1, 2. ¿Chucoch weñʌch cheʼ Jehová tsiʼ meleyonla chaʼan mi lac ñumen taj lac tijicñʌyel cheʼ bʌ mi la cʌcʼ i mach jiñic cheʼ mi lac chʼʌm?

 TIJICÑAYONLA cheʼ bʌ an chuqui mi la cʌqʼuentel, pero ñumen tijicñayonla cheʼ bʌ joñonla am bʌ chuqui mi la cʌqʼuen yambʌlob come cheʼʌch tsiʼ meleyonla (pʌtʌyonla) Jehová (Hech. 20:35). I weñʌch cheʼ tsiʼ meleyonla bajcheʼ jiñi. ¿Chucoch?

² Come cheʼ bajcheʼ jiñi Jehová tsiʼ yʌqʼueyonla ti lac wenta chaʼan miʼ mejlel lac ñumen taj lac tijicñʌyel. Jin chaʼan, laʼ lac sʌclan chuqui tac miʼ mejlel lac mel tiʼ tojlel yambʌlob, cheʼ bajcheʼ jiñi mi caj lac ñumen taj lac tijicñʌyel. ¡Jehová wen utsʼatax bajcheʼ tsiʼ meleyonla! (Sal. 139:14).

 3. ¿Chucoch miʼ yʌl jiñi Biblia chaʼan Jehová jiñʌch jiñi «tijicña bʌ Dios»?

³ Jiñi Biblia miʼ yʌl chaʼan tijicña jiñi muʼ bʌ i yʌcʼ, jin chaʼan maʼañic miʼ toj sajtel lac pusicʼal chaʼan Jehová jiñʌch jiñi «tijicña bʌ Dios» (1 Tim. 1:11). Jiñʌch tsaʼ bʌ i ñaxan acʼʌ chuqui an i chaʼan, i maʼañic yambʌ majqui miʼ ñumen acʼ bajcheʼ Jehová. Jiñi apóstol Pablo tsiʼ yʌlʌ: «Tiʼ tojlelʌch an laj cuxtʌlel, mi lac ñijcan lac bʌ yicʼot wʌʼañonla» (Hech. 17:28). Cheʼ jaʼel, «pejtelel wem bʌ yicʼot toj bʌ majtañʌl» tilemʌch ti Jehová (Sant. 1:17).

 4. ¿Chuqui mi caj i coltañonla lac ñumen taj lac tijicñʌyel?

⁴ ¿Chuqui miʼ mejlel lac mel chaʼan mi lac ñumen taj lac tijicñʌyel cheʼ bʌ mi la cʌcʼ? Cheʼ bajcheʼ mi caj laj qʼuel ti ili estudio, miʼ mejlel lac lajiben i yutslel i pusicʼal Jehová (Efes. 5:1). Cheʼ jaʼel, mi caj laj qʼuel chuqui miʼ mejlel lac mel mi tsaʼ la cubi chaʼan an maʼañic bʌ miʼ qʼuelob ti ñuc muʼ bʌ lac mel tiʼ tojlelob. Ili mi caj i coltañonla chaʼan maʼañic mi lac sʌt lac tijicñʌyel cheʼ mi la cʌcʼ, i muʼto lac ñumen taj jiñi lac tijicñʌyel.

 LAʼ LAC LAJIBEN I YUTSLEL I PUSICʼAL JEHOVÁ

 5. ¿Chuqui tac miʼ yʌqʼueñonla Jehová?

⁵ Laʼ laj qʼuel bajcheʼ miʼ pʌsbeñonla i yutslel i pusicʼal Jehová. Jumpʼejl ejemplo, miʼ yʌqʼueñonla chuqui la com. Tajol mach cheʼic chumulonla bajcheʼ jiñi ricojoʼ bʌ, pero miʼ yʌqʼueñonla jiñi i cʼʌjñibal bʌ lac chaʼan, bajcheʼ jiñi bʌlñʌcʼʌl, jiñi lac pislel yicʼot baqui mi lac chumtʌl (Sal. 4:8; Mat. 6:​31-33; 1 Tim. 6:​6-8). I mach chaʼañic xicʼbil miʼ meleʼ. ¿Chucoch miʼ mel?

