«Mi caj i tilelob baʼ añet pejtel winicob xʼixicob, come jatet maʼ ñichʼtʌbeñob i yoración» (Salmo 65:2).

An lac piʼʌlob muʼ bʌ i melob oración chaʼan tijicña miʼ yubiñob i bʌ, anquese miʼ ñaʼtañob chaʼan maʼañic majqui woli (choncol) i ñʌchʼtañob. Pero yom mi lac ñaʼtan chaʼan jiñi oración mach cojach miʼ yʌqʼueñonla la cubin lac tijicñʌyel cheʼ woli (yʌquel) lac ñusan wocol. Jiñi Biblia miʼ yʌl chaʼan Jehová * lʌcʼʌl an «tiʼ tojlel pejtel muʼ bʌ i pejcañob tiʼ pejtelel i pusicʼal [...]. Miʼ yubibeñob i tʼan cheʼ miʼ pejcañob» (Salmo 145:18, 19).

Jin chaʼan, mucʼʌch i mejlel lac ñop chaʼan Jehová miʼ ñʌchʼtʌben i yoración jiñi muʼ bʌ i chʼujutesañob. Jehová tiʼ yutslel i pusicʼal miʼ subeñonla: «Cheʼ jini mi caj laʼ pejcañon. Mi caj laʼ tilel laʼ pejcañon ti oración. Joñon mi caj cubibeñetla laʼ tʼan» (Jeremías 29:12).

«Pejcanla Dios tiʼ pejtelel ora» (Romanos 12:12).

Jiñi Biblia miʼ subeñonla chaʼan mach yʌlʌyic baqui añonla, miʼ mejlel lac melben oración Dios tiʼ pejtelel ora. Ili miʼ pʌsbeñonla chaʼan Jehová yom chaʼan mi lac melben oración (Mateo 26:41; Efesios 6:18).

¿Chucoch yom Dios chaʼan mi lac melben oración? Laʼcu lac ñaʼtan ili ejemplo: ¿Am ba juntiquil tatʌl mach bʌ añic miʼ mulan cheʼ bʌ jiñi i yalobil miʼ cʼajtin i coltʌntel? Tajol juntiquil tatʌl yujilix chuqui yom i yalobil o bajcheʼ yubil miʼ yubin i bʌ, pero cheʼ bʌ miʼ ñʌchʼtʌben i tʼan, jiñi i tat mi caj i qʼuel chaʼan jiñi i yalobil mucʼʌch i qʼuel ti ñuc, i chaʼan mucʼʌch i cʼuxbin. Joñonla jaʼel, cheʼ mi lac melben oración Jehová mi lac pʌs chaʼan mi laj qʼuel ti ñuc yicʼot chaʼan la com lac lʌcʼtesan lac bʌ tiʼ tojlel (Proverbios 15:8; Santiago 4:8).

«Acʼʌ tiʼ wenta Dios pejtelel laʼ cʼojʼol, come woliʼ cʌntañetla» (1 Pedro 5:7).

Dios yom chaʼan mi lac melben oración come miʼ cʼuxbiñonla yicʼot miʼ qʼuelonla ti ñuc. Mucʼʌch i qʼuel jiñi lac wocol tac yicʼot yom i coltañonla.

Cheʼ bʌ cuxulto jiñi rey David, tsiʼ cʼajtibe i coltaya Jehová. Tsiʼ sube chuqui muʼ bʌ i ñaʼtan yicʼot bajcheʼ yubil miʼ yubin i bʌ (Salmo 23:1-6). ¿Bajcheʼ yilal tsiʼ qʼuele Dios jiñi David? Tsiʼ wen cʼuxbi yicʼot tsiʼ ñʌchʼtʌbe i yoración (Hechos 13:22). Ili ora, Dios mucʼʌch i ñʌchʼtan la coración come mucʼʌch i qʼuelonla ti ñuc.

Ili tʼan mi lac taj yaʼ ti salmos am bʌ yaʼ ti Biblia. Jiñi tsaʼ bʌ i tsʼijbu iliyi, yujil chaʼan Jehová mucʼʌch i ñʌchʼtʌben i yoración, i jiñʌch tsaʼ bʌ i wen colta. Ñumen lʌcʼʌl tsiʼ yubi i bʌ ti Dios yicʼot tsaʼʌch cʼoti i taj i pʼʌtʌlel chaʼan miʼ lʌtʼ jiñi wocol tac (Salmo 116:1-9).

Miʼ mucʼʌch lac ñop chaʼan Dios miʼ ñʌchʼtañonla, maʼañic mi caj laj cʌy lac mel oración. Laʼ laj qʼuel chuqui tsaʼ ujti tiʼ tojlel juntiquil wiñic i cʼabaʼ Pedro chumul bʌ tiʼ nortejlel jiñi España. Jiñi i yalobil am bʌ 19 i jabilel tsaʼ chʌmi (sajti) ti jumpʼejl accidente ti carro. Ti jimbʌ ora, Pedro tsiʼ sube Dios bajcheʼ yubil miʼ yubin i bʌ, i tsiʼ cʼajtibe i coltaya chaʼan miʼ lʌtʼ jiñi wocol. ¿Chuqui tsaʼ ujti? Pedro miʼ yʌl: «Jehová tsaʼʌch i jacʼʌ coración. Tsaʼ j qʼuele chaʼan Dios tsiʼ cʼʌñʌ yambʌ xñoptʼañob, chaʼan mij coltʌntel lojon quicʼot quijñam».

Anquese jiñi oración maʼañic tsiʼ chaʼ cuxtesʌbe i yalobil, tsaʼʌch i wen colta Pedro yicʼot i familia. Jiñi i yijñam i cʼabaʼ María del Carmen, miʼ cʼajtesan: «Jiñi oración tsaʼʌch i coltayon chaʼan mic lʌtʼ jiñi chʼijyemlel. Cujil chaʼan Jehová mucʼʌch i chʼʌmben i sujm woli bʌ c ñusan come cheʼ bʌ mic mel oración tijicña mi cubin c bʌ».

Jiñi muʼ bʌ i yʌl jiñi Biblia yicʼot muʼ bʌ i yʌl yambʌ lac piʼʌlob miʼ pʌsbeñonla chaʼan Dios mucʼʌch i ñʌchʼtan la coración. Pero Dios maʼañic miʼ luʼ jacʼ tiʼ pejtelel jiñi oración. Cheʼ jiñi, ¿chucoch an jach oración muʼ bʌ i jacʼ jiñi Dios i jiñi yan tac bʌ maʼañic?