1, 2. a) ¿Bajcheʼ yilal miʼ qʼuel Jehová jiñi muʼ bʌ i chaʼlen mulil i maʼañic miʼ chaʼ ñaʼtan i bʌ? b) ¿Chuqui yom Jehová?

 JEHOVÁ tsʼaʼ miʼ qʼuel jiñi mulil, i mach cheʼic jach miʼ toʼol qʼuel cheʼ bʌ an majqui miʼ chaʼlen mulil (Sal. 5:​4-6). Yujil chaʼan xmulilonla i maʼañic miʼ pijtan chaʼan luʼ toj chuqui mi lac mel. Pero yomʌch chaʼan mi lac jacʼ muʼ bʌ i yʌl jiñi Biblia (Sal. 130:​3, 4). Jin chaʼan mach weñic miʼ qʼuel jiñi maʼañic bʌ miʼ bʌcʼñañob, muʼ bʌ i «cʼʌñob jiñi ñuc bʌ i yutslel Dios chaʼan maʼañobic i quisin miʼ melob mach bʌ weñic» (Jud. 4). Jiñi Biblia miʼ yʌl chaʼan Jehová mi caj i jisañob ti Armagedón jiñi jontoloʼ bʌ (mañajoʼ bʌ) (2 Ped. 3:7; Apoc. 16:16).

² Cheʼ bajcheʼ tsaʼ laj qʼuele ti yambʌ estudio, Jehová «yom chaʼan pejtelel lac piʼʌlob miʼ chaʼ ñaʼtañob i bʌ» come mach yomic chaʼan mi juntiquilic miʼ jisʌntel (2 Ped. 3:9). Jin chaʼan, jiñi ancianojob miʼ lajiñob Jehová i miʼ ñop i coltañob jiñi  tsaʼ bʌ i chaʼle tsʌts bʌ mulil chaʼan miʼ chaʼ ñaʼtan i bʌ yicʼot miʼ chaʼ lʌcʼtesan i bʌ ti Jehová. Pero mach tiʼ pejtelelobic wen miʼ jacʼob (Is. 6:9). An mach bʌ yomobic i tojʼesan i melbal (chaʼlibal) anquese jiñi ancianojob mach junsujtel jach miʼ ñop i coltañob. Mi cheʼ miʼ yujtel bajcheʼ jiñi, ¿chuqui yom miʼ mejlel?

CHOCOLA LOQʼUEL JIÑI JONTOL BɅ LAC PIʼɅL

3. a) Cheʼ bʌ juntiquil miʼ chaʼlen mulil i maʼañic miʼ chaʼ ñaʼtan i bʌ, ¿chuqui miʼ yʌl jiñi Biblia chaʼan yom miʼ mejlel? b) ¿Chucoch mi la cʌl chaʼan lajal bajcheʼ jin woliʼ cʼajtin chaʼan miʼ chojquel loqʼuel jiñi maʼañic bʌ miʼ chaʼ ñaʼtan i bʌ?

³ Mi juntiquil muʼ bʌ i chaʼlen mulil maʼañic miʼ chaʼ ñaʼtan i bʌ, jiñi ancianojob yom miʼ jacʼob muʼ bʌ i yʌl 1 Corintios 5:13: «Chocola loqʼuel ti laʼ tojlel jiñi jontol bʌ lac piʼʌl». Lajal bajcheʼ jiñi tsaʼ bʌ i chaʼle mulil woliʼ yilol cʼajtin chaʼan miʼ chojquel loqʼuel, woli (choncol) i lotben i wut chuqui tsaʼ bʌ i pʌcʼʌ (Gál. 6:7). Maʼañic tsiʼ qʼuele ti ñuc cheʼ bʌ jiñi ancianojob tsiʼ chaʼleyob wersa chaʼan miʼ ñop i coltañob (2 R. 17:​12-15). Tsiquil miʼ pʌs chaʼan mach yomic i jacʼ jiñi i mandar Jehová (Dt. 30:​19, 20).