 6. ¿Chuqui miʼ pʌsbeñonla muʼ bʌ i yʌl Mateo 6:​25, 26?

⁶ Jehová miʼ yʌqʼueñonla i cʼʌjñibal bʌ lac chaʼan come miʼ cʼuxbiñonla. Laʼ laj qʼuel tsaʼ bʌ i yʌlʌ Jesús ti Mateo 6:​25, 26 (pejcan). Ti ili versículo, Jesús tsiʼ yʌlʌ chaʼan jiñi xmateʼmut «maʼañic miʼ chaʼleñob pacʼ yicʼot maʼañic miʼ lotob i bucʼbal tiʼ yotlel». Cheʼ jiñi tsiʼ yʌlʌ: «Jiñi laʼ Tat am bʌ ti panchan miʼ bucʼsañob». I tsiʼ cʼajtibe jiñi xcʌntʼañob i chaʼan: «¿Mach ba ñumen añic laʼ cʼʌjñibal jatetla?». Yom bʌ i pʌs Jesús jiñʌch chaʼan Jehová miʼ ñumen qʼuel ti ñuc jiñi i wiñicob cheʼ bajcheʼ jiñi añimal tac. Mi Jehová miʼ cʌntan jiñi añimal tac miʼ mejlel lac ñop chaʼan ñumento miʼ cʌntañonla. Come jiñʌch lac Tat yicʼot miʼ cʼuxbiñonla, miʼ yʌqʼueñonla i cʼʌjñibal bʌ lac chaʼan (Sal. 145:16; Mat. 6:32).

 7. ¿Bajcheʼ miʼ mejlel lac pʌs i yutslel lac pusicʼal cheʼ bajcheʼ Jehová? (Qʼuele jaʼel jiñi foto tac).

⁷ Cheʼ bajcheʼ Jehová, joñonla jaʼel mi laj cʼuxbin yañoʼ bʌ, jin chaʼan mi la cʌcʼ chuqui an lac chaʼan. Jumpʼejl ejemplo, ¿laj cʌñʌ ba juntiquil hermano o hermana mach bʌ wen añic i pislel o i bʌl i ñʌcʼ? Jehová miʼ mejlel i cʼʌñonla chaʼan mi laj coltan. Jiñi i testigojob Jehová cʌmbilob chaʼan miʼ yʌcʼob chuqui añob i chaʼan cheʼ bʌ an jumpʼejl wocol. Laʼcu lac ñaʼtan tsaʼ bʌ ujti ti jiñi pandemia chaʼan COVID-19. An hermanojob tsaʼ bʌ i yʌcʼʌyob bʌlñʌcʼʌl, pisil yicʼot yan tac bʌ i cʼʌjñibal bʌ. Cheʼ jaʼel, cabʌl tsaʼ bʌ i yʌcʼʌyob i donación chaʼan miʼ coltʌntelob yaʼ baqui woli (choncol) i ñusañob wocol. Tiʼ pejtelelob tsaʼʌch i jacʼʌyob muʼ bʌ i yʌl Hebreos 13:16: «Mach ñajʌyic laʼ chaʼan laʼ mel chuqui wen yicʼot laʼ tʼoxben yambʌlob chuqui an laʼ chaʼan, come ili majtañʌl tac miʼ wen mulan Dios».

 8. ¿Bajcheʼ miʼ coltañonla cheʼ Jehová miʼ yʌqʼueñonla lac pʼʌtʌlel? (Filipenses 2:13).

⁸ Jehová miʼ yʌqʼueñonla lac pʼʌtʌlel. Jehová maʼañic i pʼisol i pʼʌtʌlel i miʼ mulan i yʌqʼuen  i pʼʌtʌlel i wiñicob (pejcan Filipenses 2:13). ¿Am baʼ cʼajtibe Jehová chaʼan miʼ yʌqʼueñet a pʼʌtʌlel, chaʼan maʼañic maʼ yajlel ti jumpʼejl mulil, chaʼan maʼ cuch jumpʼejl tsʌts bʌ wocol o chaʼan maʼ mel a weʼtel ti jujumpʼejl qʼuin? Cheʼ bʌ Jehová tsiʼ jacʼbeyet jiñi a woración, tajol cheʼ tsaʼ wubi a bʌ bajcheʼ jiñi apóstol Pablo, tsaʼ bʌ i yʌlʌ: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel» (Filip. 4:13).

