1, 2. a) ¿Chuqui an i yʌqʼueyonla laj cʌn Jehová? b) ¿Chuqui ti tʼan mi lac taj ti Isaías 46:10, 11 yicʼot 55:11?

WEN an i sujmlel jiñi tʼan am bʌ tiʼ tejchibal jiñi Biblia, muʼ bʌ i yʌl: «Cheʼ tiʼ cajibal tsiʼ mele Dios jini panchan yicʼot pañimil» (Génesis 1:1). Yaʼ ti panchan, chaʼpʼejl uxpʼejl jach cʌmbil lac chaʼan i melbal tac Dios. Maʼañic mi lac wen ñaʼtan bajcheʼ yilal yaʼ tiʼ jochtʌlel jiñi universo, chaʼan i sʌcpojanlel pañimil yicʼot chaʼan i pʼʌtʌlel ili lum (Eclesiastés 3:11). Pero Jehová an i yʌqʼueyonla laj cʌn chuqui ñaʼtʌbil i chaʼan tiʼ tojlel wiñicob xʼixicob (quixtañujob) yicʼot chaʼan ili Pañimil. Jehová tsiʼ mele tiʼ yejtal jiñi quixtañujob yicʼot tsiʼ yʌlʌ chaʼan yom tijicña miʼ chumtʌlob wʌʼ ti Pañimil (Génesis 1:26). Jehová mi caj i sujtel tiʼ Tat jiñi quixtañujob.

² Yaʼ ti capítulo 3 i chaʼan Génesis miʼ yʌl jumpʼejl wocol maʼañic bʌ tsiʼ yʌcʼʌ ti tsʼʌctiyel tsaʼ bʌ i ñaʼta Dios (Génesis 3:1-7). Pero Jehová miʼ mejlel i lajmesan jiñi wocol. Maʼañic chuqui miʼ mejlel i mʌctan tiʼ melol chuqui yom (Isaías 46:10, 11; 55:11). Miʼ mejlel lac ñop chaʼan jiñʌch baqui ora wen  miʼ qʼuel Jehová, mi caj i tsʼʌctesan tsaʼ bʌ i ñaʼta.

3. a) ¿Baqui bʌ jiñi cʌntesʌntel tac ñuc bʌ i cʼʌjñibal muʼ bʌ i coltañonla lac chʼʌmben isujm muʼ bʌ i yʌl jiñi Biblia? b) ¿Chucoch mi caj laj qʼuel ili cʌntesʌntel tac? c) ¿Chuqui ti cʼajtiya tac mi caj laj qʼuel?

³ Wen la cujil chuqui ñaʼtʌbil i chaʼan Dios tiʼ tojlel quixtañujob yicʼot ili Pañimil. Cheʼ jaʼel, la cujil bajcheʼ miʼ yʌcʼ ti tsʼʌctiyel Jesús jiñi ñaʼtʌbil bʌ i chaʼan Dios. Ili cʌntesʌntel tac am bʌ ti Biblia wen ñucʌch i cʼʌjñibal. Tajol jiñʌch tsaʼ bʌ lac ñaxan cʌñʌ cheʼ bʌ tsaʼ caji lac pejcan i Tʼan Dios. ¿Mach ba la comic la cʌqʼuen i cʌn yambʌlob? Ili tsic majlel jiñʌch wem bʌ i yorajlel come woli (choncol) lac pʌy jiñi quixtañujob chaʼan miʼ cʼajtesʌntel cheʼ tsaʼ chʌmi (sajti) Cristo (Lucas 22:19, 20). Mi mucʼʌch i cʼotelob ti jiñi bʌ qʼuin, mi caj i ñumen cʌñob jiñi wen utsʼatax bʌ ñaʼtʌbil i chaʼan Jehová. Jin chaʼan, i yorajlelʌch chaʼan mi lac ñaʼtan chuqui ti cʼajtiya tac miʼ mejlel i ñijcʌbeñob i pusicʼal chaʼan miʼ cʼotelob. Ti ili temaj mi caj laj qʼuel uxpʼejl cʼajtiya: ¿Chuqui tsiʼ ñaʼta i mel Dios tiʼ tojlel quixtañujob yicʼot chaʼan ili Pañimil? ¿Chuqui tsaʼ ujti? I ¿chucoch ñuc i cʼʌjñibal cheʼ tsiʼ yʌcʼʌ i cuxtʌlel Jesús chaʼan miʼ tsʼʌctesan Dios chuqui ñaʼtʌbil i chaʼan?

