1. ¿Chuqui yom i mel Jehová tiʼ tojlel juntiquil muʼ bʌ i chaʼlen tsʌts bʌ mulil?

 YAʼ ti yambʌ estudio tsaʼ laj qʼuele chaʼan Pablo tsiʼ yʌlʌ chuqui yom miʼ mejlel tiʼ tojlel jiñi wiñic tsaʼ bʌ i chaʼle tsʌts bʌ mulil yaʼ ti congregación ti Corinto. Tsiʼ yʌlʌ chaʼan yom miʼ chojquel loqʼuel ti congregación, come maʼañic tsiʼ chaʼ ñaʼta i bʌ. Pero cheʼ bajcheʼ miʼ pʌs ili texto baqui chucul ili estudio, Dios miʼ mejlel i coltan juntiquil tsaʼ bʌ i chaʼle mulil chaʼan miʼ chaʼ ñaʼtan i bʌ (Rom. 2:4). ¿Bajcheʼ miʼ cʼʌn Jehová jiñi ancianojob chaʼan miʼ ñop i coltañob jiñi muʼ bʌ i chaʼlen mulil?

2, 3. ¿Chuqui yom mi lac mel mi la cujil chaʼan juntiquil hermano tsiʼ chaʼle tsʌts bʌ mulil, i chucoch?

² Laʼcu lac ñaʼtan chaʼan juntiquil hermano tsiʼ chaʼle tsʌts bʌ mulil i tajol yom miʼ chojquel loqʼuel ti congregación. ¿Chuqui yom mi lac mel? Yom mi lac suben jiñi hermano chaʼan miʼ pejcan jiñi ancianojob chaʼan miʼ cʼajtin i coltʌntel, ¿chucoch yom miʼ mel jiñi? Come jiñi ancianojob yom yujilob chuqui jiñi tsaʼ bʌ ujti chaʼan miʼ mejlel i coltañob (Is. 1:18; Hech. 20:28; 1 Ped. 5:2).

³ Pero mi jiñi hermano o hermana mach yomic majlel i pejcan jiñi ancianojob, joñonla yom mi lac mel come mi laj cʼuxbin yicʼot la com chaʼan miʼ coltʌntel. Mi maʼañic miʼ qʼuextan i melbal (chaʼlibal) mi caj i ñumen ñajtʼesan i bʌ ti Jehová i miʼ mejlel i yʌcʼ ti ajlel mach bʌ weñic tiʼ tojlel Jehová yicʼot jiñi congregación. Jin chaʼan, anquese wocolʌch mi la cubin, yom mi lac pʌs lac chʼejlel chaʼan miʼ majlel lac pejcan jiñi ancianojob  come mi laj cʼuxbin Jehová yicʼot jiñi hermano o hermana (Sal. 27:14).

¿BAJCHEʼ MI COLTAÑOB JIÑI ANCIANOJOB JIÑI MUʼ BɅ I CHAʼLEN TSɅTS BɅ MULIL?

4. ¿Chuqui yomob jiñi ancianojob cheʼ bʌ miʼ tempañob i bʌ yicʼot jiñi tsaʼ bʌ i chaʼle mulil?

⁴ Mi juntiquil hermano miʼ chaʼlen tsʌts bʌ mulil, jiñi ancianojob yom miʼ tempañob i bʌ chaʼan miʼ yajcañob uxtiquil chaʼan miʼ melob jumpʼejl comité a chaʼan miʼ pejcañob jiñi tsaʼ bʌ i chaʼle mulil. Jiñi ancianojob yom miʼ pʌsob i pecʼlel, i maʼañic mi caj i wersa xicʼob chaʼan jiñi tsaʼ bʌ i chaʼle mulil miʼ chaʼ ñaʼtan i bʌ (Dt. 30:19). Mach junlajalic mi caj i jacʼob cheʼ bajcheʼ tsiʼ mele David (2 S. 12:13). An mach bʌ yomobic i jacʼben i tʼan Jehová (Gn. 4:​6-8). Pero jiñi ancianojob yomob i coltan jiñi tsaʼ bʌ i chaʼle mulil chaʼan miʼ chaʼ ñaʼtan i bʌ. ¿Chuqui ti principio tac miʼ chʼʌmob ti ñuc jiñi comité de anciano cheʼ bʌ miʼ tempañob i bʌ yicʼot jiñi tsaʼ bʌ i chaʼle mulil?

