1, 2. a) ¿Chuqui tac miʼ ñusañob ili ora jiñi tilemoʼ bʌ ti yambʌ país? (Qʼuele jiñi foto am bʌ tiʼ tejchibal). b) ¿Chuqui miʼ cʼajtesʌbeñonla jiñi Biblia? c) ¿Baqui bʌ cʼajtiya tac mi caj lac jacʼ?

AÑIX ñumen 30 jab, juntiquil wiñic i cʼabaʼ Osei chʼoyol bʌ ti Ghana tsiʼ cʌyʌ i país i tsaʼ majli ti Europa ^[1] (qʼuele jiñi nota am bʌ tiʼ yujtibal ili temaj). Ti jiñi bʌ ora maxto i testigojic Jehová. Cʼajalto i chaʼan bajcheʼ tsiʼ wen ñusa wocol, miʼ yʌl: «Ti ora tsaʼ j qʼuele chaʼan jiñi quixtañujob maʼañic miʼ qʼueloñob ti ñuc. Cheʼ jaʼel cʌlʌxix tsʌñal ti jiñi país. Tsaʼ cajiyon ti uqʼuel cheʼ bʌ tsaʼ loqʼuiyon yaʼ ti aeropuerto come mach ñʌmʌloñic baʼan tsʌñal». Wocol tsiʼ yubi chaʼan miʼ cʌn jiñi tʼan muʼ bʌ i cʼʌjñel ti jiñi país, jin chaʼan maʼañic tsiʼ seb taja i yeʼtel (troñel). I tsiʼ wen ñaʼta i familia come ñajt an tiʼ tojlelob yicʼot i bajñel jach tsiʼ yubi i bʌ.

² Cheʼ joñoñicla jiñi Osei, ¿bajcheʼ mi lac mulan chaʼan mi laj qʼuejlel? Tijicña mi la cubin cheʼ bʌ jiñi hermanojob miʼ pʌsbeñoñobla i cʼuxbiya yicʼot i yutslel anquese mach lajalic i colorlel lac pʌchʌlel o baqui chʼoyolonla. Jiñi Biblia miʼ  cʼajtesʌbeñonla chaʼan yom mi lac pʌsbeñob la cutslel jiñi ‹mach bʌ cʌñʌlobic lac chaʼan› (Hebreos 13:2) (qʼuele jiñi recuadro «¿Chuqui yom i yʌl?»). Jin chaʼan, ti ili temaj mi caj lac jacʼ ili cʼajtiya tac: ¿Bajcheʼ yilal miʼ qʼuel Jehová jiñi chʼoyoloʼ bʌ ti yambʌ país? ¿Yom ba mi laj qʼuextan bajcheʼ yilal mi laj qʼuelob? ¿Bajcheʼ miʼ mejlel laj coltañob chaʼan tijicña miʼ yubiñob cheʼ miʼ cʼotelob ti laj congregación?

3, 4. Cheʼ bajcheʼ miʼ yʌl Éxodo 23:9, ¿bajcheʼ yilal yom jiñi israelob tsiʼ yʌlʌ Jehová tiʼ tojlel yambʌloʼ bʌ i país, i chucoch?

³ Cheʼ bʌ Jehová tsiʼ colta loqʼuel jiñi israelob yaʼ ti Egipto, tsiʼ yʌqʼueyob mandar tac chaʼan yom miʼ pʌsbeñob i yutslel jiñi egiptojob tsaʼ bʌ majli yicʼotob (Éxodo 12:38, 49; 22:21). Jehová yujil chaʼan wocolʌch miʼ ñusañob jiñi añoʼ bʌ baqui mach i lumalobic, jin chaʼan tsiʼ cʌntayob ti wen. Jumpʼejl ejemplo, cheʼ tsaʼix ujti ti lojtel i wut pʌcʼʌbʌl miʼ mejlelob ti majlel yaʼ ti jamil chaʼan miʼ lotob jiñi tsaʼto bʌ i cʌyʌ jiñi xʼeʼtelob (Levítico 19:9, 10).

