¿MUʼ baʼ mulan a bajñel chaʼlen estudio ti jujumpʼejl semana o wocol maʼ wubin? An i tajol cheʼʌch mi la cubin ti lac pejtelel. Pero ñaʼtancu ili, an cabʌl muʼ bʌ lac mel ti jujumpʼejl qʼuin yom bʌ mi la cʌqʼuen i yorajlel yicʼot yom bʌ mi lac chaʼlen wersa lac tsʼʌctesan. Jumpʼejl ejemplo: Yom mi la cʌqʼuen i yorajlel chaʼan mi lac chaʼlen tsʼʌmel. Pero cheʼ bʌ tsaʼix tsʼʌmiyonla jamacña pañimil mi la cubin i tijicñayonla. I cheʼʌch miʼ yujtel jaʼel cheʼ mi lac chaʼlen estudio come miʼ lajintel jiñi Biblia bajcheʼ jaʼ (Efes. 5:26). Jiñi muʼ bʌ cajel i yʌjlel ilayi miʼ mejlel i coltañet chaʼan maʼ bajñel chaʼlen estudio:

• Mele jumpʼejl programa. Wen ñuc i cʼʌjñibal cheʼ mi lac bajñel chaʼlen estudio, jin chaʼan yomʌch mi lac chaʼlen wersa lac mel (Filip. 1:10). Chaʼan maʼañic miʼ ñajʌyel a chaʼan, acʼʌ jiñi a programa baqui cʼajpan tsiquil, tajol yaʼ ti refri o yambʌ baqui maʼ taj a qʼuel. Cheʼ jaʼel, miʼ mejlel a wʌcʼ jumpʼejl alarma ti a teléfono muʼ bʌ i cʼajtesʌbeñet chaʼan wolix (choncolix) i cʼotel i yorajlel chaʼan maʼ chaʼlen estudio.

• Ñaʼtan bajcheʼ ñumen wen maʼ wubin chaʼan maʼ chaʼlen estudio. An mach bʌ wocolic miʼ yubiñob chaʼan jal miʼ chaʼleñob estudio, pero an yambʌ muʼ bʌ i mulañob i mel ti chapʼej uxpʼejl qʼuin i tsʼitaʼ jach chuqui miʼ pejcañob majlel. Ixcu jatet ¿baqui bʌ maʼ ñumen mulan? Mi tsaʼix a ñaʼta baqui bʌ jiñi ñumen wem bʌ chaʼañet, mele bajcheʼ jiñi. Pero tajol cheʼ bʌ i yorajlelix maʼ chaʼlen estudio, mach a womic a mel maʼ wubin. Mi cheʼ maʼ wujtel, chaʼlen wersa chaʼan maʼ mel anquese 10 minuto jach. Mach jalic yilal pero cabʌl chuqui miʼ mejlel a cʌn, tajol cheʼ bʌ tsaʼix ñumi jiñi 10 minuto a womixto a bej chaʼlen estudio come tsaʼ wen mulaj jiñi woli bʌ (yʌquel bʌ) a pejcan (Filip. 2:13).

• Wʌn ñaʼtan chuqui mi caj a chaʼlen ti estudiar. Mi jinto maʼ sʌclan chuqui a wom a chaʼlen ti estudiar cheʼ i yorajlelix chaʼan maʼ chaʼlen estudio, maʼañic mi caj a cʼʌn ti wen jiñi a tiempo (Efes. 5:16). ¿Ixcu cheʼ muqʼuic a mel jumpʼejl lista chaʼan jiñi a wom tac bʌ a chaʼlen ti estudiar? Mi an jumpʼejl a cʼajtiya o an chuqui a wom bʌ a ñumen chaʼlen ti investigar, tsʼijbun jaʼel yaʼ ti lista.

• Miʼ mejlel a qʼuextan jala mi caj a chaʼlen estudio yicʼot bajcheʼ mi caj a mel. Jiñi ñumen ñuc bʌ i cʼʌjñibal jiñʌch chaʼan maʼ chaʼlen estudio ti jujumpʼejl semana. Chaʼan maʼ mel iliyi, miʼ mejlel a qʼuextan jiñi qʼuin, jiñi hora, bajcheʼ jalel mi caj a mel yicʼot jiñi tema tac muʼ bʌ caj a chaʼlen ti estudiar.

Mi mucʼʌch a bajñel chaʼlen estudio ti jujumpʼejl semana, mi caj a ñumen lʌcʼtesan a bʌ ti Jehová, wen chuqui mi caj a yajcan a mel i mi caj i pʼʌtʼesañet (Jos. 1:8).