• Mi caj i yajcʌntel ti Dios. «Tsaʼix c waʼchoco c Rey [...]. Mi caj cʌqʼueñet winicob xʼixicob chʼoyoloʼ bʌ tiʼ pejtelel pañimil. A chaʼañobix miʼ majlelob» (Salmo 2:6, 8).

• Mi caj i chʼʌm tiʼ wenta i buchlib jiñi rey David. «Come mi caj i yilan pañimil alʌ chʼiton chaʼan miʼ coltañonla. Dios mi caj i yʌqʼueñonla i yalobil» (Isaías 9:6). «Cheʼ bʌ miʼ ñucʼan i yumʌntel yicʼot i ñʌchʼtʌlel maʼañic mi caj i jilel yaʼ tiʼ buchlib David yicʼot tiʼ yumʌntel chaʼan tsʌts miʼ yajñel» (Isaías 9:7, TNM).

• Mi caj i yilan pañimil ti Belén. «Jatet Belén [...], yaʼ mi caj i qʼuel pañimil jini Rey [...] mi caj i qʼuejlel ti ñuc tiʼ pejtelel pañimil» (Miqueas 5:2, 4).

• Mi caj i tsʼaʼlentel yicʼot mi caj i tsʌnsʌntel. «Cheʼ tsʼaʼlebil jini winic maʼanic tsaʼ lac pʼisi ti wenta. [...] Tsaʼ jejqʼui chaʼañonla chaʼan tsaʼ lac ñusʌbe i mandar Dios. Tsaʼ jajtsʼi chaʼan lac mul» (Isaías 53:3, 5).

• Mi caj i chaʼ cuxtʌyel yicʼot mi caj i yʌqʼuentel i ñuclel. «Maʼanic mi caj a cʌyon tiʼ yajñib chʌmeñoʼ bʌ. Maʼanic mi caj a wʌcʼ jini Chʼujul Bʌ a chaʼan ti ocʼmʌl [...]. Yaʼan c wenlel ti ñoj bʌ a cʼʌb tiʼ pejtelel ora» (Salmo 16:10, 11).

Pejtelel jiñi tsaʼ bʌ ajli tsaʼ tsʼʌctiyi tiʼ tojlel Jesucristo. Juntiquil ángel tiʼ sube iliyi jiñi i ñaʼ, i cʼabaʼ María: «Lac Yum Dios mi caj i yʌqʼuen i yeʼtel ti Rey tiʼ qʼuexol i ñojteʼel, i cʼabaʼ David [...]. Maʼanic mi caj i jilel i yumʌntel» (Lucas 1:31-33).

Jesús maʼañic tsiʼ chaʼle yumʌntel cheʼ bʌ wʌʼan ti Lum. Pero mi caj i mel i yeʼtel (troñel) yaʼ ti panchan bajcheʼ Rey tiʼ Yumʌntel Dios tiʼ tojlel jiñi wiñicob xʼixicob (quixtañujob). ¿Chucoch jiñʌch jiñi wem bʌ Rey? Laʼ laj qʼuel chuqui tsiʼ mele (chaʼle) cheʼ bʌ wʌʼto an ti Pañimil.

•   Jesús tsiʼ chʼʌmʌ ti ñuc lac piʼʌlob. Tsiʼ colta wiñicob yicʼot xʼixicob, jiñi xcolelob yicʼot añobix bʌ i jabilel, mach yʌlʌlic baqui chʼoyolob, mi añob i taqʼuin o maʼañic (Mateo 9:36; Marcos 10:16). Cheʼ bʌ juntiquil am bʌ lecoj bʌ i tsoy tiʼ sube: «Mi a wom miʼ mejlel a lajmesañon», Jesús tsiʼ pʼunta yicʼot tsiʼ cʼoqʼuesa (Marcos 1:40-42).

• Jesús tsiʼ pʌsbeyonla chuqui miʼ mejlel lac mel chaʼan wen miʼ qʼuelonla Dios. Tsiʼ yʌlʌ: «Mach mejlic laʼ yuman Dios cheʼ woli laʼ yuman chubʌʼañʌl». Cheʼ jaʼel, tsiʼ yʌlʌ chaʼan yom mi lac melben yambʌlob jiñi muʼ bʌ lac mulan chaʼan mi lac melbentel. Yicʼot tsiʼ pʌsbeyonla chaʼan Dios mach cojach miʼ chʼʌm ti ñuc chuqui mi lac mel, yicʼotʌch chuqui mi lac pensalin yicʼot bajcheʼ yubil mi la cubin lac bʌ. Jin chaʼan, mi la com chaʼan wen miʼ qʼuelonla Dios, yom mi lac ticʼ jiñi am bʌ ti lac pusicʼal (Mateo 5:28; 6:24; 7:12). I Jesús tsiʼ yʌlʌ chaʼan mi la com lac taj jiñi i sujm bʌ tijicñʌyel, yom mi laj cʌn chuqui yom Dios chaʼan mi lac mel i mi lac tsʼʌctesan (Lucas 11:28).

• Jesús tsiʼ pʌsbeyonla bajcheʼ yom mi laj cʼuxbin yambʌlob. Pejtelel tsaʼ bʌ i yʌlʌ yicʼot tsaʼ bʌ i mele, tsaʼ cʼoti tiʼ pusicʼal jiñi quixtañujob. Jiñi Biblia miʼ yʌl: «Tsaʼ toj sajtiyob i pusicʼal winicob xʼixicob chaʼan i cʌntesʌbal. Come yicʼot i pʼʌtʌlel i yeʼtel tsiʼ cʌntesayob, mach cheʼic bajcheʼ stsʼijbayajob» (Mateo 7:28, 29). Jumpʼejl ejemplo, tiʼ subeyob iliyi: «Cʼuxbin laʼ contrajob». I tsiʼ taja ti oración chaʼtiqui uxtiquil tsaʼ bʌ i yʌcʼʌyob i coltaya chaʼan miʼ tsʌnsʌntel. Jesús tsiʼ yʌlʌ: «C Tat ñusʌbeñob i mul come mach yujilobic chuqui woliʼ chaʼleñob» (Mateo 5:44; Lucas 23:34).

Jesús jiñʌch jiñi wem bʌ Rey. Wen yujil melol jiñi eʼtel, miʼ cʼuxbiñonla yicʼot yom i coltañonla. Pero ¿jala mi caj i tech i yumʌntel?