 9. ¿Bajcheʼ miʼ mejlel lac lajiben i yutslel Jehová? (Qʼuele jaʼel jiñi foto).

⁹ Joñonla maʼañic miʼ mejlel la cʌqʼuen lac pʼʌtʌlel yambʌlob cheʼ bajcheʼ miʼ mel Jehová. Pero miʼ mejlel lac lajiben i yutslel i pusicʼal Jehová cheʼ mi laj cʼʌn lac pʼʌtʌlel chaʼan mi laj coltan yañoʼ bʌ. Jumpʼejl ejemplo, mi juntiquil hermano cʼam o ñoxix, miʼ mejlel laj coltan ti mʌñoñel o ti jiñi eʼtel (troñel) yom bʌ melol tiʼ yotot. Mi maʼañic chuqui miʼ mʌctañonla laʼ lac chaʼlen coltaya ti sʌqʼuesʌntel yicʼot i tojʼesʌntel i yotlel tempa bʌ. Mi mucʼʌch laj cʼʌn jiñi lac pʼʌtʌlel bajcheʼ jiñi, mi caj i mejlel lac ñumen coltan jiñi hermanojob.

10. ¿Bajcheʼ miʼ mejlel lac pʼʌtʼesan yañoʼ bʌ ti lac tʼan?

¹⁰ Yom cʼajal lac chaʼan chaʼan jiñi muʼ bʌ la cʌl añʌch i pʼʌtʌlel, i chaʼan miʼ mejlel i pʼʌtʼesan yañoʼ bʌ. ¿A cʌñʌ ba majqui miʼ mejlel a ñuqʼuesʌben i pusicʼal o maʼ suben chaʼan maʼ qʼuel ti ñuc? ¿Bajcheʼ a wʌlʌ cheʼ muqʼuic a mel? Miʼ mejlel a julaʼtan, a pejcan ti teléfono, a chocben majlel jumpʼejl tarjeta o mensaje. Mach cʼʌñʌlic maʼ cʌlʌx ñaʼtan chuqui mi caj a suben, yom jach loqʼuem ti a pusicʼal chuqui maʼ wʌl. Jasʌl chaʼpʼej uxpʼejl tʼan loqʼuem bʌ ti lac pusicʼal miʼ mejlel i coltan chaʼan miʼ cuch yambʌ jumpʼejl qʼuin o chaʼan miʼ chaʼ tsʼitaʼ taj i tijicñʌyel (Pr. 12:25; Efes. 4:29).

11. ¿Bajcheʼ miʼ tʼox i ñaʼtʌbal Jehová?

¹¹ Jehová miʼ yʌqʼueñonla lac ñaʼtʌbal. Jiñi xcʌntʼan Santiago tsiʼ yʌlʌ: «Mi an majqui anto yom i ñaʼtʌbal, laʼ i chʌn cʼajtiben Dios». I tsiʼ bej alʌ: «Come Dios miʼ wen acʼ tiʼ pejtelel i pusicʼal i maʼañic miʼ sʌclan lac mul» (Sant. 1:5). Ili versículo miʼ pʌs chaʼan Jehová maʼañic miʼ chʌquin i ñaʼtʌbal. I cheʼ bʌ miʼ yʌqʼueñonla lac ñaʼtʌbal maʼañic miʼ yʌcʼonla ti quisin chaʼan woli (yʌquel) laj cʼajtiben i coltaya, yom bʌ jiñʌch chaʼan mi laj cʼajtiben (Pr. 2:​1-6).

12. ¿Bajcheʼ miʼ mejlel lac tʼoxben yambʌlob chuqui la cujil bʌ?

¹² ¿Ixcu joñonla? ¿Muʼ ba mejlel lac lajin Jehová i mi lac pʌsben yambʌlob chuqui la cujil? ¡Mucʼʌch! Cabʌl bajcheʼ miʼ mejlel lac mel (Sal. 32:8). Miʼ mejlel laj cʌntesañob ti subtʼan jiñi tsijib publicadorob. Cheʼ jaʼel,  jiñi ancianojob miʼ mejlel i coltañob jiñi siervo ministerial yicʼot yambʌ hermanojob chʼʌmbilix bʌ i chaʼañob jaʼ chaʼan miʼ melob eʼtel tac yaʼ ti congregación. I cabʌl hermanojob yicʼot hermanajob yujiloʼ bʌ chaʼan construcción yicʼot mantenimiento miʼ cʌntesañob yambʌlob chaʼan miʼ melob jiñi eʼtel tiʼ yotlel tempa bʌ o ti yan tac bʌ.

