojlel i mach wen yujilobic chuqui ñopol bʌ lac chaʼan (Hech. 28:22). Mach yomic miʼ toj sajtel lac pusicʼal, jiñi Biblia miʼ yʌl chaʼan «ti jiñi cojix tac bʌ qʼuin» jiñi lac piʼʌlob «maʼañic mi caj i mulañob i sʌclan ñʌchʼtʌlel» yicʼot «wen jontolob» (2 Tim. 3:​1, 3).

2. ¿Chucoch yomʌch mi lac pʌs la cutslel?

² ¿Chuqui mi caj i coltañonla chaʼan wen jach bajcheʼ mi lac jacʼ cheʼ an majqui miʼ melbeñonla cʼajtiya tac chaʼan bʌ lac ñopbal? Jiñʌch cheʼ mi lac pʌs la cutslel. Juntiquil am bʌ i yutslel mach orajic miʼ michʼan yicʼot mi caj i ticʼ i bʌ chaʼan wen jach bajcheʼ miʼ jacʼ cheʼ bʌ an majqui yom i tech wocol o mach yujilic bajcheʼ yom miʼ jacʼ (Pr. 16:32). Tajol wocol mi la cubin chaʼan mi lac pʌs la cutslel. ¿Chuqui mi caj i coltañonla? I mi tatʌlonla, ¿bajcheʼ miʼ mejlel laj coltan la calobilob chaʼan miʼ pʌsob i yutslel jaʼel? Laʼ laj qʼuel.

3. ¿Chucoch mi la cʌl chaʼan jiñi muʼ bʌ i pʌsob i yutslel chʼejlobʌch jaʼel? (2 Timoteo 2:​24, 25).

³ Juntiquil am bʌ i yutslel mach yomic i yʌl chaʼan maʼañic i chʼejlel. Yomʌch an lac chʼejlel chaʼan mi lac ticʼ lac bʌ i wen jach bajcheʼ mi lac jacʼ cheʼ bʌ an chuqui woli (choncol) lac subentel. Cheʼ jaʼel, jiñi la cutslel jiñʌch jumpʼejl lac melbal (chaʼlibal) «muʼ bʌ i yʌcʼ jiñi espíritu» (Gál. 5:​22, 23). Ti griego jiñi tʼan muʼ bʌ i chaʼlentel ti traducir ti «la cutslel» an i tajol miʼ cʼʌjñel chaʼan miʼ yʌjlel juncojt jontol bʌ (simaron bʌ) caballo muʼ bʌ i yutsʼesʌntel. Pero ¿yom ba i yʌl iliyi chaʼan mach chʼejlix jiñi caballo? Maʼañic. Ixcu joñonla, ¿bajcheʼ miʼ mejlel lac pʌs la cutslel i cheʼ jaʼel jiñi lac chʼejlel? Ti lac bajñel mach mejloñicla, yom mi laj cʼajtiben Jehová jiñi i yespíritu. Mucʼʌch i mejlel lac pʌs la cutslel. Cabʌl hermanojob wen jach bajcheʼ miʼ jacʼob cheʼ bʌ jiñi yambʌ lac piʼʌlob miʼ pejcañob ti tsʌts bʌ tʼan, jin chaʼan an wem bʌ chuqui miʼ yʌlob ti lac tojlel (pejcan 2 Timoteo 2:​24, 25). ¿Chuqui miʼ mejlel lac mel chaʼan mi lac pʌs la cutslel?

4. ¿Chuqui mi laj cʌn tiʼ tojlel Isaac?

