1, 2. ¿Chucoch tijicñayonla cheʼ mi lac melben i yeʼtel Jehová? (Santiago 1:​22-25).

 JEHOVÁ yicʼot Jesús yomob chaʼan tijicñayonla. Tsaʼ bʌ i tsʼijbu jiñi Salmo 119:2 tsiʼ yʌlʌ: «Tijicñayob jini muʼ bʌ i jacʼob a tʼan, muʼ bʌ i sʌclañet c Yum, ti pejtelel i pusicʼal». Cheʼ jaʼel Jesús tsiʼ yʌlʌ: «¡Tijicñayob jiñi muʼ bʌ i yubiñob i tʼan Dios yicʼot mucʼʌch i melob!» (Luc. 11:28).

² Tijicñayonla cheʼ mi lac melben i yeʼtel (troñel) Jehová, ¿chucoch? Come mi lac pejcan i Tʼan Dios tiʼ pejtelel ora yicʼot mi lac chaʼlen wersa chaʼan mi lac mel cheʼ bajcheʼ mi laj cʌn, ili jiñʌch junchajp wen ñuc bʌ i cʼʌjñibal (pejcan Santiago 1:​22-25).

 3. ¿Chuqui ti wenlel mi lac taj cheʼ mi lac jacʼ jiñi i Tʼan Dios?

³ ¿Chuqui ti wenlel mi lac taj cheʼ mi lac jacʼ jiñi i Tʼan Dios? Mi la cʌqʼuen i tijicñʌyel Jehová, i jiñi miʼ yʌqʼueñonla lac tijicñʌyel jaʼel (Ec. 12:13). Cheʼ jaʼel, miʼ coltañonla chaʼan utsʼat mi la cajñel la quicʼot lac familia yicʼot jiñi hermanojob ti laj congregación, tajol cheʼʌch an a qʼuele. I maʼañic mi lac taj jiñi wocol tac muʼ bʌ i tajob jiñi lac piʼʌlob maʼañic bʌ miʼ jacʼbeñob i tʼan Jehová. Jin chaʼan, jiñi rey David tsiʼ yʌlʌ chaʼan jiñi muʼ bʌ i jacʼbeñob i tʼan o i mandar tac Jehová añob cabʌl i chobejtʌbal (Sal. 19:​7-11).

 4. ¿Chucoch an qʼuiñil wocol mi la cubin chaʼan mi lac mel cheʼ bajcheʼ miʼ yʌl jiñi i Tʼan Dios?

⁴ Pero chaʼan mi lac mel cheʼ bajcheʼ miʼ yʌl jiñi i Tʼan Dios,  yomʌch mi lac ñaxan chʼʌmben i sujm chuquiyes jiñi yom bʌ Jehová chaʼan mi lac mel. I chaʼan jiñi, yomʌch mi lac pejcan yicʼot mi lac wen ñaʼtan muʼ bʌ i yʌl jiñi Biblia. Cheʼ toj mi la cʌl an qʼuiñil wocolʌch mi la cubin come cabʌl jax chuqui yom mi lac mel, jin chaʼan yom mi lac locʼsʌben i yorajlel chaʼan mi lac pejcan jiñi Biblia. Ti ili estudio mi caj laj qʼuel chuqui tac miʼ mejlel i coltañonla chaʼan jujumpʼejl qʼuin mi lac pejcan jiñi Biblia. Yicʼot jaʼel mi caj laj qʼuel chuqui mi caj i coltañonla chaʼan mi lac wen ñaʼtan muʼ bʌ lac pejcan yicʼot chaʼan mi lac mel cheʼ bajcheʼ woli (choncol) laj cʌn majlel.

LOCʼSɅBEN I YORAJLEL CHAʼAN MAʼ PEJCAN JIÑI BIBLIA

 5. ¿Baqui tac bʌ eʼtel an lac chaʼan?

