1. ¿Chuqui mi caj i mel Jesús?

 ILI ora cabʌl chuqui woli (choncol) laj qʼuel ti tsʼʌctiyel. Tsʼitaʼ jax yom chaʼan Jesús mi caj i chaʼlen meloñel ila ti Pañimil. ¿Bajcheʼ la cujil chaʼan lʌcʼʌlix jiñi qʼuin? Come Jesús tiʼ sube jiñi xcʌntʼañob i chaʼan jumpʼejl profecía muʼ bʌ caj i pʌs chaʼan «lʌcʼʌlix i yorajlel i jilibal pañimil» (Mat. 24:3). Miʼ mejlel lac pejcan jaʼel ili profecía ti Mateo capítulo 24 yicʼot 25, Marcos capítulo 13 yicʼot ti Lucas capítulo 21.

2. ¿Chuqui mi caj laj qʼuel ti ili estudio, i chucoch?

² Jesús tsiʼ yʌlʌ uxpʼejl lajiya am bʌ chuqui miʼ mejlel i pʌsbeñonla, jiñʌch jiñi lajiya chaʼan jiñi tiñʌmeʼ tac yicʼot chivo, chaʼan jiñi 10 xchʼocob yicʼot chaʼan jiñi talento tac. Ti jujumpʼejl lajiya mi caj i pʌs chuqui miʼ qʼuel Jesús ti juntiquil lac piʼʌl cheʼ bʌ mi caj i chaʼlen meloñel. I jiñʌch muʼ bʌ caj laj qʼuel ti ili estudio i chuqui miʼ pʌsbeñonla. Laʼ la cʌl chaʼan bʌ jiñi tiñʌmeʼ tac yicʼot chivo.

JIÑI TIÑɅMEʼ TAC YICʼOT CHIVO

3. ¿Jala mi caj i chaʼlen meloñel Jesús?

³ Jesús tsiʼ pʌsʌ chaʼan cheʼ bʌ mi caj i chaʼlen meloñel mi caj i chʼʌm ti ñuc mi juntiquil lac piʼʌl tsaʼʌch i jacʼʌ jiñi wen tʼan yicʼot mi tsiʼ colta jiñi ungidojob (Mat. 25:​31-46). ¿I jala mi caj i yʌl majqui jiñi tiñʌmeʼ o majqui jiñi chivo? Ti jiñi ñuc bʌ wocol, cheʼ bʌ maxto tejchi jiñi Armagedón (Mat.  24:21). Lajal bajcheʼ juntiquil xcʌnta tiñʌmeʼ miʼ tʼox jiñi chivo yicʼot jiñi tiñʌmeʼ tac, Jesús mi caj i tʼox jiñi tsaʼʌch bʌ i coltʌbeyob i yermañujob yicʼot jiñi mach bʌ añic tsiʼ meleyob.

4. Cheʼ bajcheʼ miʼ yʌl Isaías 11:​3, 4, ¿chucoch mi lac ñop chaʼan Jesús toj bajcheʼ mi caj i chaʼlen meloñel? (Qʼuele jaʼel jiñi foto tac).

⁴ Jehová tsiʼ waʼchoco Jesús bajcheʼ jiñi juez, i jiñi Biblia miʼ yʌl chaʼan Jesús toj mi caj i chaʼlen meloñel (pejcan Isaías 11:​3, 4). Miʼ chʼʌm ti ñuc muʼ bʌ i ñaʼtan, chuqui miʼ yʌlob yicʼot miʼ melob jiñi lac piʼʌlob, i cheʼ jaʼel bajcheʼ yilalob tiʼ tojlel jiñi ungidojob (Mat. 12:​36, 37; 25:40). Jesús yujil majqui woli (yʌquel) i coltañob jiñi ungidojob. a Junchajp bajcheʼ miʼ pʌsob, jiñʌch cheʼ miʼ chaʼleñob subtʼan, jumpʼejl eʼtel (troñel) wen ñuc bʌ i cʼʌjñibal. Muʼ bʌ i coltañob jiñi ungidojob mi caj i cʌjñelob bajcheʼ «tojoʼ bʌ» i mi caj i mejlelob ti chumtʌl tiʼ pejtelel ora wʌʼ ti Pañimil (Mat. 25:46; Apoc. 7:​16, 17). Wen utsʼatax i majtan muʼ bʌ caj i tajob jiñi xucʼul bʌ miʼ yajñelob cheʼ miʼ ñumel jiñi ñuc bʌ wocol, ti wiʼil mi caj i tsʼijbuntelob «i cʼabaʼ yaʼ ti libro chaʼan bʌ cuxtʌlel» (Apoc. 20:15).