4. Cheʼ bʌ juntiquil miʼ chojquel loqʼuel ti congregación, ¿chucoch yom miʼ yʌjqʼuel jumpʼejl anuncio?

⁴ Cheʼ bʌ juntiquil muʼ bʌ i chaʼlen tsʌts bʌ mulil maʼañic miʼ chaʼ ñaʼtan i bʌ, yom miʼ sujbel yaʼ ti congregación chaʼan mach Testigojix. a ¿Chucoch? Chaʼan jiñi hermanojob miʼ cʌy i ñochtañob yicʼot i cʼuxob i waj yicʼot (1 Cor. 5:​9-11). I añʌch chucoch Jehová tsiʼ yʌlʌ iliyi. Jiñi apóstol Pablo tiʼ tsʼijbu: «Tsʼitaʼ levadura miʼ pajʼesan pejtelel jiñi xʌcʼbil bʌ harina» (1 Cor. 5:6). Mi jiñi tsaʼ bʌ i chaʼle mulil maʼañic miʼ chojquel loqʼuel ti congregación, tajol jiñi hermanojob mi caj i ñaʼtañob chucochto miʼ chaʼleñob wersa i jacʼbeñob i mandar Jehová (Pr. 13:20; 1 Cor. 15:33).

5. ¿Bajcheʼ yilal yom mi laj qʼuel juntiquil mach bʌ Testigojix, i chucoch?

⁵ Jin chaʼan, ¿bajcheʼ yom mi laj qʼuelob jiñi mach bʌ Testigojobix? Yom mi laj qʼuelob cheʼ bajcheʼ juncojt tiñʌmeʼ muʼ bʌ i sʌt i bʌ pero miʼ mejlel ti chaʼ sujtel, mach lac ñaʼtan chaʼan maʼañix miʼ mejlel ti chaʼ tajtʌl. Laʼ laj cʼajtesan chaʼan tsiʼ yʌcʼʌ i bʌ ti Jehová. Cojach chaʼan wʌleʼli maʼañix woli (yʌquel) i tsʼʌctesan i tʼan yicʼot an ti wocol (Ez. 18:31). Pero mi anto tiempo i Jehová muʼto i pʌsben i pʼuntaya, mi lac pijtan chaʼan ti jumpʼejl bʌ qʼuin miʼ chaʼ sujtel. ¿I bajcheʼ miʼ mejlel i coltañob jiñi ancianojob?

¿BAJCHEʼ MIʼ COLTAÑOB JIÑI ANCIANOJOB JIÑI TSAʼ BɅ CHOJQUI LOQʼUEL TI CONGREGACIÓN?

6. ¿Chuqui miʼ bej melob jiñi ancianojob chaʼan miʼ coltañob jiñi muʼ bʌ i chojquel loqʼuel ti congregación?

⁶ Mi jiñi muʼ bʌ i chaʼlen mulil miʼ chojquel loqʼuel ti congregación, ¿chuqui miʼ melob jiñi ancianojob? ¿Maʼañix ba mi caj i coltañob chaʼan miʼ chaʼ sujtel? ¡Mucʼʌch caj i coltañob! Cheʼ bʌ jiñi comité de anciano miʼ subeñob chaʼan mi caj i chocob loqʼuel ti congregación, yom miʼ subeñob jaʼel chuqui yom miʼ mel chaʼan miʼ chaʼ sujtel. Cheʼ jaʼel, miʼ mejlel i subeñob chaʼan ti chaʼpʼej uxpʼejl uw yomob i chaʼ pejcan. Mi mucʼʌch i jacʼ, cheʼ bʌ miʼ chaʼ tempañob i bʌ mi caj i subeñob chaʼan miʼ chaʼ ñaʼtan i bʌ yicʼot miʼ chaʼ sujtel. Mi jiñi ancianojob miʼ qʼuelob chaʼan maxto i qʼuexta i melbal, mi caj i bej chaʼleñob wersa chaʼan ti wiʼil miʼ chaʼ pejcañob chaʼan miʼ bej coltañob.

