1, 2. ¿Majquiyob muʼ bʌ i mejlel i melbeñoñobla mach bʌ weñic? Tsictesan.

 JESÚS tiʼ subeyob jiñi xcʌntʼañob i chaʼan jumpʼejl lajiya chaʼan juntiquil mebaʼ xʼixic tsaʼ bʌ i chʌn cʼajtibe juntiquil juez chaʼan miʼ tojʼesʌbentel i wocol. Jiñi xcʌntʼañob tsaʼʌch i chʼʌmbeyob i sujm bajcheʼ yubil miʼ yubin jiñi xʼixic come ti jimbʌ ora cabʌl lac piʼʌlob mach weñic chuqui miʼ melbentelob (Luc. 18:​1-5). Joñonla jaʼel miʼ mejlel lac ñaʼtan bajcheʼ yubil tsiʼ yubi i bʌ jiñi mebaʼ xʼixic come ti lac pejtelel an melbentiyonla mach bʌ weñic.

² Ili maʼañic miʼ yʌcʼ ti toj sajtel lac pusicʼal come ila ti pañimil an cabʌl jontolil, tsʼaʼleya i mach junlajalic miʼ qʼuelob i bʌ lac piʼʌlob, jin chaʼan miʼ melbeñoñobla mach bʌ weñic (Ec. 5:8). Tajol muʼ bʌ i yʌqʼueñonla lac chʼijyemlel jin cheʼ bʌ hermanojob miʼ melbeñoñobla bajcheʼ iliyi. Pero yom mi laj cʼajtesan chaʼan luʼ xmulilob i mach yilolic woli (choncol) i melob. Jiñi ejemplo i chaʼan Jesús miʼ mejlel i coltañonla cheʼ mi lac melbentel mach bʌ weñic. Mi lac chaʼlen wersa chaʼan maʼañic mi lac michʼan cheʼ bʌ jiñi laj contrajob miʼ  ticʼlañoñobla, jin chaʼan ¿mach ba cheʼic yom mi lac mel yicʼot jiñi hermanojob? Pero ¿bajcheʼ yilal miʼ qʼuel Jehová cheʼ bʌ juntiquil hermano o yambʌ lac piʼʌlob miʼ melbeñoñobla mach bʌ weñic?

3. ¿Bajcheʼ la cujil chaʼan Jehová mach yomic chaʼan mi lac ticʼlʌntel?

³ Jehová «miʼ mulan chuqui toj», jin chaʼan maʼañic miʼ mulan cheʼ mi lac ticʼlʌntel (Sal. 37:28). Jesús tsiʼ yʌlʌ chaʼan mi caj i cʼotel i yorajlel chaʼan Dios «mi caj i chʼʌm tiʼ wenta chaʼan ti ora miʼ melbentelob chuqui toj» jiñi i wiñicob (Luc. 18:​7, 8). Tsʼitaʼ jax yom chaʼan Jehová miʼ jisan pejtelel jiñi wocol i maʼañix mi caj lac ticʼlʌntel (Sal. 72:​1, 2).

4. ¿Bajcheʼ miʼ coltañonla Jehová?

⁴ Yomto mi lac pijtan chaʼan Jehová miʼ tojʼesan jiñi wocol tac, pero mucʼʌch i coltañonla ili ora cheʼ bʌ mi lac melbentel mach bʌ weñic (2 Ped. 3:13). Jumpʼejl ejemplo, Jehová miʼ pʌsbeñonla chuqui yom mi lac mel chaʼan maʼañic miʼ ñumen tejchel jiñi wocol. Cheʼ jaʼel, tsiʼ cʌybeyonla i yejemplo i yalobil. I yaʼ ti Biblia mi lac taj ticʼojel tac muʼ bʌ i coltañonla cheʼ mi lac melbentel mach bʌ weñic.

