1, 2. ¿Chuqui tac miʼ mel juntiquil anciano?

 MI AÑIX ora añet bajcheʼ siervo ministerial tajol muqʼuix a tsʼʌctesan jiñi requisito tac chaʼan maʼ wochel ti anciano. ¿Muʼ baʼ mulan ochel ti anciano chaʼan maʼ ñumen coltan jiñi hermanojob? (1 Tim. 3:1).

² ¿Chuqui tac miʼ mel juntiquil anciano? Miʼ chaʼlen subtʼan, miʼ julaʼtan jiñi hermanojob chaʼan miʼ pʼʌtʼesañob yicʼot miʼ chaʼlen cʌntesa yaʼ ti congregación. Cheʼ jaʼel, miʼ yʌqʼuen wem bʌ ejemplo jiñi hermanojob ti chuqui miʼ yʌl yicʼot ti chuqui miʼ mel. Jin chaʼan jiñi Biblia miʼ yʌl chaʼan jiñi ancianojob lajalob bajcheʼ jumpʼejl «majtañʌl» (Efes. 4:8).

3. ¿Chuqui yom miʼ mel juntiquil hermano chaʼan miʼ waʼchocontel bajcheʼ anciano? (1 Timoteo 3:​1-7; Tito 1:​5-9).

³ Chaʼan miʼ yochel ti anciano juntiquil hermano mach lajalic bajcheʼ juntiquil muʼ bʌ i butʼ i solicitud chaʼan miʼ cʼajtin jumpʼejl eʼtel (troñel). Cheʼ bʌ an majqui miʼ cʼajtin i yeʼtel an qʼuiñil jasʌl jach miʼ yʌl chaʼan an chuqui yujil melol i miʼ mejlel ti aqʼuentel jiñi eʼtel. Pero chaʼan miʼ yochel ti anciano juntiquil hermano mach cojach miʼ qʼuejlel mi wen yujil subtʼan o wen bajcheʼ miʼ chaʼlen cʌntesa. Yomʌch miʼ tsʼʌctesan jiñi requisito tac am bʌ ti 1 Timoteo 3:​1-7 yicʼot Tito 1:​5-9 (pejcan). Ti ili estudio mi caj laj qʼuel chuqui miʼ pijtʌntel tiʼ tojlel juntiquil anciano: Yom cʌmbil bajcheʼ juntiquil wem bʌ lac piʼʌl, bajcheʼ juntiquil wem bʌ miʼ cʌntan i familia yicʼot miʼ pʌs chaʼan mucʼʌch i mulan i coltan jiñi congregación.

YOM CɅMBIL BAJCHEʼ JUNTIQUIL WEM BɅ LAC PIʼɅL

4. ¿Chuqui yom i yʌl cheʼ «yom wen i melbal» juntiquil anciano?

⁴ Chaʼan juntiquil hermano miʼ yochel ti anciano «yom wen i melbal». Ili yom i yʌl chaʼan jiñi hermanojob ti congregación wen chuqui miʼ yʌlob tiʼ tojlel. Cheʼ jaʼel, «yom wen bajcheʼ cʌmbil  tiʼ tojlel jiñi mach bʌ xñoptʼañobic». Jinto jiñi maʼañic miʼ mulañob chuqui ñopol bʌ lac chaʼan yom miʼ tajob i qʼuel chaʼan jiñi hermano juntiquilʌch wem bʌ lac piʼʌl (Dn. 6:​4, 5). Cʼajtiben a bʌ: «¿Chuqui miʼ yʌlob tic tojlel jiñi hermanojob yicʼot jiñi yambʌ lac piʼʌlob?».

5. ¿Bajcheʼ miʼ pʌs juntiquil anciano chaʼan «miʼ cʼuxbin chuqui wen»?

