Jiñi xpejcaya juñob miʼ cʼajtibeñob i bʌ

¿Muʼ ba i chʼʌmob jiñi i testigojob Jehová tsʼitaʼ loqʼuem tac bʌ ti chʼichʼ?

Jiñi i jacʼbal: Maʼañic mi lon c chʼʌm chʼichʼ. Mi lon c ñop chaʼan jiñi i mandar Dios chaʼan bʌ chʼichʼ maʼañic miʼ qʼuextʌyel. Pero mi loqʼuel yambʌ cʼajtiya tac, come ili ora jiñi chʼichʼ miʼ tʼoxtʌl ti chʌnchajp i ti jujunchajp añʌch chuqui miʼ chaʼ tsʼitaʼ locʼbeñob. Cheʼ bʌ juntiquil xñoptʼan woliʼ ñaʼtan miʼ mucʼʌch caj i chʼʌm, mach jiñic jach yom miʼ ñaʼtan chuqui ti wenlel mi caj i taj o chuqui ti wocol. Yomʌch miʼ ñaʼtan jaʼel chuqui miʼ yʌl jiñi Biblia yicʼot miʼ maʼañic mi caj i ticʼlan bajcheʼ an yicʼot Dios.

Wen tsiquil muʼ bʌ i yʌl jiñi Biblia. Chaʼan mi lac ñaʼtan laʼ laj qʼuel chuqui miʼ yʌl, chuqui ujtem yicʼot chuqui miʼ yʌl jiñi doctorob.

Jehová Dios tiʼ sube Noé chaʼan yom miʼ qʼuejlel ti ñuc jiñi chʼichʼ (Génesis 9:3, 4). Jiñi mandar tsaʼ bʌ i yʌqʼue Dios jiñi israelitajob miʼ pʌs chaʼan chʼujulʌch jiñi chʼichʼ: «Cheʼ jaʼel mi an majqui miʼ cʼux jini chʼichʼ, mi israel mi ñajt bʌ chʼoyolob, mi caj c choc loqʼuel ti tejclum». Jiñi israelitajob maʼañic bʌ miʼ jacʼbeñob i mandar Dios miʼ mejlel i ticʼlan yambʌlob, jin chaʼan Dios tsiʼ yʌlʌ chaʼan mi caj i chocob loqʼuel tiʼ tejclum (Levítico 17:10). Ti jumpʼejl tempa bʌ tsaʼ bʌ mejli ti Jerusalén, jiñi apóstolob yicʼot ancianojob tsiʼ yʌlʌyob chaʼan yom mi lac ticʼ lac bʌ ti chʼichʼ. Cheʼ mi laj cʼux chʼichʼ, lajalʌch bajcheʼ woli lac mel tsʼiʼlel yicʼot lac chʼujutesan jiñi melbil tac jach bʌ dios, jin chaʼan ñuc i cʼʌjñibal cheʼ mi lac ticʼ lac bʌ (Hechos 15:28, 29).

¿Bajcheʼ tsiʼ tiqʼuiyob i bʌ ti chʼichʼ wajali? Jiñi xñoptʼañob maʼañic miʼ cʼuxob chʼichʼ miʼ muqʼuic i japob, i maʼañic miʼ cʼuxob weʼel o bʌlñʌcʼʌl am bʌ i chʼichʼel bajcheʼ jiñi moronga. Mi tsiʼ meleyob bajcheʼ jiñi woliʼ ñusʌbeñob ti pʼis jiñi i mandar Dios (1 Samuel 14:32, 33).

An lac piʼʌlob ti wajali mach bʌ lecojic tsiʼ qʼueleyob cheʼ miʼ cʼuxob jiñi chʼichʼ, cheʼʌch tiʼ tsʼijbu Tertuliano. Tsiʼ yʌlʌ chaʼan yaʼ ti Roma an lac piʼʌlob muʼ bʌ i japob chʼichʼ chaʼan miʼ melob jumpʼejl trato. Cheʼ jaʼel tsiʼ yʌlʌ: «An añoʼ bʌ i chaʼan epilepsia ti ora miʼ majlelob i japbeñob i chʼichʼel jiñi muʼ bʌ i tsʌnsʌntelob yaʼ ti circo chaʼan miʼ lajmelob i cʼamʌjel».

