1, 2. a) ¿Chuquiyes jiñi mulil, i bajcheʼ miʼ mejlel lac mʌlben? (Qʼuele jaʼel jiñi nota «Yom bʌ miʼ ñaʼtʌntel»). b) ¿Chuqui mi caj laj qʼuel ti ili estudio yicʼot ti jiñi yan tac bʌ muʼ bʌ caj i tilel? (Qʼuele jaʼel jiñi página 32 «Nota chaʼan ili revista»).

 ¿BAJCHEʼ cʼamel miʼ cʼuxbiñet Jehová maʼ wʌl? Chaʼan maʼ ñaʼtan, junchajp muʼ bʌ mejlel a mel jiñʌch cheʼ maʼ qʼuel chuqui an i mele chaʼan miʼ coltañet loqʼuel ti mulil yicʼot chʌmel. Ñaʼtancu, jiñi mulil a jiñʌch wen ñuc bʌ laj contra, ti lac bajñelil maʼañic miʼ mejlel lac mʌlben (jotben). Jujumpʼejl qʼuin mi lac taj lac sajtemal, i ti lac pejtelel mi lac chʌmel (sajtel) come xmulilonla (Rom. 5:12). Pero mi lac ñop chaʼan Jehová miʼ mejlel i coltañonla loqʼuel tiʼ pʼʌtʌlel jiñi mulil yicʼot chʌmel.

² Cʼʌlʌl cheʼ bʌ Jehová tsiʼ meleyonla (pʌtʌyonla), tsiʼ wen cʼuxbiyonla. Jin chaʼan, cheʼ bʌ tsaʼ ochi jiñi mulil an i coltayonla chaʼan mi lac bej melben i yeʼtel yicʼot chaʼan mi lac sujtel tiʼ yamigo, i añix 6 mil jab caj i mel iliyi. ¿Chucoch? Come  Jehová mach yomic chaʼan mi lac chʌmel tiʼ caj jiñi mulil, yom chaʼan mi lac chumtʌl tiʼ pejtelel ora (Rom. 6:23). ¡Jiñʌch yom bʌ ti a tojlel jaʼel! Ti ili estudio mi caj laj qʼuelben i jacʼbal uxpʼejl cʼajtiya: 1) ¿Chuqui tsiʼ mele Jehová chaʼan miʼ yʌqʼuen i pijtaya jiñi quixtañujob? 2) ¿Chuqui tsiʼ mele jiñi i wiñicob Jehová ti wajali chaʼan miʼ melob chuqui wem bʌ anquese xmulilob? 3) ¿Chuqui tsiʼ mele Jesús chaʼan miʼ locʼsañonla ti mulil yicʼot chʌmel?

¿CHUQUI TSIʼ MELE JEHOVÁ CHAʼAN MIʼ YɅQʼUEN I PIJTAYA JIÑI QUIXTAÑUJOB?

3. ¿Bajcheʼ tsaʼ sujtiyob ti xmulil Adán yicʼot Eva?

³ Cheʼ bʌ Jehová tsiʼ mele Adán yicʼot Eva, yom tsiʼ yʌlʌ chaʼan tijicña miʼ chumtʌlob. Jin chaʼan, tsiʼ yʌqʼueyob jumpʼejl utsʼatax bʌ i chumlib yicʼot tsiʼ yʌcʼʌyob ti ñujpuñel, cheʼ jaʼel tiʼ subeyob chaʼan miʼ bujtʼesañob ili pañimil yicʼot miʼ sujtesañob ti jumpʼejl paraíso. An jach junchajp chuqui tsaʼ subentiyob mach bʌ yom miʼ melob, i mi tsiʼ ñusʌbeyob i tʼan Jehová mi caj i chʌmelob. Cheʼ bajcheʼ la cujil, Satanás, jiñi jontol bʌ espíritu mach bʌ añic tsiʼ cʼuxbi Jehová, tsiʼ loti jiñi Adán yicʼot Eva. Ili chaʼtiquilob jin tsiʼ ñopbeyob i tʼan Satanás i mach jiñic tsaʼ bʌ i yʌlʌ Jehová. Tiʼ caj jiñi tsaʼ ñoxʼayob i tsaʼ chʌmiyob (Gn. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Chucoch miʼ tsʼaʼlen Jehová jiñi mulil, i chucoch yom i coltañonla? (Romanos 8:​20, 21).

