Mi cheʼʌchi, ¿chuqui miʼ yujtel ti lac tojlel maʼ wʌl? Laʼ laj qʼuel jumpʼejl ejemplo. Jiñi i yalobil juntiquil hermano tsiʼ tsʌnsa i bʌ. Wen chʼijiyem tsiʼ yubi i bʌ jiñi hermano. Tsaʼ caji i cʼajtiben i bʌ mi ñaʼtʌbilix i chaʼan Jehová tsaʼ bʌ ujti yicʼot mi tsaʼix i ñaʼta chaʼan mi mucʼʌch caj i cuch yicʼot i yijñam jiñi wocol. Ti ili pañimil, tajol ti lac pejtelel mi caj lac ñusan tsʌts bʌ wocol. Pero ¿yom ba mi lac ñaʼtan chaʼan an tiʼ cʼʌb Jehová chuqui miʼ yujtel tac ti lac tojlel?

Cheʼ mi lac pejcan muʼ bʌ i yʌl 1 Corintios 10:13, mi caj laj qʼuel yaʼ ti Biblia chaʼan Jehová maʼañic miʼ ñaxan qʼuel bajcheʼ cʼamel miʼ mejlel laj cuch jumpʼejl wocol chaʼan ti wiʼil miʼ yʌqʼueñonla. Laʼ laj qʼuel uxchajp chucoch mi la cʌl iliyi.

Ti ñaxan, come Jehová libre tsiʼ mele tiʼ pejtelel wiñicob xʼixicob (quixtañujob). Yom chaʼan joñonla mi lac yajcan chuqui la com lac mel (Deuteronomio 30:19, 20; Josué 24:15). Mi mucʼʌch lac yajcan chuqui miʼ mulan Jehová, mi caj i coltañonla (Proverbios 16:9). Pero mi mach cheʼiqui, mi caj la quilʌben i wocolel (Gálatas 6:7). ¿Mejl ba la cʌl chaʼan librejonla mi jin Jehová miʼ yajcan chuqui ti wocol mi caj lac ñusan?

I chaʼchajplel, come Jehová maʼañic miʼ cʌntañonla cheʼ an chuqui miʼ yujtel mach bʌ ñaʼtʌbilic lac chaʼan (Eclesiastés 9:12). Tajol an majqui miʼ taj tsʌts bʌ wocol tiʼ caj baqui an, come mach ñaʼtʌbilic i chaʼan chuqui mi caj i yujtel ti jiñi bʌ ora. Jesús tsiʼ taja ti tʼan cheʼ bʌ tsaʼ yajli i tsʼajquil jumpʼejl otot i tiʼ tsʌnsa 18 quixtañu. Tiʼ jamʌ tsictesa chaʼan Dios mach jiñic tsiʼ yʌcʼʌ ti ujtel bajcheʼ jiñi (Lucas 13:1-5). Maʼañic miʼ mejlel la cʌl chaʼan Dios wʌn ñaʼtʌbilix i chaʼan majqui cuxul mi caj i cʌytʌl cheʼ bʌ an chuqui mi caj i yujtel.

I yuxchajplel, come ti lac pejtelel yom mi lac pʌs chaʼan xucʼuloñʌchla ti Jehová. Satanás tsiʼ yʌlʌ chaʼan mi lac melben i yeʼtel Jehová tiʼ cajach chuqui miʼ yʌqʼueñonla i chaʼan mach xucʼulic mi caj la cajñel cheʼ ba ora mi lac ñusan wocol (Job 1:9-11; 2:4; Apocalipsis 12:10). Cheʼ muqʼuic i cʌntañonla Jehová ti jiñi wocol tac, tajol i sujmʌch tsaʼ bʌ i yʌlʌ Satanás.

I chʌnchajplel, come Jehová miʼ mejlel i yʌl mi yomix i wʌn ñaʼtan chuqui mi caj i yujtel. Cheʼic yom Jehová, miʼ mejlel i luʼ ñaʼtan muʼ bʌ i cajel ti ujtel (Isaías 46:10). Pero jiñi Biblia miʼ yʌl chaʼan añʌch maxto bʌ yomic i ñaʼtan chaʼan jiñi talto bʌ qʼuin (Génesis 18:20, 21; 22:12). ¿Chucoch? Come Jehová tojʌch yicʼot an i cʼuxbiya, i maʼañic miʼ mʌctañonla chaʼan chuqui mi lac yajcan lac mel (Deuteronomio 32:4; 2 Corintios 3:17).

Cheʼ jiñi, ¿chuqui tsiʼ taja ti tʼan Pablo cheʼ bʌ tsiʼ yʌlʌ chaʼan Jehová maʼañic mi caj i yʌqʼueñonla lac taj lac pʌyol ti mulil mach bʌ mejlic laj cuch? Tsaʼ bʌ i taja ti tʼan jiñʌch chaʼan bajcheʼ miʼ coltañonla Jehová cheʼ bʌ añonla ti wocol, mach jiñic cheʼ bʌ maxto lac taja jiñi wocol * (qʼuele jiñi nota). Mi mucʼʌch lac ñop Jehová, mi caj i coltañonla laj cuch baqui tac jach bʌ wocol (Salmo 55:22). Laʼ laj qʼuel chaʼpʼejl i sujmlel chucoch tsiʼ yʌlʌ Pablo chaʼan Dios maʼañic mi caj i yʌcʼ chaʼan mi lac taj lac pʌyol ti mulil mach bʌ mejlix laj cuch.