4. ¿Chucoch miʼ yʌl jiñi Biblia chaʼan tiʼ pejtelel chuqui melbil woliʼ yʌqʼuen «i ñuclel Dios»?

⁴ Jehová jiñʌch tsaʼ bʌ i luʼ mele chuqui tac an. Wen utsʼatax chuqui melbil i chaʼan (Génesis 1:31; Jeremías 10:12). Cheʼ mi laj qʼuel chaʼan utsʼatax tiʼ pejtelel chuqui melbil yicʼot cheʼ wen jach bajcheʼ tac an, miʼ pʌsbeñonla chaʼan Jehová tsiʼ mele chaʼañʌch lac wenlel, jiñi colem tac bʌ yicʼot jiñi chut tac bʌ. ¿Mach ba tijicñayic mi la cubin lac bʌ cheʼ mi laj qʼuel jiñi utsʼatax bʌ ecʼ tac ti panchan, jiñi wetsʼecña bʌ jaʼ yicʼot baqui miʼ yajlel jiñi jaʼ? Mi lac wen mulan laj qʼuel jiñi utsʼatax bʌ melbil tac i chaʼan Jehová come cheʼʌch tsiʼ meleyonla (pejcan Salmo 19:1 yicʼot 104:24).

5. ¿Chuqui an i mele Jehová chaʼan wen jach bajcheʼ miʼ yajñel jiñi melbil tac bʌ i chaʼan?

⁵ Jehová pʼisbil jach bajcheʼ tsiʼ mele tiʼ pejtelel chuqui tac an. Tsiʼ yʌcʼʌ i tʼan chaʼan bajcheʼ yom miʼ yajñel tiʼ pejtelel chuqui an ila ti Lum yicʼot tsiʼ yʌqʼue mandar jiñi quixtañujob chaʼan wen miʼ yajñelob (Salmo 19:7-9) (qʼuele jiñi recuadro «¿Chuqui yom i yʌl?»). Tiʼ pejtelel tsaʼ bʌ i mele Jehová yaʼ ti panchan, añʌch bajcheʼ tsiʼ yʌcʼʌ yicʼot chucoch tsiʼ yʌcʼʌ. Jumpʼejl ejemplo, jiñi i pʼʌtʌlel ili Lum miʼ mʌctan chaʼan maʼañic miʼ ñajtʼesan i bʌ jiñi petel bʌ icʼ ti panchan, cheʼ jaʼel, jiñʌch muʼ bʌ i yʌqʼuen i pʼʌtʌlel chaʼan maʼañic miʼ cʌy ajñel jiñi colem jaʼ tac. Maʼañic chuqui cuxul cheʼ machic an i pʼʌtʌlel ili Lum. Tiʼ pejtelel am bʌ ti panchan wen utsʼatax an come cheʼʌch tsiʼ yʌcʼʌ Jehová. Ili miʼ pʌs chaʼan añʌch chucoch tsiʼ mele Jehová ili Pañimil yicʼot quixtañujob. Cheʼ mi lac chaʼlen subtʼan, miʼ mejlel laj coltan jiñi yambʌlob chaʼan miʼ cʼotel i cʌñob jiñi tsaʼ bʌ i Mele panchan yicʼot pañimil (Apocalipsis 4:11).

6, 7. ¿Chuqui ti majtañʌl tac tsiʼ yʌqʼue Jehová jiñi Adán yicʼot Eva?

