Jiñi i cʼabaʼ. Dios miʼ subeñonla: «Joñon Jehová. Jiñʌch j cʼabaʼ» (Isaías 42:8, TNM). Yaʼ ti Biblia jiñi i cʼabaʼ Dios lʌcʼʌl ti 7,000 miʼ tilel. Pero ti cabʌl Biblia am bʌ i chaʼleyob ti traducir an jach i cʌyʌyob bajcheʼ lac Yum. Dios yom chaʼan maʼ sujtel tiʼ yamigo, jin chaʼan yom chaʼan maʼ pejcan tiʼ cʼabaʼ (Salmo 105:1).

Yan tac bʌ bajcheʼ miʼ subentel. Ti jiñi Biblia, Jehová miʼ pejcʌntel bajcheʼ Dios, mach bʌ añic i pʼisol i pʼʌtʌlel, tsaʼ bʌ i meleyonla, lac Tat yicʼot i Yum panchan yicʼot pañimil. An cabʌl oración tac muʼ bʌ lac taj yaʼ ti Biblia baqui Jehová yambʌ bajcheʼ miʼ pejcʌntel (Daniel 9:4).

 ¿Bajcheʼ yilal? Dios espíritujʌch (Juan 4:24). Jiñi Biblia miʼ subeñonla chaʼan ‹maʼañic majqui an i qʼuele Dios› (Juan 1:18). Miʼ subeñonla jaʼel chaʼan añʌch bajcheʼ miʼ yubin i bʌ tiʼ pusicʼal. Jiñi muʼ bʌ lac mel (chaʼlen) miʼ mejlel i tijicñesan o miʼ yʌqʼuen i chʼijiyemlel (Salmo 78:40, 41; Proverbios 27:11).

Jiñi utsʼatax bʌ i melbal tac. Junlajal miʼ qʼuel Dios pejtelel wiñicob xʼixicob (quixtañujob), mach yʌlʌyic baqui chʼoyolob o bajcheʼ yilalob (Hechos 10:34, 35). Cheʼ jaʼel, miʼ pʌs i pʼuntaya, i yutslel, i pijt, jiñi i sujm bʌ cʼuxbiya yicʼot tiʼ pejtelel ora miʼ yʌl i sujmlel (Éxodo 34:6, 7). Pero an chʌnchajp i melbal ñumen ñuc bʌ.

I pʼʌtʌlel. Jiñʌch jiñi ‹Pʼʌtʌl bʌ Dios›. Ili yom i yʌl chaʼan miʼ mejlel i tsʼʌctesan chuqui tac albil i chaʼan (Génesis 17:1).

I ñaʼtʌbal. Maʼañic majqui miʼ tajben i ñaʼtʌbal Dios. Jin chaʼan, jiñi Biblia miʼ yʌl chaʼan jiñʌch jiñi «cojach bʌ Dios am bʌ i ñaʼtʌbal» (Romanos 16:27).

Miʼ mel chuqui toj. Tiʼ pejtelel ora, Dios miʼ mel chuqui toj. «Tojʌch pejtelel muʼ bʌ i mel» yicʼot «maʼanic i mul» come maʼañic miʼ mel mach bʌ weñic (Deuteronomio 32:4).

I cʼuxbiya. Jiñi Biblia miʼ yʌl chaʼan «cʼuxbiyajʌch Dios» (1 Juan 4:8). Mach cojach miʼ pʌs ili melbal, jiñʌch jiñi cʼuxbiya. Pejtelel chuqui miʼ mel jiñʌch tiʼ cʼuxbiya, i jiñi, cabʌl bajcheʼ miʼ yʌqʼueñonla lac wenlel.

Miʼ sujtesan tiʼ yamigojob jiñi quixtañujob. Dios jiñʌch lac Tat am bʌ ti panchan muʼ bʌ i wen cʼuxbiñonla (Mateo 6:9). Mi añʌch lac ñopoñel (chʼujbiya) tiʼ tojlel, miʼ mejlel lac sujtel tiʼ yamigo (Salmo 25:14). Dios yom chaʼan mi lac lʌcʼtesan lac bʌ tiʼ tojlel cheʼ mi lac pejcan ti oración i mi lac suben pejtelel jiñi wocol tac am bʌ lac chaʼan come miʼ wen cʼojoʼtan bajcheʼ añonla (Santiago 4:8; 1 Pedro 5:7).