7. Cheʼ bʌ juntiquil miʼ chojquel loqʼuel ti congregación, ¿bajcheʼ miʼ lajiñob Jehová jiñi ancianojob? (Jeremías 3:12).

⁷ Jiñi ancianojob miʼ chaʼleñob wersa chaʼan  miʼ pʌsbeñob pʼuntaya jiñi tsaʼix bʌ chojqui loqʼuel ti congregación. Jehová cheʼʌch miʼ mel bajcheʼ jiñi. Cheʼ bʌ jiñi israelitajob tsiʼ wen ñusʌbeyob i tʼan, Jehová mach cheʼ jach tsaʼ cʌli i pijtan bajcheʼ ora miʼ ñaʼtañob sujtel tiʼ tojlel. Tsiʼ choco majlel xʼaltʼañob chaʼan miʼ coltañob, anquese jiñi israelitajob maxto i chaʼ ñaʼtayob i bʌ. I cheʼ bajcheʼ tsaʼ laj qʼuele yaʼ ti estudio 32, Jehová tsiʼ pʌsʌ bajcheʼ cʼamel jiñi i pʼuntaya cheʼ bʌ tiʼ sube jiñi xʼaltʼan Oseas chaʼan miʼ majlel i suben jiñi i yijñam chaʼan miʼ chaʼ sujtel yicʼot, anquese Jehová yujil chaʼan wolito i chaʼlen mulil (Os. 3:1; Mal. 3:7). Jin chaʼan, jiñi ancianojob jaʼel ti jumpʼejl i pusicʼal yomob chaʼan jiñi tsaʼ bʌ i chaʼle mulil miʼ chaʼ ñaʼtan i bʌ yicʼot miʼ chaʼ sujtel ti congregación, i mach tsʌtsic miʼ melob i bʌ tiʼ tojlel (pejcan Jeremías 3:12).

8. ¿Bajcheʼ miʼ ñumen tsictiyel i pʼuntaya Jehová ti jiñi lajiya tsaʼ bʌ i yʌlʌ Jesús? (Lucas 15:7).

⁸ Laʼ lac chaʼ cʼajtesan jaʼel jiñi lajiya tsaʼ bʌ i yʌlʌ Jesús tiʼ tojlel jiñi alob tsaʼ bʌ loqʼui majlel ti yotot i tsaʼ chaʼ sujti. Cheʼ bʌ jiñi i papá ñajtto tsiʼ taja i qʼuel, «ti ajñel tsaʼ majli i taj, tsiʼ meqʼue i tiʼ tsʼujtsʼu» (Luc. 15:20). Cheʼ bajcheʼ mi laj qʼuel, jiñi tatʌl maʼañic tsiʼ pijta chaʼan jiñi i yalobil miʼ cʼotel i cʼajtin chaʼan miʼ ñusʌbentel i mulil. Jiñʌch jiñi ñaxam bʌ tsaʼ loqʼui majlel i taj come miʼ cʼuxbin i yalobil. Jiñi ancianojob cheʼʌch miʼ yubiñob jaʼel tiʼ tojlel jiñi muʼ bʌ i ñajtʼesan i bʌ ti Jehová, miʼ chaʼleñob wersa chaʼan miʼ coltañob chaʼan miʼ chaʼ sujtel tiʼ tojlel (Luc. 15:​22-24, 32). Cheʼ bʌ jiñi tsaʼ bʌ i chaʼle mulil miʼ chaʼ sujtel, Jehová, Jesús yicʼot jiñi ángelob tijicña miʼ yubiñob i bʌ, ¡i cheʼʌch miʼ yubin jaʼel jiñi congregación! (Pejcan Lucas 15:7).

9. ¿Chuqui miʼ suben Jehová jiñi tsaʼ bʌ i chaʼleyob tsʌts bʌ mulil?