⁴ Jehová mach cojach tsiʼ subeyob chaʼan yom miʼ qʼuelob ti ñuc jiñi yambʌloʼ bʌ i país. Tsiʼ yʌqʼueyob i cʼajtesan bajcheʼ yubil cheʼ maʼañobic tiʼ lumal (pejcan Éxodo 23:9). Cheʼ bʌ jiñi israelob maxto cʼotemobic ti Egipto, jiñi egiptojob muqʼuix i toj tsʼaʼleñob (Génesis 43:32; 46:34, TNM; Éxodo 1:11-14). Wen wocol tsiʼ ñusa jiñi israelob cheʼ tsaʼ ajñiyob ti yambʌ tejclum. Jin chaʼan, Jehová tsiʼ yʌqʼueyob i cʼajtesan yicʼot tsiʼ subeyob chaʼan yom miʼ pʌsbeñob i yutslel jiñi yambʌloʼ bʌ i país yaʼ bʌ chumulob tiʼ tʼejl (Levítico 19:33, 34).

5. ¿Chuqui mi caj i ñijcañonla chaʼan mi lac lajin Jehová yicʼot mi lac pʌsbeñob la cutslel jiñi yambʌloʼ bʌ i país?

⁵ Jehová maʼañic qʼuextʌyem. Jin chaʼan, yom mi laj cʼajtesan chaʼan Jehová miʼ qʼuel ti ñuc jiñi hermanojob yambʌloʼ bʌ i país muʼ bʌ i cʼotelob ti laj congregación (Deuteronomio 10:17-19; Malaquías 3:5, 6). Yom mi lac ñaʼtan jiñi wocol muʼ bʌ i ñusañob. Tajol mach yujilobic lac tʼan yicʼot tajol an wiñicob xʼixicob (quixtañujob) mach bʌ weñic bajcheʼ miʼ melob tiʼ tojlelob. Cheʼ mi lac ñaʼtan tiʼ pejtelel iliyi mi caj i ñijcañonla chaʼan mi laj coltañob yicʼot mi lac pʌsbeñob la cutslel (1 Pedro 3:8).

6, 7. ¿Chuqui miʼ pʌs chaʼan jiñi xñoptʼañob judíojoʼ bʌ tsiʼ cʌyʌ i qʼuelob ti lecoj yañoʼ bʌ?

⁶ Jiñi xñoptʼañob judíojoʼ bʌ tsiʼ cʌyʌ i qʼuelob ti lecoj jiñi tilemoʼ bʌ ti yambʌ país. Ti jiñi qʼuiñijel chaʼan Pentecostés cheʼ ti jabil 33, jiñi xñoptʼañob ti Jerusalén tsiʼ yotsayob tiʼ yotot i tsiʼ pʌsbeyob i yutslel jiñi tsijiʼ bʌ xñoptʼañob mach bʌ yaʼic chʼoyolob (Hechos 2:5, 44-47). Ili miʼ pʌs chaʼan tsaʼʌch i chʼʌmbeyob isujm jiñi tʼan «pʼuntan» jiñi «mach bʌ cʌñʌlobic laʼ chaʼan».

⁷ Pero ti jiñi bʌ ora, an xñoptʼañob yujiloʼ  bʌ griego tsaʼ bʌ i yʌlʌyob chaʼan mach junlajalic woli (choncol) i qʼuejlelob jiñi mebaʼ xʼixicob (Hechos 6:1). Jin chaʼan, jiñi apóstolob tsiʼ chocoyob majlel 7 wiñicob añoʼ bʌ i cʼabaʼ ti griego chaʼan miʼ tojʼesañob jiñi wocol. ¿Chucoch tsiʼ yajcayob jiñi wiñicob añoʼ bʌ i cʼabaʼ ti griego? Tajol chaʼan ñumen wen miʼ yubiñob i bʌ jiñi mebaʼ xʼixicob yujiloʼ bʌ griego (Hechos 6:2-6).

8, 9. a) ¿Chuqui yom mi laj cʼajtiben lac bʌ chaʼan mi lac ñaʼtan mi lecoj mi laj qʼuel jiñi yambʌlob? b) ¿Chuqui yom mi lac locʼsan ti lac tojlel? (1 Pedro 1:22).

⁸ Anquese maʼañic mi lac taj laj qʼuel, cheʼʌch mi lac mel bajcheʼ miʼ melob yaʼ ti laj cultura (Romanos 12:2). Cheʼ jaʼel, tajol jiñi chumuloʼ bʌ ti lac tʼejl yicʼot jiñi lac piʼʌlob ti eʼtel o ti escuela miʼ yʌlob mach tac bʌ weñic tiʼ tojlel jiñi yambʌloʼ bʌ i lumal, i cultura o i colorlel i pʌchʌlelob. ¿Cheʼ ba woli (yʌquel) lac tech lac ñaʼtan bajcheʼ jiñi? ¿Bajcheʼ yubil mi la cubin cheʼ bʌ an majqui miʼ wajlen lac lumal o laj cultura?

