María, Raúl, Arne yicʼot jiñi yambʌ lac piʼʌlob an i qʼueleyob ti ñuc jiñi oración. Miʼ yubiñob chaʼan wolʌch i pejcañob Dios, chaʼan miʼ yʌqʼueñob wocolix i yʌlʌ yicʼot chaʼan miʼ sʌclʌbeñob i coltaya. Cheʼʌch miʼ ñaʼtañob jaʼel cheʼ bajcheʼ miʼ yʌl jiñi Biblia: «Chʼejl lac pusicʼal tiʼ tojlel Dios, come la cujil miʼ yubibeñonla chuqui jach mi laj cʼajtiben cheʼ bajcheʼ yom i pusicʼal» (1 Juan 5:14).

Pero an cabʌlob wocol bʌ miʼ yubiñob chaʼan miʼ ñopob chuqui miʼ yʌl jiñi Biblia chaʼan jiñi oración. Steve miʼ subeñonla chuqui am bʌ i pensari: «Cheʼ bʌ an jaxto 17 c jabilel, uxtiquil camigo tsaʼ chʌmiyob: Juntiquil tsiʼ taja accidente i jiñi yambʌ chaʼtiquilob tsaʼ chʌmiyob  yaʼ ti mar». ¿Chuqui tsiʼ mele Steve? «Tsaʼ c pejca Dios ti oración i tsaʼ j cʼajtibe chucoch cheʼ tsaʼ ujti bajcheʼ jiñi, pero maʼañic tsiʼ jacʼbeyon. Jin chaʼan, tsaʼ j cʼajtibe c bʌ: ‹¿Anto ba i cʼʌjñibal jiñi oración?›». Cabʌl an yubiyob i bʌ bajcheʼ ili, i an i cʼajtibeyob i bʌ jaʼel mi an i cʼʌjñibal jiñi oración.

An yambʌ lac piʼʌlob muʼ bʌ i yʌlob chaʼan maʼañic i cʼʌjñibal jiñi oración come Dios luʼ yujilix baqui bʌ jiñi lac wocol yicʼot chuquito la com. Miʼ luʼ yujilix, ¿chuquito i cʼʌjñibal mi lac suben muʼ bʌ lac ñusan?

Yambʌlob miʼ ñaʼtañob chaʼan maʼañic miʼ ñʌchʼtʌbentelob i yoración ti Dios, tiʼ caj tsiʼ meleyob mach bʌ weñic ti wajali. Jenny miʼ yʌl: «Jiñi ñumen wocol bʌ mi cubin, jin cheʼ maʼañic j cʼʌjñibal miʼ cubin c bʌ. An c mele muʼ bʌ i chaʼ wiʼil aqʼueñon c ñaʼtan c bʌ, cujil chaʼan mach i wentʌlelic miʼ ñʌchʼtañon Dios».

Ixcu jatet, ¿chuqui maʼ ñaʼtan? ¿Am ba cʼotem a ñaʼtan jaʼel bajcheʼ ili? Mi cheʼʌchi, mi caj a wubin a tijicñʌyel cheʼ maʼ cʌn chaʼan jiñi Biblia miʼ mejlel i yʌqʼueñet i jacʼbal jiñi a wom bʌ a ñaʼtan. Miʼ mejlel a ñop muʼ bʌ i subeñet jiñi Biblia chaʼan jiñi oración. * Mi caj i coltañet a jacʼ ili cʼajtiya tac:

• ¿Muʼ ba i ñʌchʼtan Dios jiñi la coración?

• ¿Chucoch Dios maʼañic miʼ ñʌchʼtan tiʼ pejtelel jiñi oración?

• ¿Bajcheʼ yom mi lac mel oración chaʼan Dios miʼ ñʌchʼtañonla?

• ¿Bajcheʼ miʼ mejlel i coltañet jatet jiñi oración?