DOREEN toj sajtel i pusicʼal cheʼ bʌ jiñi i ñoxiʼal, i cʼabaʼ Wesley, an jaxto bʌ 54 i jabilel, tsaʼ tajbenti jumpʼejl jontol bʌ tumor tiʼ sicojc. * Jiñi doctorob tiʼ subeyob chaʼan chaʼpʼejl uxpʼejl jax uw cuxul. Doreen miʼ yʌl: «Maʼañic tsaʼ mejli c ñop, cabʌl semana tsaʼ c wen pensali. Mach joñoñic lojon woli c ñusan tsaʼ cubi. Mach chajpʌbiloñic chaʼan jiñi».

Chʼijiyemtic jax yubil, pero i tilelʌch cheʼ mi la cubin lac bʌ bajcheʼ Doreen. Majqui jach miʼ mejlel i taj wocol tiʼ caj cʼamʌjel mach bʌ añic i tsʼʌcal. Cabʌl majqui yom bʌ mi la cʌqʼueñob i tijicñesʌntel come tiʼ pejtelelob i pusicʼal miʼ cʌntañob juntiquil cʼam bʌ. Pero tsʌtsʌch bʌ wocol cheʼ mi laj cʌntan juntiquil xcʼamʌjel. ¿Chuqui miʼ mejlel i melob jiñi familia chaʼan miʼ ñuqʼuesʌbeñob i pusicʼal yicʼot miʼ cʌntañob jiñi am bʌ i cʼamʌjel mach bʌ añix i tsʼʌcal? ¿Bajcheʼ miʼ mejlel i ñusañob i chʼijiyemlel yicʼot yan tac bʌ i cʼojol jiñi woli bʌ i cʌntañob jiñi cʼam bʌ? Cheʼ bʌ wolix i lʌcʼtiyel i chʌmel, ¿chuqui miʼ mejlel i melob? Laʼ lac ñaxan qʼuel chucoch wocolʌch i cʌntʌntel juntiquil cʼam bʌ.

Añix cheʼ bʌ 100 jab, mi jiñic to jiñi ñuc tac bʌ tejclum miʼ mejlel i tamʼesʌbeñob i cuxtʌlel jiñi cʼamoʼ bʌ. Jiñi quixtañujob miʼ chʌmelob tiʼ caj jiñi cʼamʌjel o yan tac bʌ muʼ bʌ i yujtel tiʼ tojlelob. Cabʌl maʼañic bʌ miʼ mejlelob ti majlel ti jumpʼejl hospital i jin jach jiñi i familia miʼ cʌntañob i yaʼ miʼ chʌmelob ti yotot.

Ili ora, jiñi ciencia miʼ coltan jiñi doctorob chaʼan miʼ cʼʌñob pʼʌtʌl tac bʌ tsʼac muʼ bʌ i mejlel i tsʼitaʼ tamʼesan lac jabilel. Wajali an cʼamʌjel tac orajach bʌ miʼ mejlel i tsʌnsan quixtañujob, pero wʌleʼli mach cheʼixi. Pero iliyi mach yomic i yʌl chaʼan mi caj i junyajl cʼocʼañob. An i tajol, miʼ yubibeñob i cʼuxel i bʌcʼtal i maʼañix chuqui miʼ mejlel i bajñel melob. I ñumen wocol to chaʼan mi laj cʌntañob i mi lac wen lujbʼan.

 Jin chaʼan, ñumen cabʌl muʼ bʌ i chʌmelob ti hospital bajcheʼ tiʼ yototob. Cabʌl mach bʌ yujilobic bajcheʼ miʼ chʌmel juntiquil quixtañu, i mach cabʌlobic jiñi qʼuelbiloʼ bʌ i chaʼan. Jin chaʼan, an muʼ bʌ i bʌcʼñan i cʌntañob juntiquil cʼam bʌ come mach yujilobic chuqui yom miʼ melob. ¿Chuqui miʼ mejlel i coltañob?