⁹ Jiñi apóstol Pedro añʌch chuqui lecoj tsiʼ yubi tiʼ tojlel jiñi mach bʌ judíojobic. Pero xucʼu xucʼul tsiʼ cʌyʌ i yubin bajcheʼ jiñi (Hechos 10:28, 34, 35; Gálatas 2:11-14). ¿Ixcu joñonla? Mi an bajcheʼ ñuc mi la cubin lac bʌ tiʼ caj i colorlel lac pʌchʌlel o lecoj mi laj qʼuel yañoʼ bʌ, ¿chuqui yom mi lac mel? Yom mi lac chaʼlen wersa lac locʼsan ti lac tojlel (pejcan 1 Pedro 1:22). ¿Chuqui mi caj i coltañonla? Jiñʌch cheʼ mi laj cʼajtesan chaʼan luʼ xmulilonla i chaʼan mach i wentʌlelic mi lac taj laj coltʌntel, mach yʌlʌlic baqui bʌ lac país (Romanos 3:9, 10, 21-24). Jin chaʼan maʼañic chucoch yom mi lac chanʼesan lac bʌ (1 Corintios 4:7). Cheʼ yom mi la cubin lac bʌ bajcheʼ jiñi apóstol Pablo. Tsiʼ sube jiñi xñoptʼañob yambʌloʼ bʌ i tejclum: «Lac piʼʌlix lac bʌ ti Dios» (Efesios 2:19). Yom mi la cʌcʼ wersa chaʼan mi lac luʼ choc loqʼuel ti lac pusicʼal jiñi mach bʌ weñic mi la cubin tiʼ tojlel yambʌlob. Cheʼʌch mi caj i mejlel lac xoj jiñi tsijiʼ bʌ lac pusicʼal, o wem bʌ lac melbal (Colosenses 3:10, 11).

10, 11. ¿Bajcheʼ tsiʼ pʌsʌ Booz chaʼan cheʼʌch miʼ qʼuel jiñi yambʌloʼ bʌ i país cheʼ bajcheʼ miʼ qʼuel Jehová?

¹⁰ Jiñi Biblia miʼ taj ti tʼan juntiquil toj bʌ wiñic i cʼabaʼ Booz (Boaz). Tsiʼ qʼuele jiñi yambʌloʼ bʌ i país cheʼʌch bajcheʼ miʼ qʼuelob Jehová. ¿Bajcheʼ tsiʼ mele? Ti jumpʼejl bʌ qʼuin, tsaʼ majli i qʼuel i pʌcʼʌb ti jamil. Cheʼ jiñi, tsiʼ taja i qʼuel chaʼan juntiquil xʼixic chʼoyol bʌ ti Moab i cʼabaʼ Rut, choncol i yʌcʼ wersa chaʼan miʼ lot i bʌcʼ cebada. Anquese i Mandar Moisés miʼ yʌl chaʼan mucʼʌch i mejlel, Rut tsiʼ ñaxan cʼajti (qʼuele jiñi recuadro «¿Chuqui yom i yʌl?»). Cheʼ bʌ Booz tsiʼ yubi iliyi, toj sajtel i pusicʼal i tsiʼ yʌlʌ chaʼan miʼ mejlel i lot jaʼel woli bʌ i tsep jiñi xʼeʼtelob i chaʼan (pejcan Rut 2:5-7, 18, 16).

¹¹ Cheʼ jiñi, Booz tsiʼ pʌsʌ chaʼan mucʼʌch i qʼuel ti ñuc Rut yicʼot jiñi wocol tac woli bʌ i ñusan cheʼ maʼañic tiʼ lumal. Tsiʼ sube chaʼan miʼ cʌytʌl yicʼot jiñi xʼeʼtelob xcʼalʌloʼ bʌ chaʼan jiñi wiñicob maʼañic miʼ ticʼlañob. Tsiʼ chʌn aqʼue chuqui miʼ cʼux yicʼot miʼ jap, lajal bajcheʼ yambʌ xʼeʼtelob i chaʼan. Booz tsiʼ colta yicʼot tsiʼ ñuqʼuesʌbe i pusicʼal ili xʼixic woli bʌ i ñusan wocol ti jiñi país (Rut 2:8-10, 13, 14).