5. ¿Chuqui miʼ pʌsbeñonla jiñi lajiya chaʼan jiñi tiñʌmeʼ yicʼot chivo, i majqui yom miʼ chʼʌmob ti ñuc jaʼel?

⁵ Pʌsʌ chaʼan xucʼulet. Jiñi lajiya chaʼan jiñi tiñʌmeʼ yicʼot chivo majlem tiʼ tojlel jiñi muʼ bʌ caj i chumtʌlob wʌʼ ti Pañimil. Miʼ pʌsob chaʼan xucʼulobʌch cheʼ bʌ miʼ coltañob ti subtʼan jiñi ungidojob yicʼot cheʼ miʼ jacʼob muʼ bʌ i yʌl jiñi xucʼul bʌ xyaj eʼtel (Mat. 24:45). Pero ili lajiya yomʌch miʼ wen chʼʌmob ti ñuc jaʼel jiñi muʼ bʌ caj i majlelob ti panchan. ¿Chucoch? Come Jesús woliʼ wen qʼuel jaʼel chuqui miʼ yʌlob, chuqui miʼ ñaʼtañob yicʼot chuqui miʼ melob. Jin chaʼan yomʌch miʼ pʌsob chaʼan xucʼulobʌch. Wʌle mi caj laj qʼuel jiñi yambʌ chaʼpʼejl lajiya muʼ bʌ lac taj yaʼ ti Mateo capítulo 25, miʼ chʼʌm tilel chaʼpʼejl ticʼojel majlem bʌ tiʼ tojlel jiñi ungidojob. Laʼ laj qʼuel jiñi lajiya chaʼan jiñi 10 xchʼocob.

JIÑI 10 XCHʼOCOB

6. ¿Bajcheʼ tsiʼ pʌsʌyob i ñaʼtʌbal joʼtiquil xchʼocob? (Mateo 25:​6-10).

⁶ Ti ili lajiya Jesús tsiʼ taja ti tʼan 10 xchʼocob tsaʼ bʌ majli i tajob jiñi novio (Mat. 25:​1-4). Tiʼ pejtelelob yomob ochel ti jiñi boda. Pero Jesús tsiʼ yʌlʌ chaʼan joʼtiquil xchʼocob añob i «ñaʼtʌbal» i jiñi yambʌ joʼtiquilob «maʼañobic i ñaʼtʌbal». Jiñi añoʼ bʌ i ñaʼtʌbal yʌxʌlob i yo yicʼot wen chajpʌbil tsaʼ majliyob chaʼan miʼ pijtañob jiñi novio jiñixto bajcheʼ hora miʼ cʼotel. Jin chaʼan, tsiʼ chʼʌmʌyob majlel i candil, pero chaʼan maʼañic miʼ yʌjpel, tsaʼto i parte chʼʌmʌyob majlel yambʌ i yaceitejlel (pejcan Mateo 25:​6-10). Cheʼ bʌ tsaʼ cʼoti jiñi novio, jiñi xchʼocob añoʼ bʌ i ñaʼtʌbal temel tsaʼ ochiyob yicʼot. Lʌcʼʌ lajal mi caj i yujtel tiʼ tojlel jiñi ungidojob. Mi xucʼul miʼ yajñelob i chʌn yʌxʌlob i yo cʼʌlʌl miʼ tilel jiñi novio, Jesucristo, mi caj i yochel yicʼotob tiʼ Yumʌntel (Apoc. 7:​1-3). b ¿Ixcu jiñi joʼtiquil xchʼocob maʼañobic i ñaʼtʌbal?

7. ¿Chuqui tsaʼ ujti tiʼ tojlel jiñi xchʼocob maʼañobic bʌ i ñaʼtʌbal, i chucoch?