⁶ Jiñi ñaʼtʌbil bʌ i chaʼan Jehová tiʼ tojlel quixtañujob jiñʌch chaʼan miʼ chumtʌlob tiʼ pejtelel ora wʌʼ ti Pañimil  (Génesis 1:28; Salmo 37:29). Tsiʼ yʌqʼue utsʼatax bʌ majtañʌl tac jiñi Adán yicʼot Eva come an i yutslel (pejcan Santiago 1:17). Jumpʼejl ejemplo, tsiʼ yʌcʼʌyob ti libre chaʼan miʼ yajcañob yom bʌ i melob yicʼot miʼ mejlel i chʼʌmbeñob isujm, miʼ pʌsob i cʼuxbiya yicʼot miʼ tajob i yamigo (qʼuele jiñi recuadro «¿Chuqui yom i yʌl?»). Jehová tiʼ tsictesʌbe Adán bajcheʼ yom miʼ mel chuqui toj. Cheʼ jaʼel, tsiʼ cʌntesa bajcheʼ yom miʼ cʌntan i bʌ, miʼ cʼʌñob ti eʼtel ili Lum yicʼot miʼ cʌntañob jiñi añimal tac (Génesis 2:15-17, 19, 20). Jehová tsiʼ cʌyʌ chaʼan Adán yicʼot Eva miʼ mejlelob i tʌl, i qʼuel, i ñop, i ñʌchʼtan yicʼot miʼ sicʼob tiʼ pejtelel chuqui tsiʼ mele. Cheʼ bajcheʼ jiñi miʼ mejlelob i taj i tijicñʌyel yaʼ baqui utsʼatax tsaʼ ajqʼuiyob. Jehová tsiʼ yʌqʼueyob jaʼel wen ñuc bʌ eʼtel tac. Adán yicʼot Eva cabʌl chuqui mi caj i cʌñob.

⁷ ¿Chuqui yambʌ ochem ti jiñi ñaʼtʌbil bʌ i chaʼan Dios? Jehová tsiʼ yʌcʼʌ chaʼan Adán yicʼot Eva miʼ mejlel i tajob i yalobil mach bʌ xmulilobic, i chaʼan cheʼʌch miʼ yujtel majlel tiʼ tojlel i butsob jaʼel. Cheʼ bajcheʼ jiñi, miʼ butʼob ili Pañimil. Yom bʌ tsiʼ yʌlʌ Jehová jiñʌch chaʼan jiñi tatʌlob miʼ cʼuxbiñob i yalobil cheʼʌch bajcheʼ tsiʼ mele tiʼ tojlel Adán yicʼot Eva. Dios tsiʼ yʌqʼue jiñi quixtañujob ili Lum yicʼot tiʼ pejtelel chuqui utsʼatax bʌ an. Wʌʼʌch baqui mi caj i chumtʌlob tiʼ pejtelel ora (Salmo 115:16).

8. ¿Chucoch tsiʼ yʌqʼue Jehová jiñi Adán yicʼot Eva jiñi mandar muʼ bʌ lac taj ti Génesis 2:16, 17?

⁸ Ti jiñi bʌ ora, mach cheʼic tsaʼ ujti bajcheʼ tsiʼ ñaʼta i mel Jehová. ¿Chucoch? Laʼ laj qʼuel. Jehová tsiʼ yʌqʼue Adán yicʼot Eva jumpʼejl mandar mach bʌ wocolic chaʼan miʼ ñaʼtañob chaʼan pʼisbil jach chuqui miʼ mejlel i melob. Tsiʼ subeyob: «Miʼ mejlel a cʼux i wut pejtelel teʼ am bʌ ti pʌcʼʌbʌl. Cojach jini teʼ muʼ bʌ i yʌqʼueñet a cʌn chuqui utsʼat yicʼot chuqui jontol mach a cʼux, come ti jini qʼuin cheʼ maʼ cʼuxben i wut wersa mi caj a chʌmel» (Génesis 2:16, 17). Ili mandar mach wen wocolic ti chʼʌmbentel isujm. Mach wocolic ti jacʼol come ti jiñi pʌcʼʌbʌl cabʌl chuqui miʼ mejlelob i cʼux.

9, 10. a) ¿Chuqui tsiʼ yʌlʌ Satanás tiʼ contra Jehová? b) ¿Chuqui tsiʼ yajcayob i mel Adán yicʼot Eva? (Qʼuele jiñi dibujo am bʌ tiʼ tejchibal).

