Jiñi i sujmlel chaʼan jiñi talto bʌ qʼuin
¿Am baʼ cʼajtibe a bʌ chuqui mi caj i yujtel ti lac tojlel ti talto bʌ qʼuin? Jiñi Biblia miʼ yʌl chaʼan lʌcʼʌlix mi caj laj qʼuel muʼ bʌ caj i yʌcʼ ti toj sajtel lac pusicʼal i mi caj i tajonla ti lac pejtelel.
Jesús tsiʼ yʌlʌ bajcheʼ miʼ mejlel lac ñaʼtan chaʼan «lʌcʼʌlix i yumʌntel Dios» (Lucas 21:31). Tsiʼ yʌlʌ chaʼan mi caj i yujtel ñuc bʌ guerra tac, pʼʌtʌl bʌ i yujquel lum, wiʼñal yicʼot cʼamʌjel tac muʼ bʌ i pam pujquel, i jiñʌch woli (choncol) bʌ laj qʼuel ti ujtel ili ora (Lucas 21:10-17).
Jiñi Biblia miʼ yʌl chaʼan cheʼ «ti cojix bʌ qʼuin» i yumʌntel jiñi wiñicob jiñi lac piʼʌlob mi caj i pʌsob mach weñic i melbalob (chaʼliyajob). Pejcan ili profecía yaʼ ti 2 Timoteo 3:1-5. a Tiʼ sujm, ili tʼan miʼ tsictesan bajcheʼ yilal i melbal tac jiñi wiñicob xʼixicob (quixtañujob) yaʼ baqui chʼoyolonla.
¿Chuqui yom i yʌl iliyi? Chaʼan tsʼitaʼ jachix yom chaʼan jiñi i Yumʌntel Dios an chuqui tac mi caj i qʼuextan ila ti Pañimil chaʼan ñumen weñix mi lac chumtʌl (Lucas 21:36). Yaʼ ti Biblia, miʼ yʌl chuqui tac wen mi caj i mel Dios ila ti Pañimil yicʼot ti lac tojlel. Laʼ laj qʼuel chaʼpʼejl uxpʼejl ejemplo.
JUMPʼEJL WEM BɅ YUMɅNTEL
Jesús «tsaʼ aqʼuenti i pʼʌtʌlel, yicʼot i ñuclel yicʼot i yumʌntel. Pejtel winicob yujiloʼ bʌ tʼan ti chajp ti chajp tsaʼ caji i yumañob. An i pʼʌtʌlel tiʼ pejtelel ora. Maʼanic miʼ caj ti jilel i yumʌntel» (DANIEL 7:14).
¿Chuqui yom i yʌl? Chaʼan tijicña miʼ mejlel lac chumtʌl cheʼ mi caj i mel i yeʼtel jiñi i Yumʌntel am bʌ i waʼchoco Dios, i an i cʌyʌ jiñi i Yalobil bajcheʼ Rey.
MAʼAÑIX MAJQUI MI CAJ I CʼAMʼAN
«Maʼanix mi juntiquilic muʼ bʌ caj i yʌl: ‹Cʼamon›» (ISAÍAS 33:24).
¿Chuqui yom i yʌl? Chaʼan maʼañix baʼ ora mi caj la cubin wocol tiʼ caj cheʼ an mach bʌ weñic ti lac bʌcʼtal, maʼañix mi caj laj cʼamʼan. Mi caj lac mejlel ti chumtʌl tiʼ pejtelel ora.
ÑɅCHʼTɅLEL TIʼ PEJTELEL ORA
«Miʼ yujtesan guerra cʼʌlʌl tiʼ pejtelel pañimil» (SALMO 46:9).
¿Chuqui yom i yʌl? Chaʼan tiʼ pejtelel ora mi caj la cajñel ti lac ñʌchʼtʌlel come maʼañix mi caj i yujtel guerra tac.
ILI PAÑIMIL MI CAJ I BUJTʼEL TI WEM BɅ QUIXTAÑUJOB
«Cheʼ mi caj a qʼuel jini xjontolil mach yaʼix an. Jini utsoʼ bʌ i pusicʼal mi caj i yʌqʼuentelob i wenlel» ila ti pañimil (SALMO 37:10, 11).
¿Chuqui yom i yʌl? Chaʼan maʼañix mi caj laj qʼuel jiñi jontoloʼ bʌ, cojach mi caj i yajñelob jiñi yom bʌ i jacʼbeñob i tʼan Dios.
ILI PAÑIMIL MI CAJ I SUJTEL TI JUMPʼEJL PARAÍSO
«Mi caj i waʼchocoñob i yotot. Yaʼi mi caj i chumtʌlob. [...] Cheʼ miʼ pʌcʼob tsʼusubil, mi caj i cʼuxbeñob i wut» (ISAÍAS 65:21, 22).
¿Chuqui yom i yʌl? Chaʼan tiʼ pejtelel pañimil mi caj i sujtel ti utsʼatax bʌ pʌcʼʌbʌl. Dios mi caj i mel jiñi woli (yʌquel) bʌ laj cʼajtin: Jiñʌch cheʼ miʼ mel chuqui yom ila «ti pañimil» (Mateo 6:10).
a Miʼ mejlel a pejcan jiñi Biblia ti www.pr418.com.
Miʼ mejlel a qʼuel jaʼel iliyi
CʼAJTIYA TAC CHAʼAN BɅ BIBLIA
¿Chuqui tac mi caj i mel jiñi i Yumʌntel Dios?
Qʼuele chuqui miʼ cajel cheʼ bʌ jiñix i Yumʌntel Dios woliʼ yuman ili Pañimil.