⁵ Ti lac pejtelel muʼ bʌ lac melben i yeʼtel Jehová an cabʌl la queʼtel. I yaʼ ti Biblia miʼ yʌl chaʼan yomʌch mi lac tsʼʌctesan. Jumpʼejl ejemplo, yom mi lac chaʼlen eʼtel chaʼan mi la cʌqʼuen chuqui i cʼʌjñibal i chaʼan lac familia (1 Tim. 5:8). An yom bʌ mi laj cʌntan juntiquil cʼam bʌ ti lac familia o ñoxix bʌ, i cheʼto jaʼel yom mi laj cʌntan lac bʌ. I yaʼ ti congregación añʌch chuqui yom mi lac mel jaʼel. Junchajp wen ñuc bʌ i cʼʌjñibal jiñʌch jiñi subtʼan. Come cabʌl chuqui yom mi lac mel, tajol mi laj cʼajtiben lac bʌ: «¿Bajcheʼ miʼ mejlel c tajben i yorajlel chaʼan mic pejcan jiñi Biblia ti jujumpʼejl qʼuin, mic ñaʼtan chuqui miʼ yʌl i mic mel cheʼ bajcheʼ woli j cʌn?».

 6. ¿Chuqui yom maʼ mel chaʼan maʼañic maʼ cʌy a pejcan jiñi Biblia? (Qʼuele jaʼel jiñi foto).

⁶ Junchajp wen «ñumen ñuc bʌ i cʼʌjñibal» yom bʌ mi lac mel jiñʌch cheʼ mi lac pejcan jiñi Biblia (Filip. 1:10). Jiñi libro chaʼan Salmos miʼ tech i yʌl chaʼan jiñi «winic miʼ taj i tijicñʌyel tiʼ mandar lac Yum, miʼ chʌn ñaʼtan chuqui yom lac Yum ti qʼuinil yicʼot ti acʼʌlel» (Sal. 1:​1, 2). Ili tsiquil miʼ pʌs chaʼan yom mi la cʌqʼuen i yorajlel chaʼan mi lac pejcan jiñi Biblia. ¿Bajcheʼ hora ñumen wen chaʼan mi lac mel? Jujuntiquilix yujil,  pero yom mi la cʌqʼuen i yorajlel chaʼan mi lac chʌn meleʼ. Juntiquil hermano i cʼabaʼ Víctor miʼ yʌl: «Joñon mic mulan c pejcan jiñi Biblia ti sʌcʼan. Mach chaʼañic sebto mic mulan tejchel, pero an j qʼuele chaʼan wen ñʌchʼʌlto pañimil cheʼ wen sʌcʼanto. Mach wen wocolic mi cubin chaʼan mic ñaʼtan yicʼot chaʼan miʼ cʌlel tic jol muʼ bʌ c pejcan». ¿Cheʼ ba maʼ mel jaʼel bajcheʼ Víctor? Cʼajtiben a bʌ: «¿Bajcheʼ hora ñumen wen chaʼañon chaʼan mic pejcan jiñi Biblia?».

ÑAʼTAN MUʼ BɅ A PEJCAN

7, 8. ¿Chuqui mach yomic mi lac mel cheʼ mi lac pejcan jiñi Biblia? Alʌ jumpʼejl ejemplo.

⁷ Tajol tsaʼix a wʌqʼue i yorajlel chaʼan maʼ pejcan jiñi Biblia, pero mach cheʼ jach yom maʼ toʼol pejcan i ti wiʼil maʼañix chuqui cʼajal a chaʼan. ¿Am baʼ pejca jumpʼejl jun i ti wiʼil maʼañix cʼajal a chaʼan chuqui miʼ yʌl? ¡Cheʼʌch miʼ mejlel ti ujtel jaʼel cheʼ maʼ pejcan jiñi Biblia! Tajol woli (yʌquel) a chaʼlen wersa chaʼan maʼ pejcan chaʼpʼej uxpʼejl capítulo ti jujumpʼejl qʼuin. Weñʌch bajcheʼ jiñi, pero chaʼan maʼ mejlel a locʼsʌben i wenlel mach cojach yom maʼ mel jiñi, añʌch chuqui yambʌ yom maʼ mel (1 Cor. 9:26).