MACH LAC MEL MUʼ BɅ I YUTSI TECH WOCOL

5. Cheʼ bʌ an majqui miʼ ticʼlañonla, ¿chucoch yom tsajalonla?

⁵ Cheʼ bʌ mi lac ticʼlʌntel mi lac wen ubin lac chʼijyemlel, mi laj cʌlʌx chaʼlen pensar i an i tajol muʼto lac michʼan (Ec. 7:7). Cheʼʌch tsiʼ yubiyob i bʌ jaʼel Job yicʼot Habacuc (Job 6:​2, 3; Hab. 1:​1-3). Anquese tilelʌch mi la cubin lac bʌ bajcheʼ jiñi, yomʌch mi laj cʌntan lac bʌ chaʼan maʼañic mi lac mel muʼ bʌ i ñumen tech wocol.

6. ¿Chuqui mi laj cʌn chaʼan tsaʼ bʌ i mele Absalón? (Qʼuele jaʼel jiñi dibujo).

⁶ Cheʼ bʌ mi lac ticʼlʌntel o miʼ ticʼlʌntel yañoʼ bʌ tajol mi lac mulan lac bajñel tojʼesan jiñi wocol, pero jiñi mucʼ jach i ñumen tech wocol. Cheʼʌch tsaʼ ujti tiʼ tojlel Absalón, juntiquil i yalobil jiñi rey David. Cheʼ bʌ Absalón tsiʼ yubi chaʼan Amnón tsiʼ wersa piʼle jiñi i yijtsʼin i cʼabaʼ Tamar, tsaʼ wen michʼa i tsiʼ yʌcʼʌ ti tsʌnsʌntel. Jiñi Mandar tsaʼ bʌ aqʼuenti Moisés miʼ yʌl chaʼan juntiquil muʼ bʌ i mel bajcheʼ tsiʼ mele Amnón yom miʼ tsʌnsʌntel, pero maʼañic tiʼ wenta Absalón chaʼan miʼ yʌqʼuen i toj i mul (Lv. 20:17; 2 S. 13:​20-23, 28-30).

7. ¿Bajcheʼ yubil tsiʼ yubi jiñi salmista cheʼ bʌ tsiʼ qʼuele chaʼan jiñi jontoloʼ bʌ maʼañic chuqui miʼ chaʼleñob?

 ⁷ Cheʼ bʌ mi laj qʼuel chaʼan jiñi muʼ bʌ i melob mach bʌ weñic maʼañic chuqui miʼ chaʼleñob tajol mi laj cʼajtiben lac bʌ mi añixto i cʼʌjñibal mi lac mel chuqui wen. Cheʼʌch tsaʼ ujti tiʼ tojlel jiñi salmista cheʼ bʌ tsiʼ qʼuele chaʼan jiñi jontoloʼ bʌ wen tijicñayob yilal i maʼañic chuqui miʼ tumbentelob. Tsiʼ yʌlʌ: «Cheʼʌch miʼ melob jini jontoloʼ bʌ. Miʼ pʼojlesañob i chubʌʼan ti pañimil. Maʼanic majch miʼ ticʼob» (Sal. 73:12). Come mach junyajl tijicñayic chaʼan woli bʌ (yʌquel bʌ) i yujtel, tsiʼ ñaʼta chaʼan maʼañix i cʼʌjñibal miʼ melben i yeʼtel Jehová. Tsiʼ yʌlʌ: «Cheʼ bʌ tsac ñaʼta c chʼʌmben isujm iliyi wen wocol tsa cubi» (Sal. 73:​14, 16). I tsaʼto i yʌlʌ chaʼan colelix i cʌy i ñop Jehová (Sal. 73:2). Jiñʌch tsaʼ bʌ ujti tiʼ tojlel juntiquil hermano i cʼabaʼ Alberto. a

8. ¿Chuqui tsaʼ ujti tiʼ tojlel Alberto cheʼ tsaʼ jopʼbenti i mul?

⁸ An hermanojob tsaʼ bʌ i yʌlʌyob chaʼan Alberto tsiʼ xujchʼi taqʼuin ti congregación. Jin chaʼan tiʼ sʌtʌ i privilegio bajcheʼ anciano, i jiñi hermanojob tsaʼ bʌ i yubiyob chuqui tsaʼ ujti mach utsʼatix tsaʼ caji i qʼuelob.  Alberto miʼ yʌl: «Tsaʼ wen michʼayon i maʼañix chuqui com tsaʼ cubi». Come tsaʼ wen michʼa, tsiʼ ñajtʼesa i bʌ ti Jehová i tsiʼ cʌyʌ majlel ti tempa bʌ 5 jab. Ili miʼ pʌsbeñonla chuqui miʼ mejlel ti ujtel cheʼ maʼañic mi lac ticʼ lac michʼajel cheʼ bʌ mi lac melbentel mach bʌ weñic.