⁴ Jiñi Biblia miʼ taj ti tʼan wiñicob xʼixicob tsaʼ bʌ i pʌsʌyob i yutslel, bajcheʼ Isaac. Cheʼ bʌ Isaac tsaʼ cʼoti ti chumtʌl ti Guerar, tiʼ sube i wiñicob chaʼan miʼ jocʼob jumpʼejl pozo i cheʼ bʌ tsiʼ tajayob jaʼ, jiñi filisteojob tsaʼ caji i yʌlob chaʼan i chaʼañob jiñi pozo. Pero Isaac maʼañic tsiʼ teche leto (quera), jin chaʼan tsaʼ majliyob ti chumtʌl ti yambʌ parte (Gn. 26:​12-18). I cheʼ bʌ tsiʼ chaʼ tajayob jaʼ yaʼ baqui tsaʼ cʼotiyob, jiñi filisteojob tsaʼ chaʼ tiliyob ti leto i tsiʼ yʌlʌyob chaʼan i chaʼañob jaʼel jiñi pozo, pero Isaac tsiʼ pʌsʌ i yutslel i maʼañic tsiʼ teche leto yicʼotob (Gn. 26:​19-25). ¿Chuqui tsiʼ colta? Jiñʌch jiñi wem bʌ ejemplo tsaʼ bʌ i cʌñʌ tiʼ tojlel Abrahán yicʼot Sara, tsaʼ bʌ i pʌsʌyob i yutslel yicʼot jiñi ñʌchʼtʌlel (1 Ped. 3:​4-6; Gn. 21:​22-34).

5. ¿Chuqui ti ejemplo miʼ pʌs chaʼan jiñi tatʌlob miʼ mejlel i cʌntesañob i yalobilob chaʼan miʼ pʌsob i yutslel?

⁵ Jiñi tatʌlob yom miʼ pʌsbeñob i yalobilob chaʼan ñucʌch i cʼʌjñibal cheʼ miʼ pʌsob i yutslel. Jiñʌch tsaʼ bʌ ujti tiʼ tojlel Mark, 17 bʌ i jabilel. Yaʼ ti escuela yicʼot ti subtʼan an muʼ bʌ i wajleñob o mach weñic bajcheʼ miʼ pejcañob, o chuqui jach miʼ subeñob. Pero jiñi i papá i mamá tsiʼ coltayob i qʼuel chaʼan yom miʼ pʌs i yutslel. Miʼ yʌlob: «Wʌle, Mark yujil chaʼan anquese mach wocolic miʼ mejlel ti michʼan jaʼel i mi’ chaʼ sutqʼuibeñob, ñumen wen cheʼ miʼ ticʼ i bʌ».

6. ¿Bajcheʼ miʼ coltañonla jiñi oración chaʼan mi lac pʌs la cutslel?

⁶ Ñaʼtancu chaʼan an majqui miʼ yʌl mach bʌ weñic tiʼ tojlel Jehová o miʼ wajleñonla. ¿Chuqui mi caj lac mel? Yom mi laj cʼajtiben i yespíritu Jehová chaʼan mi lac ñaʼtan bajcheʼ yom mi lac jacʼ. ¿Ixcu mi tsaʼix lac jacʼʌ pero mach weñic bajcheʼ tsaʼ lac mele? Laʼ lac chaʼ pejcan Jehová i laʼ lac ñaʼtan bajcheʼ yom mi lac jacʼ mi tsaʼ cha’ ujtiyonla bajcheʼ jiñi. Cheʼ bajcheʼ jiñi, Jehová mi caj i coltañonla yicʼot i yespíritu chaʼan miʼ mejlel lac ticʼ lac bʌ i mi lac pʌs la cutslel.

7. Cheʼ miʼ yujtel jumpʼejl wocol, ¿bajcheʼ miʼ coltañonla cheʼ mi laj cʼajtesan texto tac am bʌ ti Biblia? (Proverbios 15:​1, 18).