13. ¿Bajcheʼ miʼ mejlel lac lajin Jehová cheʼ bʌ mi laj cʌntesan yambʌlob?

¹³ Cheʼ bʌ an majqui mi laj cʌntesan, cheʼʌch yom mi lac mel bajcheʼ miʼ mel Jehová. Cheʼ bajcheʼ tsaʼ laj qʼuele, Jehová miʼ tʼoxben i ñaʼtʌbal jiñi yambʌlob ti jumpʼejl i pusicʼal. Jin chaʼan, cheʼ bʌ an majqui woli laj cʌntesan mi lac pʌsben pejtelel chuqui la cujil. Maʼañic mi lac bʌcʼñan chaʼan ti wiʼil mi caj i chilbeñonla jiñi «la queʼtel», mi muqʼuic lac ñaʼtan: «Laʼto i bajñel cʌn, c bajñel tsaʼ j cʌñʌ jaʼel, maʼañic majqui tsiʼ cʌntesayon». Tiʼ tejclum Jehová, maʼañic majqui yom miʼ ñaʼtan bajcheʼ iliyi. Cheʼ jaʼel, cheʼ an majqui mi laj cʌntesan mi lac mel ti jumpʼejl lac pusicʼal (1 Tes. 2:8). Cheʼ bajcheʼ jiñi la cujil chaʼan «chajpʌbilob chaʼan miʼ cʌntesañob yambʌlob» (2 Tim. 2:​1, 2). Mi ti lac pejtelel mi lac pʌsben yambʌlob chuqui la cujil bʌ, junlajal mi caj la cubin lac tijicñʌyel yicʼot mi caj lac ñumen taj lac ñaʼtʌbal.

CHEʼ MAʼAÑIC MIʼ QʼUELOB TI ÑUC YILAL CHUQUI MU BɅ LAC MEL

14. ¿Chuqui miʼ yujtel cheʼ bʌ an chuqui mi lac mel tiʼ tojlel yambʌlob?

¹⁴ Lʌcʼʌ tiʼ pejtelel ora, cheʼ bʌ an chuqui mi lac mel tiʼ tojlel yambʌlob mi la cʌqʼuentel wocolix la cʌlʌ, ñumento jiñi hermanojob. Tajol miʼ yʌqʼueñoñobla jumpʼejl nota o an yambʌ bajcheʼ miʼ pʌsob chaʼan miʼ qʼuelob ti ñuc jiñi tsaʼ bʌ lac mele (Col. 3:15). Jiñi muʼto i ñumen aqʼueñonla lac tijicñʌyel.

15. ¿Chuqui yom cʼajal lac chaʼan mi maʼañic miʼ qʼuejlel ti ñuc yilal jiñi muʼ bʌ lac mel?

¹⁵ Pero yom mi lac ñaʼtan chaʼan mach tiʼ pejtelelobic mi caj i qʼuelob ti ñuc chuqui mi lac mel tiʼ tojlelob. Tajol tsaʼix laj cʼʌñʌ lac pʼʌtʌlel, lac tiempo o lac taqʼuin chaʼan mi laj coltañob, pero ti wiʼil mi laj qʼuel chaʼan maʼañic miʼ wen qʼuelob ti ñuc yilal. Mi cheʼ bajcheʼ jiñi, ¿chuqui mi caj i coltañonla chaʼan maʼañic mi la cubin lac chʼijyemlel? Laʼ laj cʼajtesan Hechos 20:35. Jiñi lac tijicñʌyel mach yaʼic cʌyʌl ti bajcheʼ miʼ chʼʌmob jiñi muʼ bʌ la cʌqʼueñob, jin chaʼan laʼ lac bej acʼ yicʼot lac tijicñʌyel anquese an maʼañic bʌ miʼ qʼuelob ti ñuc. Laʼ laj qʼuel chuqui miʼ mejlel i coltañonla.