⁴ Chʼijyemtic jax jiñi tsaʼ bʌ ujti, pero Jehová tsiʼ yʌcʼʌ ti tsʼijbuntel cʌytʌl chaʼan mi lac ñaʼtan chaʼan miʼ tsʼaʼlen jiñi mulil, come miʼ ñajtʼesañonla tiʼ tojlel i tiʼ caj jiñi mi lac chʌmel (Is. 59:2). Pero Satanás miʼ mulan jiñi mulil, yom chaʼan mi lac ñajtʼesan lac bʌ ti Jehová, jin chaʼan tsiʼ loti Adán yicʼot Eva. I jiñʌch muʼ bʌ i ñop i mel ti lac tojlel jaʼel. Cheʼ bʌ Satanás tsiʼ loti Adán yicʼot Eva tsiʼ ñaʼta chaʼan maʼañix mi caj i tsʼʌctesan chuqui yom bʌ Jehová. Pero Jehová miʼ wen cʼuxbiñonla, jin chaʼan ti orajach tsiʼ ñaʼta chuqui yom miʼ mel (pejcan Romanos 8:​20, 21). Jehová yujil chaʼan añixto muʼ bʌ caj i cʼuxbiñob yicʼot muʼ bʌ caj i lʌcʼtesañob i bʌ tiʼ tojlel.

5. Cheʼ bʌ Adán yicʼot Eva tsiʼ chaʼle mulil, ¿chuqui tsiʼ yʌlʌ Jehová i jalixqui tsiʼ mele? (Génesis 3:15).

⁵ (Pejcan Génesis 3:15). Jehová orajach tiʼ sube Satanás chuqui mi caj i yujtel tiʼ tojlel, cheʼ bajcheʼ jiñi tsiʼ yʌqʼue i pijtaya jiñi quixtañujob. Génesis 3:15 miʼ yʌl chaʼan «i pʼolbal jini xʼixic» mi caj i jisan Satanás yicʼot jiñi wocol tsaʼ bʌ i teche (1 Juan 3:8). Pero Satanás mi caj i ñaxan acʼ chaʼan i pʼolbal ili xʼixic miʼ ñusan wocol yicʼot miʼ chʌmel i Jehová cʼuxʌch mi caj i yubin. Pero tsaʼʌch i cuchu come yujil chaʼan mach juntiquil jach mi caj i taj i wenlel, ti lac pejtelel mi caj i locʼsañonla ti mulil yicʼot chʌmel.

¿CHUQUI TSIʼ MELEYOB JIÑI QUIXTAÑUJOB WAJALI CHAʼAN UTSʼAT MIʼ QʼUEJLELOB TI DIOS ANQUESE XMULILOB?

6. ¿Chuqui tsiʼ mele Abel yicʼot Noé chaʼan miʼ lʌcʼtesañob i bʌ ti Jehová?

⁶ ¿Bajcheʼ miʼ mejlel lac lʌcʼtesan lac bʌ ti Jehová anquese xmulilonla? Jehová cʼunteʼ cʼunteʼ tiʼ tsictesa majlel. Abel, jiñi i chaʼticlel i yalobil Adán yicʼot Eva, tsiʼ cʼuxbi Jehová i tsiʼ pʌsʌ chaʼan miʼ ñop tiʼ tojlel. Jin chaʼan «tsiʼ yʌqʼue [Jehová] ñaxan bʌ i yal tiñʌmeʼ tac» bajcheʼ tsʌnsʌbil bʌ majtañʌl. ¿I bajcheʼ yilal tsiʼ qʼuele Jehová? Jiñi Biblia miʼ yʌl: «Tsiʼ qʼuele ti utsʼat Abel yicʼot i majtan» (Gn. 4:4). Ti wiʼil, jiñi yambʌ i wiñicob tsaʼʌch i yʌqʼueyob tsʌnsʌbil bʌ majtañʌl jaʼel, cheʼ bajcheʼ Noé, i Jehová tsaʼʌch i chʼʌmʌ (Gn. 8:​20, 21). Ili miʼ pʌs chaʼan anquese  xmulilonla miʼ mejlel lac tijicñesʌben i pusicʼal Jehová. b

7. ¿Chuqui miʼ pʌsbeñonla tiʼ tojlel Abrahán cheʼ ti jumpʼejl i pusicʼal colel i yʌcʼ i yalobil bajcheʼ tsʌnsʌbil bʌ majtañʌl?