⁷ Yaʼ ti Biblia an cabʌl texto muʼ bʌ i mejlel i coltañonla chaʼan wen jach bajcheʼ mi lac jacʼ cheʼ bʌ an jumpʼejl wocol, i jiñi chʼujul bʌ espíritu miʼ coltañonla chaʼan mi laj cʼajtesan jiñi texto tac (Juan 14:26). Jumpʼejl ejemplo, yaʼ ti libro chaʼan Proverbios an cabʌl principio muʼ bʌ i coltañonla lac pʌs la cutslel (pejcan Proverbios 15:​1, 18). Cheʼ jaʼel, miʼ coltañonla laj qʼuelben i wenlel cheʼ bʌ mach orajic  mi lac michʼan i wen jach mi lac jacʼ (Pr. 10:19; 17:27; 21:23; 25:15).

8. ¿Chuqui yom mi lac ñaʼtan cheʼ an majqui miʼ melbeñonla jumpʼejl cʼajtiya?

⁸ Jiñi lac ñaʼtʌbal miʼ wen coltañonla (Pr. 19:11). Juntiquil muʼ bʌ i cʼʌn i ñaʼtʌbal miʼ ticʼ i bʌ chaʼan mach orajic miʼ jacʼ cheʼ bʌ an chuqui woli (yʌquel) i cʼajtibentel. Cheʼ bʌ an majqui miʼ melbeñoñobla cʼajtiya tac, an i tajol mach wen la cujilic chuqui yomob i ñaʼtan o chucoch woliʼ melob jiñi cʼajtiya. Jin chaʼan, cheʼ bʌ maxto lac jacʼbeyob, laʼ lac ñaʼtan chaʼan mach wen la cujilic chucoch woliʼ melob (Pr. 16:23).

9. ¿Bajcheʼ tsiʼ pʌsʌ i ñaʼtʌbal yicʼot i yutslel Gedeón?

⁹ Laʼcu lac ñaʼtan tsaʼ bʌ ujti tiʼ tojlel Gedeón. Ti jumpʼejl bʌ qʼuin, jiñi wiñicob ti Efraín tsaʼ wen michʼayob come maʼañic tsaʼ pʌjyiyob majlel ti guerra tiʼ contra jiñi Madián. Pero ¿chucoch tsaʼ michʼayob? ¿Chaʼan ba miʼ wen qʼuelob i bʌ ti ñuc i maʼañic tsiʼ mulayob cheʼ bʌ maʼañic chuqui tsaʼ subentiyob? Tajolʌch. Pero Gedeón tsiʼ cʼʌñʌ i ñaʼtʌbal i tsiʼ qʼuele ti ñuc bajcheʼ yubil miʼ yubiñob i bʌ, jin chaʼan wen jach tsiʼ jacʼbeyob. Cheʼ bajcheʼ jiñi «tsaʼ lajmiyob i michʼajel» (Jue. 8:​1-3).

10. ¿Chuqui mi caj i coltañonla chaʼan wen jach mi lac jacʼ cheʼ an chuqui mi laj cʼajtibentel? (1 Pedro 3:15).

 ¹⁰ Tajol juntiquil lac piʼʌl ti eʼtel o ti escuela miʼ cʼajtibeñonla chucoch mi lac jacʼ pejtelel muʼ bʌ i yʌl jiñi Biblia. I sujmʌch, la com laj coltan pejtelel chuqui miʼ yʌl jiñi Biblia, pero yomʌch mi lac chʼʌm ti ñuc muʼ bʌ i ñaʼtan jaʼel jiñi yambʌlob (pejcan 1 Pedro 3:15). Jin chaʼan, cheʼ bʌ an majqui miʼ melbeñonla jumpʼejl cʼajtiya yom mi lac ñaʼtan chaʼan jiñi miʼ mejlel i coltañonla laj qʼuel chuqui añob tiʼ pusicʼal i mach ti orajic mi lac ñaʼtan chaʼan yomob jach leto. Jin chaʼan, wen jach yom mi lac jacʼbeñob yicʼot mi lac pʌsbeñob la cutslel. Mach yʌlʌyic chucoch woliʼ melob jiñi cʼajtiya, mi tsʌts bʌ tʼan woliyob o wajal jach, cheʼ mi lac pʌsbeñob la cutslel miʼ mejlel i ñijcañob chaʼan miʼ qʼuextañob i pensar (Rom. 12:17).