⁹ Satanás tsiʼ cʼʌñʌ juncojt lucum chaʼan miʼ lotin Eva i miʼ ñusʌben i tʼan Jehová (pejcan Génesis 3:1-5; Apocalipsis 12:9). Tsiʼ yʌlʌ chaʼan jontol jiñi Dios come maʼañic miʼ yʌcʼ chaʼan jiñi i yalobilob miʼ cʼuxbeñob i wut «pejtel jini teʼ am bʌ ti jini pʌcʼʌbʌl». Tajol tsiʼ yʌlʌ: «¿Chucoch maʼañic miʼ mejlel la mel chuqui laʼ wom?». Ti wiʼil tiʼ sube Eva ili lot: «Maʼanic mi caj laʼ chʌmel». Cheʼ jiñi, tiʼ sube chaʼan mach i cʼʌjñibalic miʼ jacʼben i tʼan Dios. Tiʼ sube: «Yujil Dios mux i cajñel laʼ wut cheʼ mi laʼ cʼuxben i wut jini teʼ». Satanás tiʼ sube Adán yicʼot Eva chaʼan Jehová mach yomic cheʼ miʼ cʼuxbeñob i wut jiñi teʼ come miʼ mejlel i ñumen tajob i ñaʼtʌbal. Cheʼ jiñi Satanás tsiʼ yʌlʌ: «Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol».

¹⁰ Adán yicʼot Eva tsiʼ ñaʼtayob mi jin mi caj i jacʼbeñob i tʼan Dios o jiñi i tʼan lucum. Maʼañic tsiʼ jacʼbeyob i tʼan Dios. Tsiʼ  yʌcʼʌyob i bʌ tiʼ contra Jehová i maʼañic tiʼ bej mulayob tiʼ Tat. Cheʼʌch bajcheʼ jiñi tsaʼ caji i coltañob Satanás. Ti jimbʌ ora i bajñel jax tsaʼ cʌyleyob i Jehová maʼañix tsiʼ chʌn cʌntayob (Génesis 3:6-13).

11. ¿Chucoch mach cheʼic jach tsiʼ qʼuele Jehová tsaʼ bʌ i mele Adán yicʼot Eva?

¹¹ Cheʼ bʌ Adán yicʼot Eva tsiʼ ñusʌbeyob i mandar Dios, tsaʼ sujtiyob tiʼ contra yicʼot ti xmulil, come Dios miʼ tsʼaʼlen jontolil. Jiñi Biblia miʼ yʌl tiʼ tojlel Dios: «Sʌquet. Mach cujchic a qʼuel mulil» (Habacuc 1:13). Cheʼic jach tsiʼ qʼuele Jehová tsaʼ bʌ i mele Adán yicʼot Eva, tajol tsaʼ sajti tiʼ pejtelel chuqui tsiʼ yʌqʼue i cuxtʌlel. Jiñi ángelob yicʼot quixtañujob tajol tsiʼ cʼajtibeyob i bʌ mi muʼto i mejlel i chʌn ñopbeñob i tʼan Jehová. Pero Jehová mucʼʌch i tsʼʌctesan tiʼ pejtelel chuqui miʼ yʌl (Salmo 119:142). Anquese Adán yicʼot Eva tsaʼ mejli i melob chuqui yomob, tsaʼʌch i tajayob wocol. Ti wiʼil, tsaʼ chʌmiyob i tsaʼ chaʼ sujtiyob ti tsʼubejn (Génesis 3:19).

12. ¿Chuqui tsiʼ chaʼle jiñi i yalobilob Adán?

¹² Cheʼ bʌ Adán yicʼot Eva tsiʼ cʼuxuyob jiñi i wut teʼ, maʼañix tsaʼ chʌn ajñiyob bajcheʼ i familia Jehová. Jin chaʼan, tsaʼ chojquiyob loqʼuel yaʼ ti paraíso i maʼañix tsaʼ chʌn otsʌntiyob (Génesis 3:23, 24). Jehová tsiʼ yʌcʼʌ chaʼan miʼ yilʌbeñob i wocolel jiñi i melbal (pejcan Deuteronomio 32:4, 5). Tiʼ caj jiñi, maʼañix tsaʼ chʌn mejli i lajibeñob ti wen i melbal tac Jehová. Adán tsiʼ sʌtʌ jiñi utsʼat bʌ i chumlib yicʼot i chaʼan i yalobilob. Cojach tsiʼ cʌybeyob mulil yicʼot chʌmel (Romanos 5:12). Jiñi i yalobilob maʼañix tsaʼ mejliyob ti chumtʌl tiʼ pejtelel ora. xMulilobix tiʼ pejtelel i yalobilob yicʼot i butsob. Cʼʌlʌl cheʼ bʌ Satanás tsiʼ yʌcʼʌ chaʼan Adán yicʼot Eva miʼ sujtelob tiʼ contra Dios, cheʼʌch woli (yʌquel) i mel ti lac tojlel ili ora (Juan 8:44).