⁷ Jiñi joʼtiquil xchʼocob maʼañobic i bʌ i ñaʼtʌbal, mach chajpʌbilobic cheʼ bʌ tsaʼ cʼoti jiñi novio. Cheʼ bʌ tsiʼ yubiyob chaʼan muqʼuix caj i cʼotel jiñi novio, tsiʼ qʼueleyob  chaʼan wolix i yʌjpel jiñi candil. I come maʼañic tsiʼ chʼʌmʌyob majlel yambʌ i yaceite, tsaʼto majli i mʌñob. Jin chaʼan, cheʼ bʌ tsaʼ cʼoti jiñi novio maʼañic yaʼañobi. Cheʼ jiñi, «jiñi xchʼocob chajpʌbiloʼ bʌ tsaʼ ochiyob yicʼot yaʼ ti otot chaʼan bʌ ñujpuñel, i tsaʼ ñujpʼi jiñi i tiʼ otot» (Mat. 25:10). Cheʼ bʌ jiñi yambʌ joʼtiquilob tsaʼ cʼotiyob tsaʼix ñujpʼi jiñi puerta, tsaʼto i lon cʼajtiyob chaʼan miʼ yotsʌntelob, pero jiñi novio tiʼ subeyob: «Mach j cʌñʌyeticla» (Mat. 25:​11, 12). Maʼañic tsiʼ chajpayob i bʌ chaʼan miʼ pijtañob jiñi novio jiñixto bajcheʼ hora miʼ cʼotel. ¿Chuqui miʼ pʌsbeñob jiñi ungidojob ili lajiya?

8, 9. ¿Chuqui miʼ pʌsben jiñi ungidojob jiñi lajiya chaʼan jiñi 10 xchʼocob? (Qʼuele jaʼel jiñi foto tac).

⁸ Pʌsʌ chaʼan chajpʌbilet yicʼot chaʼan yʌxʌlʌch a wo. Jesús mach wolic i yʌl chaʼan jiñi ungidojob tʼoxbilob ti chaʼpʼejl grupo: Chaʼan an jumpʼejl grupo chajpʌbiloʼ bʌ yicʼot mach bʌ cheʼiqui. Woli bʌ i yʌl jiñʌch chaʼan mi jiñi ungidojob mach chajpʌbilobic chaʼan miʼ cuchob cʼʌlʌl tiʼ yujtibal, maʼañic mi caj i yʌqʼuentelob jiñi i majtan (Juan 14:​3, 4). ¡Iliyi mach alasic! Mach yʌlʌyic mi joñonla woli lac pijtan chumtʌl wʌʼ ti Pañimil o mi chaʼan mi lac majlel ti panchan, yomʌch mi lac wen chʼʌm ti ñuc jiñi ticʼojel muʼ bʌ lac taj ti ili lajiya chaʼan jiñi 10 xchʼocob. Yom wen yʌxʌl la co yicʼot chajpʌbilonla chaʼan mi lac lʌtʼ cʼʌlʌl tiʼ yujtibal (Mat. 24:13).

⁹ Tsaʼix laj qʼuele chaʼan yom bʌ i pʌs Jesús ti jiñi lajiya chaʼan jiñi 10 xchʼocob, jiñʌch chaʼan ñuc i cʼʌjñibal cheʼ yom chajpʌbilonla yicʼot yʌxʌl la co. Cheʼ jiñi tsiʼ taja ti tʼan jiñi lajiya chaʼan bʌ talento tac, i tsiʼ pʌsʌ chaʼan yom la cujil eʼtel.

JIÑI TALENTO TAC

10. ¿Bajcheʼ tsiʼ pʌsʌyob chaʼan xucʼulobʌch jiñi chaʼtiquil xʼeʼtelob? (Mateo 25:​19-23).

¹⁰ Jesús tsiʼ taja ti tʼan chaʼtiquil xʼeʼtelob xucʼuloʼ bʌ i juntiquil mach cheʼiqui (Mat. 25:​14-18). Cheʼ bʌ jiñi i yum muqʼuix caj  i majlel ti yambʌ tejclum tsiʼ yʌqʼueyob cʌytʌl talento tac. Jiñi chaʼtiquil xʼeʼtelob tsiʼ pʌsʌyob chaʼan xucʼulobʌch i chaʼan mi caj i chaʼleñob eʼtel chaʼan miʼ tajob yambʌ taqʼuin, pero jiñi yambʌ maʼañic. Cheʼ bʌ tsaʼ cʼoti jiñi i yum, jiñi chaʼtiquil xʼeʼtelob tsaʼix i tajayob yambʌ taqʼuin. Jin chaʼan, jiñi i yum tiʼ subeyob ti jujuntiquil: «Laʼ, i taja a tijicñʌyel a wicʼot a yum» (pejcan Mateo 25:​19-23). ¿I chuqui tsiʼ mele jiñi yambʌ xʼeʼtel?

