Yaʼ ti yambʌ artículo, tsaʼ laj qʼuele chuqui mi caj i yujtel tsiʼ yʌlʌ Jesús. Ili miʼ pʌs chaʼan tsaʼix waʼchoconti jiñi i Yumʌntel Dios yaʼ ti panchan i chaʼan jiñi Rey jiñʌch Jesucristo.

Jiñi Biblia miʼ yʌl chaʼan Jesús tsiʼ choco loqʼuel ti panchan jiñi Satanás yicʼot i xibajob cheʼ bʌ tsaʼ caji ti yumʌntel. Satanás yicʼot i xibajob cojach ila ti Lum miʼ mejlel i melob chuqui yomob. Jin chaʼan, cʼʌlʌl ti 1914 jiñi wiñicob xʼixicob miʼ wen ilañob wocol (Apocalipsis 12:7, 9).

Anquese mach wen utsʼatix chuqui woli (choncol) ti yujtel ila ti pañimil, Jesús, jiñi Rey chaʼan i Yumʌntel Dios, añix chuqui an i mele chaʼan miʼ coltan jiñi wiñicob xʼixicob (quixtañujob). An tiʼ wenta i qʼuel jiñi subtʼan muʼ bʌ i yujtel tiʼ pejtelel pañimil, i an i colta yonlel quixtañujob chaʼan miʼ cʌñob principio tac am bʌ ti Biblia yicʼot miʼ jacʼob i mel (Isaías 2:2-4). Ili quixtañujob, an sujtiyob ti wem bʌ xʼeʼtelob, an i cʌñʌyob chuqui yom miʼ melob chaʼan wen miʼ yajñelob i familia yicʼot chaʼan pʼisbil jach yom miʼ qʼuelob jiñi chubʌʼañʌl tac. Jiñi Biblia miʼ coltañob chaʼan miʼ weñʼesañob i cuxtʌlel yicʼot miʼ chajpañob chaʼan miʼ sujtelob ti wem bʌ quixtañujob cheʼ bajcheʼ yom Dios ti jiñi i Yumʌntel.

Anquese Jesús añix bajcheʼ Rey yaʼ ti panchan, jiñi wiñicob bej añobto bajcheʼ yumʌlob ila ti Pañimil. Pero Dios tiʼ sube Jesús iliyi: «Chaʼlen yumʌl tiʼ tojlel a contrajob» (Sal. 110:2). Jesús mach jalix mi caj i jisan jiñi i contrajob yicʼot i jisan jiñi wocol tac muʼ bʌ i ticʼlan jiñi yomoʼ bʌ i jacʼbeñob i tʼan Dios.

Ti jimbʌ ora, jiñi i Yumʌntel Dios mi caj i mel ili tac:

• Mi caj i jisan jiñi mach bʌ i sujmic ñopbalʌl tac. Jiñi Biblia miʼ lajin jiñi mach bʌ i sujmic ñopbalʌl tac bajcheʼ juntiquil xʼixic muʼ bʌ i chon i bʌ, mach bʌ jalix mi caj i jisʌntel. Jin chaʼan, jiñi ñopbalʌl tac am bʌ i loti yicʼot i ticʼla jiñi quixtañujob mi caj i jilel. Mi caj i toj sajtelob i pusicʼal jiñi muʼ bʌ caj i qʼuelob cheʼ bʌ miʼ jisʌntel tac (Apocalipsis 17:15, 16).

• Mi caj i jisan jiñi i yumʌntel wiñicob. Jiñi i Yumʌntel Dios mi caj i jisan pejtelel yumʌlob (Apocalipsis 19:15, 17, 18).

• Mi caj i jisan jiñi jontol bʌ quixtañujob. ¿Bajcheʼ mi caj i yujtelob jiñi bej yomoʼ bʌ i mel mach bʌ weñic yicʼot cheʼ mach yomobic i jacʼbeñob i tʼan Dios? Mi caj i jisʌntelob (Proverbios 2:22).

• Mi caj i jisan jiñi Satanás yicʼot jiñi i xibajob. Satanás yicʼot i xibajob maʼañix mi caj i «chʌn lotin tejclumob ti pañimil» (Apocalipsis 20:3, 10).

¿I chuqui mi caj i yujtel tiʼ tojlelob jiñi quixtañujob muʼ bʌ i coltañob i Yumʌntel Dios?

Yaʼ ti panchan, Jesucristo ñumen cabʌl chuqui mi caj i mel bajcheʼ juntiquil yumʌl bʌ wiñic. Cheʼ jaʼel, 144 mil reyob yajcʌbiloʼ bʌ ti pañimil mi caj i coltañob (Apocalipsis 5:9, 10; 14:1, 3). Mi caj i tsʼʌctesan chuqui yom Dios ila ti Pañimil. ¿Chuqui mi caj i mel i Yumʌntel Dios tiʼ tojlel jiñi quixtañujob?

• Mi caj i jisan jiñi cʼamʌjel tac yicʼot jiñi chʌmel. «Maʼanix mi juntiquilic muʼ bʌ caj i yʌl: ‹Cʼamon›» i «maʼanix majch miʼ caj ti chʌmel» (Isaías 33:24; Apocalipsis 21:4).

• Mi caj i yʌcʼ i sujm bʌ ñʌchʼtʌlel yicʼot maʼañix chuqui mi caj i bʌcʼñʌntel. «Mi caj cʌqʼueñob i ñʌchʼtʌlel i pusicʼal mach bʌ yujilic jilel» yicʼot «jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Isaías 54:13; Miqueas 4:4).

• Mi caj i yʌcʼ wem bʌ eʼtel tac. «Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel. Mach lolomic jach mi caj i chaʼleñob eʼtel» (Isaías 65:22, 23).

• Mi caj i tojʼesan jiñi wocol tac am bʌ ti Pañimil. «Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).

• Mi caj i cʌntesan jiñi quixtañujob chuqui yom miʼ melob chaʼan miʼ chumtʌlob tiʼ pejtelel ora. «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3).

Dios yom chaʼan maʼ taj jiñi bendición tac (Isaías 48:18). Yaʼ ti yambʌ artículo mi caj i subeñet chuqui miʼ mejlel a mel chaʼan maʼ taj.