13. ¿Chuqui miʼ mulan Jehová chaʼan jiñi quixtañujob?

¹³ Jehová tsiʼ chʌn cʼuxbi jiñi quixtañujob anquese Adán yicʼot Eva tsiʼ cʌyʌyob. Dios tsiʼ chʌn mulaj chaʼan jiñi quixtañujob miʼ sujtelob tiʼ yamigo i maʼañic miʼ chʌmelob (2 Pedro 3:9). Jin chaʼan, ti ora tsiʼ sajca bajcheʼ miʼ mejlel i coltañob chaʼan miʼ chaʼ sujtelob tiʼ yamigo. Pero chaʼan maʼañic miʼ ñusan ti pʼis i mandar, ¿bajcheʼ tsiʼ chaʼle? Laʼ laj qʼuel.

14. a) Cheʼ bajcheʼ miʼ yʌl Juan 3:16, ¿chuqui tsiʼ mele Dios chaʼan miʼ locʼsañonla ti mulil yicʼot ti chʌmel? b) ¿Baqui bʌ jiñi cʼajtiya tac miʼ mejlel lac tsajin la quicʼotob jiñi quixtañujob?

¹⁴ (Pejcan Juan 3:16). Tajol jiñi quixtañujob muʼ bʌ lac pʌyob chaʼan i Cʼajtesʌntel i chʌmel Jesús wen i cʌñʌyobix ili texto. Pero ¿yujiloʼ ba chucoch miʼ mejlel i yʌqʼueñonla laj cuxtʌlel maʼañic  bʌ miʼ jilel jiñi i tojol mulil? Miʼ mejlel laj coltañob i ñaʼtan i jacʼbal ili cʼajtiya. ¿Jalaqui? Jin cheʼ mi lac pʌyob tiʼ Cʼajtesʌntel i chʌmel Jesús yicʼot cheʼ mi lac chaʼ julaʼtañob. Mi mucʼʌch i chʼʌmbeñob isujm chucoch tsaʼ chʌmi Cristo, tiʼ sujm mi caj i ñaʼtañob bajcheʼ cʼamel miʼ cʼuxbiñonla Jehová yicʼot chaʼan wen an i ñaʼtʌbal. ¿Chuqui tac miʼ mejlel lac subeñob chaʼan i tojol jiñi mulil?

15. ¿Chucoch mach cheʼic tsiʼ mele Jesús bajcheʼ Adán?

¹⁵ Jehová tsiʼ yʌcʼʌ juntiquil toj bʌ wiñic chaʼan miʼ coltañonla. Jiñi wiñic yom xucʼul tiʼ tojlel Jehová yicʼot yomʌch miʼ yʌcʼ i cuxtʌlel tiʼ tojlel quixtañujob (Romanos 5:17-19). Jin chaʼan Jehová tsiʼ yajca Jesús i tsiʼ choco tilel wʌʼ ti Pañimil (Juan 1:14). Jesús lajal tsaʼ juli bajcheʼ Adán, come mach xmulilic. Pero Jesús mach cheʼic tsiʼ mele bajcheʼ Adán. ¿Chucoch? Come tsiʼ jacʼʌ jiñi mandar tac muʼ bʌ i cʼajtin Dios. Jesús tiʼ pejtelel ora tsiʼ jacʼbe i mandar tac Dios anquese tsiʼ ñusa tsʌts bʌ wocol.

16. ¿Chucoch ñucʌch i cʼʌjñibal cheʼ tsiʼ yʌcʼʌ i cuxtʌlel Jesús?

¹⁶ Cheʼ bʌ Jesús tsiʼ yʌcʼʌ toj bʌ i cuxtʌlel, tsiʼ coltayonla loqʼuel ti mulil yicʼot chʌmel. Cheʼʌch tsiʼ mele bajcheʼ i wentʌlel yom miʼ mel Adán. Juntiquilʌch toj bʌ wiñic tsaʼ bʌ i pʌsʌ i xucʼtʌlel yicʼot tsiʼ jacʼbe i tʼan Dios (1 Timoteo 2:6). Jiñi i cuxtʌlel tsaʼ bʌ i yʌcʼʌ miʼ coltan jiñi wiñicob, xʼixicob yicʼot xbiʼtalob chaʼan miʼ mejlelob ti chumtʌl tiʼ pejtelel ora (Mateo 20:28). Cheʼ bajcheʼ mi laj qʼuel, i cʼʌjñibalʌch cheʼ tsaʼ chʌmi Jesús chaʼan miʼ tsʼʌctiyel tsaʼ bʌ i ñaʼta Dios (2 Corintios 1:19, 20).