5. ¿Chuqui yom miʼ cʼajtesañob jiñi ancianojob cheʼ miʼ tempañob i bʌ yicʼot jiñi tsaʼ bʌ i chaʼle mulil? (2 Timoteo 2:​24-26; qʼuele jaʼel jiñi dibujo).

⁵ Jiñi ancianojob cheʼ yom miʼ qʼuelob cheʼ bajcheʼ miʼ qʼuel Jehová, bajcheʼ juncojt tiñʌmeʼ tsaʼ bʌ sajti pero muʼ bʌ i wen qʼuel ti ñuc (Luc. 15:​4, 6). Jin chaʼan, cheʼ bʌ miʼ pejcañob mach tsʌtsic mi caj i melob i bʌ tiʼ tojlel. Maʼañic mi caj i toʼol melbeñob cʼajtiya tac chaʼan jach miʼ ñaʼtañob chuqui tsaʼ bʌ i mele chaʼan miʼ yʌlob chuqui mi caj i yujtel. Yomʌch miʼ pʌsob i yutslel, yom ti uts bʌ tʼan miʼ pejcañob chaʼan miʼ ñijcʌbeñob i pusicʼal i miʼ chaʼ ñaʼtan i bʌ. Yom miʼ pʌsob jiñi melbalʌl tac muʼ bʌ i yʌjlel ti 2 Timoteo 2:​24-26 (pejcan).

6. ¿Bajcheʼ miʼ chajpañob i bʌ jiñi ancianojob cheʼ bʌ muʼto caj i pejcañob jiñi tsaʼ bʌ i chaʼle mulil? (Romanos 2:4).

⁶ Jiñi ancianojob yom miʼ chajpañob i bʌ chaʼan miʼ qʼuelob chuqui miʼ ñaʼtan Jehová. Yom cʼajal i chaʼañob ili tʼan tsaʼ bʌ i yʌlʌ Pablo: «Ti jiñi ñuc bʌ i yutslel [Dios] woliʼ ñop i coltañet chaʼan maʼ chaʼ ñaʼtan a bʌ» (pejcan Romanos 2:4). Yujilob chaʼan Jehová tsiʼ yʌcʼʌyob bajcheʼ xcʌntaya yaʼ ti congregación, jin chaʼan miʼ chaʼleñob wersa i pʌsob i yutslel cheʼ bajcheʼ Jehová. Miʼ lajiñob Jesús i miʼ jacʼob jiñi tsaʼ bʌ i yʌlʌ (Is. 11:​3, 4; Mat. 18:​18-20). Cheʼ bʌ muʼto caj i tempañob i bʌ yicʼot jiñi tsaʼ bʌ i chaʼle mulil, miʼ melob oración chaʼan miʼ cʼajtibeñob i coltaya Jehová chaʼan miʼ mejlel i coltañob chaʼan miʼ chaʼ ñaʼtan i bʌ. Miʼ sʌclañob información ti Biblia yicʼot ti lac jun tac, i miʼ cʼajtibeñob Jehová  chaʼan miʼ yʌqʼueñob i ñaʼtʌbal chaʼan miʼ mejlel i chʼʌmbeñob i sujm jiñi tsaʼ bʌ i chaʼle mulil. Cheʼ jaʼel, yom yujilob chuqui tsiʼ pʌyʌ majlel chaʼan miʼ mel bajcheʼ jiñi o chucoch tsiʼ mele (Pr. 20:5).

7, 8. ¿Bajcheʼ miʼ mejlel i pʌsob i pijt jiñi ancianojob cheʼ bʌ miʼ chaʼleñob tʼan yicʼot juntiquil tsaʼ bʌ i chaʼle tsʌts bʌ mulil?

