Mach jalix yom chaʼan jiñi i Yumʌntel Dios am bʌ ti panchan, miʼ chaʼlen yumʌntel tiʼ pejtelel Pañimil, i ti lac pejtelel tijicña mi caj la cajñel, ñʌchʼʌl mi caj lac chumtʌl yicʼot mi caj lac ñusan lac bʌ tiʼ melol i yeʼtel. Dios tsiʼ waʼchoco Jesús chaʼan miʼ chaʼlen yumʌntel. I Jesús mach lajalic bajcheʼ jiñi yambʌ yumʌlob, yom chaʼan pejtelel miʼ tajob i wenlel. Jiñi muʼ bʌ i ñijcan chaʼan miʼ mel i yeʼtel jiñʌch jiñi cʼuxbiya i tiʼ pejtelel ora mi caj i pʌs i yutslel, i tojel yicʼot i pʼuntaya (Isaías 11:4).

Anquese yʌñʌlob i tejclum o yʌñʌlob i colorlel i pʌchʌlel, maʼañix tʼox bʌ miʼ cajel come ti lac pejtelel juntemel mi caj la cajñel (Apocalipsis 7:9, 10). Ti lac pejtelel mi caj laj cʼuxbin Dios yicʼot mi caj laj cʼuxbin lac bʌ jaʼel. Juntemel mi caj lac chaʼlen eʼtel yicʼot ñʌchʼʌl mi caj lac chumtʌl chaʼan mi lac tsʼʌctesan jiñi ñaʼtʌbil bʌ i chaʼan Dios: I cʌntʌntel ili Lum (Salmo 115:16).

Cheʼ bʌ jiñi i Yumʌntel Dios miʼ chʼʌm tiʼ wenta ili Pañimil (Lum), Dios maʼañix mi caj i yʌcʼ chaʼan ili pañimil miʼ wen ticwan o miʼ wen tsʌñan, wen jax mi caj i yajñel (Salmo 24:1, 2). Cheʼ bʌ Jesús tsajñi wʌʼ ti Lum tsiʼ ñʌjchʼesa tsʌts bʌ icʼ jaʼal, ili tsiʼ pʌsʌ chaʼan añʌch chuqui miʼ mejlel i mel yicʼot i pʼʌtʌlel Dios (Marcos 4:39, 41). Cheʼ bʌ Jesús miʼ chaʼlen yumʌntel, maʼañix majqui miʼ cajel i bʌcʼñan chaʼan muʼto i cajel tsʌts bʌ icʼ jaʼal o yujquel lum. Cheʼ jaʼel, jiñi i Yumʌntel Dios mi caj i mejlel i yʌcʼ chaʼan jiñi quixtañujob yicʼot añimal tac wen miʼ yajñelob i maʼañix majqui mi caj i yʌsin jiñi pañimil (Oseas 2:18).

Ti lac pejtelel cʼocʼ mi caj la cajñel. Maʼañic majqui miʼ caj ti cʼamʼan, ti ñoxʼan o ti chʌmel (Isaías 35:5, 6). Jiñi pañimil sʌc yicʼot utsʼatax mi caj i yajñel, lajal bajcheʼ yaʼ baqui tsaʼ chumleyob Adán yicʼot Eva. Cheʼ jaʼel, jiñi lum mi caj i yʌcʼ cabʌl i wut, i ti lac pejtelel wen cabʌl bʌlñʌcʼʌl mi caj lac taj, lajal bajcheʼ yaʼ ti pʌcʼʌbʌl Edén (Génesis 2:9). Ti Paraíso mi caj i tsʼʌctiyel tsaʼ bʌ i wʌn alʌ Dios tiʼ tojlel jiñi israelitajob ti wajali: «Mi caj laʼ wen ñajʼan cheʼ mi laʼ cʼux i bʌl laʼ ñʌcʼ» (Levítico 26:3-5).