11, 12. ¿Chuqui yom mi lac ñaxan ñaʼtan cheʼ bʌ mi caj lac jacʼ jumpʼejl cʼajtiya? Alʌ jumpʼejl ejemplo bajcheʼ miʼ coltañonla iliyi chaʼan mi lac chaʼlen tʼan ti wen la quicʼot yambʌlob. (Qʼuele jaʼel jiñi foto).

¹¹ Tajol juntiquil lac piʼʌl ti eʼtel (troñel) miʼ cʼajtibeñonla chucoch maʼañic mi lac mel cumpleaño. Cheʼ bʌ muʼto caj lac jacʼben, laʼ laj cʼajtiben lac bʌ: ¿Muʼ ba i ñaʼtan chaʼan mi lac mʌctʌntel chaʼan mi lac ñusan lac bʌ? ¿O muʼ ba i bʌcʼñan chaʼan miʼ sajtel jiñi tijicñʌyel ti eʼtel cheʼ miʼ qʼuel chaʼan mach temeloñic yicʼotob? Miʼ mejlel a suben chaʼan maʼ qʼuel ti ñuc cheʼ miʼ mulan chaʼan luʼ tijicñayob ti eʼtel, chaʼan jiñʌch muʼ bʌ a mulan jaʼel. Cheʼ bajcheʼ jiñi, tajol muʼto caj i mejlel a suben chuqui miʼ pʌs jiñi Biblia chaʼan jiñi cumpleaño tac.

¹² Cheʼʌch miʼ mejlel lac mel cheʼ miʼ yujtel yan tac bʌ wocol. Jumpʼejl ejemplo, cheʼ bʌ an majqui miʼ subeñonla chaʼan tsʼaʼ mi laj qʼuel jiñi homosexualoʼ bʌ, miʼ mejlel laj cʼajtiben lac bʌ: ¿Chucoch cheʼ miʼ yʌl bajcheʼ jiñi? ¿Chaʼan ba mach wen yujilic chuqui jiñi muʼ bʌ lac ñop? ¿O chaʼan ba an juntiquil i yamigo o i familia homosexual bʌ? Miʼ mejlel lac suben chaʼan maʼañic majqui mi lac tsʼaʼlen, chaʼan mi laj qʼuel ti ñuc pejtelel lac piʼʌlob i chaʼan an ti lac wenta mi lac yajcan chuqui mi caj lac mel (1 Ped. 2:17). b Tajol cheʼ bajcheʼ jiñi mi caj i mulan i ñʌchʼtañonla i miʼ mejlel lac suben chucoch weñʌch cheʼ mi lac jacʼ muʼ bʌ i yʌl jiñi Biblia.

13. ¿Bajcheʼ miʼ mejlel a coltan juntiquil muʼ bʌ i yʌl chaʼan maʼañic i sujmlel cheʼ mi lac ñop ti Dios?

¹³ Cheʼ bʌ juntiquil lac piʼʌl an chuqui miʼ subeñonla, mach ti orajic yom mi lac waʼ jacʼ come mach wen la cujilic chuqui miʼ ñaʼtan (Tito 3:2). Laʼ la cʌl jumpʼejl ejemplo, ñaʼtancu chaʼan juntiquil a piʼʌl ti clase miʼ subeñet chaʼan maʼañic i sujmlel cheʼ mi lac ñop ti Dios. ¿Muʼ ba caj a waʼ ñaʼtan ti ora chaʼan miʼ ñop jiñi evolución? Tiʼ sujm, tajol mi añicto ñaʼtʌbil i chaʼan jiñi. Jin chaʼan ñumen wen cheʼ maʼ suben muʼ bʌ i mejlel i yʌcʼ ti pensar. Tajol miʼ mejlel a chocben majlel jumpʼejl enlace, jumpʼejl tema o jumpʼejl video am bʌ ti jw.org muʼ bʌ i taj ti tʼan jiñi melbil tac bʌ (pʌtbil tac bʌ) i chaʼan Jehová. Ti wiʼil, tajol muʼto caj i mulan i bej qʼuel a wicʼot jiñi tsaʼ bʌ a chocbe majlel. Mi wen jach bajcheʼ maʼ pejcan, miʼ mejlel i qʼuextan chuqui miʼ ñaʼtan.