Jesús mach jiñic Dios. Maʼañic yambʌ bajcheʼ Jesús come Dios jin tsiʼ bajñel mele. Jin chaʼan, jiñi Biblia miʼ yʌl chaʼan i Yalobilʌch Dios (Juan 20:31). Jehová tsiʼ mele jiñi Jesús, jiñi ñaxam bʌ i yalobil, i tsiʼ waʼchoco bajcheʼ juntiquil wem bʌ xʼeʼtel chaʼan miʼ coltan i mel chuqui tac an ti panchan yicʼot ila ti Pañimil (Proverbios 8:30, 31; Colosenses 1:15, 16).

 Jesús maʼañic baʼ ora tsiʼ yʌlʌ chaʼan jiñʌch Dios. Tsiʼ jamʌ alʌ: «Chʼoyolon yaʼ baʼan [Dios]. Tsiʼ chocoyon tilel» (Juan 7:29). Cheʼ bʌ wolito (choncolto) i pejcan juntiquil xʼixic xcʌntʼan bʌ i chaʼan, Jesús tiʼ sube Jehová bajcheʼ «c Tat, jiñʌch laʼ Tat jaʼel» yicʼot «c Dios, jiñʌch laʼ Dios jaʼel» (Juan 20:17). Cheʼ bʌ tsaʼ chʌmi (sajti), Jehová tsiʼ chaʼ cuxtesa chaʼan miʼ chumtʌl yaʼ ti panchan, tsiʼ yʌcʼʌ chaʼan miʼ buchtʌl tiʼ ñoj yicʼot tsiʼ yʌqʼue cabʌl i pʼʌtʌlel (Mateo 28:18; Hechos 2:32, 33).

Jesucristo miʼ mejlel i coltañet chaʼan maʼ lʌcʼtesan a bʌ ti Dios

Tsajñi ila ti Pañimil chaʼan miʼ pʌsbeñonla bajcheʼ yilal i Tat. Jehová tsiʼ yʌlʌ tiʼ tojlel Jesús: «Jiñʌch calobil, cʼux bʌ mi cubin. Ñichʼtanla» (Marcos 9:7). Jesús jiñʌch i ñumen cʌñʌ bʌ Dios. Tsiʼ yʌlʌ: «Maʼanic majqui miʼ cʌn c Tat cojach joñon come i Yalobilon. Miʼ cʌñob c Tat jaʼel majqui jach mi cʌqʼuen i cʌn» (Lucas 10:22).

Miʼ pʌs ti toj jiñi utsʼatax bʌ i melbal tac Dios. Jesús tsaʼ mejli i wen pʌs jiñi wen tac bʌ i melbal i Tat, jin chaʼan tsiʼ yʌlʌ: «Jini tsaʼ bʌ i qʼueleyon, tsaʼix i qʼuele c Tat» (Juan 14:9). Jesús tsiʼ colta jiñi quixtañujob chaʼan miʼ lʌcʼtesañob i bʌ ti Dios come tiʼ tʼan yicʼot tiʼ melbal tsiʼ pʌsbeyob chaʼan jiñi i Tat miʼ cʼuxbiñob. Jesús tsiʼ yʌlʌ: «Joñon i bijlelon isujmlelon, i cuxtʌlelon. Maʼanic majch miʼ cʼotel baʼan c Tat, jini jach am bʌ tic wenta» (Juan 14:6). Cheʼ jaʼel tsiʼ yʌlʌ: «Mi caj i chʼujutesañob lac Tat tiʼ Espíritu cheʼ jaʼel ti isujm jini mero xchʼujutesayajob. Come lac Tat jaʼel miʼ sajcan jini muʼ bʌ i chʼujutesañob cheʼ bajcheʼ jini» (Juan 4:23). ¡Ñaʼtancu! Jehová woli (yʌquel) i sʌclan quixtañujob bajcheʼ jatet, yomoʼ bʌ i cʌn jiñi i sujm bʌ tiʼ tojlel.