Ti jiñi i Yumʌntel Dios, miʼ cajel ñʌchʼtʌlel tiʼ pejtelel Pañimil, laj toj chuqui mi caj i mejlel i jiñi quixtañujob mi caj i cʼuxbiñob i bʌ. Maʼañix guerra, maʼañic majqui mi caj i qʼuel i bʌ ti ñuc tiʼ caj an i yeʼtel (troñel) i ti lac pejtelel mi caj lac taj i cʼʌjñibal bʌ lac chaʼan. Jiñi Biblia miʼ wʌn al: «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Miqueas 4:3, 4).

Tiʼ pejtelel jiñi familia tac mi caj i melob (pʌtob) i yotot i maʼañic mi caj i bʌcʼñañob i sʌtob, i mi caj i ñusañob i bʌ tiʼ melol jiñi eʼtel tac. Jin chaʼan, jiñi Biblia miʼ yʌl chaʼan jiñi muʼ bʌ caj i chumtʌlob yaʼ ti tsijiʼ bʌ pañimil «mach lolomic jach mi caj i chaʼleñob eʼtel» (Isaías 65:21-23).

Jiñi Biblia miʼ wʌn al: «Jiñi lum mi caj i bujtʼel ti wiñicob xʼixicob i cʌñʌyoʼ bʌ Jehová» (Isaías 11:9, TNM). Mi caj i mejlel i cʼotel laj cʌn jiñi i ñaʼtʌbal Jehová yicʼot jiñi utsʼatax bʌ chuqui tac an i mele. Jiñi muʼ bʌ i cʼotel laj cʌn maʼañic miʼ cajel laj cʼʌn chaʼan mi lac mel eʼtijib tac chaʼan guerra o chaʼan mi lac tʌcʼlan yambʌlob, chaʼañʌch mi lac chumtʌl ti ñʌchʼʌl yicʼot chaʼan mi laj cʌntan ili Lum (Salmo 37:11; Isaías 2:4).

Dios wen utsʼatax tsiʼ mele ili Pañimil come yom chaʼan wʌʼ mi lac chumtʌl yicʼot chaʼan mi lac ñusan lac bʌ ti jujumpʼejl qʼuin (Salmo 37:29; Isaías 45:18). Chaʼan cheʼ miʼ cajel bajcheʼ ili, Dios «mi caj i junyajlel jisan jini pʼʌtʌl bʌ muʼ bʌ i yʌcʼonla ti chʌmel» (Isaías 25:8). I jiñi Biblia miʼ yʌl chaʼan «maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apocalipsis 21:4). Dios mi caj i yʌcʼ chaʼan miʼ chumtʌl tiʼ pejtelel ora yaʼ ti tsijiʼ bʌ pañimil jiñi muʼ bʌ caj i coltan cheʼ bʌ miʼ jisʌntel ili jontol (maña) bʌ pañimil, i yaʼ ochemob jaʼel jiñi yonlel muʼ bʌ caj i chaʼ tejchelob (Juan 5:28, 29; Hechos 24:15).

 Ili ora, yonlelob wolix (choncolix) i chajpañob i bʌ chaʼan miʼ chumtʌlob ti jiñi tsijiʼ bʌ pañimil cheʼ bʌ jiñix jiñi i Yumʌntel Dios woliʼ chaʼlen eʼtel. Anquese xmulilob woliʼ chaʼleñob wersa chaʼan miʼ chumtʌlob cheʼ bajcheʼ yom Dios chaʼan miʼ yochelob ti tsijiʼ bʌ Pañimil, ¿bajcheʼ miʼ melob? Jiñʌch cheʼ miʼ cʌñob Jehová yicʼot Jesucristo (Juan 17:3).

Tsʼitaʼ jax yom chaʼan ili pañimil miʼ jisʌntel. Mi a wom a ñumen ñaʼtan chuqui yom maʼ mel chaʼan maʼañic maʼ jisʌntel a wicʼot ili pañimil yicʼot chaʼan maʼ chumtʌl tiʼ pejtelel ora, cʼajtiben juntiquil i testigo Jehová chaʼan miʼ yʌqʼueñet jumpʼejl estudio loqʼuem bʌ ti Biblia mach bʌ tojbilic yicʼot jiñi libro Ubin a tijicñʌyel.