LAʼ LAC LAJIN JESÚS

9. ¿Chuqui tac ti wocol tsiʼ ñusa Jesús? (Qʼuele jaʼel jiñi dibujo tac).

⁹ Jesús tsiʼ wen ñusa wocol. Jiñi i familia maʼañic tsiʼ ñopo chaʼan jiñʌch jiñi Mesías i tiʼ subeyob chaʼan tsaʼ sojqui. Jiñi añoʼ bʌ i yeʼtel ti ñopbalʌl tsiʼ yʌlʌyob chaʼan miʼ comol chaʼlen eʼtel yicʼot jiñi xibajob. I jiñi soldadojob romanojoʼ bʌ tsiʼ wajleyob, tsiʼ ticʼlayob i tiʼ tsʌnsayob (Mar. 3:​21, 22; 14:55; 15:​16-20, 35-37). Pero Jesús tsaʼʌch i laj cuchu i mach cheʼic tsiʼ mele cheʼ bajcheʼ tsaʼ melbenti. ¿Chuqui mi laj cʌn tiʼ tojlel?

10. ¿Chuqui tsiʼ mele Jesús cheʼ bʌ tsaʼ ticʼlʌnti? (1 Pedro 2:​21-23).

¹⁰ (Pejcan 1 Pedro 2:​21-23). b Jesús yujil jalaqui yom miʼ chaʼlen tʼan yicʼot jalaqui ñʌchʼʌl jach miʼ cʌytʌl (Mat. 26:​62-64). An i tajol ñʌchʼʌl jach tsaʼ cʌyle cheʼ tsiʼ yʌlʌyob lot tac tiʼ tojlel (Mat. 11:19). Pero cheʼ bʌ yomʌch miʼ chaʼlen tʼan maʼañic tsiʼ yʌleʼ i contrajob yicʼot maʼañic tsiʼ chʼʌcʌyob. Jesús tsaʼ mejli i mel iliyi come «tsiʼ yʌcʼʌ i bʌ tiʼ wenta jiñi toj bʌ miʼ chaʼlen meloñel». Yujil chaʼan Jehová woliʼ qʼuel pejtelel chuqui woliʼ melbentel i tsiʼ ñopo chaʼan mi caj i cʼotel i yorajlel chaʼan miʼ tojʼesan.

11. ¿Bajcheʼ miʼ mejlel lac pʌs chaʼan mucʼʌch laj cʌntan bajcheʼ mi lac chaʼlen tʼan? (Qʼuele jaʼel jiñi foto tac).

 ¹¹ Cheʼ bʌ mi lac melbentel mach bʌ weñic yom mi laj cʌntan bajcheʼ mi lac chaʼlen tʼan, cheʼ bajcheʼ jiñi mi lac lajin Jesús. Mi mach wen tsʌtsic chuqui tsaʼ melbentiyonla, laʼ jach la cʌcʼ ti ñumel. O tajol maʼañic chuqui mi caj la cʌl chaʼan maʼañic miʼ ñumen tsʌtsʼan jiñi wocol (Ec. 3:7; Sant. 1:​19, 20). Pero mi tsaʼ laj qʼuele chaʼan yomʌch mi lac chaʼlen tʼan come an majqui woliʼ ticʼlʌntel o yom mi laj coltan ñopol bʌ lac chaʼan, wen jach yom mi lac mel yicʼot mi lac pʌs la cutslel (Hech. 6:​1, 2; 1 Ped. 3:15). c

12. ¿Bajcheʼ mi la cʌcʼ lac bʌ «tiʼ wenta jiñi toj bʌ miʼ chaʼlen meloñel»?