Jiñi xñoptʼañob mach weñic miʼ qʼuelob anquese jiñi romanojob tsaʼ caji i cʼʌñob chaʼan miʼ tsʼʌcañob i cʼamʌjel. Chaʼan miʼ jacʼ jiñi lot tac woli bʌ i yʌjlel tiʼ tojlel jiñi xñoptʼañob, Tertuliano tiʼ tsʼijbu: «Mi muqʼuic jax j cʼuxben lojon i chʼichʼel jiñi añimal tac». Jiñi romanojob miʼ yʌcʼob bʌlñʌcʼʌl tac am bʌ i chʼichʼel tiʼ tojel i wut jiñi xñoptʼañob chaʼan mi’ qʼuelob mi xucʼulobʌch. Tertuliano tsiʼ yʌlʌ: «Chaʼan mi jiñi xñoptʼañob maʼañic miʼ cʼuxbeñob i chʼichʼel jiñi añimal tac, maʼañic mi lac ñop chaʼan miʼ japbeñob i chʼichʼel jiñi lac piʼʌlob».

Ili ora cabʌl lac piʼʌlob maʼañic miʼ chʼʌmob ti ñuc jiñi i mandar tac Dios cheʼ bʌ jiñi doctorob miʼ yʌlob chaʼan yom miʼ chʼʌmob chʼichʼ. Jiñi i testigojonbʌlon Jehová mach comic lojon chʌmel, pero tsaʼ cʌcʼʌ lon c tʼan chaʼan mi caj lon c jacʼben i mandar Jehová chaʼan bʌ jiñi chʼichʼ. ¿Bajcheʼ miʼ mejlel lac jacʼben i mandar tac Dios chaʼan bʌ jiñi chʼichʼ ti ili ora?

Cheʼ bʌ tsaʼ ñumi jiñi Segunda Guerra Mundial tsaʼ caji ti ñumen cʼʌjñel jiñi chʼichʼ, i jiñi i testigojonbʌlon tsaʼ cʼoti lon c chʼʌmben i sujm chaʼan jiñi an tiʼ contra i mandar Dios, i cheʼʌch mi lon j cʼʌlʌ ñaʼtan. Pero ili ora, jiñi chʼichʼ muqʼuix i tʼoxtʌl ti jiñi chʌnchajp am bʌ i chaʼan: 1) glóbulos rojos, 2) glóbulos blancos, 3) plaqueta i 4) plasma. Jiñi doctorob jin jach miʼ yotsʌbeñob i cʼʌjñibal bʌ i chaʼan jiñi cʼam bʌ. Come jiñi chʼichʼ muqʼuix i mejlel ti tʼoxtʌl, jin chaʼan cabʌlix majqui miʼ mejlel ti aqʼuentel. Jiñi i testigojob Jehová miʼ ñopob chaʼan cheʼ mi lac chʼʌm jiñi mero chʼichʼ o jumpʼejl jiñi chʌnchajp am bʌ i chaʼan woli lac ñusʌben i mandar Dios. Iliyi añʌch i coltayob chaʼan maʼañic miʼ tajob cʼamʌjel tac bajcheʼ jiñi hepatitis yicʼot sida.

Come jiñi chʌnchajp am bʌ i chaʼan jiñi chʼichʼ muʼto i mejlel ti tʼoxtʌl jujunchajp muʼ bʌ i chʌn tilel, mi laj cʼajtiben lac bʌ, ¿bajcheʼ miʼ cʼʌjñel, i chuqui mi caj i coltan juntiquil xñoptʼan chaʼan miʼ ñaʼtan mi mucʼʌch caj i chʼʌm o maʼañic?

