1. ¿Chuqui yom Jehová chaʼan mi lac mel?

 JEHOVÁ libre tsiʼ meleyonla (pʌtʌyonla). Joñonla mi lac ñaʼtan chuqui mi caj lac mel. Pero an junchajp wen ñuc bʌ i cʼʌjñibal, jiñʌch cheʼ mi la cʌcʼ lac bʌ ti Jehová chaʼan mi lac sujtel tiʼ familia. Jiñʌch yom bʌ Jehová chaʼan mi lac mel ti lac pejtelel, ¿chucoch? Come miʼ wen cʼuxbiñonla i yom chaʼan lʌcʼʌl mi la cajñel tiʼ tojlel i mi lac chumtʌl tiʼ pejtelel ora (Dt. 30:​19, 20; Gál. 6:​7, 8).

2. ¿Chuqui yom Jehová chaʼan miʼ melob jiñi muʼ bʌ i chaʼleñob mulil? (1 Juan 2:1).

² Anquese Jehová yom chaʼan mi lac melben i yeʼtel (troñel), maʼañic miʼ xicʼonla chaʼan mi lac mel. Pero ¿ixcu mi juntiquil chʼʌmʌlix bʌ i chaʼan jaʼ miʼ chaʼlen tsʌts bʌ mulil? ¿Chuqui yom miʼ mel jiñi ancianojob? Mi maʼañic miʼ chaʼ ñaʼtan i bʌ, yom miʼ chojquel loqʼuel ti congregación (1 Cor. 5:13). Pero Jehová yom chaʼan jiñi muʼ bʌ i chaʼlen mulil miʼ chaʼ  ñaʼtan i bʌ, i jiñʌch junchajp chucoch tsiʼ choco tilel i Yalobil, chaʼan miʼ ñusʌben i mul jiñi muʼ bʌ i chaʼ ñaʼtan i bʌ (pejcan 1 Juan 2:1). Jehová wen yujil cʼuxbiya, jin chaʼan miʼ coltan jiñi muʼ bʌ i chaʼlen mulil chaʼan miʼ chaʼ ñaʼtan i bʌ (Zac. 1:3; Rom. 2:4; Sant. 4:8).

3. ¿Chuqui mi caj laj qʼuel ti ili estudio?

³ Jehová miʼ subeñonla bajcheʼ yilal miʼ qʼuel jiñi mulil yicʼot jiñi muʼ bʌ i chaʼlen tsʌts bʌ mulil. Ili estudio mi caj i coltañonla chaʼan cheʼʌch mi laj qʼuel jaʼel cheʼ bajcheʼ miʼ qʼuel Jehová. Jin chaʼan mi caj laj qʼuel ili uxchajp. Ñaxam bʌ, mi caj laj qʼuel chuqui tsiʼ meleyob jiñi ancianojob ti Corinto cheʼ bʌ juntiquil hermano tsiʼ chaʼle tsʌts bʌ mulil. I chaʼpʼejlel, mi caj laj qʼuel chuqui tsiʼ yʌlʌ jiñi apóstol Pablo cheʼ bʌ jiñi tsaʼ bʌ i chaʼle mulil tsaʼix i chaʼ ñaʼta i bʌ. I yuxpʼejlel, mi caj laj qʼuel bajcheʼ yilal miʼ qʼuel Jehová jiñi muʼ bʌ i chaʼlen tsʌts bʌ mulil.

¿CHUQUI TSIʼ MELEYOB JIÑI ANCIANOJOB TI CORINTO CHEʼ BɅ JUNTIQUIL HERMANO TSIʼ CHAʼLE TSɅTS BɅ MULIL?

4. ¿Chuqui woliʼ yujtel yaʼ ti congregación am bʌ ti Corinto? (1 Corintios 5:​1, 2).