⁷ Yambʌ wiñic tsaʼ bʌ i wen ñopo ti Jehová jiñʌch Abrahán. Cheʼ bʌ Jehová tiʼ sube Abrahán chaʼan miʼ yʌcʼ i yalobil bajcheʼ tsʌnsʌbil bʌ majtañʌl, Abrahán tsaʼʌch i jacʼʌ anquese wen cʼux tiʼ pusicʼal tsiʼ yubi. Cheʼ bʌ Abrahán muqʼuix caj i tsʌnsan i yalobil, Jehová tiʼ sube chaʼan maʼañic miʼ mel. Ili an chuqui ñuc bʌ i cʼʌjñibal tsiʼ pʌsʌ: Chaʼan Jehová ti jumpʼejl i pusicʼal mi caj i yʌcʼ jiñi cʼuxbibil bʌ i Yalobil come miʼ wen cʼuxbiñonla (Gn. 22:​1-18).

8. ¿Chuqui tsiʼ pʌsʌ jiñi majtañʌl tac tsaʼ bʌ i yʌcʼʌyob jiñi israelitajob? (Levítico 4:​27-29; 17:11).

⁸ Ti wiʼil, Jehová tsiʼ yʌqʼue Mandar jiñi israelitajob, i tiʼ subeyob chaʼan yom miʼ yʌcʼob tsʌnsʌbil bʌ majtañʌl chaʼan miʼ ñusʌbentelob i mul (pejcan Levítico 4:​27-29; 17:11). Jiñi tsiʼ pʌsʌ chaʼan Jehová mi caj i yʌcʼ jumpʼejl majtañʌl ñumen wem bʌ come mi caj i junyajl locʼsan jiñi wiñicob xʼixicob ti jiñi mulil. I tsiʼ cʼʌñʌ jiñi xʼaltʼañob chaʼan miʼ tsictesan chaʼan jiñi i Yalobil, i pʼolbal jiñi xʼixic, mi caj i ñusan wocol yicʼot mi caj i chʌmel, lajal bajcheʼ juncojt tiñʌmeʼ (Is. 53:​1-12). Ñaʼtancu, ¡Jehová tsiʼ yʌcʼʌ jiñi cʼuxbibil bʌ i Yalobil chaʼan miʼ junyajl locʼsañonla ti mulil, i tsaʼʌch i mele ti a tojlel jaʼel!

¿CHUQUI TSIʼ MELE JESÚS CHAʼAN MIʼ COLTAÑONLA?

9. ¿Chuqui tsiʼ yʌlʌ Juan jiñi Xʼacʼ chʼʌmjaʼ? (Hebreos 9:22; 10:​1-4, 12).

⁹ Cheʼ ti jabil 29, Juan jiñi Xʼacʼ chʼʌmjaʼ tsiʼ qʼuele Jesús i tsiʼ yʌlʌ: «¡Qʼuelela, jiñi i Tiñʌmeʼ Dios muʼ bʌ i jisan mulil ti pañimil!» (Juan 1:29). Cheʼ bajcheʼ iliyi tiʼ tsictesa chaʼan Jesús jiñʌch i pʼolbal jiñi xʼixic tsaʼ bʌ wʌn ajli i jiñʌch muʼ bʌ caj i yʌcʼ i cuxtʌlel chaʼan miʼ locʼsañonla ti mulil yicʼot chʌmel (pejcan Hebreos 9:22; 10:​1-4, 12).

10. ¿Bajcheʼ tsiʼ pʌsʌ Jesús chaʼan tsaʼ tili i sʌclan jiñi xmulilob?