16. ¿Chuqui yom bʌ mi lac ñaʼtan?

¹⁶ Laʼ lac ñaʼtan chaʼan woli lac lajin Jehová cheʼ bʌ mi la cʌcʼ. Jehová jiñʌch muʼ bʌ i yʌqʼuen pejtelel lac piʼʌlob chuqui wem bʌ, anquese an maʼan bʌ miʼ qʼuelob ti ñuc (Mat. 5:​43-48). Jehová miʼ suben jiñi i wiñicob «mach laʼ pijtan mi laʼ chaʼ qʼuextʌbentel», cheʼ jiñi miʼ yʌqʼueñob i tʼan «mi caj laʼ taj ñuc bʌ laʼ chobejtʌbal» (Luc. 6:35). Jin chaʼan, mach a wubin a chʼijyemlel mi an maʼañic bʌ miʼ qʼuelob ti ñuc jiñi muʼ bʌ a mel. Cʼajtesan chaʼan Jehová tiʼ pejtelel ora mi caj i yʌqʼueñet i bendición cheʼ maʼ wʌqʼuen yambʌlob yicʼot a tijicñʌyel (Pr. 19:17; 2 Cor. 9:7).

17. ¿Chuqui mi caj i coltañonla lac lajin Jehová? (Lucas 14:​12-14).

¹⁷ Yambʌ muʼ bʌ caj i coltañonla chaʼan mi lac lajin Jehová jiñʌch cheʼ mi lac chʼʌm ti ñuc jiñi principio muʼ bʌ lac taj ti Lucas 14:​12-14 (pejcan). I sujmʌch chaʼan maʼañic i wocolel cheʼ mi lac pʌsben la cutslel jiñi muʼ bʌ i mejlel i chaʼ qʼuextañob muʼ bʌ lac mel. Pero mi tsaʼ laj qʼuele chaʼan cheʼ bʌ mi la cʌcʼ mi lac pijtan chaʼan cheʼʌch mi lac melbentel jaʼel,  yomʌch mi lac jacʼ jiñi ticʼojel tsaʼ bʌ i yʌcʼʌ Jesús: Laʼ lac pʌsben la cutslel jiñi la cujil bʌ chaʼan maʼañic mi caj i chaʼ mejlel i qʼuextañob. Mi cheʼʌch mi lac mel, tijicña mi caj la cubin come woli lac lajin Jehová. Cheʼ jaʼel, mi maʼañic mi lac pijtan chaʼan miʼ chaʼ qʼuextañob, mi caj lac bej acʼ yicʼot lac tijicñʌyel anquese an maʼañic bʌ miʼ yʌqʼueñoñobla wocolix la cʌlʌ.

18. ¿Chuqui mi caj i coltañonla chaʼan maʼañic mi lac ñaʼtan mach bʌ weñic tiʼ tojlel yambʌlob?

¹⁸ Mach a ñaʼtan mach bʌ weñic tiʼ tojlelob (1 Cor. 13:7). Mi an chuqui mi lac mel tiʼ tojlel yañoʼ bʌ i maʼan chuqui miʼ subeñoñobla, miʼ mejlel laj cʼajtiben lac bʌ: «¿Machʌch ba maʼañic miʼ qʼuel ti ñuc o tsaʼ jach ñajʌyi i chaʼan i yʌqʼueñon wocolix cʌlʌ?». Tajol añʌch chucoch mach cheʼic tsiʼ mele. Tajol mucʼʌch i qʼuel ti ñuc jiñi tsaʼ bʌ lac mele pero wocol miʼ yubin chaʼan miʼ yʌl. O ti wajali jiñʌch tsaʼ bʌ i chaʼle coltaya, pero wʌle maʼañix miʼ mejlel i mel i miʼ quisñin chaʼan jiñix woli bʌ i coltʌntel. Jiñi laj cʼuxbiya mi caj i coltañonla chaʼan mach lecojic mi lac ñaʼtan tiʼ tojlel jiñi hermanojob i chaʼan mi lac bej acʼ yicʼot lac tijicñʌyel (Efes. 4:2).

19, 20. ¿Chucoch yomʌch la cujil pijt? (Qʼuele jaʼel jiñi foto tac).