⁹ Cheʼ bajcheʼ tsaʼix laj qʼuele, wen tsiquil chaʼan Jehová maʼañic mi caj i yʌcʼ chaʼan miʼ bej ajñel ti congregación jiñi muʼ bʌ i chaʼlen tsʌts bʌ mulil i maʼañic miʼ chaʼ ñaʼtan i bʌ. Pero ili mach yomic i yʌl chaʼan miʼ junyajl choc, come yom chaʼan miʼ chaʼ sujtel tiʼ tojlel. Ti Oseas 14:4 mi laj qʼuel chuqui miʼ yʌl Jehová tiʼ tojlel jiñi muʼ bʌ i chaʼ ñaʼtañob i bʌ: «Joñon mi caj j coltañob […]. Mi caj j cʼuxbiñob tiʼ yutslel c pusicʼal, come tsaʼix lajmi c michʼajel». Cheʼ bajcheʼ mi laj qʼuel, jiñi ancianojob yom yʌxʌlob i yo chaʼan miʼ qʼuelob mi jiñi tsaʼ bʌ i cʌyʌ Jehová an bajcheʼ woliʼ pʌs chaʼan wolix i tech i chaʼ ñaʼtan i bʌ, ¡ili wen ñucʌch i cʼʌjñibal! Cheʼ jaʼel, ili miʼ pʌsbeñob jiñi tsaʼ bʌ i cʌyʌyob jiñi congregación chaʼan Jehová mucʼʌch i bej cʼuxbiñob i yom chaʼan muqʼuix i chaʼ sujtelob tiʼ tojlel.

10, 11. ¿Bajcheʼ miʼ chaʼleñob wersa i coltañob jiñi ancianojob jiñi wajalix bʌ chojquiyob loqʼuel ti congregación?

¹⁰ ¿Ixcu mi juntiquil wajalix tsaʼ chojqui loqʼuel ti congregación? ¿Chuqui yom miʼ mejlel? Tajol tsaʼix i cʌyʌ jiñi i mul tsaʼ bʌ i mele o maʼañix cʼajal i chaʼan chuqui tiʼ caj tsaʼ locʼsʌnti ti congregación. Mach yʌlʌyic bajcheʼ tsaʼ ujti, pero jiñi ancianojob yom miʼ chaʼleñob wersa chaʼan miʼ julaʼtañob tiʼ pejtelelob. I cheʼ bʌ miʼ pejcañob, jiñi ancianojob miʼ mejlel i subeñob mi yom chaʼan miʼ chaʼleñob oración tiʼ tojlel yicʼot miʼ subeñob chaʼan miʼ chaʼ sujtel ti congregación. Pero mi wajalix tsiʼ cʌyʌ jiñi congregación tajol yom miʼ yʌqʼuentel estudio chaʼan miʼ chaʼ tech i cʌn Jehová yicʼot jiñi i sujmlel am bʌ ti Biblia. Jin chaʼan, mi tsiʼ yʌlʌ chaʼan yomʌch chaʼ sujtel, jiñi ancianojob mi caj i yajcañob majqui bʌ hermano o hermana mi caj i yʌqʼueñob jiñi estudio anquese maxto chaʼ sujtemic. Pero pejtelel iliyi jiñʌch yom miʼ qʼuelob jiñi ancianojob.

 ¹¹ Jiñi ancianojob yom miʼ pʌsob i pʼuntaya cheʼ bajcheʼ miʼ mel Jehová. Jin chaʼan miʼ chaʼleñob wersa i sʌclañob yicʼot i coltañob jiñi tsaʼ bʌ i chaʼleyob mulil chaʼan miʼ pʌsbeñob chaʼan mucʼʌch i mejlel ti chaʼ sujtel ti congregación. Mi jiñi tsaʼ bʌ i chaʼle mulil miʼ pʌs chaʼan tsaʼix i chaʼ ñaʼta i bʌ muqʼuix i mejlel ti chaʼ otsʌntel ti congregación (2 Cor. 2:​6-8).