⁴ (Pejcan 1 Corintios 5:​1, 2). Cheʼ tiʼ yuxpʼejlel i viaje Pablo bajcheʼ misionero, tsaʼ subenti chaʼan an chuqui tsʌts bʌ woli (choncol) i yujtel yaʼ ti congregación ti Corinto: Chaʼan an juntiquil hermano woli bʌ i chaʼlen tsʼiʼlel yicʼot i madrastra. Jin chaʼan tiʼ tsʼijbubeyob majlel: «Cheʼ bʌ tsʼiʼlel bajcheʼ jiñi mi muqʼuicto i yujtel tiʼ tojlel mach bʌ xñoptʼañobic». Jiñi congregación maʼañic chuqui woliʼ mel, i an tsaʼ bʌ i ñaʼtayob chaʼan Jehová miʼ wen pʌs i yutslel yicʼot chaʼan miʼ chʼʌmbeñonla i sujm come xmulilonla. Tajol weñʌch tsaʼ cʼoti i qʼuelob, pero Jehová mach utsʼatic miʼ qʼuel woli bʌ i yujtel yaʼ ti congregación. Tajol jiñi yambʌ lac piʼʌlob mach bʌ añic miʼ chʼujutesañob Jehová tsaʼ caji i yʌlob mach bʌ weñic tiʼ tojlel jiñi congregación. I mi maʼañic chuqui miʼ tumbentel jiñi woli bʌ (yʌquel bʌ) i chaʼlen mulil, jiñi yambʌ hermanojob tajol cheʼ mi caj i tech i melob jaʼel bajcheʼ jiñi. ¿Chuqui ti ticʼojel tsiʼ yʌqʼue Pablo jiñi hermanojob ti Corinto?

5. ¿Chuqui tiʼ tsʼijbube majlel Pablo jiñi congregación, i chuqui jiñi yom bʌ i subeñob? (1 Corintios 5:13; qʼuele jaʼel jiñi dibujo).

⁵ (Pejcan 1 Corintios 5:13). Jehová tsiʼ yʌcʼʌ chaʼan jiñi apóstol Pablo miʼ tsʼijbuben majlel jiñi hermanojob ti Corinto chaʼan yom miʼ locʼsʌntel ti congregación jiñi maʼañic bʌ miʼ chaʼ ñaʼtan i bʌ, i tiʼ sube jiñi hermanojob chaʼan yom miʼ cʌy i ñochtañob, mi yomicto miʼ chaʼleñob uchʼel yicʼot (1 Cor. 5:11).  La cujil chaʼan cheʼ an majqui mi laj cʼux lac waj la quicʼot, mi lac chaʼlen tʼan i mi lac ñusan qʼuin yicʼot. Jin chaʼan, yom bʌ i suben Pablo jiñi hermanojob jiñʌch chaʼan mach yomic miʼ ñusañob qʼuin yicʼot jiñi tsaʼ bʌ i chaʼle mulil. Cheʼ bajcheʼ jiñi mi caj i cʌntañob i bʌ chaʼan maʼañic miʼ tsajcʌbeñob i melbal (1 Cor. 5:​5-7). I cheʼ jaʼel mi caj i coltañob jiñi tsaʼ bʌ i chaʼle mulil chaʼan miʼ qʼuel chaʼan mach weñic tsaʼ bʌ i mele yicʼot chaʼan tsiʼ yʌqʼue i chʼijyemlel Jehová, jiñi miʼ mejlel i coltan chaʼan miʼ chaʼ ñaʼtan i bʌ.

6. ¿Chuqui tsiʼ mele jiñi congregación cheʼ bʌ Pablo tsiʼ choco majlel jiñi carta, i chuqui tsiʼ mele jaʼel jiñi wiñic tsaʼ bʌ i chaʼle mulil?

⁶ Cheʼ bʌ Pablo tsiʼ chocbe majlel carta jiñi xñoptʼañob ti Corinto tsaʼ caji i cʼajtiben i bʌ bajcheʼ yilal tsiʼ jacʼʌyob jiñi hermanojob. Ti wiʼil, Tito tiʼ sube chaʼan wen jach tsiʼ jacʼʌyob i tsaʼ caji i melob cheʼ bajcheʼ tsaʼ subentiyob. Iliyi tsaʼʌch i wen tijicñesʌbe i pusicʼal jiñi apóstol Pablo (2 Cor. 7:​6, 7). Cheʼ jaʼel, mach jalic tsaʼ ñumi i jiñi wiñic tsaʼ bʌ i chaʼle mulil tsiʼ chaʼ ñaʼta i bʌ, tsiʼ qʼuexta i melbal  (chaʼlibal) i tsaʼ caji i jacʼ muʼ bʌ i yʌl Jehová (2 Cor. 7:​8-11). Jin chaʼan, ¿chuqui tiʼ sube Pablo jiñi congregación?

¿BAJCHEʼ YILAL YOM MIʼ QʼUEJLEL TI CONGREGACIÓN JIÑI WIÑIC TSAʼIX BɅ I CHAʼ ÑAʼTA I BɅ?