Cheʼ bajcheʼ mi laj qʼuel tiʼ tojlel Doreen, cabʌl wen chʼijiyem bʌ miʼ yubiñob i bʌ cheʼ bʌ juntiquil tiʼ familia miʼ tajbentel i cʼamʌjel mach bʌ añix i tsʼʌcal. ¿Bajcheʼ miʼ mejlel i coltañet a chajpan a bʌ cheʼ woli a ñusan ili tsʌts bʌ wocol? Juntiquil xucʼul bʌ i wiñic Dios tsiʼ yʌlʌ tiʼ yoración: «Cʌntesañon lojon chaʼan mic ñaʼtan lojon maʼanic jaypʼejl lojon j qʼuiñilel chaʼan mic taj cabʌl lojon c pusicʼal» (Salmo 90:12). Suben Dios chaʼan miʼ coltañet a «ñaʼtan» ti wen chuqui yom mi a mel cheʼ cuxulto jiñi cʼam bʌ ti a familia.

Chaʼan miʼ mejlel, yomʌch miʼ wen chajpʌntel. Mi jiñi cʼam bʌ muʼto i mejlel ti tʼan i an chuqui yom i tsictesan, miʼ mejlel ti cʼajtibentel majqui mi caj i yʌl chuqui miʼ mejlel cheʼ baqui ora maʼañix mi mejlel ti tʼan. Cheʼ jamʌ tsiquil miʼ yʌl chuqui yom miʼ melbentel, maʼañic mi caj i wen tejchel wocol i maʼañic mi caj i wen ubiñob i chʼijiyemlel cheʼ miʼ yʌlob chuqui mi caj i melob tiʼ tojlel. Jumpʼejl ejemplo, miʼ mejlel i yʌl mi yom chaʼan miʼ cʼʌjñel alʌ máquina chaʼan miʼ chaʼ cuxtesʌntel, mi yom miʼ yotsañob ti doctor o miʼ yʌqʼueñob yambʌ tsʼac tac. Cheʼ miʼ yujtel wem bʌ tʼan mi caj i coltan jiñi familia chaʼan miʼ cʌntan ti wen jiñi cʼam bʌ cheʼ miʼ ñijlel majlel i cʼamʌjel. Jiñi Biblia miʼ yʌl: «Mucʼʌch i joloñel tiʼ pejtelel cheʼ miʼ temob i tʼan cheʼ cabʌlob» (Proverbios 15:22).

I yeʼtel jiñi muʼ bʌ i chaʼlen cʌntaya jiñʌch chaʼan miʼ yʌqʼuen i tijicñʌyel jiñi cʼam bʌ. Jiñi cʼam bʌ yom miʼ subentel chaʼan mucʼʌch i cʼuxbintel i chaʼan mach i bajñelic. ¿Bajcheʼ miʼ mejlel ti coltʌntel? Jiñʌch cheʼ miʼ pejcʌbentel jun tac yicʼot miʼ cʼʌyibentel cʼay muʼ bʌ i mulan yicʼot miʼ coltan. Cheʼ jaʼel, an muʼ bʌ i yubiñob i tijicñʌyel cheʼ bʌ juntiquil i cʌñʌ bʌ miʼ chucben i cʼʌb i wen jach miʼ pejcan.

Cheʼ jaʼel, jiñi muʼ bʌ i cʼotelob i julaʼtan yom miʼ subob i cʼabaʼ. Jumpʼejl informe miʼ yʌl: «Miʼ yʌjlel chaʼan juntiquil quixtañu muʼto i mejlel i yubin tʼan anquese wen wʌyʌlix yilal. Jin chaʼan, mach yomic mi la cʌl tʼan tac mach bʌ la cʌlʌyic cheʼ cañal i wut».

Mi mucʼʌch i mejlel, tem chaʼlenla oración. Ti Biblia miʼ yʌl chaʼan ti jumpʼejl bʌ qʼuin jiñi apóstol  Pablo yicʼot i piʼʌlob tsiʼ tajayob wocol i tsiʼ bʌcʼñayob miʼ chʌmel. ¿Chuqui tiʼ coltaya tsiʼ sʌclayob? Pablo tsiʼ cʼajtibe ti wocol tʼan jiñi i yamigojob chaʼan miʼ melob oración tiʼ tojlelob (2 Corintios 1:8-11). Wen ñuc i cʼʌjñibal cheʼ mi lac mel oración tiʼ pejtelel lac pusicʼal chaʼan miʼ coltañonla cheʼ woli lac ñusan tsʌts bʌ cʼamʌjel o cʌlʌx pensal.