12. ¿Chuqui miʼ mejlel ti ujtel cheʼ mi lac pʌsbeñob la cutslel jiñi tilemoʼ bʌ ti yambʌ país?

 ¹² Booz tsiʼ pʌsbe i yutslel Rut come Rut tsiʼ pʌsbe Noemí xucʼul bʌ cʼuxbiya. Cheʼ jaʼel, Rut tsiʼ teche i melben i yeʼtel Jehová yicʼot tsiʼ sʌcla i coltʌntel ti Dios. Cheʼ bʌ Booz tsiʼ pʌsbe i yutslel Rut, jiñʌch choncol i lajin xucʼul bʌ i cʼuxbiya Jehová (Rut 2:12, 20; Proverbios 19:17). Ili ora lajal miʼ yujtel jaʼel. Cheʼ mi lac pʌs la cutslel tiʼ «pejtelel winicob xʼixicob», miʼ mejlel laj coltañob i cʌn i sujmlel yicʼot miʼ taj i qʼuelob chaʼan Jehová miʼ wen cʼuxbiñob (1 Timoteo 2:3, 4).

13, 14. a) ¿Chucoch yomʌch mi lac pejcan jiñi tilemoʼ bʌ ti yambʌ país cheʼ bʌ miʼ cʼotelob tiʼ Yotlel Tempa bʌ? b) ¿Chuqui mi caj i coltañonla chaʼan ñumen tijicña mi la cubin cheʼ mi lac pejcan mach bʌ lajalic i cultura bajcheʼ lac chaʼan?

¹³ Junchajp bajcheʼ mi lac pʌsbeñob la cutslel jiñi tilemoʼ bʌ ti yambʌ país, jiñʌch cheʼ tijicña mi lac pejcañob tiʼ Yotlel Tempa bʌ. An i tajol, añob i bʌqʼuen yicʼot maʼañic majqui miʼ wen ñochtañob cheʼ bʌ tsijib julemob jaxto. Tajol pecʼ miʼ yubiñob i bʌ tiʼ cajob i cultura, mach wen añobic i taqʼuin, chaʼan bajcheʼ yilalob i colorlel i pʌchʌlel o i país. Jin chaʼan yom mi lac pejcañob, mi lac pʌsbeñob la cutslel yicʼot chaʼan mucʼʌch laj qʼuelob ti ñuc. Mi añʌch lac chaʼan jiñi aplicación JW Language, miʼ mejlel laj cʼʌn chaʼan mi lac ñop lac pejcañob tiʼ tʼan (pejcan Filipenses 2:3, 4).

¹⁴ Tajol wocol mi la cubin chaʼan mi lac pejcan juntiquil mach bʌ lajalic i cultura bajcheʼ lac chaʼan. ¿Chuqui mi caj i coltañonla chaʼan miʼ mejlel lac pejcañob? Miʼ mejlel lac suben chaʼan bʌ joñonla. Tajol mi lac taj laj qʼuel chaʼan mach cheʼobic bajcheʼ tsaʼ lac ñaʼta, i cabʌl chuqui lajal bʌ la quicʼot. Laʼ  laj cʼajtesan chaʼan ti jujumpʼejl cultura añʌch bajcheʼ yilal.

15. ¿Chuqui mi caj i coltañonla lac chʼʌmbeñob isujm jiñi wolito bʌ i ñʌmʼañob ti lac país?

¹⁵ ¿Bajcheʼ miʼ mejlel laj coltañob chaʼan miʼ yubiñob i tijicñʌyel yaʼ ti congregación? Yom mi laj cʼajtiben lac bʌ: «Cheʼ joñoñic añon ti yambʌ país, ¿bajcheʼ com mij qʼuejlel?» (Mateo 7:12). Mi an wolito bʌ i ñʌmʼañob, yom la cujil pijt tiʼ tojlelob. Tajol mach ti orajic mi lac chʼʌmben isujm chuqui miʼ ñaʼtañob o bajcheʼ yilal miʼ qʼuelob chuqui miʼ yujtel. Pero mach lac pijtan chaʼan cheʼ mi caj i ñaʼtañob o mi caj i melob bajcheʼ ñʌmʌlonla. Yom mi lac chʼʌmbeñob isujm yicʼot mi laj qʼuelob ti utsʼat cheʼ bajcheʼ yilalob (pejcan Romanos 12:13).

16, 17. a) ¿Bajcheʼ miʼ mejlel lac ñumen cʌn jiñi yambʌloʼ bʌ i cultura? b) ¿Bajcheʼ miʼ mejlel laj coltañob jiñi añoʼ bʌ ti laj congregación ñajt bʌ tilemob?