⁷ Jiñi ancianojob yom yujilob pijt cheʼ bajcheʼ Jehová. Yom cʼajal i chaʼañob bajcheʼ tsiʼ colta Jehová jiñi tsaʼ bʌ i chaʼleyob mulil ti wajali. Jumpʼejl ejemplo, Jehová ti uts jach bʌ tʼan tiʼ sube Caín chuqui mi caj i yujtel tiʼ tojlel mi maʼañic miʼ qʼuextan i melbal (Gn. 4:​6, 7). Cheʼ jaʼel, cheʼ bʌ jiñi rey David tsiʼ chaʼle mulil, Jehová tsiʼ choco majlel jiñi xʼaltʼan Natán chaʼan miʼ coltan. Natán tsiʼ cʼʌñʌ jumpʼejl ejemplo chaʼan miʼ cʼotel tiʼ pusicʼal David chaʼan miʼ chaʼ ñaʼtan i bʌ (2 S. 12:​1-7). Cheʼ bʌ jiñi israelitajob tsiʼ ñusʌbeyob i tʼan Jehová, mach junsujtelic jach tsiʼ choco majlel jiñi xʼaltʼañob chaʼan miʼ ñop i coltañob (Jer. 7:​24, 25). Jehová maʼañic miʼ pijtan chaʼan jinto miʼ chaʼ ñaʼtan i bʌ jiñi muʼ bʌ i chaʼlen mulil chaʼan miʼ coltan, miʼ qʼuel bajcheʼ miʼ mejlel i coltan anquese wolito (choncolto) ti mulil.

⁸ ¿Chuqui yom miʼ melob jiñi ancianojob chaʼan miʼ lajiñob Jehová cheʼ bʌ juntiquil miʼ chaʼlen tsʌts bʌ mulil? Cheʼ bajcheʼ miʼ yʌl 2 Timoteo 4:​2, yom miʼ wen pʌsob i pijt. Tiʼ pejtelel ora yom miʼ pejcañob ti uts jach bʌ tʼan i miʼ yʌqʼueñob i qʼuel chaʼan yom miʼ chaʼ qʼuextan i melbal. Mi jiñi ancianojob miʼ pʌsob chaʼan michʼob, maʼañic mi caj i coltañob chaʼan miʼ chaʼ ñaʼtan i bʌ jiñi tsaʼ bʌ i chaʼle mulil o tajol maʼañic mi caj i chʼʌm ti ñuc jiñi ticʼojel woli bʌ (yʌquel bʌ) i yʌqʼuentel.

9, 10. ¿Chuqui miʼ mejlel i melob jiñi ancianojob chaʼan miʼ coltañob jiñi tsaʼ bʌ i chaʼle mulil?

⁹ Jiñi ancianojob yom miʼ qʼuelob chuqui tsiʼ pʌyʌ majlel chaʼan miʼ chaʼlen mulil. Jumpʼejl ejemplo, ¿tsaʼ ba cʼuñʼa chaʼan tsiʼ cʌyʌ i pejcan i Biblia o tsiʼ cʌyʌ subtʼan? ¿Bajcheʼ yilal miʼ mel i yoración, tsaʼix ba i cʌyʌ i mel? ¿Tsaʼ ba i yʌcʼʌ ti ochel tiʼ ñaʼtʌbal jiñi mach bʌ weñic? ¿Majqui jiñi i yamigojob o chuqui ti ñusa qʼuin miʼ mel? Tajol jiñʌch tsaʼ bʌ i yʌcʼʌ chaʼan miʼ chaʼlen mulil. ¿Muʼ ba i ñaʼtan bajcheʼ yubil miʼ yubin i bʌ Jehová tiʼ caj jiñi tsaʼ bʌ i mele?