¹⁰ Jesús tsiʼ chʼʌmʌ ti ñuc jiñi chʼijyemoʼ bʌ chaʼan añob i mul i tiʼ subeyob chaʼan miʼ tsajcañob, yujil chaʼan jiñi mulil jiñʌch muʼ bʌ i yʌcʼ wocol. Jin chaʼan, ti jumpʼejl i pusicʼal tiʼ sʌcla ili wiñicob xʼixicob wen xmuliloʼ bʌ miʼ qʼuejlelob. Jin chaʼan tsiʼ yʌlʌ: «Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob». Cheʼ jaʼel tsiʼ yʌlʌ: «Mach jiñic tsaʼ tili c pʌy jiñi tojoʼ bʌ, jiñʌch jiñi xmulilob» (Mat. 9:​12, 13). Jesús mach tsaʼ jach i yʌlʌ iliyi, tsaʼʌch i mele. Jumpʼejl ejemplo, cheʼ bʌ juntiquil xʼixic wen am bʌ i mul tsaʼ cʼoti i pocben i yoc tiʼ yalel i wut, tsiʼ ñusʌbe i mul (Luc. 7:​37-50). Ti jumpʼejl bʌ qʼuin, cheʼ woli (choncol) i cʼaj i yo yaʼ ti pozo, tsaʼ cʼoti juntiquil samaritana, i anquese yujil chaʼan cabʌl i mul tsiʼ pejca i tiʼ sube jiñi wen tʼan (Juan 4:​7, 17-19, 25, 26). Cheʼ jaʼel, tsiʼ cʼʌñʌ i pʼʌtʌlel jaʼel tsaʼ bʌ i yʌqʼue Jehová chaʼan miʼ tejchesan jiñi wiñicob xʼixicob yicʼot alobob tsaʼ bʌ chʌmiyob. Cheʼ bajcheʼ jiñi tsiʼ pʌsʌ chaʼan Jehová miʼ mejlel i junyajl lʌm jiñi mulil (Mat. 11:5).

11. ¿Chucoch mach wocolic tsiʼ yubiyob jiñi wen añoʼ bʌ i mul chaʼan miʼ lʌcʼtesañob i bʌ ti Jesús?

¹¹ Jiñi lac piʼʌlob wen añoʼ bʌ i mul mach wocolic tsiʼ yubiyob chaʼan miʼ lʌcʼtesañob i bʌ ti Jesús. ¿Chucoch? Come Jesús tsiʼ chʼʌmbeyob i sujm yicʼot tsiʼ pʼuntayob (Luc. 15:​1, 2). Cheʼ jaʼel, ti uts jach bʌ tʼan tsiʼ pejcayob  jiñi muʼ bʌ i pʌsob chaʼan miʼ ñopob tiʼ tojlel (Luc. 19:​1-10). Jesús yom chaʼan jiñi xmulilob miʼ qʼuextañob i melbal (chaʼlibal) yicʼot chaʼan miʼ tsajcañob. Cheʼ bajcheʼ yilal i melbal Jesús tsiʼ pʌsʌ chaʼan cheʼʌch yilal Jehová jaʼel (Juan 14:9). Jehová miʼ cʼuxbiñonla i yom i locʼsañonla ti mulil (Luc. 5:​27, 28).

12. ¿Chuqui mi caj i yujtel tsiʼ yʌlʌ Jesús cheʼ bʌ miʼ chʌmel?

¹² Jesús yujil chuqui mi caj i yujtel tiʼ tojlel. Mach junsujtelic jach tiʼ subeyob jiñi xcʌntʼañob i chaʼan chaʼan mi caj i tsʌnsʌntel (Mat. 17:22; 20:​18, 19). Cheʼ jaʼel, yujil chaʼan cheʼ bʌ miʼ chʌmel mi caj i mejlel i junyajl jisan jiñi mulil, cheʼ bajcheʼ tsiʼ wʌn alʌ Juan yicʼot jiñi xʼaltʼañob. I cheʼ jaʼel, tsiʼ wʌn alʌ chuqui mi caj i yujtel cheʼ bʌ tsaʼix chʌmi: «Mi caj c pʌy tilel majqui jach bʌ quixtañujob tic tojlel» (Juan 12:32). Jiñi muʼ bʌ i lajiñob Jesús i miʼ pʌsob chaʼan miʼ ñopob tiʼ tojlel, wen miʼ qʼuejlelob ti Jehová i miʼ locʼsʌntelob ti mulil (Rom. 6:​14, 18, 22; Juan 8:32). Pero chaʼan miʼ mejlel iliyi, Jesús yomʌch miʼ pʌs i chʼejlel chaʼan miʼ yʌcʼ i cuxtʌlel (Juan 10:​17, 18).