¹² Yambʌ bajcheʼ mi lac lajin Jesús jin cheʼ mi la cʌcʼ lac bʌ «tiʼ wenta jiñi toj bʌ miʼ chaʼlen meloñel». ¿Bajcheʼ mi lac mel iliyi? Jiñʌch cheʼ mi lac ñop chaʼan Jehová wolʌch i qʼuel cheʼ mi lac melbentel mach bʌ weñic. La cujil chaʼan Jehová mi caj i tojʼesan jiñi wocol i jiñi miʼ coltañonla lac lʌtʼ. Cheʼ bʌ mi laj cʌyben tiʼ wenta jiñi lac wocol tac maʼañic mi lac lot lac michʼajel, maʼañic majqui tsʼaʼ mi laj qʼuel. Cheʼ jaʼel, maʼañic mi caj lac mel mach bʌ weñic, tijicñayonla i maʼañic mi caj lac ñajtʼesan lac bʌ ti Jehová (Sal. 37:8).

13. ¿Chuqui miʼ coltañonla lac lʌtʼ cheʼ mi lac melbentel mach bʌ weñic?

¹³ Tiʼ sujm mach mejlic lac luʼ mel cheʼ bajcheʼ tsiʼ mele Jesús. Tajol mi caj lac mel o la cʌl muʼ bʌ i yʌqʼueñonla lac chaʼ ñaʼtan lac bʌ (Sant. 3:2). An i tajol jiñi muʼ bʌ lac melbentel miʼ chʌn aqʼueñonla lac ñusan wocol yicʼot lac chʼijyemlel. Mi cheʼ woli a wujtel, cʼajtesan chaʼan Jehová yujil chuqui woli a ñusan. Jesús miʼ chʼʌmben i sujm bajcheʼ yubil maʼ wubin come tsiʼ ñusa wocol tac jaʼel (Heb. 4:​15, 16). Yambʌ muʼ bʌ i yʌqʼueñonla Jehová chaʼan mi lac lʌtʼ cheʼ mi lac melbentel mach bʌ weñic jiñʌch jiñi ticʼojel tac am bʌ ti Biblia. Laʼ laj qʼuel chaʼpʼejl versículo am bʌ ti Romanos.

«CɅYBENLA TIʼ WENTA DIOS CHAʼAN MIʼ PɅS I MICHʼAJEL»

14. ¿Bajcheʼ miʼ mejlel lac jacʼ jiñi ticʼojel am bʌ ti Romanos 12:19?

¹⁴ (Pejcan Romanos 12:19). Jiñi apóstol Pablo tiʼ sube jiñi xñoptʼañob chaʼan miʼ cʌybeñob tiʼ wenta Dios chaʼan miʼ pʌs i michʼajel. ¿Bajcheʼ miʼ mejlel lac mel iliyi? Jiñʌch cheʼ mi laj cʌyben tiʼ wenta Jehová chaʼan jin miʼ qʼuel jala yicʼot bajcheʼ mi caj i tojʼesan jiñi wocol. Jiñʌch tsaʼ bʌ i mele Juan cheʼ bʌ juntiquil hermano tsiʼ melbe mach bʌ weñic. Juan miʼ yʌl: «Tsaʼ c chaʼle wersa chaʼan jiñi c michʼajel maʼañic miʼ yʌqʼueñon c mel mach bʌ weñic. Romanos 12:19 tsiʼ coltayon chaʼan mic chʌn pʌseʼ c pijt yicʼot mij cʌyben tiʼ wenta Jehová».

15. ¿Chucoch ñumen wen cheʼ mi laj cʌyben tiʼ wenta Jehová chaʼan miʼ tojʼesan jiñi lac wocol?

¹⁵ Ñumen wen cheʼ mi laj cʌyben tiʼ wenta Jehová chaʼan miʼ tojʼesan jiñi lac wocol, cheʼ bajcheʼ jiñi maʼañic mi caj laj cʌlʌx chaʼlen pensar. Jehová yomʌch i coltañonla, lajal bajcheʼ woliʼ subeñonla: «Cʌyʌ jach ti c wenta, joñon mi caj c tojʼesan». Mi mucʼʌch lac ñop muʼ bʌ i subeñonla, maʼañic mi caj lac lot lac michʼajel. Jiñʌch tsaʼ bʌ i colta Juan, miʼ yʌl: «Mi tsaʼ j cʌybe tiʼ wenta Jehová jiñi c wocol, ñumen wento bajcheʼ mi caj i tojʼesan».

