Dios miʼ yʌqʼuen i bendición jiñi muʼ bʌ i coltan yambʌlob
Cabʌl lac piʼʌlob mach wen añobic i bʌl i ñʌcʼ yicʼot maʼañobic baqui miʼ chumtʌlob. I an yambʌlob yomob jach bʌ i ñaʼtan chuqui mi caj i yujtel tiʼ tojlelob ti talto bʌ qʼuin. Pero mi la com lac tajben i bendición Dios, laʼ laj coltan yambʌlob.
MUʼ BɅ I YɅL JIÑI CHʼUJUL BɅ TSʼIJBUJEL
«Jini muʼ bʌ i yʌqʼuen pobre chuqui anto yom i chaʼan woliʼ yʌqʼuen lac Yum ti majan. Mi caj i chaʼ qʼuextʌbentel bajcheʼ cʼamel tsiʼ yʌqʼue» (PROVERBIOS 19:17).
¿CHUQUI YOM MI LAC MEL CHAʼAN MI LAJ COLTAN YAMBɅLOB?
Jesús tsiʼ yʌlʌ jumpʼejl lajiya tiʼ tojlel juntiquil wiñic tsaʼ bʌ i taja xujchʼob yaʼ ti bij, tsaʼ bʌ i jatsʼʌyob cʼʌlʌl jinto cheʼ colelix i chʌmel (Lucas 10:29-37). Pero juntiquil wiñic chʼoyol bʌ ti yambʌ tejclum tsiʼ qʼuele i tsiʼ colta.
Ili wiñic mach cojach tiʼ tsʼʌcʌbe i lojweñal, tsaʼʌch i colta jaʼel ti taqʼuin yicʼot tsiʼ colta cʼʌlʌl jinto tsaʼ cʼocʼa.
¿Chuqui mi laj cʌn ti jiñi tsaʼ bʌ i yʌlʌ Jesús? Chaʼan yom mi lac chaʼlen wersa laj coltan yambʌlob jiñʌch baqui jaxʌl mi lac mejlel (Proverbios 14:31). Dios miʼ yʌl ti jiñi Chʼujul bʌ tsʼijbujel chaʼan mach jalix yom chaʼan miʼ jisan jiñi pʼumpʼuñiyel yicʼot wocol. Pero ¿bajcheʼ mi caj i mel, i jala? Ti jiñi yambʌ artículo mi caj laj qʼuel jiñi bendición chajpʌbil bʌ i chaʼan Dios chaʼan jatet.
