¿Chucoch i cʼʌjñibal lac chaʼan jiñi i Yumʌntel Dios?
Cheʼ bʌ jiñi Dios, i cʼabaʼ Jehová, tsiʼ mele (pʌtʌ) jiñi ñaxam bʌ wiñic yicʼot xʼixic, jin jach an bajcheʼ Yumʌl i miʼ mel yicʼot i cʼuxbiya. Jin chaʼan, tsiʼ melbeyob utsʼatax bʌ i chumlib, yaʼ tiʼ pʌcʼʌbʌl Edén, baqui an cabʌl bʌlñʌcʼʌl. Yicʼot tsiʼ yʌqʼueyob wem bʌ eʼtel (troñel) (Génesis 1:28, 29; 2:8, 15). Tsaʼic i jacʼʌyob chaʼan Dios miʼ bej yumañob, jiñi wiñicob xʼixicob (quixtañujob) bej añobto i ñʌchʼtʌlel.
Jiñi ñaxam bʌ wiñic yicʼot xʼixic maʼañic tsiʼ chʼujbiyob chaʼan Dios miʼ yumañob.
Jiñi Biblia miʼ yʌl chaʼan juntiquil jontol bʌ ángel, Satanás, jiñi Diablo, tsiʼ yʌlʌ chaʼan mach weñic miʼ chaʼlen yumʌntel Dios. Tsiʼ yʌcʼʌ ti ñaʼtʌntel chaʼan jiñi quixtañujob ñumen tijicñayob cheʼ mach jiñic Dios miʼ yumañob. Chʼijiyemtic jax, pero jiñi Adán yicʼot Eva, tsiʼ jacʼbeyob i tʼan Satanás i tsaʼ sujtiyob tiʼ contra Dios (Génesis 3:1-6; Apocalipsis 12:9).
Cheʼ bʌ Adán yicʼot Eva tiʼ ñusʌbeyob i tʼan Jehová yicʼot maʼañic tsiʼ chʼujbiyob bajcheʼ yumʌl, tiʼ sʌtʌyob i chumlib yaʼ ti Paraíso yicʼot chaʼan cʼocʼob miʼ chumtʌlob tiʼ pejtelel ora (Génesis 3:17-19). Jiñi tsaʼ bʌ i yajcayob i mel tsiʼ yʌqʼueyob wocol jaʼel jiñi i yalobilob. Jiñi Biblia miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob» (Romanos 5:12). Jiñi mulil an i yʌcʼʌ jaʼel chaʼan jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9). Ili yom i yʌl chaʼan miʼ tejchel cabʌl wocol cheʼ jiñi quixtañujob miʼ bajñel yumañob i bʌ.
JIÑI WIÑIC MIʼ TECH YUMɅNTEL
Nemrod tsiʼ contraji Jehová.
Jiñi ñaxam bʌ wiñic tsaʼ bʌ i chaʼle yumʌntel miʼ yʌl jiñi Biblia jiñʌch Nemrod, i tsiʼ contrajibe i yumʌntel Dios. Cʼʌlʌl cheʼ jiñi, cabʌl yumʌlob mach weñic bajcheʼ miʼ melob (chaʼleñob) i yeʼtel. Jin chaʼan, añix cheʼ bʌ 3 mil jab cheʼ bʌ jiñi rey Salomón tiʼ tsʼijbu: «Jini ticʼlʌbiloʼ bʌ woliyoʼ bʌ ti uqʼuel, maʼanic miʼ tajob i coltʌntel. Jini añoʼ bʌ tiʼ wenta xticʼlayajob maʼanic miʼ pʼuntʌntelob» (Eclesiastés 4:1).
Ili ora, cheʼʌch miʼ bej ujtel. Ti 2009 jiñi Naciones Unidas tsiʼ yʌlʌ chaʼan cabʌl quixtañujob miʼ ñaʼtañob chaʼan miʼ yujtel mach tac bʌ weñic tiʼ caj mach bʌ weñic yumʌlob.
AÑIX CHUQUI YOM MIʼ MEJLEL
Ili pañimil (mulawil) ñuc i cʼʌjñibal i chaʼan wem bʌ yumʌlob yicʼot chaʼan wen miʼ melob i yeʼtel. Jiñi lac Dios an i yʌcʼʌ i tʼan chaʼan cheʼʌch mi caj i mel.
Mi jiñicto jiñi wem bʌ yumʌlob an i jisayob jiñi tsʌts bʌ wocol tac am bʌ i chaʼan jiñi quixtañujob.
Dios an i waʼchoco i Yumʌntel muʼ bʌ caj i jisan pejtelel jiñi i yumʌntel wiñicob, i jin jach «mi caj i yajñel tiʼ pejtelel ora» (Daniel 2:44). Jiñʌch jiñi Yumʌntel am bʌ i cʼajtiyob yonlel quixtañujob ti jiñi padrenuestro (Mateo 6:9, 10). Pero Dios mach jiñic mi caj i yochel bajcheʼ Rey ti jiñi Yumʌntel, an i waʼchoco juntiquil tsaʼ bʌ chumle ila ti Lum. ¿Majqui tsiʼ yajca?
Miʼ mejlel a qʼuel jaʼel iliyi
CʼAJTIYA TAC CHAʼAN BɅ BIBLIA
¿Bajcheʼ mi caj i tajtʌl ñʌchʼtʌlel ila ti Pañimil?
Jiñi Biblia miʼ yʌl chaʼan jiñi i Yumʌntel Dios mi caj i chʼʌm tilel ñʌchʼtʌlel.
CʼAJTIYA TAC CHAʼAN BɅ BIBLIA
¿Am ba ti lac pusicʼal jiñi i Yumʌntel Dios?
An yan tac bʌ Biblia baqui miʼ yʌl bajcheʼ ili: «Jiñi i yumʌntel Dios an ti laʼ malil». ¿Chuqui yom i yʌl?
