CABΛL chuqui miʼ yʌjlel chaʼan jiñi cuxtʌlel yicʼot chʌmel (sajtel). An muʼ bʌ i ñaʼtañob chaʼan cheʼ bʌ miʼ chʌmelob, miʼ majlelob ti chumtʌl ti yambʌ parte. Yambʌ miʼ ñaʼtañob chaʼan mi caj i chaʼ yilañob pañimil (chʼocʼañob). Yicʼot an muʼ bʌ i ñaʼtañob chaʼan cheʼ mi lac chʌmel yaʼix jaxʌl mi lac jilel.

Tajol jatet yambʌ bajcheʼ maʼ ñaʼtan, cheʼʌch bajcheʼ yicʼot baqui tsaʼ cosʌntiyet. Ili ora, cabʌl chuqui miʼ yʌjlel chaʼan iliyi, pero ¿tiʼ sujm ba miʼ mejlel lac ñaʼtan chuqui mi lac chaʼlen cheʼ bʌ mi lac chʌmel?

Cʼʌlʌl ti wajali, jiñi ñaxañoʼ bʌ ti ñopbalʌl an i yʌlʌyob chaʼan jiñi lac chʼujlel mach yujilic chʌmel. Lʌcʼʌ tiʼ pejtelel jiñi ñopbalʌl, jiñi cristianismo, hinduismo, judaísmo, yicʼot jiñi islam, miʼ yʌlob chaʼan jiñi lac chʼujlel maʼañic miʼ jilel cheʼ mi lac chʌmel, i chaʼan miʼ majlel ti chumtʌl yaʼ baqui an jiñi espíritujob. Jiñi budistajob miʼ ñopob chaʼan juntiquil quixtañu mach junsujtel jach miʼ chʼocʼan jinto baʼ jaxʌl maʼañix miʼ yilan wocol i junyajlel tijicñayix miʼ yubin, ili jiñʌch cʌmbil bʌ ti español bajcheʼ Nirvana.

Tiʼ caj ili cʌntesʌntel tac, yonlel quixtañu miʼ ñaʼtañob chaʼan cheʼ mi lac chʌmel, mi laj cʼaxel ti chumtʌl ti yambʌ parte. Jin chaʼan, cabʌl miʼ qʼuelob ti ñuc jiñi chʌmel come miʼ ñaʼtañob chaʼan Dios cheʼʌch tsiʼ chajpa. Pero ¿chuqui miʼ yʌl jiñi Biblia? Mic poj subeñet lojon chaʼan maʼ pejcan jiñi yambʌ temaj. Tajol toj sajtel a pusicʼal cheʼ maʼ qʼuel i jacʼbal jiñi cʼajtiya.