12. a) ¿Chuqui yom miʼ wen ñaʼtañob jiñi ancianojob? b) ¿Chucoch mach yomic mi la cʌl chaʼan an tsaʼ bʌ i chaʼleyob tsʌts bʌ mulil maʼañix bʌ mi caj i ñusʌbentelob i mul? (Qʼuele jaʼel jiñi nota).

¹² An baqui jiñi ancianojob yomʌch miʼ wen ñaʼtañob mi muqʼuix i mejlel ti chaʼ ochel ti congregación juntiquil tsaʼ bʌ i chaʼle mulil, ¿chucoch? Tajol an tsaʼ bʌ i ticʼla alobob, tsaʼ sujti ti apóstata o tsiʼ ñaʼta bajcheʼ miʼ mejlel  i cʌy i yijñam o i ñoxiʼal. Jiñi ancianojob yomʌch miʼ wen ñaʼtañob mi jiñi tsaʼ bʌ i mele bajcheʼ iliyi tsaʼix i chaʼ ñaʼta i bʌ tiʼ sujm (Mal. 2:14; 2 Tim. 3:6). ¿Chucoch? Come yomob i cʌntan jiñi congregación. Pero yom mi lac chʼʌmben i sujm chaʼan Jehová mucʼʌch i chaʼ chʼʌm tiʼ tejclum jiñi tsaʼ bʌ i chaʼle tsʌts bʌ mulil mi tsaʼix i chaʼ ñaʼta i bʌ yicʼot mi tsaʼix i cʌyʌ i mel mulil. Jin chaʼan, anquese jiñi ancianojob an qʼuiñil yomʌch miʼ wen ñaʼtañob mi muqʼuix caj i chaʼ otsañob ti congregación juntiquil, yom miʼ cʌntañob i bʌ chaʼan maʼañic miʼ subeñob jiñi tsaʼ bʌ i chaʼle tsʌts bʌ mulil chaʼan Jehová maʼañix mi caj i ñusʌbeñob i mul (1 Ped. 2:10). b

¿CHUQUI MIʼ MEJLEL I MEL JIÑI CONGREGACIÓN?

13. ¿Bajcheʼ yilal yom mi laj qʼuel jiñi muʼ bʌ i chaʼlentel ti censurar, i bajcheʼ yilal yom mi laj qʼuel jiñi muʼ bʌ i chojquel loqʼuel ti congregación?

¹³ Cheʼ bajcheʼ tsaʼix laj qʼuele ti yambʌ estudio, an i tajol miʼ yʌjqʼuel jumpʼejl anuncio chaʼan miʼ sujbel chaʼan an majqui tsaʼ chaʼlenti ti censurar. Mucʼʌch i mejlel lac bej ñochtan come la cujil chaʼan tsaʼix i chaʼ ñaʼta i bʌ yicʼot tsaʼix i cʌyʌ i mel jiñi mulil (1 Tim. 5:20). Juntiquilʌch hermano yaʼ ti congregación i yom miʼ coltʌntel chaʼan miʼ bej mel chuqui wen (Heb. 10:​24, 25). Pero qʼuexelʌch cheʼ bʌ an majqui miʼ chojquel loqʼuel ti congregación. Mi laj cʌy lac ñochtan, mi muqʼuicto laj cʼux lac waj yicʼot (1 Cor. 5:11).

14. ¿Chuqui an ti lac wenta mi lac ñaʼtan ti jujuntiquil tiʼ tojlel jiñi tsaʼ bʌ chojqui loqʼuel ti congregación? (Qʼuele jaʼel jiñi foto).

