Jiñi xpejcaya juñob miʼ cʼajtibeñob i bʌ

Jiñi Biblia miʼ yʌl chaʼan mach yomic mi lac chʼʌm chʼichʼ. Pero ¿bajcheʼ yilal miʼ qʼuelob jiñi i testigojob Jehová cheʼ jiñi doctorob an bajcheʼ miʼ cʼʌñob lac chʼichʼel chaʼan miʼ tsʼʌcañoñobla?

Juntiquil xñoptʼan mach jin jach yom miʼ chʼʌm ti ñuc chuqui miʼ yʌl jiñi doctorob o muʼ bʌ i yʌlob yambʌlob, yomʌch miʼ qʼuel jaʼel chuqui miʼ yʌl jiñi Biblia, come yaʼʌch cʌyʌl bajcheʼ an yicʼot Jehová.

Jehová jiñʌch tsaʼ bʌ i meleyonla i miʼ subeñonla chaʼan mach yomic mi laj cʼux chʼichʼ (Génesis 9:3, 4). Jin chaʼan tiʼ sube jiñi israelitajob bajcheʼ jach yom miʼ cʼʌñob jiñi chʼichʼ: «I cuxtʌlel jini alʌcʼʌl an tiʼ chʼichʼel. Tsaʼix cʌqʼueyet chaʼan maʼ tsijcan yaʼ ti pulʌntib chaʼan i ñusʌntel laʼ mul tiʼ qʼuexol i cuxtʌlel». Ixcu mi tiʼ tsʌnsayob juncojt añimal chaʼan miʼ cʼuxob, ¿chuqui yom miʼ tumbeñob i chʼichʼel? Dios tsiʼ yʌlʌ: «Wersa mi caj i becʼbeñob i chʼichʼel ti lum cheʼ miʼ tsʌnsañob» * (Levítico 17:11, 13). Ili mandar mach junyajl jach tsaʼ ajqʼui (Deuteronomio 12:16, 24; 15:23). Jumpʼejl libro i chaʼan jiñi judíojob miʼ yʌl: «Jiñi chʼichʼ mach yomic miʼ lojtel, yom miʼ bejqʼuel ti lum i maʼañic miʼ cʼuxtʌl» (The Soncino Chumash). Mi juntiquilic israelita yom miʼ cʼʌn cheʼ bajcheʼ yom o miʼ lotben i chʼichʼel jiñi añimal tac, come jiñi i cuxtʌlel tilem ti Dios.

Anquese jiñi Mandar tsaʼ bʌ aqʼuenti Moisés tsaʼ qʼuextʌyi cheʼ bʌ tsaʼ chʌmi jiñi Mesías, Dios bej chʼujul miʼ qʼuel jiñi chʼichʼ. Tiʼ coltaya jiñi chʼujul bʌ espíritu jiñi apóstolob tiʼ subeyob jiñi xñoptʼañob chaʼan yom miʼ ticʼob i bʌ ti jiñi chʼichʼ. Iliyi yomʌch miʼ wen qʼuelob ti ñuc, come mi maʼañic miʼ jacʼob lajal bajcheʼ woliʼ melob tsʼiʼlel o woliʼ chʼujutesañob melbil jach bʌ dios tac (Hechos 15:28, 29; 21:25). Ti jiñi siglo veinte jiñi doctorob tsaʼ caji i wen cʼʌñob jiñi chʼichʼ chaʼan miʼ yotsʌbeñob jiñi cʼamoʼ bʌ, pero jiñi i testigojob Jehová tsiʼ chʼʌmbeyob i sujm chaʼan iliyi an tiʼ contra muʼ bʌ i yʌl Jehová. *

An i tajol jiñi doctor miʼ subeñonla chaʼan yom miʼ tʼox locʼ lac chʼichʼel cheʼ bʌ anto yom chaʼpʼej uxpʼejl semana chaʼan mi lac melbentel jumpʼejl operación (donación autóloga preoperatoria) chaʼan mi tsaʼ cʼʌjñibʌyi cheʼ bʌ wolix lac melbentel jiñi operación mi lac chaʼ otsʌbentel. Pero cheʼ mi lac tʼox locʼsʌbentel lac chʼichʼel, miʼ lojtel i ti wiʼil mi lac chaʼ otsʌbentel, an tiʼ contra muʼ bʌ i yʌl Levítico yicʼot Deuteronomio. Jiñi chʼichʼ mach yomic miʼ lojtel, yomʌch miʼ bejqʼuel, lajalʌch bajcheʼ mi lac chaʼ sutqʼuiben Dios. I sujmʌch, mach chʌn chuculoñixla ti jiñi Mandar tsaʼ bʌ aqʼuenti Moisés, pero jiñi i testigojonbʌlon Jehová mic ticʼ lon c bʌ chaʼan jiñi chʼichʼ come mij qʼuel lojon ti ñuc jiñi principio tac am bʌ ti Biblia. Jin chaʼan, maʼañic mij cʌcʼ lon chʼichʼ mi muqʼuic cʌcʼ lojon ti lojtel chaʼan mic chaʼ otsʌbentel lojon ti wiʼil come yomʌch miʼ bejqʼuel. Mic jacʼ lojon muʼ bʌ i yʌl Dios.