17. ¿Chuqui miʼ mejlel lac taj chaʼan tsiʼ yʌcʼʌ i cuxtʌlel Jesús?

¹⁷ Jehová wen letsem tiʼ tojo chaʼan miʼ coltañonla (1 Pedro 1:19). Miʼ wen qʼuelonla ti ñuc come tsiʼ yʌcʼʌ ti chʌmel jiñi cʼuxbibil bʌ i Yalobil ti laj caj (1 Juan 4:9, 10). Jesús tsaʼ ochi tiʼ qʼuexol Adán i jiñix tsaʼ sujti ti lac tat (1 Corintios 15:45). Jesús mach cojach miʼ yʌqʼueñonla lac taj laj cuxtʌlel tiʼ pejtelel ora, miʼ yʌcʼ chaʼan mi lac mejlel ti chaʼ ochel tiʼ familia Dios. Chaʼan i cuxtʌlel Jesús, tojix mi caj lac sujtel i maʼañix wocol chaʼan Jehová miʼ chaʼ otsañonla tiʼ familia. Laʼ cu lac ñaʼtan cheʼ baqui ora mach chʌn xmulilobix jiñi xucʼuloʼ bʌ tiʼ tojlel Dios. Ti jiñi bʌ ora, jumpʼejl jax familia mi caj i sujtel jiñi añoʼ bʌ ti panchan yicʼot wʌʼ ti Pañimil. Ti lac pejtelel mi caj lac sujtel tiʼ yalobil Dios (Romanos 8:21).

18. ¿Baqui ora mi caj i sujtel tiʼ ñuclel Jehová tiʼ «pejtelel chuqui tac an»?

¹⁸ Jehová maʼañic tsiʼ cʌyʌ i cʼuxbin jiñi quixtañujob, anquese Adán yicʼot Eva tsiʼ ñusʌbeyob i tʼan. Jin chaʼan tsiʼ yʌcʼʌ i Yalobil chaʼan miʼ coltañonla. Satanás maʼañic miʼ mejlel i wersa xicʼonla chaʼan mi lac ñusʌben i tʼan Jehová anquese xmulilonla. Jehová mi caj i cʼʌn i tojol jiñi mulil chaʼan mi lac sujtel ti toj. Wen utsʼatax cheʼ bʌ miʼ cajelob ti chumtʌl tiʼ pejtelel ora jiñi muʼ bʌ i ñopob Jesús (Juan 6:40). Jehová, jiñi lac Tat wen yujil bʌ cʼuxbiya yicʼot am bʌ i ñaʼtʌbal, mi caj i tsʼʌctesan i tʼan yicʼot mi caj i coltañonla chaʼan mi lac sujtel ti toj. Cheʼ jiñi, tiʼ «pejtelel chuqui tac an» mi caj i sujtel chaʼan i ñuclel Jehová (1 Corintios 15:28).

19. a) ¿Chuqui mi caj lac mel mi mucʼʌch laj qʼuel ti ñuc i tojol jiñi mulil? (Qʼuele jiñi recuadro « Laʼ lac chʌn sajcan jiñi utsoʼ bʌ i pusicʼal»). b) ¿Chuqui mi caj laj qʼuel ti yambʌ temaj?

¹⁹ Mi mucʼʌch laj qʼuel ti ñuc i tojol jiñi mulil, mi caj lac suben yambʌlob chaʼan ili utsʼatax bʌ majtañʌl. Jiñi yambʌlob yom miʼ ñaʼtañob chaʼan Jehová miʼ cʼʌn jiñi i tojol mulil chaʼan miʼ yʌqʼueñob i cuxtʌlel maʼañic bʌ miʼ jilel. Pero jiñi i tojol mulil mach cojach miʼ mejlel i yʌqʼueñonla laj cuxtʌlel. Miʼ yʌcʼ ti tsictiyel jaʼel mi isujmʌch tsaʼ bʌ i yʌlʌ Satanás yaʼ ti pʌcʼʌbʌl Edén. Yaʼ ti yambʌ temaj mi caj laj qʼuel bajcheʼ miʼ tsictiyel iliyi.