¹⁰ Jiñi ancianojob yom miʼ wen ñaʼtañob chuqui ti cʼajtiya mi caj i melbeñob jiñi tsaʼ bʌ i chaʼle mulil, mach yomic miʼ cʼajtibeñob chuqui tac mach bʌ yomic miʼ ñaʼtañob. Cheʼ ti uts jach bʌ tʼan miʼ pejcañob mi caj i coltañob chaʼan miʼ mejlel i sub chuqui tsiʼ yʌcʼʌ chaʼan miʼ chaʼlen mulil (Pr. 20:5). Cheʼ bajcheʼ tsiʼ mele Natán tiʼ tojlel David, jiñi ancianojob miʼ mejlel i cʼʌñob ejemplo tac chaʼan miʼ coltañob i qʼuel jiñi hermano chaʼan mach weñic jiñi tsaʼ bʌ i mele. Tajol cheʼ cojaxto miʼ tempañob i bʌ yicʼotob mi caj i tech i ñaʼtan chaʼan mach weñic jiñi tsaʼ bʌ i mele i miʼ chaʼ ñaʼtan i bʌ.

11. ¿Bajcheʼ yilal tsiʼ qʼuele Jesús jiñi xmulilob?

¹¹ Jiñi ancianojob miʼ chaʼleñob wersa i lajiñob Jesús. Jumpʼejl ejemplo, cheʼ bʌ Jesús tsiʼ pejca jiñi Saulo chʼoyol bʌ ti Tarso, tiʼ sube: «Saulo, Saulo, ¿chucoch maʼ contrajiñon?». Yicʼot ili wem bʌ cʼajtiya tsiʼ colta i chʼʌmben i sujm chaʼan jiñi woli bʌ i mel mach weñic (Hech. 9:​3-6). I yaʼ ti Apocalipsis 2:​20, 21 tsiʼ taja ti tʼan jiñi xʼixic «Jezabel» i tsiʼ yʌlʌ: «Tsaʼ cʌqʼue i yorajlel chaʼan miʼ chaʼ ñaʼtan i bʌ».

12, 13. ¿Chuqui miʼ mejlel i melob jiñi ancianojob chaʼan miʼ coltañob i chaʼ ñaʼtan i bʌ jiñi tsaʼ bʌ i chaʼle mulil? (Qʼuele jaʼel jiñi foto tac).

¹² Jiñi ancianojob yom miʼ lajiñob Jesús, jin chaʼan mach yomic miʼ waʼ ñaʼtañob chaʼan jiñi  tsaʼ bʌ i chaʼle mulil maʼañix mi caj i qʼuextan i melbal. An jasʌl jach bʌ junyajl miʼ pejcʌntel chaʼan miʼ chaʼ ñaʼtan i bʌ, pero an mach bʌ cheʼiqui. Tajol cheʼ bʌ jiñi ancianojob miʼ ñaxan pejcañob maʼañic miʼ pʌs chaʼan tsaʼix i chaʼ ñaʼta i bʌ. Pero ti wiʼil miʼ chaʼ ñaʼtan jiñi tsaʼ bʌ subenti i miʼ cʼotel i qʼuel chaʼan jiñi tsaʼ bʌ i mele mach weñic i miʼ cʼajtiben Jehová chaʼan miʼ ñusʌben i mul (Sal. 32:5; 38:18). I cheʼ bʌ jiñi ancianojob miʼ chaʼ tempañob i bʌ yicʼot, tajol miʼ pʌs chaʼan mucʼʌch i chaʼ ñaʼtan i bʌ.

¹³ Chaʼan jiñi ancianojob miʼ mejlel i coltañob i chaʼ ñaʼtan i bʌ jiñi tsaʼ bʌ i chaʼle mulil, yom miʼ pʌsob i yutslel yicʼot miʼ chʼʌmbeñob i sujm. Cheʼ jaʼel miʼ cʼajtibeñob i coltaya Jehová, come yomob chaʼan miʼ chaʼ ñaʼtan i bʌ jiñi tsaʼ bʌ i chaʼle mulil (2 Tim. 2:​25, 26).

14. ¿Majqui jiñi muʼ bʌ i coltan jiñi tsaʼ bʌ i chaʼle mulil chaʼan miʼ chaʼ ñaʼtan i bʌ?