Jiñi chʼichʼ cabʌl chuqui an i chaʼan. Jinto jiñi plasma, anquese jaʼ jach yilal, an cabʌl i chaʼan hormona, sales inorgánicas, enzimas, nutrientes, minerales yicʼot azúcar. Cheʼ jaʼel, miʼ chʼʌm tilel proteína tac bajcheʼ albúmina, proteína tac muʼ bʌ i yʌcʼ ti tʌtʼan lac chʼichʼel yicʼot muʼ bʌ i coltañonla chaʼan maʼañic mi laj cʼamʼan, cʌmbil bʌ bajcheʼ anticuerpo. Jiñi doctorob miʼ locʼsañob cabʌl proteína am bʌ i chaʼan jiñi plasma i miʼ cʼʌñob. Jumpʼejl ejemplo, jiñi wen yujiloʼ bʌ loqʼuel i chʼichʼel, miʼ yotsʌbentelob jumpʼejl proteína muʼ bʌ i coltañob chaʼan maʼañix miʼ wen loqʼuelob i chʼichʼel. An lac piʼʌlob muʼ bʌ i wen tajob cʼamʌjel tac, i jiñi doctorob miʼ subeñob chaʼan yom miʼ chʼʌmob jumpʼejl proteína cʌmbil bʌ bajcheʼ gammaglobulina, loqʼuem bʌ ti plasma, ili miʼ coltañob chaʼan maʼañic miʼ wen tajob jiñi cʼamʌjel tac. Jiñi plasma cabʌl proteína an i chaʼan, ili tsaʼix bʌ ujti la cʌl miʼ pʌsbeñonla chaʼan jiñi chʌnchajp am bʌ i chaʼan jiñi chʼichʼ, bajcheʼ jiñi plasma, muʼto i mejlel ti chaʼ bicʼti tʼoxtʌl. *

Cheʼ bajcheʼ jiñi plasma, jiñi yambʌ uxchajp mucʼʌch i mejlel ti chaʼ tsʼitaʼ tʼoxtʌl jaʼel. Jumpʼejl ejemplo, ti jiñi glóbulos blancos miʼ mejlel ti locʼsʌntel interferones yicʼot interleuquinas, muʼ bʌ i cʼʌjñel chaʼan miʼ tsʼʌcʌntel cabʌl cʼamʌjel. Ti jiñi plaqueta miʼ locʼsʌntel muʼ bʌ i cʼʌjñibʌyel chaʼan miʼ tsoyʼan jiñi lac lojweñal. I muʼto caj i loqʼuel yambʌ tsʼac tac mach bʌ añic i chaʼan chʼichʼ, pero mucʼʌch bʌ i chʼʌm tilel jiñi tsʼitaʼ am bʌ i chaʼan jiñi chʌnchajp. ¿Mucʼʌch ba mejlel i chʼʌmob jiñi xñoptʼañob iliyi? Mach mejlic lon cʌl mi mucʼʌch o maʼañic. Jiñi Biblia maʼañic miʼ jamʌ al. Jujuntiquil an tiʼ wenta miʼ ñaʼtan chuqui mi caj i mel cheʼ bajcheʼ miʼ suben i conciencia.

Pero an xñoptʼañob mach bʌ añic miʼ junyajl chʼʌmob jiñi tsʼac tac am bʌ i chaʼan jiñi tsʼitaʼ loqʼuem tac bʌ ti chʼichʼ, anquese tajol mucʼʌch mejlel i tsʼitaʼ coltañob chaʼan maʼañic miʼ tajtʌlob ti cʼamʌjel tac. Miʼ melob bajcheʼ ili come cheʼʌch miʼ chʼʌmbeñob i sujm muʼ bʌ i yʌl jiñi Biblia. Miʼ ñaʼtañob chaʼan yomʌch miʼ bejqʼuel ti lum jiñi chʼichʼ, cheʼ bajcheʼ tsaʼ aqʼuentiyob mandar jiñi israelitajob (Deuteronomio 12:22-24). ¿Chucoch ñucʌch i cʼʌjñibal iliyi? Come chaʼan miʼ mejlel jiñi gammaglobulina yicʼot yan tac bʌ, yomʌch miʼ ñaxan lojtel jiñi chʼichʼ chaʼan miʼ cʼʌjñel. Jin chaʼan, an xñoptʼañob maʼañic bʌ miʼ chʼʌmob cheʼ tac bʌ tsʼac bajcheʼ jiñi, maʼañic miʼ chʼʌmob jiñi ñoj chʼichʼ bʌ mi jiñic jiñi chʌnchajp am bʌ i chaʼan. Yom mi laj qʼuel ti ñuc chuqui miʼ ñaʼtañob i mel cheʼ bajcheʼ miʼ subeñob i conciencia.

An xñoptʼañob qʼuexelʌch bʌ chuqui miʼ ñaʼtañob i mel. Maʼañic miʼ chʼʌmob jiñi mero chʼichʼ bʌ mi jiñic jiñi glóbulos rojos, glóbulos blancos, plaqueta o plasma. Pero mucʼʌch i chʼʌmob jiñi tsʼitaʼ loqʼuem bʌ ti jiñi chʌnchajp. Jujuntiquil miʼ ñaʼtan chuqui mi caj i mel. Tajol juntiquil xñoptʼan miʼ chʼʌm jiñi gammaglobulina, pero maʼañic miʼ chʼʌm jiñi tsʼitaʼ loqʼuem bʌ ti jiñi glóbulos rojos o glóbulos blancos. Jin chaʼan, ¿chuqui mi caj i ñijcan juntiquil xñoptʼan chaʼan miʼ chʼʌm?