⁸ Laʼcu lac ñaʼtan iliyi. Jiñi pʌcʼʌbʌl tac i cʼʌjñibal i chaʼan jiñi jaʼal. Pero mi cʌlʌxix miʼ waʼ yajlel jiñi jaʼal, mucʼ jach caj i pajmel yaʼ ti lum i maʼañic mi caj i wen coltan jiñi pʌcʼʌbʌl. Jin chaʼan, ñumen wen cheʼ tsʼitaʼ jach miʼ yajlel chaʼan jiñi lum miʼ mejlel i tsʼuʼ i wen miʼ colel majlel jiñi pʌcʼʌbʌl. Cheʼʌch miʼ yujtel jaʼel cheʼ mi lac pejcan jiñi Biblia, mi ora ora jach mi lac pejcan maʼañic mi caj lac wen ñaʼtan, wocol mi caj la cubin chaʼan mi lac chaʼ cʼajtesan yicʼot mi lac mel cheʼ bajcheʼ miʼ yʌl (Sant. 1:24).

 9. ¿Chuqui yom mi lac mel mi ñʌmʌlonla chaʼan orajach mi lac waʼ pejcan lac Biblia?

⁹ Ñaʼtancu chaʼan woli a pejcan jiñi Biblia i maʼ wubin chaʼan ora ora woli a pejcan. ¿Chuqui miʼ mejlel a mel? Chaʼlen wersa chaʼan mach orajic maʼ pejcan yicʼot chaʼan  maʼ ñaʼtan chuqui woli a pejcan. ¿Ixcu mi wocol maʼ wubin chaʼan maʼ mel? Mach a pensarin. Ñopo jach a pensarin jiñi woli bʌ a pejcan majlel. Muʼ bʌ i mejlel i coltañet jiñʌch 1) maʼ ñumen aqʼuen i yorajlel chaʼan maʼ chaʼlen estudio chaʼan maʼ ñumen ñaʼtan jiñi muʼ bʌ a pejcan o 2) maʼañic jaypʼejl versículo maʼ pejcan chaʼan maʼ más ñaʼtan jiñi woli bʌ a pejcan. Víctor, tsaʼ bʌ la cʌlʌ yaʼ ti párrafo 6, miʼ yʌl: «Mach cabʌlic mic pejcan, an i tajol jumpʼejl jach capítulo. I cheʼ sʌcʼan mic pejcan, miʼ mejlel c bej ñaʼtan ti jiñi qʼuin». Jin chaʼan, mach jiñic ñuc i cʼʌjñibal bajcheʼ cʼamel mi lac pejcan, jin mi mucʼʌch lac ñaʼtan muʼ bʌ lac pejcan (Sal. 119:97; qʼuele jiñi recuadro « Muʼ bʌ caj i coltañet a ñaʼtan jiñi muʼ bʌ a pejcan»).

10. Tsictesan yic’ot jumpʼejl ejemplo chuqui miʼ mejlel a mel chaʼan maʼ ñaʼtan bajcheʼ miʼ mejlel a jacʼ woli bʌ a cʌn yaʼ ti Biblia (1 Tesalonicenses 5:​17, 18).

¹⁰ Mi tsaʼix a ñaʼta bajcheʼ hora mi caj a pejcan jiñi Biblia yicʼot bajcheʼ jalel mi caj a mel, sʌclan o ñaʼtan bajcheʼ miʼ mejlel a jacʼ jiñi woli bʌ a cʌn, cʼajtiben a bʌ: «¿Bajcheʼ miʼ mejlel j cʼʌn ili ora o ti talto bʌ qʼuin jiñi tsaʼ bʌ ujti j cʌn?». Ñaʼtancu chaʼan tsaʼ ujti a pejcan 1 Tesalonicenses 5:​17, 18 (pejcan). Wʌle jumucʼ ñaʼtan iliyi: ¿Bajcheʼ yilal jiñi a woración? ¿Loqʼuem ba ti a pusicʼal? ¿Jaysujtel maʼ mel? ¿Chuqui tac muʼ bʌ a wʌqʼuen wocolix i yʌlʌ Jehová? Maʼ mejlel a ñaʼtan uxchajp chuqui a wom bʌ a wʌqʼuen wocolix i yʌlʌ. Mi mucʼʌch a wʌqʼuen i yorajlel chaʼan maʼ mel bajcheʼ iliyi, mach muqʼuic jach caj a ñʌchʼtan jiñi i Tʼan Dios, mi caj a mel cheʼ bajcheʼ woli a cʌn. I mi jujumpʼejl qʼuin maʼ mele’ iliyi cheʼ bʌ maʼ pejcan jiñi Biblia, mi caj a sujtel ti ñumen wem bʌ xñoptʼan. Pero ¿ixcu mi cabʌlto chuqui yom maʼ tojʼesan maʼ qʼuel? ¿Chuqui yom maʼ mel?