⁵ Jiñi anciano «miʼ cʼuxbin chuqui wen». Ili yom i yʌl chaʼan miʼ qʼuel chuqui wen tac bʌ tiʼ tojlel yañoʼ bʌ i miʼ subeñob chaʼan miʼ qʼuel ti ñuc jiñi wen tac bʌ i melbalob. Cheʼ jaʼel, miʼ mulan i mel chuqui wem bʌ tiʼ tojlel yañoʼ bʌ i muʼto i sʌclan bajcheʼ miʼ mejlel i coltan jiñi hermanojob anquese maʼañic miʼ subentel (1 Tes. 2:8). ¿Chucoch ñuc i cʼʌjñibal chaʼan jiñi ancianojob miʼ cʼuxbiñob chuqui wen? Come mi caj i locʼsʌbeñob i yorajlel chaʼan miʼ cʌntañob jiñi congregación yicʼot miʼ tsʼʌctesañob jiñi i yeʼtel (1 Ped. 5:​1-3). Anquese cabʌlʌch jiñi eʼtel yom bʌ miʼ melob tijicña miʼ yubiñob cheʼ miʼ coltañob jiñi hermanojob (Hech. 20:35).

6. ¿Bajcheʼ miʼ pʌs juntiquil chaʼan mucʼʌch i mulan i coltan yambʌlob? (Hebreos 13:​2, 16; qʼuele jaʼel jiñi foto).

⁶ Jiñi wiñic muʼ bʌ i «qʼuel bajcheʼ miʼ coltan yambʌlob» mach cojach miʼ mel chuqui wen tiʼ tojlel i yamigojob (1 Ped. 4:9). Jumpʼejl diccionario miʼ yʌl: «Jiñi wiñic muʼ bʌ i coltan yambʌlob miʼ pʌsben i yutslel jiñi mach bʌ i cʌñʌyobic i miʼ mulan i pʌyob majlel tiʼ yotot». Jin chaʼan cʼajtiben a bʌ: «¿Muʼ ba c mulan c pʌsbeñob cutslel jiñi muʼ bʌ i cʼotelob ti julaʼ ti congregación?» (pejcan Hebreos 13:​2, 16). Jiñi wiñic muʼ bʌ i qʼuel bajcheʼ miʼ coltan yambʌlob miʼ mulan i coltan jiñi mach bʌ wen añobic i chubʌʼan. Cheʼ jaʼel miʼ mulan i coltan o miʼ pʌy majlel tiʼ yotot jiñi añoʼ bʌ bajcheʼ superintendente chaʼan circuito yicʼot jiñi hermanojob muʼ bʌ i cʼotelob ti discurso ti congregación (Gn. 18:​2-8; Pr. 3:27; Luc. 14:​13, 14; Hech. 16:15; Rom. 12:13).

7. ¿Bajcheʼ miʼ pʌs juntiquil anciano chaʼan maʼañic miʼ cʼuxbin taqʼuin?

⁷ Jiñi anciano «mach yomic […] miʼ cʼuxbin taqʼuin». Ili yom i yʌl chaʼan maʼañic miʼ cʌlʌx qʼuel ti ñuc jiñi taqʼuin o jiñi chubʌʼañʌl tac. Mach yʌlʌyic mi an i taqʼuin o maʼañic, muʼ bʌ i ñumen qʼuel ti ñuc jiñʌch i melbentel i yeʼtel Jehová (Mat. 6:33). Yom miʼ cʼʌn i tiempo, i pʼʌtʌlel yicʼot chuqui tac an i chaʼan chaʼan miʼ chʼujutesan Jehová, miʼ cʌntan i familia yicʼot miʼ coltan jiñi congregación (Mat. 6:24;  1 Juan 2:​15-17). Cʼajtiben a bʌ: «¿Muʼ baʼ c wen qʼuel ti ñuc jiñi taqʼuin? ¿Tijicñayon ba anquese mach cabʌlic chuqui an c chaʼan? ¿O muʼ ba c wen chaʼlen eʼtel chaʼan mic ñumen taj taqʼuin?» (1 Tim. 6:​6, 17-19).

8. ¿Bajcheʼ miʼ pʌs juntiquil anciano chaʼan yujil i ticʼol i bʌ?