¹⁴ Cheʼ bʌ juntiquil miʼ chaʼ ñaʼtan i bʌ tijicña mi la cubin (Luc. 15:​7, 10). Pero ¿majqui jiñi muʼ bʌ i coltan chaʼan miʼ chaʼ ñaʼtan i bʌ? ¿Jimba Jehová o jiñi ancianojob? Pablo tsiʼ yʌlʌ: «Tajol Dios miʼ yʌqʼueñob i chaʼ ñaʼtañob i bʌ» (2 Tim. 2:25). Ili miʼ pʌs chaʼan jiñʌch Jehová muʼ bʌ i coltan jiñi tsaʼ bʌ i chaʼle mulil chaʼan miʼ chaʼ tojʼesan i melbal yicʼot miʼ ñaʼtan i bʌ, jin chaʼan jiñʌch yom bʌ mi la cʌqʼuen i ñuclel. Ti wiʼil, Pablo tsiʼ yʌlʌ chaʼan cheʼ bʌ juntiquil miʼ chaʼ ñaʼtan i bʌ miʼ ñumen cʌn jiñi i sujmlel, miʼ ñaʼtan pañimil i miʼ putsʼtan i yac jiñi Diablo (2 Tim. 2:26).

15. ¿Bajcheʼ miʼ mejlel i bej coltañob jiñi ancianojob jiñi tsaʼix bʌ i chaʼ ñaʼta i bʌ?

¹⁵ Jiñi ancianojob yomʌch miʼ bej melbeñob visita de pastoreo jiñi tsaʼ bʌ i chaʼle mulil anquese tsaʼix i chaʼ ñaʼta i bʌ. ¿Chucoch? Chaʼan miʼ coltañob chaʼan miʼ chaʼ pʼʌtʼan majlel, chaʼan maʼañic miʼ chaʼ yajlel tiʼ yac jiñi Satanás yicʼot miʼ chʌn ajñel ti jiñi toj bʌ bij (Heb. 12:​12, 13). Pero yomʌch miʼ cʌntañob i bʌ chaʼan maʼañic miʼ tsictesañob yaʼ ti congregación chuqui tsiʼ mele jiñi tsaʼ bʌ i chaʼle mulil. Pero ¿chuqui tajol yomʌch bʌ miʼ subob?

 «TIʼ WUT PEJTELEL YAʼ BɅ AÑOB, TOJʼESAN JIÑI MUʼ BɅ I CHAʼLEÑOB MULIL»

16. ¿Majqui tsiʼ taja ti tʼan Pablo cheʼ bʌ tsiʼ yʌlʌ «tiʼ wut pejtelel yaʼ bʌ añob»?

¹⁶ (Pejcan 1 Timoteo 5:20). Pablo tiʼ sube Timoteo, juntiquil anciano bʌ jaʼel, chaʼan yom miʼ tojʼesan jiñi muʼ bʌ i chaʼleñob mulil «tiʼ wut pejtelel yaʼ bʌ añob». ¿Majqui woliʼ tajob ti tʼan cheʼ bʌ tsiʼ yʌlʌ «tiʼ wut pejtelel yaʼ bʌ añob»? Tajol jin jach jiñi hermanojob yujiloʼ bʌ chuqui tsiʼ mele jiñi tsaʼ bʌ i chaʼle mulil o tsaʼ bʌ i qʼueleyob. Jiñi ancianojob jin jach mi caj i subeñob ili hermanojob chaʼan tsaʼix i pejcayob yicʼot tsaʼix i tiqʼuiyob.

17. Mi jiñi mulil wen cʌmbil yaʼ ti congregación, ¿chuqui yom miʼ mejlel, i chucoch?

¹⁷ An qʼuiñil pejtelel jiñi congregación yujil chuqui tsiʼ mele jiñi tsaʼ bʌ i chaʼle mulil o mi caj i cʼotel i yubiñob. Jin chaʼan yom miʼ sujbel chaʼan jiñi hermano o jiñi hermana tsaʼ chaʼlenti ti censurar. ¿Chucoch? Cheʼ bajcheʼ tsiʼ yʌlʌ Pablo: «Chaʼan jiñi yambʌlob miʼ qʼuelob bajcheʼ i wʌn subentelob» i maʼañic miʼ chaʼleñob mulil jaʼel.