YOM PʼISBIL JACH JIÑI A META

11. ¿Chucoch an i tajol maʼ wubin a chʼijyemlel cheʼ maʼ pejcan jiñi Biblia? Alʌ jumpʼejl ejemplo.

¹¹ Cheʼ bʌ woli a pejcan jiñi Biblia tajol maʼ qʼuel chaʼan anto cabʌl chuqui yom bʌ maʼ tojʼesan, i jiñi miʼ mejlel i yʌqʼueñet a chʼijyemlel. Ñaʼtancu iliyi, ti lunes cheʼ woli a pejcan a Biblia maʼ taj baqui miʼ yʌl chaʼan mach yomic yajcʌbil majqui mi laj qʼuel ti ñuc (Sant. 2:​1-8). Cheʼ jiñi maʼ ñaʼtan chaʼan yomixto maʼ weñʼesan bajcheʼ yilal maʼ qʼuel jiñi yambʌ hermanojob. Ti martes, maʼ pejcan baqui miʼ yʌl chaʼan yom mi lac ticʼ la cacʼ (Sant. 3:​1-12). I miʼ cʼotel a ñaʼtan chaʼan yomixto maʼ weñʼesan bajcheʼ maʼ chaʼlen tʼan i chaʼan yom ñumen utset,  come an i tajol an a wʌlʌ chuqui mach bʌ weñic o mach cʌlʌx utsic bajcheʼ an a chaʼle tʼan. Ti miércoles, cheʼ bʌ woli a chaʼ pejcan jiñi Biblia maʼ taj a qʼuel baʼ miʼ yʌl chaʼan mach yomic mi lac sujtel tiʼ yamigo ili pañimil (Sant. 4:​4-12). I miʼ yʌqʼueñet a ñaʼtan chaʼan yom maʼ ñumen cʌntan a bʌ chaʼan chuqui maʼ qʼuel ti televisión o chuqui ti música maʼ ñʌchʼtan. I ti jueves tajol miʼ cʼotel a qʼuel chaʼan cabʌlix chuqui yom maʼ tojʼesan i jiñi miʼ yʌqʼueñet a chʼijyemlel, i maʼañix chuqui a wom maʼ wubin.

12. ¿Chucoch mach yomic maʼ wubin a chʼijyemlel mi tsaʼ qʼuele chaʼan anto chuqui tac yom maʼ tojʼesan? (Qʼuele jiñi nota).

¹² Mi tsaʼ qʼuele chaʼan anto chuqui tac yom maʼ tojʼesan mach a wubin a chʼijyemlel. Jiñi miʼ pʌs chaʼan cheʼ bʌ maʼ pejcan jiñi Biblia maʼ mel yicʼot a pecʼlel, a wom a ñumen tojʼesan a bʌ yicʼot chaʼan wolʌch a cʌn a bʌ tiʼ sujm. a I cʼajtesan chaʼan yom mi lac lʌp jiñi tsijiʼ bʌ lac melbal (chaʼlibal), i mach junsujtelic jach mi lac mel iliyi, ti bele ora (Col. 3:10). ¿Chuqui mi caj i coltañet chaʼan maʼ bej mel cheʼ bajcheʼ miʼ yʌl jiñi i Tʼan Dios?

13. ¿Chuqui miʼ mejlel a mel? (Qʼuele jaʼel jiñi foto tac).