¹⁴ Cheʼ bʌ juntiquil miʼ chojquel loqʼuel ti congregación, ¿yom ba i yʌl chaʼan mach weñix mi caj laj qʼuel? Maʼañic. I sujmʌch, mach yomic mi lac ñochtan o mi lac ñusan qʼuin la quicʼot. Pero jujuntiquil mi caj i cʼʌn chuqui cʌmbil i chaʼan yaʼ ti Biblia chaʼan miʼ ñaʼtan mi yom i pʌy ti tempa bʌ, tajol i familia, i yamigo o i cʌñʌ. I mi tsaʼ cʼoti ti tempa bʌ, ¿bajcheʼ yilal yom mi laj qʼuel? Ti wajali, maʼañic mi lac chaʼlen ti saludar. Pero wʌle jujuntiquil mi caj i ñaʼtan jaʼel mi yom i chaʼlen ti saludar. Cojach maʼañic mi caj laj cʌlʌx pejcan mi muqʼuic caj lac ñusan qʼuin yicʼot.

15. ¿Majqui woliʼ taj ti tʼan 2 Juan 9-11? (Qʼuele jaʼel jiñi recuadro « ¿Lajal jach ba jiñi mulil woli bʌ i taj ti tʼan Juan yicʼot Pablo?»).

 ¹⁵ Tajol mi laj cʼajtiben lac bʌ: «¿Pero mach ba añic miʼ yʌl jiñi Biblia chaʼan mi tsaʼ lac chaʼle ti saludar woli laj ‹coltan tiʼ melol chuqui tac mach bʌ weñic›?» (pejcan 2 Juan 9-11). Ili versículo tac miʼ taj ti tʼan jiñi apóstatajob yicʼot muʼ bʌ i yʌcʼ ti mulil yambʌlob (Apoc. 2:20). Mi juntiquil bej apóstata, jiñi ancianojob maʼañic mi caj i julaʼtañob. Tajol ti jumpʼejl bʌ qʼuin mucʼʌch i chaʼ qʼuextan i melbal, pero mi maʼañic miʼ mel, mach yomic mi lac chaʼlen ti saludar mi yomic mi lac pʌy ti tempa bʌ.

LAʼ LAC LAJIBEN I PʼUNTAYA JEHOVÁ

16, 17. a) ¿Chuqui yom Jehová chaʼan miʼ melob jiñi tsaʼ bʌ i chaʼleyob mulil? (Ezequiel 18:32). b) ¿Bajcheʼ miʼ chaʼleñob eʼtel jiñi ancianojob yicʼot Jehová?

¹⁶ ¿Chuqui tsaʼ laj cʌñʌ ti ili joʼpʼejl estudio? Jehová mach yomic chaʼan miʼ jisʌntel mi juntiquilic, yom chaʼan jiñi tsaʼ bʌ i chaʼleyob mulil miʼ chaʼ utsʼañob yicʼot (pejcan Ezequiel 18:32; 2 Cor. 5:20). Cʼʌlʌl ti wajali, Jehová maʼañic miʼ cʌy jiñi muʼ bʌ i chaʼlen mulil, yom chaʼan miʼ chaʼ ñaʼtan i bʌ. Jiñi ancianojob añob i chaʼan jumpʼejl ñuc bʌ privilegio, miʼ chaʼleñob eʼtel (troñel) yicʼot Jehová chaʼan miʼ coltañob jiñi tsaʼ bʌ i chaʼleyob mulil chaʼan miʼ chaʼ ñaʼtañob i bʌ (Rom. 2:4; 1 Cor. 3:9).

¹⁷ ¡Ñaʼtancu jiñi tijicñʌyel am bʌ ti panchan cheʼ bʌ juntiquil miʼ chaʼ ñaʼtan i bʌ! Jehová wen tijicña miʼ yubin cheʼ bʌ miʼ qʼuel chaʼan jiñi tsaʼ bʌ i chaʼle mulil miʼ chaʼ sujtel ti congregación. Cheʼ mi lac wen ñaʼtan bajcheʼ miʼ pʌs Jehová jiñi i yutslel yicʼot i pʼuntaya mi caj lac ñumen cʼuxbin (Luc. 1:78).