14. ¿Bajcheʼ tsiʼ cʼʌñʌ juntiquil xcolel jiñi página jw.org chaʼan miʼ coltan juntiquil i piʼʌl ti clase?

¹⁴ Juntiquil xcolel i cʼabaʼ Navin tsiʼ cʼʌñʌ jiñi página jw.org chaʼan miʼ pʌsben juntiquil i piʼʌl ti clase chaʼan mach i sujmic muʼ bʌ i yʌjlel tiʼ tojlel jiñi i testigojob Jehová. Navin miʼ yʌl: «An juntiquil c piʼʌl ti clase muʼ bʌ i joy subeñon chaʼan maʼañic mic ñop jiñi ciencia, chaʼan jin jach mic ñop jumpʼejl libro ñoxix bʌ  mucʼ jach bʌ i yʌl cuento tac». Come jiñi i piʼʌl ti clase maʼañic miʼ cʌy chaʼan miʼ tsictesan jiñi ñopol bʌ i chaʼan, Navin tiʼ sube chaʼan miʼ yochel ti jw.org i miʼ qʼuel jiñi sección «Jiñi Biblia yicʼot jiñi ciencia». Ti wiʼil, Navin tsiʼ ñaʼta chaʼan jiñi i piʼʌl ti clase tajol tsaʼix i pejca jiñi tema tac muʼ bʌ i tilel yaʼi, i mach wocolix tsiʼ yubi chaʼan miʼ chaʼlen tʼan yicʼot. Jiñʌch muʼ bʌ i mejlel lac mel jaʼel.

15. ¿Bajcheʼ miʼ mejlel i coltañob i yalobil jiñi tatʌlob chaʼan miʼ jacʼob cʼajtiya tac yicʼotob i yutslel?

¹⁵ Jiñi tatʌlob miʼ mejlel i coltan i yalobilob chaʼan ti uts jach bʌ tʼan miʼ jacʼob cheʼ bʌ an chuqui miʼ subentelob chaʼan jiñi ñopol bʌ i chaʼañob (Sant. 3:13). An tatʌlob muʼ bʌ i cʼʌñob jiñi chʼujutesaya ti familia chaʼan miʼ wʌn chajpañob i bʌ. Miʼ tsajiñob (wen qʼuelob) tema tac muʼ bʌ i mejlel ti ajlel ti escuela i miʼ coltañob i yalobilob chaʼan wen jach bajcheʼ miʼ jacʼob i miʼ pʌsob i yutslel. (Qʼuele jiñi recuadro « Cheʼ mi laʼ chajpan laʼ bʌ, miʼ mejlel laʼ coltan laʼ familia»).

16, 17. ¿Bajcheʼ miʼ mejlel i coltan jiñi xcolelob cheʼ mi laʼ chajpan la bʌ ti laʼ familia?

¹⁶ Cheʼ mi laʼ chajpan laʼ bʌ bajcheʼ familia, jiñi laʼ walobilob mach cojach mi caj i mejlel i tsictesañob chuqui ñopolob i chaʼan, mi caj i pʼʌtʼañob i ñopoñel jaʼel. Yaʼ ti sección «Jóvenes» am bʌ ti jw.org miʼ tilel jumpʼejl parte i cʼabaʼ «Ponlo por escrito», ili miʼ mejlel i coltan jiñi xcolel chaʼan miʼ pʼʌtʼesañob i ñopoñel i chaʼan miʼ cʌñob i tsictesan jiñi ñopol bʌ i chaʼañob. Mi mucʼʌch laʼ qʼuel ti laʼ familia ili eʼtijib tac, ti laʼ pejtelel mi caj i mejlel laʼ tsictesan ti wen jach bʌ tʼan jiñi ñopol bʌ laʼ chaʼan.