 «BEJ MELE CHUQUI WEN CHAʼAN MAʼ MɅLBEN JIÑI MACH BɅ WEÑIC»

16, 17. ¿Bajcheʼ miʼ coltañonla jiñi oración chaʼan mi lac bej mel chuqui wen i mi lac mʌlben jiñi mach bʌ weñic? (Romanos 12:21).

¹⁶ (Pejcan Romanos 12:21). Pablo tsiʼ yʌlʌ: «Bej mele chuqui wen chaʼan maʼ mʌlben jiñi mach bʌ weñic». I Jesús tsiʼ yʌlʌ chaʼan mi laj cʼuxbin laj contrajob yicʼot mi lac tajob ti oración, i jiñʌch tsaʼ bʌ i mele (Mat. 5:44). Laʼcu lac ñaʼtan pejtelel jiñi wocol tsaʼ bʌ i ñusa. Tsiʼ wajleyob, tsiʼ pʼumpʼun ticʼlayob i jiñi soldadojob romanojoʼ bʌ tsiʼ chʼijiyob ti teʼ. Maʼañic miʼ mejlel lac mero ñaʼtan bajcheʼ cʼamel jiñi wocol tsaʼ bʌ i ñusa. Tiʼ sujm machʌch junyajl weñic chuqui tsaʼ melbenti.

¹⁷ Pero Jesús tsaʼʌch i lʌtʼʌ pejtelel chuqui tsaʼ melbenti. Anquese miʼ mejlel i cʼajtiben Jehová chaʼan miʼ yʌqʼuen i toj i mul jiñi soldadojob, maʼañic tsiʼ mele. Tsaʼ jach i yʌlʌ: «C Tat, ñusʌbeñob i mul come mach yujilobic chuqui woliʼ melob» (Luc. 23:34). Cheʼ mi lac tajob ti oración jiñi muʼ bʌ i ticʼlañoñobla miʼ coltañonla chaʼan mi lac taj lac ñʌchʼtʌlel yicʼot maʼañic mi lac lot lac michʼajel. Cheʼ jaʼel, miʼ coltañonla chaʼan mach lecojic mi laj qʼuel jiñi muʼ bʌ i melbeñonla mach bʌ weñic.

18. ¿Bajcheʼ tsiʼ colta Alberto yicʼot Juan jiñi oración?

¹⁸ Jiñi oración jiñʌch tsaʼ bʌ i colta jiñi chaʼtiquil hermanojob tsaʼ bʌ lac tajayob ti tʼan. Alberto miʼ yʌl: «Tsaʼ c tajayob ti oración jiñi hermanojob tsaʼ bʌ i jopʼbeyoñob c mul i tsaʼ j cʼajtibe Jehová chaʼan miʼ coltañon c ñajʌtesan tsaʼ bʌ ujti». ¡Ili ora, Alberto wolix i chaʼ melben i yeʼtel (troñel) Jehová! Juan miʼ yʌl: «Tsaʼ c chʌn cʼajtibe Jehová chaʼan miʼ coltan jiñi hermano tsaʼ bʌ i melbeyon mach bʌ weñic yicʼot chaʼan mic ñusʌben i mul. Jiñi tsiʼ coltayon chaʼan maʼañic mic lot c michʼajel yicʼot chaʼan mach lecojic mij qʼuel jiñi hermano. Cheʼ jaʼel, Jehová tsiʼ yʌqʼueyon c ñʌchʼtʌlel».

19. ¿Chuqui yom mi lac bej mel? (1 Pedro 3:​8, 9).

¹⁹ La cujil chaʼan mi caj lac ñusan wocol yicʼot mi caj lac ticʼlʌntel. Pero mach yʌlʌyic chuqui mi lac ñusan, laʼ lac chʌn cʼajtiben i coltaya Jehová. Laʼ lac chaʼlen wersa lac lajin Jesús yicʼot mi lac chʼʌm ti ñuc jiñi principio tac. Mi mucʼʌch lac mel, miʼ mejlel lac ñop chaʼan Jehová mi caj i yʌqʼueñonla i bendición (pejcan 1 Pedro 3:​8, 9).