11. ¿Chuqui tsiʼ mele jiñi tsʼub bʌ xʼeʼtel, i chuqui tsaʼ ujti tiʼ tojlel?

¹¹ Jiñi tsaʼ bʌ aqʼuenti jumpʼejl talento tsiʼ pʌsʌ chaʼan «tsʼub bʌ xʼeʼtel». Jiñi i yum tsiʼ pijta chaʼan miʼ cʼʌn ti eʼtel, pero mach cheʼic tsiʼ mele, tsiʼ piqui lum i tsiʼ mucu. Cheʼ bʌ tsaʼ cʼoti jiñi i yum tsaʼ jach i chaʼ sutqʼuibe, maʼañic tsiʼ cʼajti chaʼan miʼ ñusʌbentel cheʼ maʼañic tsiʼ taja yambʌ talento. Tsiʼ pʌsʌ chaʼan mach weñic i melbal (chaʼlibal) i tsiʼ yʌlʌ chaʼan jiñi i yum ti eʼtel ñumeñix ti pʼis chuqui miʼ cʼajtin. Jiñi i yum tsiʼ chʼʌmʌ jiñi talento i tsiʼ choco loqʼuel jiñi wiñic (Mat. 25:​24, 26-30).

12. ¿Bajcheʼ miʼ lajintelob jiñi ungidojob?

¹² Jiñi ungidojob miʼ lajintelob bajcheʼ jiñi chaʼtiquil xʼeʼtelob. Jin chaʼan, Jesús miʼ subeñob ti jujuntiquil: «Laʼ, i taja a tijicñʌyel a wicʼot a yum». Ili jiñʌch cheʼ mi caj i yʌqʼuentelob jiñi i majtan yaʼ ti panchan, jiñi ñaxam bʌ chaʼ chʼojyel (Mat. 25:​21, 23; Apoc. 20:5a). Jiñi ejemplo chaʼan jiñi tsʼub bʌ xʼeʼtel jumpʼejlʌch ticʼojel chaʼan jiñi ungidojob. Laʼ laj qʼuel chucoch.

13, 14. ¿Chuqui miʼ pʌsbeñob jiñi ungidojob jiñi lajiya chaʼan bʌ talento tac? (Qʼuele jaʼel jiñi foto tac).

¹³ Pʌsʌ chaʼan maʼ mulan eʼtel. Ti jiñi lajiya chaʼan jiñi talento tac, Jesús maʼañic woliʼ yʌl chaʼan jiñi ungidojob mi caj i tsʼubʼañob. Lajal bajcheʼ ti jiñi lajiya tsaʼ bʌ i yʌlʌ chaʼan jiñi 10 xchʼocob, woli jach i ticʼob. Woliʼ pʌsbeñob chuqui miʼ mejlel ti ujtel mi tiʼ sʌtʌyob i tijicñʌyel ti jiñi eʼtel, maʼañic mi caj i pʌjyelob chaʼan miʼ majlelob ti panchan (2 Ped. 1:10).

 ¹⁴ Jesús wen tsiquil tsiʼ pʌsbe jiñi ungidojob ti jiñi lajiya chaʼan jiñi 10 xchʼocob yicʼot jiñi talento tac chaʼan yom chajpʌbilob yicʼot wen yʌxʌlob i yo, i miʼ bej chaʼleñob eʼtel. Pero mach cojach jiñi, ti Mateo 24:​40, 41, Jesús an chuqui yambʌ tsiʼ pʌsbe jiñi ungidojob. Laʼ laj qʼuel.

MAJQUI «MI CAJ I PɅJYEL MAJLEL»

15, 16. Cheʼ bajcheʼ miʼ yʌl Mateo 24:​40, 41, ¿chucoch yom chʌn yʌxʌlob i yo jiñi ungidojob?