An yambʌ bajcheʼ tac miʼ cʼʌjñel jiñi lac chʼichʼel, i jiñi Biblia maʼañic miʼ yʌl chaʼan mach weñic. An xñoptʼañob muʼ bʌ i melob jiñi análisis de sangre come jiñi chʼichʼ muʼ bʌ i tsʼitaʼ locʼsʌbentelob mucʼ jach i chojquel cheʼ bʌ miʼ yujtel ti cʼʌjñel. Pero an tac yambʌ bajcheʼ miʼ mejlelob i cʼʌn lac chʼichʼel jiñi doctorob.

Junchajp jiñʌch jiñi hemodilución. Ili jiñʌch cheʼ miʼ tʼox locʼsʌntel lac chʼichʼel i miʼ ñusʌntel ti jumpʼejl máquina, i cheʼ jaʼel mi la cotsʌbentel jumpʼejl tsʼac lajal bʌ bajcheʼ jaʼ chaʼan miʼ yocʼan jiñi lac chʼichʼel. Cheʼ bʌ miʼ yujtel jiñi operación mi lac chaʼ otsʌbentel jiñi lac chʼichʼel. Yambʌ jiñʌch jiñi recuperación de sangre. Cheʼ bʌ woli lac tsejpel, miʼ tempʌntel jiñi lac chʼichʼel muʼ bʌ i loqʼuel, miʼ sʌqʼuesʌntel i mi lac chaʼ otsʌbentel. An i tajol, jiñi lac chʼichʼel miʼ ñusʌntel ti jumpʼejl máquina i wentʌlel bʌ jiñi lac pusicʼal, lac pulmón o lac riñón. Cheʼ jiñi mi lac chaʼ otsʌbentel ti lac bʌcʼtal. Cheʼ jaʼel, an máquina tac cʌmbil bʌ bajcheʼ centrifugador baqui miʼ locʼsʌbentel i bibiʼlel jiñi lac chʼichʼel, o chaʼan jach miʼ tʼoxob ti chajp ti chajp am bʌ i chaʼan jiñi lac chʼichʼel chaʼan miʼ yotsañob baqui anto chuqui yom yaʼ ti lac bʌcʼtal. Cheʼ jaʼel, jiñi doctorob tajol miʼ tsʼitaʼ chʼʌmob lac chʼichʼel, miʼ yotsʌbeñob jumpʼejl tsʼac, i cheʼ jiñi miʼ chaʼ otsañob ti lac bʌcʼtal chaʼan miʼ qʼuelob bajcheʼ yilal.

Jiñi doctorob mach junchajpic jach chuqui miʼ mejlel i melob, o tajol muʼto i cʼotel i ñaʼtañob yambʌ tsijib tratamiento o yambʌ chuqui tac muʼ bʌ mejlel i coltañonla. Maʼañic majqui an tiʼ wenta chaʼan miʼ subeñonla chuqui yom mi lac mel ti jujunchajp. Jujuntiquil yom mi lac ñaʼtan chuqui mi caj i tumbentel jiñi lac chʼichʼel cheʼ bʌ mi caj lac melbentel jumpʼejl operación, jumpʼejl estudio médico o terapia. Yom mi lac wʌn cʼajtiben jiñi doctor o muʼ bʌ caj i mel jiñi análisis chuqui mi caj i melbentel jiñi lac chʼichʼel. I yom mi lac chʼʌm ti ñuc chuqui miʼ subeñonla jiñi laj conciencia (qʼuele jiñi recuadro).

Jiñi xñoptʼan yom miʼ cʼajtesan cheʼ bʌ tiʼ sube Dios chaʼan mi caj i yʌqʼuen i cuxtʌlel chaʼan miʼ melben i yeʼtel i chaʼan mi caj i cʼuxbin tiʼ pejtelel i pusicʼal, tiʼ pejtelel i cuxtʌlel, tiʼ pejtelel i pʼʌtʌlel yicʼot tiʼ pejtelel i ñaʼtʌbal (Lucas 10:27). Jiñi i testigojob Jeho­vá miʼ wen qʼuelob ti ñuc cheʼ wen miʼ yajñelob yicʼot Dios. Jiñi tsaʼ bʌ i Meleyonla miʼ subeñonla chaʼan yom mi lac ñop tiʼ cuxtʌlel Jesús. Jiñi i Tʼan miʼ subeñonla: «Tiʼ tojlelʌch [Jesucristo] tsaʼ lac taja jiñi i tojol laj coltʌntel chaʼan i chʼichʼel, cheʼʌchi, jiñi i ñusʌntel lac mul, come cabʌlʌch jiñi ñuc bʌ i yutslel Dios» (Efesios 1:7).

[Nota tac]

[Recuadro yicʼot foto tac]

MUʼ BɅ MEJLEL LAJ CʼAJTIBEN LAC BɅ

Cheʼ muqʼuic i tʼox locʼsañob c chʼichʼel o miʼ jumucʼ waʼchocoñob chaʼan maʼañic miʼ chaʼlen ajñel tic bʌcʼtal, ¿muʼ ba caj i subeñon jiñi j conciencia chaʼan chʌn c chʼichʼelto jiñi, i mach cʼʌñʌlic mic «becʼ ti lum»?

Cheʼ bajcheʼ cʌmbil c chaʼan yaʼ ti Biblia, ¿tijicña ba mi caj cubin c bʌ mi tsiʼ chaʼ otsayob jiñi c chʼichʼel tic bʌcʼtal tsaʼix bʌ i cʌn locʼsayob i an chuqui tsiʼ melbeyob?