7. ¿Chuqui tsaʼ ujti cheʼ bʌ jiñi wiñic tsaʼ chojqui loqʼuel ti congregación? (2 Corintios 2:​5-8).

⁷ (Pejcan 2 Corintios 2:​5-8). Pablo tsiʼ yʌlʌ: «Jasʌlix jiñi i tojʼesʌntel tsaʼ bʌ aqʼuenti jiñi wiñic, jiñi tojʼesʌntel tsaʼ bʌ laʼ wʌqʼue lʌcʼʌ ti laʼ pejtelel». Ili yom i yʌl chaʼan cheʼ bʌ jiñi wiñic tsaʼ chojqui loqʼuel ti congregación, tsiʼ colta chaʼan miʼ chaʼ ñaʼtan i bʌ (Heb. 12:11).

8. ¿Chuqui tiʼ sube Pablo jiñi congregación?

⁸ Cheʼ bʌ jiñi wiñic tsaʼix i chaʼ ñaʼta i bʌ, Pablo tiʼ sube jiñi ancianojob chaʼan yom miʼ chaʼ otsañob ti congregación. Cheʼ jaʼel tiʼ subeyob: «Yom mi laʼ ñusʌben i mul yicʼot laʼ wutslel i yom mi laʼ ñuqʼuesʌben i pusicʼal». I tsiʼ yʌlʌ: «Mic subeñetla chaʼan mi laʼ pʌsben chaʼan mucʼʌch laʼ cʼuxbin». Pablo mach cojach tsiʼ yʌlʌ chaʼan yom miʼ chaʼ otsañob ti congregación, tiʼ sube jaʼel jiñi hermanojob chaʼan yom miʼ pʌsbeñob tiʼ tʼan yicʼot tiʼ melbal chaʼan tsaʼix i ñusʌbeyob i mul yicʼot chaʼan miʼ cʼuxbiñob. Cheʼ bajcheʼ ili, jiñi wiñic tsaʼix bʌ i chaʼ ñaʼta i bʌ mi caj i yubin chaʼan jiñi hermanojob tijicñayob chaʼan tsaʼix chaʼ sujti yaʼ ti congregación.

9. ¿Chucoch an wocol bʌ tsiʼ yubiyob chaʼan utsʼat miʼ chaʼ qʼuelob jiñi hermano tsaʼ bʌ chaʼ sujti ti congregación?

⁹ ¿Tijicña ba tsiʼ yubiyob pejtelel jiñi hermanojob cheʼ bʌ jiñi tsaʼ bʌ i chaʼle mulil tsaʼ chaʼ sujti ti congregación? Jiñi relato maʼañic miʼ jamʌ al, pero tajol maʼañic. Tajol an hermanojob mach bʌ tijicñayic tsiʼ yubiyob i bʌ come jiñi tsaʼ bʌ i chaʼle mulil tsiʼ yʌcʼʌ ti ajlel jiñi congregación. Cheʼ jaʼel, tajol an cʼux bʌ tiʼ pusicʼalob chaʼan jiñi tsaʼ bʌ i mele. I an hermanojob woli bʌ i chaʼleñob wersa chaʼan chʌn xucʼul miʼ yajñelob ti congregación, pero cheʼ bʌ tsiʼ qʼueleyob chaʼan jiñi tsaʼ bʌ i chaʼle tsʌts bʌ mulil wen tijicña woliʼ chaʼ chʼʌjmel ti congregación anquese mach junyaj weñic chuqui tsiʼ mele, tajol mach utsʼatic tsiʼ qʼueleyob (laja yicʼot Lucas 15:​28-30). ¿Chucoch wen ñucʌch i cʼʌjñibal miʼ pʌsbentel cʼuxbiya jiñi hermano tsaʼ bʌ chaʼ sujti ti congregación?

10, 11. ¿Chuqui tsaʼ ujti cheʼ jiñi ancianojob tsaʼic i yʌlʌyob chaʼan maxto añic miʼ mejlel ti otsʌntel ti congregación jiñi tsaʼix bʌ i chaʼ ñaʼta i bʌ?