⁸ Juntiquil yujil bʌ i ticʼol i bʌ «pʼisbil jach ti chuqui miʼ mel». Ili yaʼ ochem cheʼ mach ñumeñic ti pʼis bajcheʼ miʼ chaʼlen uchʼel, miʼ jap chuqui miʼ jap, tiʼ pislel, ti bajcheʼ miʼ chʼʌl i bʌ yicʼot chuqui tac miʼ mel chaʼan miʼ ñusan qʼuin. Maʼañic miʼ yotsan i bʌ ti chuqui miʼ melob jiñi maʼañic bʌ miʼ chʼujutesañob Jehová (Luc. 21:34; Sant. 4:4). Cheʼ jaʼel, miʼ ticʼ i bʌ i maʼañic chuqui miʼ yʌl cheʼ bʌ an majqui miʼ yilo techben i michʼajel. Jiñi anciano mach yomic cʌmbil bajcheʼ juntiquil «xyʌcʼʌjel». Cʼajtiben a bʌ: «¿Muʼ ba c pʌs chaʼan cujilʌch i ticʼol c bʌ?».

9. ¿Bajcheʼ miʼ pʌs juntiquil anciano chaʼan «an wem bʌ i ñaʼtʌbal» yicʼot toj bajcheʼ chumul?

⁹ Jiñi anciano muʼ bʌ i pʌs chaʼan «an wem bʌ i ñaʼtʌbal» miʼ chʼʌm ti ñuc chuqui miʼ yʌl jiñi Biblia tiʼ pejtelel chuqui miʼ mel. Cheʼ bʌ an chuqui yom i mel o yom i ñaʼtan miʼ ñaxan qʼuel chuqui ti principio miʼ mejlel i coltan, i cheʼ bajcheʼ jiñi miʼ mel chuqui miʼ mulan Jehová. Maʼañic baʼ ora mi caj i waʼ jacʼ o miʼ yʌl chuqui miʼ bajñel ñaʼtan (Pr. 18:13). Cheʼ jaʼel yom toj bajcheʼ chumul. Ili yom i yʌl chaʼan miʼ wen chajpan pejtelel muʼ bʌ i mel yicʼot miʼ tsʼʌctesan tiʼ yorajlel jiñi i yeʼtel. Cheʼ jaʼel, jiñi hermanojob miʼ qʼuelob chaʼan mucʼʌch i jacʼ jiñi instrucción tac. Mi juntiquil anciano miʼ mel pejtelel tsaʼ bʌ ajli ti ili subtítulo wen chuqui mi caj i yʌjlel tiʼ tojlel. Wʌle mi caj laj qʼuel bajcheʼ yilal jiñi anciano wem bʌ miʼ cʌntan i familia.

YOM WEN BAJCHEʼ MIʼ CɅNTAN I FAMILIA

10. ¿Bajcheʼ yilal jiñi wiñic wem bʌ miʼ cʌntan i familia?

¹⁰ Chaʼan miʼ waʼchocontel ti anciano juntiquil hermano ñujpuñem bʌ yom wen chuqui miʼ yʌjlel tiʼ tojlel i yijñam yicʼot i yalobilob, jin chaʼan jiñi Biblia miʼ yʌl chaʼan yom wen miʼ cʌntan i familia. Ili yom i yʌl chaʼan yom miʼ cʼuxbiñob yicʼot miʼ yʌqʼueñob chuqui i cʼʌjñibal bʌ i chaʼañob. Cheʼ jaʼel, miʼ chʼʌm tiʼ wenta chaʼan miʼ mel jiñi chʼujutesaya ti familia, miʼ pʌyob majlel ti tempa bʌ yicʼot ti subtʼan. Pejtelel iliyi wen ñuc i cʼʌjñibal come cheʼ bajcheʼ tsiʼ yʌlʌ jiñi apóstol Pablo, «mi juntiquil wiñic maʼañic miʼ mejlel i cʌntan i familia, ¿bajcheʼ mi caj i cʌntʌben i congregación Dios?» (1 Tim. 3:5).

