Cabʌl lac piʼʌlob miʼ yʌlob chaʼan jiñi muʼ bʌ i wen chaʼleñob clase yicʼot jiñi ricojoʼ bʌ wen mi caj i yajñelob cʼʌlʌl ti talto bʌ qʼuin. Miʼ yʌlob chaʼan cheʼ miʼ majlelob ti universidad jiñi lac piʼʌlob, ñumen wen mi caj i yajñelob tiʼ yeʼtel (troñel), tiʼ familia yicʼot tiʼ lumalob. Miʼ yʌlob jaʼel chaʼan cheʼ mi lac ñumen chaʼlen clase mi caj lac taj wem bʌ la queʼtel baqui wen mi lac tojtʌl yicʼot chaʼan cheʼ mi lac ñumen taj taqʼuin ñumen tijicña mi caj la cajñel.

Juntiquil wiñic chʼoyol bʌ ti China i cʼabaʼ Zhang Chen miʼ yʌl: «Tsaʼ c ñaʼta chaʼan, mi maʼañic c chaʼan jumpʼejl título chaʼan universidad, maʼañic baʼ ora mi caj c loqʼuel ti pʼumpʼuñiyel yicʼot chaʼan jumpʼejl eʼtel baqui wen mic tojtʌl mi caj i yʌqʼueñon c tijicñʌyel».

Cabʌlob yomoʼ bʌ majlel ti universidad wen cʌmbil bʌ come miʼ ñaʼtañob chaʼan iliyi mi caj i coltañob chaʼan ñumen wen miʼ yajñelob, mach yʌlʌyic mi yom miʼ majlelob ti yambʌ país chaʼan miʼ chaʼleñob qʼueljun. Jiñʌch muʼ bʌ i wen melob jinto tsaʼ caji jiñi COVID-19 i maʼañix mi lac wen mejlel ti loqʼuel. Añix cheʼ bʌ 10 jab, jumpʼejl organización tsiʼ mele jumpʼejl estudio i tsiʼ yʌlʌ chaʼan ñumen ti ojlil tsaʼ bʌ i chaʼleyob clase ti yambʌ país asiáticojob.

Cabʌl tatʌlob cabʌl chuqui miʼ melob chaʼan jiñi i yalobilob miʼ majlelob ti universidad ti yambʌ país. Qixiang, juntiquil wiñic chʼoyol bʌ ti Taiwán, miʼ yʌl: «Jiñi c tatob mach wen cabʌlobic i taqʼuin. Pero tsiʼ chocoyob majlel ti qʼueljun ti Estados Unidos jiñi chʌntiquil i yalobilob». Chaʼan miʼ tojob jiñi escuela, jiñi i familia Qixiang, cheʼ bajcheʼ yambʌ familia tac, tsiʼ wen otsayob i bʌ ti bet.

I sujmʌch chaʼan cheʼ mi lac chaʼlen clase miʼ mejlel i coltañonla ti laj cuxtʌlel, pero cabʌlob an i qʼueleyob chaʼan mach tiʼ pejtelelic ora cheʼ miʼ yujtel bajcheʼ pijtʌbil i chaʼañob. Jumpʼejl ejemplo, cabʌlob maʼañic miʼ tajob jiñi eʼtel yomoʼ bʌ anquese cabʌl jab tsiʼ chaʼleyob wersa yicʼot tsiʼ wen otsayob i bʌ ti bet. Jumpʼejl reportaje tsaʼ bʌ i mele Rachel Mui chaʼan jiñi revista Business Times chaʼan Singapur miʼ yʌl: «Ñumen wocol chaʼan miʼ tajob i yeʼtel jiñi tsajñoʼ bʌ ti universidad». Jianjie, tsaʼ bʌ i wen chaʼle clase ti universidad i chumul bʌ ti Taiwán, miʼ yʌl: «An i tajol cabʌlob yom bʌ miʼ chʼʌmob jumpʼejl eʼtel anquese mach jiñic tsaʼ bʌ i qʼueleyob ti escuela».

An muʼ bʌ i tajob i yeʼtel cheʼ bajcheʼ tsiʼ qʼueleyob ti escuela, pero tajol mach cheʼic chumulob cheʼ bajcheʼ tsiʼ lon ñaʼtayob. Niran juntiquil wiñic chʼoyol bʌ ti Tailandia tsajñi ti universidad ti Reino Unido. Cheʼ bʌ tsaʼ sujti tiʼ país, tsiʼ taja i yeʼtel cheʼ bʌ bajcheʼ tsiʼ qʼuele ti escuela. Miʼ yʌl: «Cheʼ bajcheʼ tsaʼ c ñaʼta, tsaʼ c taja wem bʌ queʼtel baqui wen mic tojtʌl come tsaʼ c wen chaʼle clase. Pero chaʼan mic ñumen taj taqʼuin, yom mic ñumen chaʼlen wersa yicʼot mic ñumen chaʼlen eʼtel. Ti wiʼil, jiñi empresa tsiʼ choco loqʼuel lʌcʼʌ tiʼ pejtelel xʼeʼtelob, yicʼot joñon. Tsaʼ j qʼuele chaʼan maʼañic mi jumpʼejlic eʼtel lac chaʼañʌch bʌ tiʼ pejtelel ora».

Jiñi ricojoʼ bʌ o jiñi «poj wem bʌ chumulob» miʼ tajob wocol tac jaʼel tiʼ familia, miʼ cʼamʼañob o miʼ wen chaʼleñob pensar tiʼ caj jiñi taqʼuin. Katsutoshi, juntiquil wiñic chʼoyol bʌ ti Japón, miʼ yʌl: «Anquese wen cabʌl c taqʼuin, mach tijicñayoñic come an yom bʌ i mʌlbeñoñob (jotbeñoñob), miʼ tsʼaʼleñoñob yicʼot miʼ ticʼlañoñob». Lam, juntiquil xʼixic chumul bʌ ti Vietnam, miʼ yʌl: «Qʼuelbil c chaʼan bajcheʼqui jiñi lac piʼʌlob miʼ chaʼleñob wersa chaʼan miʼ tajob wem bʌ i yeʼtel yicʼot chaʼan miʼ tajob taqʼuin. Pero mach cheʼic miʼ yujtel: Miʼ cʌlʌx chaʼleñob pensar, miʼ tajob i chʼijyemlel, miʼ cʼamʼañob yicʼot miʼ chaʼleñob bʌqʼuen».

Cheʼ bajcheʼ Franklin, cabʌlob an i qʼueleyob chaʼan jiñi escuela yicʼot jiñi taqʼuin mach jiñic muʼ bʌ i yʌqʼuen i sujmlel laj cuxtʌlel. An yambʌlob mach bʌ añic miʼ sʌclañob chubʌʼañʌl tac chaʼan miʼ tajob i tijicñʌyel ti talto bʌ qʼuin, miʼ chaʼleñob wersa chaʼan mach jontolobic (mañajobic) yicʼot chaʼan miʼ melob chuqui tac wen tiʼ tojlel yambʌlob. ¿Jimba muʼ bʌ caj i yʌqʼueñonla lac tijicñʌyel jiñi? Jiñi yambʌ tema mi caj i yʌqʼuen i jacʼbal ili cʼajtiya.