¹⁵ Cheʼ bʌ Jesús maxto i yʌlʌ jiñi uxpʼejl lajiya tsiʼ taja ti tʼan chaʼtiquil wiñicob woliyoʼ bʌ ti eʼtel tiʼ lum yicʼot chaʼtiquil xʼixicob woliyoʼ bʌ ti juchʼbal. Tiʼ chaʼticlel jiñi wiñicob laj bʌ eʼtel woliʼ melob, i cheʼʌch jaʼel jiñi chaʼtiquil xʼixicob. Pero Jesús tsiʼ yʌlʌ: «Juntiquil mi caj i pʌjyel majlel, i jiñi yambʌ mi caj i cʌjyel» (pejcan Mateo 24:​40, 41). I yaʼ ti yambʌ versículo tiʼ sube jiñi xcʌntʼañob: «Yom chʌn yʌxʌl laʼ wo come mach laʼ wujilic chuqui ti qʼuin mi caj i tilel laʼ Yum» (Mat. 24:42). Jesús lʌcʼʌ lajal tsiʼ yʌlʌ jaʼel cheʼ bʌ wolix i yujtel i yʌl jiñi lajiya chaʼan bʌ jiñi 10 xchʼocob (Mat. 25:13). Jin chaʼan, jiñi tsaʼ bʌ i yʌlʌ tiʼ tojlel jiñi chaʼtiquil wiñicob yicʼot jiñi chaʼtiquil xʼixicob, lajal jach i sujmlel yilal. Jesús woliʼ tsictesan chaʼan mi caj i cʼotel i yorajlel chaʼan mi caj i qʼuejlel majqui jiñi ungidojob muʼ bʌ caj i pʌjyelob majlel. Cojach jiñi mero ungido bʌ i chʌn xucʼul miʼ yajñel «mi caj i pʌjyel majlel», yom i yʌl, chaʼan mi caj i majlel yicʼot Jesús ti panchan chaʼan miʼ chaʼlen yumʌntel (Juan 14:3).

¹⁶ Pʌsʌ chaʼan yʌxʌl a wo. Mi juntiquil ungido mach yʌxʌlic i yo, maʼañic mi caj i tempan i bʌ yicʼot jiñi «yajcʌbiloʼ bʌ» (Mat. 24:31). Pero jiñi muʼ bʌ caj lac chumtʌl ila ti Pañimil yomʌch mi lac jacʼ jaʼel jiñi ticʼojel tsaʼ bʌ i yʌlʌ Jesús, yom xucʼul mi la cajñel yicʼot chʌn yʌxʌl la co.

17. ¿Chucoch maʼañic mi lac pensarin cheʼ Jehová anto i bej yajca yambʌ ungidojob ili ora?

¹⁷ Wen laj cʌñʌyix Jehová, la cujil chaʼan wen pejtelel chuqui miʼ mel. Jin chaʼan, maʼañic mi lac pensarin mi ili ora an wolito bʌ i yajcan bajcheʼ ungido. c Lajal miʼ yujtel bajcheʼ jiñi lajiya tsaʼ bʌ i yʌlʌ Jesús tiʼ tojlel jiñi xʼeʼtelob wiʼilix bʌ tsiʼ techeyob eʼtel, junlajal tsiʼ chʼʌmʌyob i tojol cheʼ bajcheʼ jiñi yambʌ xʼeʼtelob ñaxam bʌ tsiʼ techeyob (Mat. 20:​1-16). Pejtelel jiñi ungidojob xucʼuloʼ bʌ jaʼel junlajal mi caj i chʼʌmob i majtan, mach yʌlʌyic mi wiʼilix tsaʼ yajcʌntiyob.

JACʼɅ JIÑI TICʼOJEL

18, 19. ¿Chuqui tac tsaʼ laj cʌñʌ ti ili estudio?

¹⁸ ¿Chuqui tsaʼ laj qʼuele ti ili estudio? Chaʼan jiñi lajiya chaʼan jiñi tiñʌmeʼ yicʼot chivo miʼ pʌs chaʼan jiñi woli bʌ i pijtañob chumtʌl wʌʼ ti Pañimil yomʌch chʌn xucʼul miʼ yajñelob ili ora yicʼot ti jiñi ñuc bʌ wocol. Cheʼ bʌ miʼ cʼotel jiñi qʼuin, Jesús mi caj i yʌl majquiyob jiñi xucʼuloʼ bʌ muʼ bʌ caj i «tajob i cuxtʌlel maʼañic bʌ i jilibal» (Mat. 25:46).

