¿AM BA a ñusa wocol bajcheʼ ili? Mi añʌch, tajol maʼ ñaʼtan bajcheʼ yubil miʼ yubiñob i bʌ jiñi cuxul bʌ miʼ cʌytʌlob: Añob i bʌqʼuen, cʌlʌx pensal, maʼañic miʼ ñopob tsaʼ bʌ ujti, mach yujilobic chuqui yom miʼ melob yicʼot miʼ chaʼleñob bʌbʌqʼuen bʌ ñajal. Muʼ bʌ i ñusañob ili wocol wen chʼijiyem yicʼot lujben miʼ yubiñob i bʌ i maʼañobic i pʼʌtʌlel miʼ yubin chaʼan miʼ chaʼleñob wersa.

Mi an a sʌtʌ a chubʌʼan tiʼ caj tsʌts bʌ icʼ jaʼal o yan tac bʌ, tajol maʼañix a pʼʌtʌlel maʼ wubin jaʼel. Cheʼ jaʼel, tajol woli (choncol) a ñaʼtan chaʼan maʼañix i cʼʌjñibal cheʼ cuxulet. Pero jiñi Biblia miʼ yʌl chaʼan añʌch i sujmlel cheʼ cuxulet yicʼot añʌch chucoch miʼ mejlel a ñop chaʼan mucʼʌch caj lac taj chuqui tac wen ti talto bʌ qʼuin.

Eclesiastés 7:8 miʼ yʌl chaʼan ñumen utsʼat i joloñibal jumpʼejl eʼtel bajcheʼ i tejchibal. Mi jatet tsaʼ ñusa wocol tiʼ caj tsʌts bʌ icʼ jaʼal o yan tac bʌ i yom maʼ chaʼ tech chumtʌl, tajol maʼ ñaʼtan chaʼan maʼañix i cʼʌjñibal. Pero yomʌch a wujil pijt yicʼot maʼ chaʼlen wersa chaʼan miʼ chaʼ tojʼan bajcheʼ añet.

Jiñi Biblia miʼ yʌl chaʼan mi caj i cʼotel i yorajlel cheʼ bʌ «maʼanix mi caj i chʌn ubintel uqʼuel yicʼot oñel» (Isaías 65:19). Ili tʼan mi caj i tsʼʌctiyel cheʼ bʌ jiñi i Yumʌntel Dios miʼ sujtesan ili Lum ti jumpʼejl paraíso (Salmo 37:11, 29). Maʼañix baʼ ora mi caj i chaʼ ñumel tsʌts bʌ icʼ jaʼal o yan tac bʌ. Mi caj i jilel pejtelel mach bʌ weñic mi laj cʼajtesan yicʼot bʌqʼuen. Jiñi Dios mach bʌ añic i pʼisol i pʼʌtʌlel miʼ yʌl: «Maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan» (Isaías 65:17).

Ñaʼtancu iliyi: Jiñi tsaʼ bʌ i Meleyonla (Pʌtʌyonla) añʌch chuqui tsiʼ chajpa chaʼan mi lac taj «chuqui utsʼat» yicʼot lac pijtaya, yom chaʼan ñʌchʼʌl mi lac chumtʌl tiʼ wenta jiñi toj bʌ i Yumʌntel (Jeremías 29:11). ¿Muʼ ba i mejlel i yʌqʼuen i sujmlel a cuxtʌlel ili pijtaya? Sally, tsaʼ bʌ lac ñaxan alʌ, miʼ yʌl: «Cheʼ bʌ mi lac ñaʼtan jiñi wen tac bʌ ti talto bʌ qʼuin, cheʼ bʌ añoñixla tiʼ wenta i Yumʌntel Dios, miʼ mejlel i coltañonla lac ñajʌtesan jiñi tsaʼ bʌ lac ñusa yicʼot chaʼan mi lac lʌtʼ ili ora».

¿Chuqui tac yambʌ mi caj i mel jiñi i Yumʌntel Dios? Mic poj subeñet lojon chaʼan maʼ sʌclʌben i jacʼbal. Cheʼ jiñi, mi caj a qʼuel chaʼan añʌch i sujmlel cheʼ cuxulet anquese an a ñusa wocol yicʼot chaʼan tsʼitaʼ jax yom chaʼan jiñi icʼ jaʼal yicʼot yan tac bʌ miʼ jilel. Cheʼ bʌ wolito (yʌquelto) lac pijtan, jiñi ticʼojel tac am bʌ ti Biblia miʼ mejlel i coltañet a lʌtʼ jiñi wocol tac.