¹⁰ Cheʼ jiñi ancianojob tsaʼic i subeyob jiñi wiñic chaʼan maxto añic miʼ mejlel ti chaʼ ochel ti congregación anquese tsaʼix i chaʼ ñaʼta i bʌ, o jiñi hermanojob mach utsʼatic miʼ qʼuelob cheʼ tsaʼix chaʼ sujti, ¿bajcheʼ yubil tsiʼ yubi i bʌ? Tajol jiñi tsaʼ bʌ i chaʼle tsʌts bʌ mulil «miʼ cʌlʌx ubin i chʼijyemlel i miʼ lujbʼan», miʼ mejlel i ñaʼtan chaʼan Jehová maʼañic baʼ ora mi caj i ñusʌben i mul i miʼ cʌy i chaʼlen wersa chaʼan miʼ chaʼ melben i yeʼtel Jehová.

¹¹ Pero anto yambʌ wocol. Mi jiñi hermanojob maʼañic miʼ ñusʌbeñob i mul jiñi tsaʼix bʌ i chaʼ ñaʼta i bʌ, mach utsʼatic mi caj i qʼuejlelob ti Jehová. ¿Chucoch? Come maʼañic woliʼ lajiñob Jehová, juntiquil Dios yujil bʌ pʼuntaya yicʼot muʼ bʌ i ñusʌben i mul jiñi muʼ bʌ i chaʼ ñaʼtañob i bʌ. Woliʼ lajiñob Satanás, mach bʌ yujilic pʼuntaya yicʼot wen jontol bʌ (maña bʌ). Cheʼ jaʼel, woliʼ yʌcʼob i bʌ ti cʼʌjñel ti Satanás, come miʼ mejlel i yʌcʼob chaʼan jiñi tsaʼ bʌ i chaʼle mulil miʼ junyaj ñajtʼesan i bʌ ti Jehová (2 Cor. 2:​10, 11; Efes. 4:27).

12. ¿Bajcheʼ miʼ mejlel i lajiñob Jehová jiñi hermanojob ti Corinto?

¹² ¿Bajcheʼ miʼ mejlel i lajiñob Jehová jiñi hermanojob añoʼ bʌ ti Corinto? Jiñʌch cheʼ miʼ qʼuelob jiñi tsaʼ bʌ i chaʼle mulil cheʼ bajcheʼ miʼ qʼuel Jehová. Laʼ laj qʼuel tsaʼ bʌ i yʌlʌyob  jiñi i wiñicob Dios ti wajali. David tsiʼ yʌlʌ: «Isujm utsʼatet, c Yum, maʼ ñusʌbeñon lojon c mul» (Sal. 86:5). Miqueas tiʼ tsʼijbu: «¿Am ba yambʌ Dios lajal bajcheʼ jatet? Jatet jach maʼ ñusan mulil» (Mi. 7:18). Cheʼ jaʼel, Isaías tsiʼ yʌlʌ: «Laʼ i cʌy i mul jini xjontolil. Jini mach bʌ tojic la i cʌy i ñaʼtan jontolil. Laʼ i sutqʼuin i bʌ ti lac Yum, come mi caj i pʼuntan. Mi caj i ñusʌben i mul ti pejtelel i pusicʼal» (Is. 55:7).

13. ¿Chucoch weñʌch cheʼ miʼ chaʼ otsʌntel ti congregación jiñi tsaʼ bʌ i chaʼle mulil? (Qʼuele jiñi recuadro « ¿Jalix tsaʼ chaʼ sujti ti congregación jiñi wiñic tsaʼ bʌ i chaʼle tsʌts bʌ mulil?»).

¹³ Jiñi hermanojob ti Corinto yom miʼ pʌsbeñob jiñi tsaʼ bʌ i chaʼle mulil chaʼan tijicñayob cheʼ tsaʼix chaʼ sujti ti congregación, yicʼot chaʼan miʼ cʼuxbiñob. Jiñi apóstol Pablo tsiʼ yʌlʌ chaʼan mi mucʼʌch i ñusʌbeñob i mul mi caj i pʌsob chaʼan xjacʼtʼañobʌch (2 Cor. 2:9). I sujmʌch chaʼan maʼañic jaypʼejl uw tsaʼ ñumi cheʼ bʌ tsaʼ chojqui loqʼuel ti congregación, pero jiñi ancianojob maʼañic chuqui yom miʼ pijtañob chaʼan miʼ chaʼ otsañob ti congregación come tsaʼix i chaʼ ñaʼta i bʌ.

¿BAJCHEʼ MIʼ MEJLEL LAC PɅS LAC PʼUNTAYA YICʼOT MI LAC MEL CHUQUI TOJ CHEʼ BAJCHEʼ JEHOVÁ?