¹⁹ yom a wujil pijt. Jiñi rey Salomón an chuqui tsiʼ yʌlʌ wen añʌch bʌ i sujmlel: «Aqʼuen i majtan jini mach bʌ anic i chaʼan. Muqʼuix a chaʼ aqʼuentel anquese jal maʼ pijtan» (Ec. 11:1). Ili tʼan tac miʼ pʌsbeñonla chaʼan añʌch muʼ bʌ caj i yʌqʼueñonla wocolix la cʌlʌ anquese jal mi lac pijtan. Laʼ laj qʼuel jumpʼejl ejemplo.

²⁰ Ti jumpʼejl bʌ qʼuin jiñi i yijñam juntiquil superintendente chaʼan circuito tsiʼ yʌqʼue jumpʼejl nota juntiquil hermana maxto bʌ jalic i chʼʌmʌ jaʼ i tiʼ sube chaʼan chʌn xucʼul miʼ yajñel. Pero tsaʼto ñumi 8 jab chaʼan jiñi hermana miʼ jacʼben i nota jiñi i yijñam viajante, ti jumpʼejl carta tiʼ sube: «Mach a wujilic bajcheʼ cʼamel tsiʼ coltayon jiñi tsaʼ bʌ a tsʼijbubeyon. Anquese wen utsʼatax jiñi tsaʼ bʌ a wʌlʌ, tsaʼ bʌ ñumen cʼoti tic pusicʼal jiñʌch  jiñi texto, maʼañic ñajʌyem c chaʼan». a Cheʼ bʌ tsaʼ ujti i suben jiñi wocol tac tsaʼ bʌ i ñusa, tsiʼ yʌlʌ: «An i tajol comix c laj cʌy tsaʼ cubi: Jiñi i sujmlel, jiñi eʼtel. . . tiʼ pejtelel. Pero jiñi texto tsaʼ wen cʌli tic pusicʼal, jin chaʼan maʼañic tsaʼ j cʌyʌ c chaʼlen wersa. Jiñʌch tsaʼ bʌ i wen coltayon ti jiñi 8 jab». ¡Ñaʼtancu bajcheʼ cʼamel i tijicñʌyel tsiʼ yubi i yijñam jiñi superintendente cheʼ bʌ tsiʼ chʼʌmʌ jiñi carta! Mi joñonla an chuqui wem bʌ tsaʼ lac mele tiʼ tojlel juntiquil, tajol «jalto» mi caj i majlel i pʌs chaʼan miʼ qʼuel ti ñuc jiñi tsaʼ bʌ lac mele tiʼ tojlel.

21. ¿Chucoch yomʌch mi lac chaʼlen wersa lac lajiben i yutslel Jehová maʼ wʌl?

²¹ Cheʼ bajcheʼ tsaʼix laj qʼuele, Jehová wen utsʼatax bajcheʼ tsiʼ meleyonla: Ñumen tijicñayonla cheʼ mi la cʌcʼ i mach jiñic cheʼ mi lac chʼʌm. Cheʼ mi laj coltan jiñi hermanojob wen mi la cubin lac bʌ i mi lac mulan chaʼan mi la cʌqʼuentel wocolix la cʌlʌ. Pero, mach yʌlʌyic mi tsiʼ meleyob o maʼañic, yom tijicñayonla come wen tsaʼ bʌ lac mele. Jin chaʼan, cheʼ bʌ an chuqui mi la cʌcʼ, mach yʌlʌyic chuquiyes, laʼ laj cʼajtesan muʼ bʌ i yʌl 2 Crónicas 25:9: «Lac Yum mi mejlel i yʌqʼueñet yambʌ [ . . . ] ñumen bajcheʼ ti ñaxan». ¡Maʼañic yambʌ muʼ bʌ i mejlel i ñumen acʼ cheʼ bajcheʼ Jehová! I cheʼ bʌ Jehová miʼ yʌqʼueñonla lac chobejtʌbal chaʼan jiñi muʼ bʌ lac mel, jiñʌch muʼ bʌ i yʌqʼueñonla lac tijicñʌyel. Jin chaʼan, laʼ lac chʌn chaʼlen wersa lac pʌs la cutslel cheʼ bajcheʼ jiñi lac Tat am bʌ ti panchan.