Anquese jiñi Biblia mach jumpʼejlic libro chaʼan bʌ tsʼac, miʼ yʌcʼ wen tac bʌ ticʼojel chaʼan woli bʌ (choncol bʌ) i chaʼleñob wersa i mʌlbeñob (jotbeñob) jiñi ansiedad, depresión o yan tac bʌ cheʼ bʌ bajcheʼ jiñi. Qʼuele jiñi ejemplo tac.

«Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (MATEO 9:12).

Jiñi Biblia miʼ pʌsbeñonla chaʼan an i tajol i cʼʌjñibalʌch mi lac sʌclan laj coltʌntel ti doctor. Cabʌlob añoʼ bʌ i chaʼan ansiedad, depresión o yan tac bʌ cheʼ bʌ bajcheʼ jiñi an i tajayob i tijicñʌyel cheʼ yujilob chuqui woli (yʌquel) i yubiñob i cheʼ mucʼʌch i majlelob ti doctor.

«Jiñi ejercicio mucʼʌch i tsʼitaʼ aqʼueñonla lac wenlel» (1 TIMOTEO 4:8).

Cheʼ bʌ mi lac mel (chaʼlen) chuqui tac wem bʌ chaʼan bʌ lac bʌcʼtal miʼ coltañonla chaʼan tijicña mi la cubin. Miʼ mejlel lac tsʼitaʼ mel ejercicio, wen jach mi laj cʼux lac waj yicʼot mi lac wʌyel ti wen.

«I tijicñʌyel lac pusicʼal i wentajʌch wen bʌ tsʼac. I chʼijiyemlel lac pusicʼal miʼ tiquesan lac bʌcʼtal» (PROVERBIOS 17:22).

Cheʼ bʌ mi lac pejcan texto tac muʼ bʌ i ñuqʼuesan lac pusicʼal yicʼot mi la cʌqʼuen lac bʌ  meta tac mach bʌ wocolic mi caj i coltañonla chaʼan tijicña mi la cubin lac bʌ. Mi wen jach chuqui mi lac ñaʼtan mi caj i coltañonla chaʼan maʼañic mi laj cʌlʌx chaʼlen pensar anquese an lac chaʼan ansiedad o depresión.

«An wen bʌ i ñaʼtʌbal jini muʼ bʌ i peqʼuesan i bʌ» (PROVERBIOS 11:2).

Tajol i cʼʌjñibal a chaʼan a coltʌntel, jin chaʼan jacʼʌ jiñi a coltʌntel. Tajol jiñi a wamigojob o a familia yomʌch i coltañetob, pero mach yujilobic bajcheʼ yom miʼ melob. Jamʌ subeñob chuqui a wom, pero mach a pijtan chaʼan mi caj i luʼ melob jiñi a wom bʌ i aqʼueñob wocolix i yʌlʌ chaʼan muʼ bʌ i melob ti a tojlel.

«Tsaʼ j qʼuele chaʼan an chuqui mach weñic tic tojlel, jin chaʼan tsaʼ majliyon ti doctor. Jiñi xdoctora tiʼ subeyon chuqui woli cubin i jiñi tsiʼ coltayon j qʼuel chaʼan añʌch j cʼamʌjel. Cheʼ jaʼel, tiʼ subeyon chuqui ti tsʼac tac miʼ mejlel c chʼʌm chaʼan miʼ mejlel i coltañoñob» (Nicole, a am bʌ i chaʼan trastorno bipolar).

«Mucʼʌch i coltañon cheʼ bʌ mic pejcan jiñi Biblia ti jujumpʼejl qʼuin quicʼot quijñam. Miʼ yʌqʼueñon c ñaʼtan chuqui tac wem bʌ. An j qʼuele chaʼan añʌch versículo tac muʼ bʌ i ñuqʼuesan c pusicʼal cheʼ bʌ mach tijicñayoñic» (Peter, am bʌ i chaʼan depresión).

«Ti ñaxan mij quisñin c suben yambʌlob chuqui woli cubin. Pero an juntiquil camiga tsaʼ bʌ i chʼʌmbeyon i sujm yicʼot wen jach bajcheʼ tsiʼ coltayon, i jiñi tsiʼ yʌqʼueyon c tijicñʌyel yicʼot chaʼan mach c bajñelic jach mi cubin» (Ji-yoo, tsaʼ bʌ i cʌyʌ i cʼux i waj).

«Jiñi Biblia tsiʼ wen coltayon, wʌle maʼañix mij cʌlʌx chaʼlen eʼtel (troñel) yicʼot muqʼuix j cʼaj co. Jiñi ticʼojel tac an i coltayon chaʼan wen jach chuqui mic ñaʼtan» (Timothy, cʌlʌxix miʼ chaʼlen pensar).