11, 12. Mi juntiquil hermano yom ochel ti anciano, ¿chucoch wen ñuc i cʼʌjñibal chaʼan wen i melbal i familia? (Qʼuele jaʼel jiñi foto).

¹¹ Mi jiñi hermano an i yalobilob pecʼobto bʌ i jabilel yom xjacʼtʼañob yicʼot yom weñob i melbal. Yom miʼ cʌntesañob yicʼot cʼuxbiya. I sujmʌch chaʼan jiñi alʌlob miʼ mulañob tseʼñal yicʼot alas, pero mi wen miʼ cʌntesʌntelob yicʼot miʼ tijqʼuelob mi caj i jacʼbeñob i tʼan i tat i ñaʼ, mi caj i qʼuelob ti ñuc yambʌlob yicʼot wen i melbalob. Cheʼ jaʼel, jiñi tatʌl yom miʼ coltan i yalobilob chaʼan miʼ sujtelob tiʼ yamigo Jehová, chaʼan miʼ jacʼob jiñi principio tac yicʼot miʼ cʼotelob ti chʼʌmjaʼ.

¹² «Yom xñoptʼañob i yalobilob mach bʌ añic miʼ mejlel ti ajlel chaʼan mach weñobic i melbal yicʼot chaʼan xñusatʼañob». Pero ¿chuqui miʼ yujtel mi juntiquil i yalobil chʼʌmʌlix bʌ i chaʼan jaʼ o maxto bʌ añic miʼ chaʼlen tsʌts bʌ mulil? Mi tsaʼ qʼuejli chaʼan jiñi tatʌl tsiʼ cʌyʌ i cʌntesan, i coltan yicʼot i ticʼ i yalobil, tajol maʼañic miʼ tsʼʌctesan jiñi requisito chaʼan miʼ mel i yeʼtel bajcheʼ anciano (qʼuele jiñi La Atalaya 15 de octubre, 1996, página 21, párrafo 6 yicʼot 7).

YOM MIʼ COLTAN JIÑI CONGREGACIÓN

13. ¿Bajcheʼ miʼ pʌs juntiquil anciano chaʼan maʼañic miʼ tsʌtsʼesan i bʌ tiʼ tʼan yicʼot chaʼan mach jiñic jach miʼ mejlel chuqui yom?

¹³ Jiñi hermanojob muʼ bʌ i pʌsob wem bʌ i melbal miʼ wen chaʼleñob coltaya. Jiñi  hermano mach bʌ añic miʼ tsʌtsʼesan i bʌ tiʼ tʼan miʼ chaʼlen coltaya chaʼan an ñʌchʼtʌlel ti congregación. Mi a wom chaʼan cheʼ maʼ cʌjñel, yom maʼ ñʌchʼtan chuqui miʼ yʌlob yañoʼ bʌ yicʼot maʼ chʼʌm ti ñuc chuqui miʼ ñaʼtañob. Ñaʼtancu chaʼan mi laʼ tempan laʼ bʌ bajcheʼ anciano i an chuqui miʼ yʌjlel. Jiñi yambʌ ancianojob weñʌch miʼ qʼuelob, pero jatet qʼuexel bajcheʼ maʼ ñaʼtan. ¿Chuqui mi caj a mel? ¿Muʼ ba caj a coltan jiñi woli bʌ (choncol bʌ) i yʌjlel mi maʼañic woliʼ ñusʌntel ti pʼis jumpʼejl principio am bʌ ti Biblia? Jiñi anciano «mach yomic miʼ tsʌtsʼesan i bʌ chaʼan miʼ mejlel chuqui yom». Yujil chaʼan wen ñuc i cʼʌjñibal cheʼ miʼ chʼʌm ti ñuc muʼ bʌ i yʌl yañoʼ bʌ (Gn. 13:​8, 9; Pr. 15:22). «Mach yomic yujil leto» yicʼot «mach yomic ora yujil michʼ». Ili yom i yʌl chaʼan uts i maʼañic miʼ pejcan yañoʼ bʌ ti tsʌts bʌ tʼan. Come miʼ mulan cheʼ an ñʌchʼtʌlel miʼ chaʼlen wersa i tojʼesan cheʼ bʌ miʼ taj wocol yicʼot yañoʼ bʌ (Sant. 3:​17, 18). Tiʼ pejtelel ora wen jach bajcheʼ miʼ chaʼlen tʼan i jiñi miʼ coltan chaʼan maʼañic miʼ michʼan yañoʼ bʌ o chaʼan miʼ lajmelob i michʼajel, jinto jiñi mach bʌ yomobic i qʼueloñobla (Jue. 8:​1-3; Pr. 20:3; 25:15; Mat. 5:​23, 24).

