Tiʼ sujm, ili ora woli (yʌquel) i tilel ti lac tojlel lajal bʌ bajcheʼ jumpʼejl tsʌts bʌ icʼ jaʼal. Jesús tsiʼ yʌlʌ bajcheʼ ñuc bʌ wocol (Mateo 24:21). Anquese maʼañic chuqui miʼ mejlel lac mel (chaʼlen) chaʼan maʼañic miʼ tilel ili lajal bʌ bajcheʼ tsʌts bʌ icʼ jaʼal, mucʼʌch i mejlel lac sajcan lac putsʼib. ¿Chuqui yom mi lac mel?

Ti jiñi i Cʌntesa yaʼ ti bujtʌl, Jesús tsiʼ yʌlʌ chuqui yom mi lac mel: «Ñaxan sajcanla i yumʌntel Dios yicʼot i tojel» (Mateo 6:33). ¿Chuqui yom i yʌl iliyi?

«Ñaxan sajcanla i yumʌntel Dios». Ili yom i yʌl chaʼan jiñi i Yumʌntel Dios jiñʌch ñumen ñuc bʌ i cʼʌjñibal bajcheʼ yan tac bʌ (Mateo 6:25, 32, 33). ¿Chucoch cheʼʌch yom mi lac ñaʼtan? Come joñonla mach mejlic lac tojʼesan jiñi wocol tac am bʌ ti pañimil. Jin jach Dios miʼ mejlel i mel.

Chʌn sajcanla jiñi i «tojel» Dios. Ili yom i yʌl chaʼan yom mi lac chaʼlen wersa lac jacʼ i mandar tac yicʼot i principio tac Dios. ¿Chucoch? Come, mi mucʼ jach lac bajñel ñaʼtan chuqui wem bʌ yicʼot mach bʌ weñic, mach utsʼatic chuqui mi caj lac taj (Proverbios 16:25). Pero mi tsaʼ lac jacʼbe i mandar tac Jehová, mi caj lac tijicñesan yicʼot utsʼat mi caj la cajñel (Isaías 48:17, 18).

¿Chucoch tsiʼ yʌlʌ Jesús: «Ñaxan sajcanla i yumʌntel Dios yicʼot i tojel»? Come an muʼ bʌ i mejlel i yʌñob i pensar i miʼ ñaʼtañob chaʼan wen mi caj i chumtʌlob cheʼ miʼ sajcañob cabʌl taqʼuin. Yambʌlob miʼ cʌlʌx  cʼojoʼtañob bajcheʼ mi caj i tajob chuqui i cʼʌjñibal i chaʼañob i maʼañix miʼ yʌqʼueñob i yorajlel chaʼan miʼ sajcañob i Yumʌntel Dios (Mateo 6:19-21, 25-32).

Pero Jesús tsiʼ yʌcʼʌ i tʼan chaʼan jiñi muʼ bʌ i coltan i Yumʌntel Dios mi caj i yʌqʼuentel pejtelel chuqui anto yom i chaʼan, i ti talto bʌ qʼuin, mi caj i taj cabʌl bendición (Mateo 6:33).

Anquese jiñi ñaxam bʌ xcʌntʼañob i chaʼan Jesús tsiʼ ñaxan sajcayob i Yumʌntel Dios yicʼot i tojel, maʼañic tsaʼ cʼoti i qʼuelob i jilibal wocol tac. Pero tsaʼʌch i tajayob i putsʼib. ¿Bajcheʼ?

Come tsiʼ jacʼbeyob i mandar tac Dios, tsiʼ cʌntayob chaʼan maʼañic miʼ tajob wocol tac bajcheʼ jiñi yambʌlob maʼañic bʌ miʼ jacʼbeñob i tʼan Jehová. Cheʼ jaʼel, tsiʼ wen ñopoyob chaʼan mi caj i tilel i Yumʌntel Dios, i jiñʌch tsaʼ bʌ i coltayob i ñusan tsʌts bʌ wocol tac tiʼ cuxtʌlelob. Dios tsiʼ yʌqʼueyob i «pʼʌtʌlel» chaʼan miʼ mejlel i lʌtʼob (2 Corintios 4:7-9).

Jiñi xñoptʼañob ti ñaxam bʌ siglo tsaʼʌch i chʼʌmʌyob ti ñuc tsaʼ bʌ i yʌlʌ Jesús. Jin chaʼan, tiʼ subuyob jiñi wen tʼan chaʼan i Yumʌntel Dios yaʼ baqui tsaʼ chumleyob (Colosenses 1:23). ¿Am ba majqui woliʼ mel jaʼel jiñi eʼtel ti ili ora?

¡Añʌch! Jiñi i testigojob Jehová yujilob chaʼan jiñi i Yumʌntel Dios tsʼitaʼ jax mi caj i jisan ili pañimil. Jin chaʼan, miʼ chaʼleñob wersa i tsʼʌctesañob tsaʼ bʌ i yʌlʌ Jesús: «Jini wen tʼan chaʼan i yumʌntel Dios mi caj i sujbel tiʼ pejtelel pañimil chaʼan miʼ yubintel tiʼ pejtelel pañimil. Ti jimbʌ ora mi caj i tilel i jilibal» (Mateo 24:14).

¿Chuqui mi caj a mel jatet cheʼ baʼ ora maʼ wubin jiñi wen tʼan? Mic subeñet lojon chaʼan maʼ lajin chuqui tsiʼ meleyob jiñi tsaʼ bʌ chumleyob ti ñaxam bʌ siglo ti tejclum Berea, am bʌ ti Macedonia. Cheʼ bʌ tsiʼ yubiyob jiñi wen tʼan chaʼan i Yumʌntel Dios tsaʼ bʌ i yʌlʌ Pablo, «ti jumpʼejl jach i pusicʼal tsiʼ jacʼʌyob», «tsiʼ wen qʼueleyob jiñi i Tsʼijbujel Dios» chaʼan miʼ ñaʼtañob miʼ sujmʌch chuqui tsaʼ subentiyob i tsiʼ cʼʌñʌyob tiʼ cuxtʌlel tsaʼ bʌ i cʌñʌyob (Hechos 17:11, 12).

Jatet miʼ mejlel a mel jaʼel. Mi ñaxañʌch maʼ sajcan i Yumʌntel Dios yicʼot i tojel, mi caj a taj a putsʼib ili ora, i ti talto bʌ qʼuin mi caj a taj a ñʌchʼtʌlel yicʼot cʌntʌbil mi caj a chumtʌl tiʼ pejtelel ora.