13. ¿Bajcheʼ tsaʼ chʌmi Jesús, i chuqui miʼ pʌsbeñonla tiʼ tojlel Jehová? (Qʼuele jaʼel jiñi dibujo tac).

¹³ Jesús tsaʼ ajqʼui tiʼ cʼʌb i contrajob, tsiʼ cʌchʌyob, tsiʼ pʼajayob (ñiqʼuisubeyob), tiʼ sʌsʌp jatsʼʌyob i tsiʼ yʌlʌyob chaʼan yom miʼ chʌmel. Ti wiʼil, jiñi soldadojob tsiʼ chʼijiyob  ti teʼ. Jesús tsaʼʌch i lʌtʼʌ pejtelel ili wocol. Cheʼ bʌ Jehová tsiʼ qʼuele chaʼan jiñi i Yalobil woli (yʌquel) i wen ñusan wocol wen cʼux tsiʼ yubi. I anquese miʼ wen cʼuxbin yicʼot añʌch i pʼʌtʌlel chaʼan miʼ coltan, maʼañic tsiʼ mele. ¿Chucoch? Come miʼ cʼuxbiñonla. Jesús tsiʼ yʌlʌ: «Dios tsiʼ wen cʼuxbi jiñi lac piʼʌlob ti pañimil i tsiʼ yʌcʼʌ cojim bʌ i Yalobil chaʼan pejtelel muʼ bʌ i pʌs chaʼan miʼ ñop tiʼ tojlel maʼañic miʼ jisʌntel, miʼ taj i cuxtʌlel mach bʌ añic miʼ jilel» (Juan 3:16).

14. ¿Chuqui miʼ pʌsbeñet cheʼ Jesús tsiʼ yʌcʼʌ i cuxtʌlel?

¹⁴ Cheʼ bʌ Jehová tsiʼ yʌcʼʌ i Yalobil bajcheʼ tsʌnsʌbil bʌ majtañʌl tsiʼ pʌsʌ chaʼan miʼ wen cʼuxbin jiñi i pʼolbal Adán yicʼot Eva. Iliyi yom i yʌl jaʼel chaʼan miʼ wen cʼuxbiñet. Cheʼ maʼ ñaʼtan pejtelel tsaʼ bʌ i mele Jehová chaʼan miʼ locʼsañet ti mulil yicʼot chʌmel. ¿Mach ba muqʼuic i yʌcʼ ti toj sajtel a pusicʼal? (1 Juan 4:​9, 10). Jehová yom i coltañonla ti jujuntiquil chaʼan mi lac bej melben i yeʼtel anquese xmulilonla, i ti talto bʌ qʼuin mi caj i junyajl jisan jiñi mulil.

15. ¿Chuqui yom mi lac mel chaʼan mucʼʌch i coltañonla jiñi i cuxtʌlel Jesús?

¹⁵ Jumpʼejlʌch ñuc bʌ lac majtan cheʼ Jehová tsiʼ yʌcʼʌ jiñi i cuxtʌlel i Yalobil come jiñʌch muʼ bʌ i locʼsañonla ti mulil. Pero Juan jiñi Xʼacʼ chʼʌmjaʼ yicʼot Jesucristo tsiʼ yʌlʌyob chaʼan añʌch chuqui yom mi lac mel jaʼel: «Chaʼ ñaʼtañix laʼ bʌ come tsaʼix lʌcʼtiyi jiñi i Yumʌntel panchan» (Mat. 3:​1, 2; 4:17). Jin chaʼan, chaʼan Jehová utsʼat miʼ qʼuelonla i mi lac mejlel lac lʌcʼtesan lac bʌ tiʼ tojlel yomʌch mi lac chaʼ ñaʼtan lac bʌ. Pero ¿chuqui yom i yʌl jiñi? ¿Bajcheʼ miʼ coltañonla cheʼ mi lac chaʼ ñaʼtan lac bʌ chaʼan utsʼat miʼ qʼuelonla Jehová anquese xmulilonla? Jiñʌch muʼ bʌ caj laj qʼuel ti jiñi yambʌ estudio.