18. Mi jiñi muʼ bʌ i chaʼlen mulil maxto añic 18 i jabilel, ¿chuqui miʼ melob jiñi ancianojob? (Qʼuele jaʼel jiñi foto).

¹⁸ ¿I chuqui miʼ mejlel mi jiñi tsaʼ bʌ i chaʼle mulil maxto añic 18 i jabilel? Jiñi ancianojob mi caj i waʼchocoñob chaʼtiquil chaʼan miʼ pejcañob jiñi alob o xchʼoc temel yicʼotob i papá i mamá, b mi caj i qʼuelob chuqui an i meleyob jiñi tatʌlob chaʼan miʼ coltañob jiñi i yalobil chaʼan miʼ chaʼ ñaʼtan i bʌ. Mi jiñi ancianojob miʼ qʼuelob chaʼan weñʌch woliʼ jacʼ i coltʌntel jiñi alob miʼ mejlel i yʌlob chaʼan mach cʼʌñʌlic jumpʼejl comité. Jehová jiñʌch tsiʼ yʌqʼue  tiʼ wenta jiñi tatʌlob chaʼan miʼ cʌntesañob yicʼot miʼ ticʼob i yalobil (Dt. 6:​6, 7; Pr. 6:20; 22:6; Efes. 6:​2-4). Pero ti wiʼil, jiñi ancianojob yomʌch miʼ chaʼ pejcañob jiñi tatʌlob chaʼan miʼ qʼuelob mi wolʌch i bej coltañob majlel jiñi i yalobil. ¿Ixcu mi jiñi alob o xchʼoc mach yomic i qʼuextan i melbal yicʼot i chaʼ ñaʼtan i bʌ? Jiñi ancianojob mi caj i melob jumpʼejl comité chaʼan miʼ pejcañob temel yicʼot i papá i mamá.

«JEHOVÁ WEN YUJIL CʼUXBIYA YICʼOT PʼUNTAYA»

19. ¿Bajcheʼ miʼ lajiñob Jehová jiñi ancianojob cheʼ bʌ an majqui miʼ chaʼlen mulil?

¹⁹ Jiñi ancianojob yomob chaʼan sʌc miʼ yajñel jiñi congregación come jiñʌch jiñi eʼtel (troñel) tsaʼ bʌ aqʼuentiyob ti Jehová (1 Cor. 5:7). Pero cheʼ jaʼel miʼ chaʼleñob wersa i coltañob juntiquil tsaʼ bʌ i chaʼle mulil chaʼan miʼ chaʼ ñaʼtan i bʌ, mach yomic miʼ ñaʼtañob chaʼan maʼañix mi caj i qʼuextan i melbal. Cheʼ bajcheʼ jiñi woliʼ lajiñob Jehová, «wen yujil cʼuxbiya yicʼot pʼuntaya» (Sant. 5:11). Jiñʌch tsaʼ bʌ i mele jiñi apóstol Juan, tsiʼ pʌsbe i cʼuxbiya jiñi hermanojob. Tsiʼ yʌlʌ: «Cʼuxbibil bʌ calobilob, mic tsʼijbubeñetla iliyi chaʼan maʼañic mi laʼ chaʼlen mulil. Pero mi an muʼ bʌ i chaʼlen mulil, an juntiquil la caj coltaya yaʼ bʌ an yicʼot jiñi Tatʌl: Jesucristo, juntiquil toj bʌ» (1 Juan 2:1).

20. ¿Chuqui mi caj laj qʼuel ti jiñi cojix bʌ estudio?

²⁰ Pero an qʼuiñil mach yomic i chaʼ ñaʼtan i bʌ jiñi tsaʼ bʌ i chaʼle tsʌts bʌ mulil. Mi cheʼ miʼ yujtel bajcheʼ jiñi, ¿chuqui yom miʼ mejlel? Yom miʼ chojquel loqʼuel ti congregación. ¿Chuqui yom miʼ melob jiñi ancianojob? Jiñʌch muʼ bʌ caj laj qʼuel ti jiñi cojix bʌ estudio.