Cheʼ bʌ juntiquil la camigo an i chaʼan ansiedad, depresión o yan tac bʌ bajcheʼ jiñi, tajol machʌch añic bajcheʼ miʼ mejlel laj coltan. Pero mejlʌch lac pʌsben chaʼan mi laj cʼuxbin cheʼ bʌ mi laj coltan i cuch majlel jiñi i cʼamʌjel.

«Yom chajpʌbiletla chaʼan mi laʼ ñʌchʼtan tʼan» (SANTIAGO 1:19).

Junchajp muʼ bʌ i mejlel a mel (chaʼlen) tiʼ tojlel jiñi a wamigo jiñʌch cheʼ maʼ ñʌchʼtan cheʼ ba ora yom tʼan. Mach a ñaʼtan bajcheʼ mi caj a jacʼ pejtelel chuqui miʼ yʌl. Ñuc bʌ i cʼʌjñibal jiñʌch cheʼ miʼ qʼuel chaʼan woli (choncol) a ñʌchʼtan yicʼot chaʼan mucʼʌch a chʼʌmben i sujm. Ñopo a ñaʼtan bajcheʼ yubil miʼ yubin i bʌ, pero mach a ñaʼtan lecoj bʌ tiʼ tojlel. Cʼajtesan chaʼan an i tajol mi caj i yʌl mach bʌ weñic i ti wiʼil mi chaʼ ñaʼtan i bʌ (Job 6:2, 3).

«Ñuqʼuesʌbenla i pusicʼal jiñi wen chʼijyemoʼ bʌ» (1 TESALONICENSES 5:14).

Tajol jiñi a wamigo wen chʼijyem o woli (yʌquel) i chaʼlen wersa chaʼan maʼañic miʼ ñaʼtan chaʼan maʼañic i cʼʌjñibal. Jin chaʼan, suben chaʼan mucʼʌch a wen qʼuel ti ñuc. Cheʼ bajcheʼ jiñi, mucʼʌch caj i mejlel a ñuqʼuesʌben i pusicʼal anquese mach a wujilic chuqui maʼ suben.

«Jiñi i sujm bʌ amigo miʼ cʼuxbiñonla tiʼ pejtelel ora» (PROVERBIOS 17:17).

Aqʼuen a coltaya. Mach a waʼ ñaʼtan chaʼan a wujilix chuqui i cʼʌjñibal i chaʼan, cʼajtiben  chuqui miʼ mejlel a mel tiʼ tojlel. Tajol jiñi a wamigo maʼañic miʼ ñaʼtan bajcheʼ miʼ subeñet. Mi cheʼʌch bajcheʼ jiñi, suben chuqui tac miʼ mejlel laʼ comol mel, mi laʼ mejlel ti majlel ti xʌmbal. Cheʼ jaʼel, suben chaʼan miʼ mejlel a coltan ti mʌñoñel, i sʌqʼuesan i yotot o yan tac bʌ (Gálatas 6:2).

«Yom mi laʼ pʌs laʼ pijt» (1 TESALONICENSES 5:14).

Tajol jiñi a wamigo mach tiʼ pejtelelic ora yom tʼan. Pero cʼajtesʌben chaʼan yaʼañet cheʼ baqui ora yom tʼan. Tajol tiʼ caj jiñi i cʼamʌjel, mi caj i yʌl o i mel cʼux bʌ maʼ yubin, o mi caj i subeñet chaʼan maʼañix mi caj i majlel baqui tsaʼ laʼ lon ñaʼta o miʼ michʼan. Cheʼ maʼ coltan jiñi a wamigo yom maʼ pʌs a pijt yicʼot maʼ chʼʌmben i sujm (Proverbios 18:24).

«Mic chaʼlen wersa chaʼan wem bʌ amigajon. I sujmʌch chaʼan maʼañic mic mejlel c lajmesʌben pejtelel i wocol jiñi camiga, pero mucʼʌch i mejlel c ñʌchʼtan cheʼ bʌ yom tʼan. An i tajol yom jach chaʼan an majqui miʼ ñʌchʼtan chaʼan tijicña miʼ yubin i bʌ» (Farrah, a an juntiquil i yamiga am bʌ i chaʼan depresión clínica, trastorno alimentario yicʼot ansiedad).

«An juntiquil camiga wen tijicña bʌ yicʼot wen uts bʌ yicʼoton. Ti jumpʼejl bʌ qʼuin tsiʼ pʌyʌyon tiʼ yotot i tiʼ chajpʌbeyon wen sumuc bʌ bʌlñʌcʼʌl. Tsaʼ c sube bajcheʼ yubil mi cubin c bʌ come mach lecojic tsaʼ cubi cheʼ bʌ yaʼañon yicʼot. ¡Ti wiʼil wen tijicña tsaʼ cubi c bʌ!» (Ha-eun, an i chaʼan depresión clínica).

«Ñuc i cʼʌjñibal cheʼ la cujil pijt. Cheʼ bʌ jiñi c quijñam miʼ mel muʼ bʌ i yʌcʼon ti michʼ, mij cʼajtesan chaʼan mach i mulic, jiñʌch tiʼ caj i cʼamʌjel. Ili miʼ coltañon chaʼan maʼañic mic michʼan yicʼot chaʼan mic chʼʌmben i sujm bajcheʼ yubil miʼ yubin» (Jacob, jiñi i yijñam an i chaʼan depresión clínica).

«Jiñi quijñam añʌch i wen coltayon yicʼot i ñuqʼuesa c pusicʼal. Cheʼ bʌ miʼ tajon jiñi ansiedad maʼañic miʼ wersa xicʼon c mel mach bʌ com c mel ti jimbʌ qʼuin. An i tajol maʼañix miʼ mel chuqui yom bʌ i mel jaʼel. Mucʼʌch c wen cʼuxbin come wen uts yicʼot cabʌl chuqui miʼ mel tic tojlel» (Enrico, an i chaʼan ansiedad).