¹³ Mach a ñop a luʼ tsʼʌctesan ti junjajtsʼ pejtelel chuqui woli bʌ a cʌn, yom maʼ pʌs a pecʼlel (Pr. 11:2). Ñopo a mel iliyi: Mele jumpʼejl lista chaʼan pejtelel jiñi yom bʌ maʼ tojʼesan, cheʼ jiñi yajcan jumpʼej o chaʼpʼejl chaʼan maʼ ñaxan tech a tsʼʌctesan. ¿Bajcheʼ miʼ mejlel a mel?

14. ¿Baqui bʌ miʼ mejlel a ñaxan mel?

¹⁴ Maʼ mejlel a yajcan jiñi mach bʌ wen wocolic maʼ qʼuel o jiñi ñumen yom bʌ maʼ tojʼesan  maʼ wubin. Cheʼ tsaʼix a mele, sʌclan información. Maʼ mejlel a cʼʌn jiñi Índice de las publicaciones Watch Tower o jiñi Coltʌntel chaʼan estudio. Cheʼ jiñi, pejcan Jehová i cʼajtiben a pʼʌtʌlel yicʼot i mulʌntel i melol chuqui wen (Filip. 2:13). Ti wiʼil, mele cheʼ bajcheʼ tsaʼ cʌñʌ. Cheʼ bʌ maʼ qʼuel chaʼan wolʌch a tsʼʌctesan, mi caj a wubin a tijicñʌyel i mi caj a mulan a wʌqʼuen a bʌ jiñi yambʌ meta. Cheʼ jaʼel, tajol muʼto i mejlel i coltañet chaʼan maʼ tsʼʌctesan jiñi yambʌ am bʌ ti a lista.

ACʼɅ CHAʼAN JIÑI I TʼAN DIOS MIʼ COLTAÑET

15. ¿Chucoch mach lajaloñicla bajcheʼ jiñi yambʌ lac piʼʌlob muʼ bʌ i yʌlob chaʼan miʼ wen pejcañob jiñi Biblia? (1 Tesalonicenses 2:13).

¹⁵ Cabʌl lac piʼʌlob miʼ yʌlob chaʼan añix i wen pejcayob jiñi Biblia. Pero ¿mucʼʌch ba i ñopob muʼ bʌ i yʌl? ¿Muʼ ba i pʌsob tiʼ cuxtʌlel chaʼan mucʼʌch i jacʼob chuqui miʼ yʌl? Mach cheʼic miʼ luʼ melob. Pero jiñi i testigojonbʌla Jehová wen qʼuexelonla. Cheʼ bajcheʼ jiñi xñoptʼañob ti ñaxam bʌ siglo, joñonla mi lac ñop muʼ bʌ i yʌl jiñi Biblia i mi lac chʼʌm cheʼ bajcheʼ yom, «bajcheʼ i tʼan Dios». Jin chaʼan, mi lac chaʼlen wersa lac pʌs ti laj cuxtʌlel chaʼan mi lac jacʼ muʼ bʌ i yʌl (pejcan 1 Tesalonicenses 2:13).

16. ¿Chuqui mi caj i coltañonla chaʼan mi lac mel cheʼ bajcheʼ miʼ yʌl i Tʼan Dios?

¹⁶ An i tajol wocolʌch chaʼan mi lac pejcan jiñi i Tʼan Dios i mi lac jacʼ muʼ bʌ i yʌl. Tajol maʼañic mi lac wen tajben i yorajlel, ora ora jach mi lac waʼ pejcan i maʼañix cʼajal lac chaʼan chuqui miʼ yʌl. O tajol cheʼ mi laj qʼuel chaʼan cabʌl chuqui yom mi lac tojʼesan mi lac chaʼ ubin lac chʼijyemlel. Pero mach yʌlʌyic chuqui ti wocol mi lac taj, Jehová yom i coltañonla. Jacʼben i coltaya, mach a toʼol pejcan i maʼ chaʼ ñajʌtesan. Mele cheʼ bajcheʼ miʼ yʌl. Cheʼ mucʼʌch a wen pejcan jiñi Biblia yicʼot maʼ jacʼ muʼ bʌ i yʌl, wen tijicña mi caj a wubin a bʌ (Sant. 1:25).