¿Muʼ ba i mejlel lac ñop chaʼan Dios mi caj i tsʼʌctesan pejtelel jiñi albil bʌ i chaʼan? Jesús tsaʼʌch i ñopo, i pejtelel jiñi tsaʼ bʌ i ñʌchʼtʌbeyob i cʌntesa tsiʼ pʼʌtʼayob i ñopoñel. Jumpʼejl ejemplo, ñaʼtan ili lajiya tsaʼ bʌ i yʌlʌ tiʼ Cʌntesa yaʼ ti Bujtʌl, mi lac taj ti Mateo 5:18: «Come isujm mic subeñetla, mach mejlic ti sujcuntel loqʼuel mi jumpʼejlic jota mi jumpʼejlic punto ti jini mandar cʼʌlʌl tiʼ jilibal pañimil yicʼot panchan, cʼʌlʌl jinto miʼ tsʼʌctiyel pejtelel i subal».

Jiñi ñumen chʼoʼchʼoc bʌ letra am bʌ ti tʼan hebreo jiñʌch י (yod), ñaxam bʌ letra i chaʼan jiñi Tetragrámaton, jiñi chʼujul bʌ i cʼabaʼ Dios, Jehová. * Jiñi xtsʼijbayajob yicʼot fariseojob mach cojic jach tsiʼ qʼueleyob ti ñuc jiñi tʼan tac o letra tac am bʌ tiʼ Mandar Dios yicʼotʌch ja’el jiñi alʌ letra tac bajcheʼ jumpʼejl jota o alʌ punto.

Jesús tsiʼ yʌlʌ chaʼan jiñi panchan yicʼot Pañimil miʼ mejlel ti jilel, pero mi jumpʼejlic alʌ letra am bʌ ti jiñi mandar mi caj i toʼol jilel. Jiñi tsʼijbujel miʼ yʌl chaʼan jiñi panchan yicʼot pañimil mi caj i yajñel tiʼ pejtelel ora (Salmo 78:69). Jin chaʼan, yicʼot iliyi tsiquil chaʼan jiñi tsaʼ bʌ i yʌcʼʌ ti ñaʼtʌntel Jesús jiñʌch chaʼan pejtelel jiñi albil bʌ miʼ caj ti luʼ tsʼʌctiyel.

¿Muʼ ba i qʼuel ti ñuc Jehová jiñi mach bʌ ñuquix tac i cʼʌjñibal yilal? Mucʼʌch. Ñaʼtan iliyi: Jiñi israelob tsaʼ subentiyob chaʼan mach yomic miʼ xulbeñob mi jumpʼejlic i bʌquel jiñi tʌñʌmeʼ chaʼan pascua (Éxodo 12:46). Tajol iliyi maʼañic i cʼʌjñibal yilal. ¿Yujiloʼ ba chucoch mach yomic miʼ xulbeñob mi jumpʼejlic i bʌquel? Tajol maʼañic. Pero Jehová yujil chaʼan añʌch jumpʼejl i sujmlel: Chaʼan jiñi Mesías maʼañic mi caj i xulbentel mi jumpʼejlic i bʌquel cheʼ ba ora miʼ tsʌnsʌntel (Salmo 34:20; Juan 19:31-33, 36).

Jiñi i tʼan tac Jesús miʼ yʌqʼueñonla lac ñop jaʼel chaʼan pejtelel jiñi albil bʌ i chaʼan Jehová miʼ cajel ti tsʼʌctiyel. Jiñi alʌ letra am bʌ ti tʼan Hebreo miʼ yʌqʼueñonla lac ñumen pʼʌtʼesan lac ñopoñel