14. ¿Chucoch «mach yomic tsijib xñoptʼanto» jiñi anciano, i bajcheʼ miʼ pʌs chaʼan «xucʼul»?

¹⁴ Jiñi muʼ bʌ i yochel ti anciano «mach yomic tsijib xñoptʼanto». Ili yom i yʌl chaʼan yomixto miʼ tsʼitaʼ ñumel tiempo chaʼan miʼ mejlel i ñumen lʌcʼtesan i bʌ ti Jehová yicʼot miʼ taj majlel i ñaʼtʌbal. Cheʼ bʌ maxto ancianojic yom miʼ pʌs i pecʼlel yicʼot chaʼan yomʌch i melben i yeʼtel Jehová mach yʌlʌyic chuqui miʼ yʌqʼuentel i mel (Mat. 20:23; Filip. 2:​5-8). Cheʼ jaʼel, miʼ pʌs chaʼan xucʼul ti Jehová come miʼ mel chuqui miʼ mulan yicʼot miʼ jacʼ jiñi instrucción tac muʼ bʌ i yʌcʼ jiñi organización (1 Tim. 4:15).

15. Chaʼan juntiquil hermano miʼ sujtel ti anciano, ¿wersa yom ba miʼ yʌcʼ wen tac bʌ discurso?

¹⁵ Jiñi Biblia miʼ yʌl chaʼan jiñi anciano «yom chajpʌbil chaʼan miʼ chaʼlen cʌntesa». Ili mach yomic i yʌl chaʼan wersa yom miʼ ñusan wen tac bʌ discurso, pero yomʌch wen miʼ cʼʌn jiñi Biblia cheʼ miʼ chaʼlen subtʼan  yicʼot cheʼ miʼ julaʼtan jiñi hermanojob (laja yicʼot 1 Corintios 12:​28, 29 yicʼot Efesios 4:11). Anquese mach jiñic miʼ ñumen qʼuejlel mi wen bajcheʼ miʼ ñusan i discurso, yomʌch miʼ chaʼlen wersa chaʼan miʼ weñʼesan i cʌntesa. ¿Chuqui miʼ mejlel i coltan?

16. ¿Chuqui miʼ mejlel i coltan juntiquil hermano chaʼan ñumen wen bajcheʼ miʼ chaʼlen cʌntesa? (Qʼuele jaʼel jiñi foto).