14, 15. ¿Chuqui mi laj cʌn chaʼan bajcheʼ tsaʼ tojʼesʌnti jiñi wocol yaʼ ti congregación ti Corinto? (2 Pedro 3:9; qʼuele jaʼel jiñi foto).

¹⁴ Jehová tsiʼ yʌcʼʌ chaʼan miʼ tsʼijbuntel cʌytʌl yaʼ ti Biblia tsaʼ bʌ ujti yaʼ ti congregación  ti Corinto chaʼan laj cʌntesʌntel (Rom. 15:4). Ili miʼ pʌsbeñonla chaʼan Jehová mach utsʼatic miʼ qʼuel cheʼ bʌ an majqui miʼ chaʼlen mulil yaʼ ti congregación. Tajol an muʼ bʌ i ñaʼtañob chaʼan Jehová mach lecojic miʼ qʼuel mi juntiquil miʼ chaʼlen mulil i yaʼto bej an ti congregación come wen yujil pʼuntaya, pero mach cheʼiqui. I sujmʌch, Jehová miʼ wen pʼuntañonla, pero mach cheʼ jach miʼ qʼuel mi juntiquil woliʼ mel mach bʌ weñic, i maʼañic miʼ ñusan ti pʼis jiñi i mandar tac (Jud. 4). Tiʼ sujm, mi tsiʼ yʌcʼʌ chaʼan jiñi muʼ bʌ i chaʼlen tsʌts bʌ mulil i maʼañic miʼ chaʼ ñaʼtan i bʌ yaʼ miʼ bej ajñel ti congregación, miʼ mejlel i yotsan ti wocol jiñi yambʌ hermanojob, i cheʼ bajcheʼ jiñi Jehová maʼañic woliʼ pʌs i pʼuntaya (Pr. 13:20; 1 Cor. 15:33).

¹⁵ Ili relato miʼ pʌsbeñonla jaʼel chaʼan Jehová mach yomic chaʼan mi juntiquilic miʼ jilel, yom chaʼan ti lac pejtelel mi lac taj laj cuxtʌlel. Miʼ pʌsben i pʼuntaya jiñi muʼ bʌ i chaʼlen mulil pero miʼ chaʼlen wersa chaʼan miʼ tojʼesan i melbal yicʼot miʼ chaʼ lʌcʼtesan i bʌ ti Jehová (Ez. 33:11; pejcan 2 Pedro 3:9). Jin chaʼan, Jehová tiʼ sube jiñi congregación chaʼan yom miʼ ñusʌbeñob i mul jiñi wiñic yicʼot miʼ chaʼ otsañob yaʼ ti congregación.

16. ¿Bajcheʼ yubil maʼ wubin cheʼ maʼ ñaʼtan bajcheʼ tsaʼ tojʼesʌnti jiñi tsʌts bʌ mulil ti Corinto?

¹⁶ Ili relato miʼ pʌsbeñonla chaʼan Jehová an i cʼuxbiya yicʼot toj chuqui miʼ mel (Sal. 33:5). I cheʼ la cujil chaʼan cheʼ yilal Jehová bajcheʼ iliyi, miʼ ñijcan lac pusicʼal chaʼan mi lac chʼujutesan. Tiʼ sujm, ti lac pejtelel la com chaʼan miʼ ñusʌbeñonla lac mul come luʼ xmulilonla. Mi lac wen aqʼuen wocolix i yʌlʌ chaʼan tsiʼ yʌcʼʌ ti chʌmel i Yalobil chaʼan miʼ ñusʌbeñonla lac mul. Wen tijicña mi la cubin cheʼ la cujil chaʼan Jehová mucʼʌch i cʼuxbiñonla yicʼot yom i coltañonla.

17. ¿Chuqui mi caj laj qʼuel ti yambʌ estudio?

¹⁷ Ixcu ili ora, ¿chuqui miʼ mejlel mi an majqui miʼ chaʼlen tsʌts bʌ mulil? ¿Bajcheʼ miʼ pʌsob i cʼuxbiya jiñi ancianojob cheʼ bajcheʼ Jehová, i bajcheʼ miʼ coltañob i chaʼ ñaʼtan i bʌ jiñi tsaʼ bʌ i chaʼle mulil? ¿Bajcheʼ yom mi laj qʼuel mi jiñi ancianojob miʼ chocob loqʼuel o miʼ chaʼ otsañob ti congregación juntiquil tsaʼ bʌ i chaʼle mulil? Iliyi mi caj laj qʼuel yaʼ ti yambʌ estudio.