¹⁹ Tsaʼix laj qʼuele jiñi chaʼpʼejl lajiya tsaʼ bʌ i cʼʌñʌ Jesús chaʼan miʼ yʌqʼuen ticʼojel jiñi ungidojob. Ti jiñi lajiya chaʼan bʌ jiñi 10 xchʼocob, an joʼtiquilob tsaʼ bʌ i chajpayob i bʌ yicʼot yʌxʌloʼ bʌ i yo. Tsiʼ cʼʌñʌyob i ñaʼtʌbal i chajpʌbil tsaʼ majliyob chaʼan miʼ pijtañob jiñi novio jinto bajcheʼ hora miʼ cʼotel. Pero jiñi yambʌ joʼtiquilob maʼañobic bʌ i ñaʼtʌbal maʼañic tsiʼ chajpayob  i bʌ, jin chaʼan cheʼ bʌ tsaʼ cʼoti jiñi novio maʼañic tsaʼ otsʌntiyob ti jiñi boda. ¿Chuqui mi laj cʌn? Chaʼan yom chajpʌbilonla chaʼan mi lac pijtan jinto baʼ ora miʼ tilel Jesús chaʼan miʼ jisan ili jontol bʌ pañimil (mulawil). Ti jiñi lajiya chaʼan bʌ jiñi talento tac tsaʼ laj qʼuele chaʼan an chaʼtiquil wen yomoʼ bʌ eʼtel. Xucʼul tsiʼ pijtayob jiñi i yum i tsiʼ chaʼleyob wersa chaʼan miʼ chaʼleñob eʼtel. Jin chaʼan utsʼat tsaʼ qʼuejliyob, pero jiñi tsʼub bʌ xʼeʼtel tsaʼ chojqui loqʼuel. ¿Chuqui mi laj cʌn? Chaʼan yom mi lac chʌn melben i yeʼtel Jehová cʼʌlʌl tiʼ yujtibal. I cojix bʌ, tsaʼ laj qʼuele chaʼan Jesús tsiʼ pʌsʌ chaʼan jiñi ungidojob yomʌch chʌn yʌxʌlob i yo jinto miʼ pʌjyelob majlel ti panchan. Wen yomob chaʼan muqʼuix i tempʌntelob yicʼot Jesús. Jin chaʼan, cheʼ bʌ miʼ yujtel jiñi Armagedón, jiñi ungidojob muʼ bʌ i lajintelob bajcheʼ jiñi novia mi caj i ñujpuñelob yicʼot Jesús, «jiñi Tiñʌmeʼ» (2 Tes. 2:1; Apoc. 19:9).

20. ¿Chuqui mi caj i mel Jehová mi mucʼʌch lac jacʼ jiñi ticʼojel tac?

²⁰ Tsʼitaʼ jax yom chaʼan Jesús miʼ chaʼlen meloñel, pero mach lac chaʼlen bʌqʼuen. Mi xucʼuloñʌchla, Jehová mi caj i yʌqʼueñonla lac pʼʌtʌlel mach bʌ añic miʼ mejlel i taj jiñi lac piʼʌlob chaʼan mi lac «mejlel ti waʼtʌl tiʼ tojlel jiñi i Yalobil wiñic» (2 Cor. 4:7; Luc. 21:36). Jin chaʼan, mach yʌlʌyic mi yaʼ mi lac pijtan chumtʌl ti panchan o mi wʌʼ ti Pañimil, laʼ lac jacʼ jiñi i ticʼojel Jesús muʼ bʌ lac taj ti jiñi lajiya tac. Mi cheʼʌch mi lac mel, jiñi lac Tat am bʌ ti panchan utsʼat mi caj i qʼuelonla, i chaʼan i yutslel i pusicʼal mi caj i tsʼijbun laj cʼabaʼ yaʼ ti libro chaʼan bʌ laj cuxtʌlel (Dn. 12:1; Apoc. 3:5).