¹⁶ «Yom miʼ chuc i bʌ ti jiñi xucʼul bʌ tʼan». Yomʌch miʼ wen qʼuel chaʼan pejtelel chuqui miʼ yʌl cheʼ miʼ chaʼlen cʌntesa yicʼot cheʼ bʌ miʼ yʌcʼ ticʼojel tac yaʼʌch chucul ti Biblia. Chaʼan miʼ mejlel i mel iliyi, yomʌch ñʌmʌl i pejcan jiñi Biblia yicʼot lac publicación tac (Pr. 15:28; 16:23). Cheʼ bʌ miʼ bajñel chaʼlen estudio miʼ wen qʼuel bajcheʼ miʼ tsictesʌntel jiñi versículo tac chaʼan miʼ mejlel i cʼʌn ti wen muʼ bʌ i yʌl jiñi Biblia. Cheʼ bʌ miʼ chaʼlen cʌntesa miʼ chaʼlen wersa i ñijcʌbeñob i pusicʼal jiñi woli bʌ (yʌquel bʌ) i ñʌchʼtañob. Yambʌ muʼ bʌ caj i coltan chaʼan miʼ sujtel ti wem bʌ xcʌntesa jiñʌch cheʼ miʼ cʼajtiben jiñi ancianojob ñumen añobix bʌ i ñaʼtʌbal chuqui yomto bʌ miʼ weñʼesan (1 Tim. 5:17). Jiñi ancianojob yom chajpʌbilob chaʼan miʼ tijicñesʌbeñob i pusicʼal jiñi hermanojob. Cheʼ jaʼel, an i tajol yom miʼ yʌqʼueñob ticʼojel tac o miʼ jamʌ subeñob chuqui mach bʌ weñic woliʼ melob, pero yomʌch miʼ melob yicʼotob i yutslel. Mi mucʼʌch i melob bajcheʼ ili yicʼot miʼ chucob i bʌ ti jiñi i Tʼan Dios, wen mi caj i chaʼleñob cʌntesa come woliʼ lajiñob jiñi Ñumen ñuc xcʌntesa, Jesús (Mat. 11:​28-30; 2 Tim. 2:24).

CHɅN CHAʼLEN WERSA CHAʼAN MAʼ WOCHEL TI ANCIANO

17. a) ¿Chuqui miʼ mejlel i coltan jiñi siervo ministerialob chaʼan miʼ yochelob ti anciano? b) ¿Chuqui yom miʼ chʼʌmob ti ñuc jiñi ancianojob cheʼ bʌ miʼ qʼuelob mi juntiquil hermano muqʼuix i mejlel ti ochel ti anciano? (Qʼuele jiñi recuadro « Ancianojob, yom pʼisbil jach chuqui mi laʼ pijtan tiʼ tojlel jiñi yom bʌ ochel ti anciano»).

¹⁷ Cheʼ bajcheʼ tsaʼix laj qʼuele, cabʌl jiñi requisito yom bʌ miʼ tsʼʌctesan juntiquil hermano chaʼan miʼ yochel ti anciano. Jin chaʼan, tajol an siervo ministerialob muʼ bʌ i ñaʼtañob  chaʼan maʼañic baʼ ora mi caj i tsʼʌctesañob pejtelel chuqui miʼ cʼajtintel. Pero yom miʼ cʼajtesañob chaʼan mi jiñicto Jehová yicʼot i yorganización miʼ pijtan chaʼan junyajl tojobix jiñi muʼ bʌ i yochelob ti anciano (1 Ped. 2:21). Cheʼ jaʼel, jiñi chʼujul bʌ espíritu mi caj i coltañob chaʼan miʼ tajob ili meta (Filip. 2:13). ¿Tsaʼ baʼ taja a qʼuel mi anto chuqui yom bʌ maʼ tojʼesan? Mi añʌch, suben Jehová ti oración, sʌclan chuqui miʼ yʌl lac publicación tac chaʼan jiñi yomto bʌ maʼ tojʼesan i cʼajtiben i coltaya jiñi ancianojob.

18. ¿Chuqui yom miʼ melob jiñi siervo ministerialob?

¹⁸ Pejtelel jiñi hermanojob, jinto jaʼel jiñi añobix bʌ bajcheʼ anciano, yom miʼ chaʼleñob wersa i ñumen weñʼesañob jiñi melbalʌl tac tsaʼ bʌ laj qʼuele ti ili estudio (Filip. 3:16). I mi añetix bajcheʼ siervo ministerial, chaʼlen wersa chaʼan maʼ wochel ti anciano. Cʼajtiben Jehová chaʼan miʼ cʌntesañet yicʼot miʼ coltañet chaʼan maʼ ñumen melben i yeʼtel ti congregación (Is. 64:8). Miʼ mejlel a ñop chaʼan Jehová mi caj i yʌqʼueñet i bendición cheʼ woli a chaʼlen wersa chaʼan maʼ wochel ti anciano.