¹⁷ Juntiquil xcolel i cʼabaʼ Matthew miʼ yʌl chaʼan añʌch i wen colta cheʼ miʼ chajpañob  i bʌ tiʼ yotot. Cheʼ miʼ melob i chʼujutesaya ti familia miʼ wen qʼuelob tema tac muʼ bʌ i mejlel ti ajlel yaʼ ti escuela. Miʼ yʌl: «Mic ñop c ñaʼtan lojon chuqui ti wocol miʼ mejlel ti ujtel, cheʼ jiñi mic ñaʼtan lojon bajcheʼ miʼ mejlel c jacʼ o chuqui miʼ mejlel c mel. Cheʼ wen tsiquilʌch tic jol chucoch mic ñop jiñi ñopol bʌ c chaʼan, maʼañic mic chaʼlen bʌqʼuen i wen jach bajcheʼ miʼ mejlel c tsictesan».

18. Cheʼ bajcheʼ miʼ yʌl Colosenses 4:​6, ¿chuqui jiñi ñuc bʌ i cʼʌjñibal?

¹⁸ Cheʼ woli lac tsictesan jiñi ñopol bʌ lac chaʼan, an i tajol mach jasʌlic jach cheʼ jamʌ tsiquil bajcheʼ mi lac tsictesan. Yom mi lac pʌs la cutslel yicʼot mi laj cʼʌn wen jach bʌ tʼan (pejcan Colosenses 4:6). Lajal miʼ yujtel bajcheʼ jumpʼejl alas. Cheʼ tsʌts mi lac choc jiñi pelota, wocol mi caj i yubin jiñi yambʌ chaʼan miʼ chuc, pero mi cʼunteʼ jach mi lac choc, mach wocolic mi caj i mejlel i chuc i mi caj i bej mulan alas. Cheʼʌch miʼ yujtel jaʼel cheʼ wen jach mi lac chaʼlen tʼan yicʼot mi lac pʌs la cutslel, jiñi lac piʼʌl tajol mi caj i bej mulan tʼan. Pero ili mach yomic i yʌl chaʼan mi caj lac bej chaʼlen tʼan mi jiñi yambʌ lac piʼʌl yom jach leto o yom jach i wajleñonla (Pr. 26:4). Tiʼ sujm, mach cabʌlic cheʼoʼ bʌ bajcheʼ jiñi.

19. ¿Chuqui miʼ mejlel i coltañonla chaʼan mi lac pʌs la cutslel cheʼ bʌ an chuqui mi laj cʼajtibentel chaʼan bʌ lac ñopbal?

¹⁹ Tsaʼix laj qʼuele chaʼan cabʌl i wenlel cheʼ mi lac pʌs la cutslel. Jin chaʼan, mi an majqui miʼ jatsonla ti tʼan o miʼ yʌl mach bʌ weñic ti lac tojlel, laʼ laj cʼajtiben Jehová chaʼan miʼ coltañonla lac pʌs la cutslel. Cʼajtesan, cheʼ maʼ pʌs a wutslel i wen jach bajcheʼ maʼ chaʼlen tʼan maʼañic mi caj i tejchel leto o aʼleya yicʼot yambʌ lac piʼʌl, i tajol mi caj i qʼuextan i pensar chaʼañonla o chaʼan chuqui miʼ yʌl jiñi Biblia. Jin chaʼan, cheʼ bʌ an majqui miʼ melbeñonla cʼajtiya yom chʌn chajpʌbilonla chaʼan mi lac jacʼ yicʼot la cutslel i mi lac pʌs chaʼan mucʼʌch laj qʼuelob ti ñuc (1 Ped. 3:15). Jin chaʼan, pʌsʌ a wutslel yicʼot a chʼejlel.