Miʼ wen aqʼueñonla lac chʼijiyemlel cheʼ juntiquil ti lac familia wolix i chʌmel. Cheʼʌch mi la cubin come mach i wentʌlelic mi lac chʌmel. Maʼañic tsaʼ mejliyonla chaʼan mi lac chʌmel (Romanos 5:12). Jiñi i Tʼan Dios miʼ yʌl chaʼan jiñi chʌmel jiñʌch laj «contra» (1 Corintios 15:26). Jin chaʼan, maʼañic miʼ mejlel lac ñop yubil cheʼ miʼ chʌmel juntiquil cʼux bʌ mi la cubin.

Cheʼ jiñi familia mero yujilix chuqui miʼ caj ti yujtel, miʼ mejlel i coltan chaʼan maʼañic miʼ cʌlʌx cʼojoʼtañob i bʌ i miʼ melob jiñi yom bʌ melol chaʼan miʼ mejlel i ñusañob jiñi wocol. Ti jiñi recuadro « Cheʼ tsʼitaʼ jax yom miʼ chʌmel» miʼ yʌl bajcheʼ yubil miʼ yubin jiñi wen cʼamix bʌ. Tajol mach tiʼ pejtelelobic mi caj i yubiñob bajcheʼ iliyi. Pero lʌcʼʌ tiʼ pejtelelob mucʼʌch i ñusañob chaʼpʼejl uxpʼejl jiñi muʼ bʌ i yʌjlel yaʼ ti recuadro.

Cheʼ bʌ miʼ chʌmel juntiquil cʼux bʌ mi la cubin, wen cheʼ mi lac chaʼlen tʼan yicʼot juntiquil la camigo yom bʌ i coltañonla. Jiñi xcʌntayajob yicʼot jiñi i familia yom miʼ coltʌntelob yicʼot miʼ subentelob chaʼan tsaʼix ñumi jiñi ñumen tsʌts bʌ i jiñi cʼam bʌ tsaʼix i cʌyʌ i yilan wocol. Jiñi tsaʼ bʌ i Meleyonla, ti uts bʌ tʼan miʼ subeñonla chaʼan «maʼanix chuqui yujilob jini chʌmeñobix bʌ» (Eclesiastés 9:5).

Ñuc i cʼʌjñibal cheʼ mi la cʌcʼ lac ñopoñel ti Dios, mach cojic jach cheʼ juntiquil ti lac familia woliʼ ñusan cʼamʌjel mach bʌ añic i tsʼʌcal, yicʼotʌch jaʼel cheʼ tsʼitaʼ añix ora i chʌmel. Dios miʼ mejlel i ñuqʼuesan lac pusicʼal ti uts tac bʌ tʼan yicʼot wen tac bʌ i melbal yambʌ lac piʼʌlob. Doreen miʼ yʌl: «Tsaʼ j cʌñʌ chaʼan cheʼ bʌ an majqui yom i coltañon, mach yomic mic suben chaʼan maʼañic. Ñumento tsaʼ coltʌntiyon lon bajcheʼ tsaʼ lon c ñaʼta. Jiñi c ñoxiʼal yicʼot joñon tsaʼ lon c ñopo chaʼan jiñʌch Jehová woli bʌ i subeñon lojon: ‹Añon quicʼotetla chaʼan mij coltañetla laʼ ñusan jiñi wocol›. Mach wis ñajʌyic c chaʼan».

Tiʼ sujm, Jehová jiñʌch jiñi ñumen wem bʌ xcʌntaya. Miʼ chʼʌmben isujm lac wocol come jiñʌch tsiʼ Meleyonla. Mucʼʌch i mejlel yicʼot yomʌch i coltañonla yicʼot i yʌqʼueñonla lac chʼejlel chaʼan mi lac chʌn chaʼlen wersa. Pero jiñi ñumen wem bʌ jiñʌch albil bʌ i chaʼan chaʼan mi caj i junyajlel jisan jiñi chʌmel i miʼ chaʼ chʼojyesan yonlel quixtañujob am bʌ tiʼ ñaʼtʌbal (Juan 5:28, 29; Apocalipsis [Revelación] 21:3, 4). Cheʼ miʼ tsʼʌctiyel iliyi mi caj i mejlel laj cʌl tsaʼ bʌ i yʌlʌ jiñi apóstol Pablo: «¿Bacan i cʼuxel cheʼ mi lac chʌmel? ¿Bacan miʼ mʌjlel i chaʼan jini mucoñibʌl?» (1 Corintios 15:55).