Mach lac ñaʼtan chaʼan jiñi 70 xcʌntʼañob tsiʼ cʌyʌyob Jesús o chaʼan mach weñic tsaʼ qʼuejliyob ti Jehová. Ti jimbʌ qʼuin Jesús yom jach ajñel yicʼot jiñi apóstolob.

Jesús utsʼat tsiʼ qʼuele jiñi 12 yicʼot jiñi yambʌ setentajob. Ñaxan tsiʼ yajca jiñi 12 wiñicob tsaʼ bʌ i subeyob bajcheʼ apóstolob (Luc. 6:​12-16). Cheʼ bʌ yaʼañob ti Galilea «tsiʼ tempa jiñi 12» i «tsiʼ chocoyob majlel chaʼan miʼ subob jiñi i Yumʌntel Dios yicʼot chaʼan miʼ tsʼʌcañob jiñi cʼamoʼ bʌ» (Luc. 9:​1-6). Ti wiʼil, cheʼ yaʼañob ti Judea, «tsiʼ yajca yambʌ 70 xcʌntʼañob i tsiʼ ñaxan chocoyob majlel ti chaʼchaʼtiquil» (Luc. 9:51; 10:1). Tsiquil chaʼan baqui jach miʼ majlelob ti subtʼan miʼ loqʼuel tsijib xñoptʼañob.

Jiñi judíojob muʼ bʌ i tsajcayob Jesús mucʼʌch i bej melob jiñi Pascua ti jujumpʼejl jab, tajol yicʼotob jach i familia (Éx. 12:​6-11, 17-20). Cheʼ bʌ Jesús muʼto caj i chʌmel, tsaʼ majli ti Jerusalén yicʼot jiñi apóstolob. Pero maʼañic tsiʼ luʼ subeyob jiñi xcʌntʼañob añoʼ bʌ ti Judea, ti Galilea yicʼot ti Perea chaʼan miʼ majlel yicʼotob chaʼan temel miʼ melob jiñi Pascua. Tajol ti jimbʌ ora Jesús jin jach yom ajñel yicʼot jiñi apóstolob. Jin chaʼan tiʼ subeyob: «Wen com j cʼux quicʼotetla ili Pascua cheʼ bʌ maxto tejchi jiñi c wocol. . .» (Luc. 22:15).

¿Chucoch Jesús yom ajñel yicʼot jiñi apóstolob? Jesús mi caj i chʌmel bajcheʼ «jiñi i Tiñʌmeʼ Dios muʼ bʌ i jisan mulil ti pañimil» (Juan 1:29). Ili tsaʼ ujti ti Jerusalén, baqui jiñi israelitajob miʼ yʌqʼueñob tsʌnsʌbil bʌ i majtan Dios. Cheʼ bʌ jiñi israelitajob miʼ cʼuxob jiñi tiñʌmeʼ chaʼan bʌ Pascua tsiʼ cʼajtesʌbeyob bajcheʼ Jehová tsiʼ coltayob loqʼuel ti Egipto. Pero jiñi i cuxtʌlel Jesús ñumen wento come miʼ locʼsan pejtelel jiñi wiñicob xʼixicob ti mulil yicʼot ti chʌmel (1 Cor. 5:​7, 8). Jiñi i cuxtʌlel Jesús tsiʼ yʌcʼʌ chaʼan jiñi 12 apóstolob miʼ sujtelob ti jiñi xajlel ñumen ñuc bʌ i cʼʌjñibal yaʼ ti congregación (Efes. 2:​20-22). Jin chaʼan, jiñi Biblia miʼ yʌl chaʼan jiñi i cʼʌclib jiñi chʼujul bʌ tejclum Jerusalén jiñʌch jiñi 12 xajlel, «i yaʼ tsʼijbubilob i cʼabaʼ jiñi 12 i yapóstolob jiñi Tiñʌmeʼ» (Apoc. 21:​10-14). Tsiquil chaʼan jiñi apóstolob mi caj i melob jumpʼejl ñuc bʌ eʼtel chaʼan miʼ tsʼʌctiyel ñaʼtʌbil bʌ i chaʼan Jehová. Jin chaʼan, Jesús yaʼʌch yom ajñel yicʼotob ti jiñi cojix bʌ Pascua yicʼot cheʼ miʼ mel jiñi Cena yicʼotob.

Jiñi 70 xcʌntʼañob yicʼot pejtelel jiñi yambʌyob, mach yaʼic tsaʼ ajñiyob yicʼot Jesús ti jimbʌ ora. Pero tsaʼʌch i tajayob i wenlel jaʼel pejtelel jiñi xucʼul bʌ tsaʼ ajñiyob. ¿Chucoch? Come jiñi ungidojob tsaʼʌch ochiyob jaʼel ti jiñi trato chaʼan bʌ yumʌntel tsaʼ bʌ i taja ti tʼan Jesús ti jimbʌ acʼʌlel (Luc. 22:​29, 30).