Ñaxam bʌ chucoch tsaʼ mejli i yʌl Pablo iliyi jiñʌch chaʼan tiʼ pejtelel jiñi wocol muʼ bʌ lac ñusan añʌch i «yubiyob yañoʼ bʌ». Ili yom i yʌl chaʼan i tilelʌch cheʼ mi lac luʼ taj wocol ila ti pañimil  woli (choncol) bʌ i yuman Satanás. Ti lac pejtelel mi caj lac ñusan tsʌts tac bʌ wocol. Pero mucʼʌch i mejlel laj cuch yicʼot xucʼul mi la cajñel mi tsaʼ lac ñopo Jehová (1 Pedro 5:8, 9). Pablo tsiʼ yʌlʌ yaʼ ti ñaxan tac bʌ versículo cheʼ maxto cʼotiyonla yaʼ ti 1 Corintios 10:13, chaʼan jiñi israelob tsiʼ tajayob wocol yaʼ tiʼ tiquiñal lum (1 Corintios 10:6-11). Jiñi tsaʼ bʌ i ñopoyob Jehová tsaʼʌch mejli i cuchob jiñi wocol tac. Pero mach xucʼulic tsaʼ ajñiyob yicʼot tsiʼ ñusayob tʼan jiñi maʼañic bʌ tsiʼ ñopoyob Jehová.

I chaʼpʼejlel chucoch tsiʼ yʌlʌ Pablo bajcheʼ jiñi, jiñʌch cheʼ «xucʼul i pusicʼal Dios». ¿Chuqui yom i yʌl? Mi tsaʼ lac ñaʼta bajcheʼ coltʌbil i chaʼan Jehová jiñi i wiñicob, mi caj laj qʼuel chaʼan añʌch i xucʼtʌlel yicʼot miʼ coltan jiñi muʼ bʌ i cʼuxbiñob yicʼot «muʼ bʌ i jacʼbeñob i mandar» (Deuteronomio 7:9). Cheʼ jaʼel, tiʼ pejtelel ora miʼ tsʼʌctesan i tʼan Jehová (Josué 23:14). Jin chaʼan, an chaʼchajp muʼ bʌ i mejlel lac ñop. Ñaxam bʌ, jiñʌch chaʼan Jehová mach i yʌcʼʌyic chaʼan mi lac ñusan ñoj tsʌts bʌ wocol mach bʌ laj lʌtʼʌyic. I chaʼpʼejlel, chaʼan mi caj i yʌcʼonla ti «loqʼuel» ti wocol.

¿Bajcheʼ miʼ yʌcʼonla ti loqʼuel ti wocol Jehová cheʼ mucʼʌch lac ñop? Tiʼ sujm, mucʼʌch i mejlel i locʼsañonla ti wocol. Pero Pablo tsiʼ yʌlʌ chaʼan Jehová mi caj i coltañonla ti «loqʼuel» ti jiñi wocol chaʼan miʼ mejlel laj cuch. Ili miʼ cʌntesañonla chaʼan Jehová miʼ yʌqʼueñonla lac pʼʌtʌlel chaʼan chʌn xucʼul mi la cajñel. Mach junsujmic jach bajcheʼ miʼ yʌqʼueñonla lac pʼʌtʌlel. Laʼ laj qʼuel.

• Jehová «miʼ ñuqʼuesan lac pusicʼal tiʼ pejtelel lac wocol» (2 Corintios 1:3, 4). Miʼ cʼʌn jiñi Biblia, jiñi chʼujul bʌ i yespíritu yicʼot jiñi xucʼul bʌ xʼeʼtel chaʼan mi lac taj i ñʌchʼtʌlel lac pensar yicʼot lac pusicʼal (Mateo 24:45; Juan 14:16; Romanos 15:4).

• Jehová miʼ mejlel i tojʼesañonla yicʼot chʼujul bʌ i yespíritu (Juan 14:26). Jiñi chʼujul bʌ i yespíritu miʼ mejlel i coltañonla laj cʼajtesan chuqui pejcʌbil lac chaʼan ti Biblia yicʼot principio tac muʼ bʌ i coltañonla lac mel chuqui wen.

• Jehová miʼ mejlel i cʼʌn i yángelob chaʼan miʼ coltañonla (Hebreos 1:14).

• Jehová miʼ mejlel i cʼʌn jiñi hermanojob chaʼan miʼ coltañoñobla. Miʼ mejlel i pʼʌtʼesañob lac pusicʼal cheʼ an chuqui miʼ melob ti lac tojlel yicʼot cheʼ miʼ subeñoñobla chuqui utsʼat (Colosenses 4:11).

Ti tsʼitaʼ bʌ tʼan, ¿chuqui mi laj cʌn ti jiñi tsaʼ bʌ i yʌlʌ Pablo yaʼ ti 1 Corintios 10:13? Chaʼan Jehová maʼañic miʼ yajcan baqui bʌ wocol mi caj lac ñusan. Mi laj cʌn jaʼel chaʼan mi mucʼʌch lac ñop tiʼ tojlel, mi caj laj cuch jiñi wocol tac muʼ bʌ i tilel ti lac tojlel. Jehová tiʼ pejtelel ora mi caj i coltañonla loqʼuel ti wocol tac chaʼan chʌn xucʼulonla tiʼ tojlel.