Ti jiñi yan tac bʌ artículo, tsaʼix laj cʌñʌ chaʼan Dios mach jalix yom chaʼan miʼ jisan ili jontol bʌ pañimil (mulawil) yicʼot ili wocol tac. ¿Chucoch mucʼʌch lac ñop jiñi? Come jiñi Biblia, i Tʼan Dios, miʼ yʌl:

«Jiñi pañimil mi caj i jilel» (1 JUAN 2:17).

Pero la cujilʌch jaʼel chaʼan añʌch maʼan bʌ mi caj i chʌmelob (sajtelob) come jiñi texto miʼ chaʼ al:

«Pero jiñi muʼ bʌ i mel chuqui yom Dios cuxul miʼ yajñel tiʼ pejtelel ora».

Jin chaʼan chaʼan maʼañic mi lac chʌmel, yom mi lac jacʼben i tʼan Dios. Pero chaʼan miʼ mejlel lac jacʼben i tʼan yom mi lac ñaxan wen cʌñeʼ.

Jesús tsiʼ yʌlʌ: «Ili yom i yʌl cuxtʌlel mach bʌ añic miʼ jilel: Cheʼ miʼ cʼotel i cʌñetob, jatet jiñi cojach bʌ i sujm bʌ Dios» (Juan 17:3). Chaʼan maʼañic mi lac chʌmel cheʼ bʌ miʼ jisʌntel jiñi jontoloʼ (mañajoʼ) bʌ yicʼot chaʼan mi lac mejlel ti chumtʌl tiʼ pejtelel ora yom mi laj cʌn Dios. Ili mach yomic i yʌl chaʼan mi lac tsʼitaʼ cʌn chaʼan añʌch Dios yicʼot majqui. Yom mi lac sujtel tiʼ yamigo. Cheʼ la com sujtel tiʼ yamigo juntiquil yom mi la cʌqʼuen i yorajlel chaʼan mi lac ñumen cʌn, i cheʼʌch miʼ yujtel jaʼel cheʼ la com laj cʌñeʼ Dios. Mi caj laj qʼuel cʌntesʌntel tac muʼ bʌ i coltañonla chaʼan chʌn lʌcʼʌl mi la cajñel la quicʼot Dios.

Chaʼan maʼañic mi lac chʌmel, yom mi laj cʼux lac waj tiʼ pejtelel ora, pero Jesús tsiʼ yʌlʌ jaʼel: «Mach ti bʌlñʌcʼʌlic jach yom cuxul jiñi wiñic, cuxulʌch tiʼ pejtelel jiñi tʼan muʼ bʌ i loqʼuel tiʼ yej Jehová» (Mateo 4:4).

Ili ora yaʼ ti Biblia mi lac taj muʼ bʌ i yʌl Jehová. Cheʼ bʌ mi lac pejcan majlel jiñi Biblia, mi caj laj cʌn chuqui tsiʼ mele Dios ti wajali, chuqui woli (yʌquel) i mel ili ora yicʼot chuqui mi caj i mel ti talto bʌ qʼuin.

¿Chuqui yom mi lac mel mi com lac jacʼben i tʼan Dios pero wocol mi la cubin chaʼan mi laj cʌy lac mel maʼañic bʌ miʼ mulan? Muʼ bʌ caj i coltañonla jiñʌch cheʼ miʼ cʼotel lac ñumen cʌn.

Mi caj laj qʼuel chuqui tsaʼ ujti tiʼ tojlel juntiquil xʼixic, muʼ bʌ caj lac poj suben bajcheʼ Sakura. Sakura miʼ mel tsʼiʼlel, pero cheʼ bʌ tsaʼ caji i chʼʌm estudio tsiʼ cʌñʌ chaʼan Dios miʼ yʌl chaʼan yom mi lac ‹putsʼtan tsʼiʼlel› (1 Corintios 6:18). Sakura tsiʼ cʼajtibe i coltaya Dios, i tsaʼ mejli i qʼuextan i melbal. Pero yomʌch miʼ chaʼlen wersa chaʼan maʼañic miʼ chaʼ yajlel ti jiñi wocol. Jin chaʼan miʼ yʌl: «Cheʼ bʌ miʼ tilel mach bʌ weñic c pensar mic jamʌ pejcan Jehová, come cujil chaʼan tic bajñelil maʼañic mi caj c mejlel c mʌlben (jotben) iliyi. Jiñi oración an i ñumen lʌcʼtesayon ti Jehová». Cheʼ bajcheʼ Sakura yicʼot yonlel lac piʼʌlob woliʼ cʌñob Dios, i jiñʌch woli bʌ i yʌqʼueñob i pʼʌtʌlel chaʼan miʼ qʼuextañob i melbal i chaʼan miʼ chumtʌlob cheʼ bajcheʼ miʼ mulan Dios (Filipenses 4:13).

Cheʼ bʌ mi lac ñumen cʌn Dios, mi caj i ñumen cʌñonla jaʼel, i mi caj i qʼuelonla bajcheʼ wem bʌ i yamigo (Gálatas 4:9; Salmo 25:14). I cheʼ bajcheʼ jiñi, maʼañic mi caj lac chʌmel cheʼ bʌ miʼ jisʌntel ili jontol bʌ pañimil, i cheʼ jaʼel mi caj lac mejlel ti chumtʌl ti jiñi tsijiʼ bʌ Pañimil (Lum) chajpʌbil bʌ i chaʼan Dios. ¿I bajcheʼ yilal miʼ cajel jiñi tsijiʼ bʌ pañimil? Ti jiñi yambʌ artículo mi caj i tsictesʌntel.