¹⁶ ¿Bajcheʼ miʼ mejlel lac ñumen cʌñob jiñi ñajt bʌ chʼoyolob chumuloʼ bʌ ti lac tʼejl? Junchajp jiñʌch cheʼ mi la cʌqʼuen i yorajlel lac ñumen cʌn baqui tilemob yicʼot bajcheʼ yilalob i cultura. Yaʼ ti lac chʼujutesaya ti familia miʼ mejlel lac sʌclan bajcheʼ yilalob i cultura jiñi ñajt bʌ tilemob añoʼ bʌ ti laj congregación o lʌcʼʌl bʌ chumulob la quicʼot. Yambʌ jiñʌch cheʼ mi lac pʌyob ti uchʼel ti la cotot. Jehová  «tsiʼ jambeyob gentilob i tiʼ otot chaʼan miʼ yochelob i ñop» (Hechos 14:27). Cheʼʌch yom mi lac mel jeʼel cheʼ mi la cotsañob ti la cotot jiñi ñajt bʌ tilemob «chʌncol bʌ i chʼujbiñob Dios jeʼel» (Gálatas 6:10, Jini wen bʌ tʼan; Job 31:32).

¹⁷ Cheʼ mi lac tem ajñel yicʼot yambʌ familia ñajt bʌ tilemob, miʼ coltañonla lac chʼʌmben isujm yicʼot laj qʼuel ti ñuc muʼ bʌ i melob chaʼan miʼ ñʌmʼañob ti laj cultura. Tajol yom mi laj coltañob i cʌn lac tʼan. O miʼ mejlel laj coltañob chaʼan miʼ tajob i troñel o baqui miʼ mejlelob ti chumtʌl. Ili miʼ mejlel i wen coltan jiñi la quermañojob (Proverbios 3:27).

18. ¿Majqui miʼ mejlel i lajibeñob i melbal jiñi ñajt bʌ chʼoyolob?

¹⁸ Isujm, yomʌch miʼ chaʼleñob wersa jaʼel chaʼan miʼ ñʌmʼañob yaʼ ti yambʌ cultura. Miʼ mejlel i lajibeñob i melbal Rut. Ti ñaxan, tsiʼ qʼuele ti ñuc i costumbre jiñi país baqui tsaʼ cʼoti. ¿Bajcheʼ? Tsiʼ cʼajti chaʼan miʼ mejlel i lot cebada yaʼ ti jamil (Rut 2:7). Maʼañic tsiʼ bajñel ñaʼta chaʼan mucʼʌch i mejlel mi chaʼañic an bajcheʼ yom miʼ coltʌntel. I chaʼpʼejlel, tsiʼ yʌcʼʌ wocolix i yʌlʌ cheʼ tsaʼ pʌsbenti i yutslel (Rut 2:13). Mi cheʼʌch miʼ melob bajcheʼ Rut jiñi ñajt bʌ chʼoyolob jaʼel, tajol jiñi hermanojob yicʼot yambʌ lac piʼʌlob mi caj i ñumen qʼuelob ti ñuc.

19. ¿Chucoch yom mi laj coltan i yubiñob i tijicñʌyel jiñi ñajt bʌ chʼoyolob?

¹⁹ Tijicña mi la cubin cheʼ Jehová miʼ pʌsben i yutslel mach bʌ i wentʌlel miʼ tajob jiñi quixtañujob yicʼot cheʼ miʼ yʌqʼueñob i yubin jiñi wen tʼan. An cabʌl maʼañic bʌ miʼ mejlel i cʌñob chaʼan Biblia yaʼ tiʼ país o maʼañic miʼ mejlel i tempañob i bʌ. Pero wʌle muqʼuix i mejlelob, i yom mi laj coltañob chaʼan mach i bajñelobic miʼ yubiñob i bʌ. Tajol mach wen añic lac taqʼuin o maʼañic bajcheʼ miʼ mejlel lac wen coltañob. Pero mi mucʼʌch lac pʌsbeñob la cutslel, woli lac lajin bajcheʼ miʼ pʌs i cʼuxbiya Jehová tiʼ tojlelob. Jin chaʼan, laʼ lac chʌn lajin Jehová yicʼot laʼ lac chaʼlen wersa chaʼan utsʼat mi laj qʼuel jiñi tilemoʼ bʌ ti yambʌ país (Efesios 5:1, 2).