Ti jiñi sección «Jiñi xpejcaya juñob miʼ cʼajtibeñob i bʌ» am bʌ ti jiñi La Atalaya 1 chaʼan junio, 1990, tsiʼ yʌlʌ chaʼan jiñi plasma am bʌ i chaʼan jiñi xʼixic an i chaʼan proteína tac muʼ bʌ i ñusʌben tiʼ chʼichʼel jiñi i yalobil cʌntʌbilto bʌ i chaʼan. Cheʼ bajcheʼ iliyi, jiñi alʌl miʼ chʼʌm jiñi inmunoglobulina am bʌ i chaʼan jiñi i ñaʼ, iliyi miʼ coltan chaʼan miʼ pʼʌtʼan i maʼañic miʼ wen cʼamʼan. Cheʼ jaʼel, cheʼ bʌ i glóbulo rojo jiñi alʌl muqʼuix i jilel i cʼʌjñibal, lamital miʼ ñumel tiʼ placenta jiñi i ñaʼ chaʼan jiñix miʼ choc loqʼuel. Come cheʼʌch mi la cujtel ti lac pejtelel bajcheʼ iliyi, tajol jin chaʼan an xñoptʼañob muʼ bʌ i ñaʼtañob chaʼan mucʼʌch i mejlel i chʼʌmob loqʼuem tac bʌ ti jiñi plasma o ti yan tac bʌ.

Come mach junlajalic chuqui miʼ ñaʼtʌntel o i mejlel, ¿yom ba i yʌl jiñi chaʼan mach wen ñuquic i cʼʌjñibal? Maʼañic. Ñucʌch i cʼʌjñibal. Pero tsiquil chaʼan jiñi i testigojob Jehová maʼañic miʼ chʼʌmob jiñi mero chʼichʼʌch bʌ yicʼot jiñi chʌnchajp am bʌ i chaʼan. Jiñi Biblia miʼ yʌl chaʼan jiñi xñoptʼañob yom miʼ ticʼob i bʌ ti chuqui tac aqʼuebil jiñi melbil tac jach bʌ dios, ti chʼichʼ yicʼot ti tsʼiʼlel (Hechos 15:29). Jujuntiquil xñoptʼan an tiʼ wenta chaʼan miʼ ñaʼtan mi mucʼʌch caj i chʼʌm tsʼitaʼ loqʼuem tac bʌ ti jiñi chʌnchajp am bʌ i chaʼan jiñi chʼichʼ, pero yomʌch miʼ ñaxan wen ñaʼtan yicʼot miʼ mel oración.

Cabʌl lac piʼʌlob mach i wentajobic mi mucʼʌch i tajob wocol cheʼ miʼ chʼʌmob jumpʼejl tsʼac come yomob cʼocʼan. Jumpʼejl ejemplo jiñʌch cheʼ miʼ chʼʌmob jiñi chʼichʼ. Pero jiñi xñoptʼañob yujilob chaʼan añʌch chuqui wen ñuc bʌ i cʼʌjñibal, i mach jin jach jiñi i cʼocʼlelob. Jiñi i testigojob Jehová mucʼʌch i sʌclañob chaʼan miʼ tsʼʌcʌntelob ti wen, pero mucʼʌch i ñaxan wen ñaʼtañob mi mucʼʌch caj i chʼʌmob o maʼañic jiñi muʼ bʌ i subentelob ti doctor. Pero cheʼ bʌ miʼ subentelob chaʼan yom miʼ chʼʌmob am bʌ i chaʼan jiñi tsʼitaʼ loqʼuem tac bʌ ti chʼichʼ, miʼ wen ñaʼtañob chuqui miʼ yʌl Dios i bajcheʼ añob yicʼot (Salmo 36:9).

Lajal mi lac ñaʼtan jaʼel cheʼ bajcheʼ tsiʼ yʌlʌ jiñi salmista: «Lac Yum Dios lac Mʌctʌjibʌch, lac Sʌclelʌch. Lac Yum miʼ pʼuntañonla. Miʼ yʌqʼueñonla lac ñuclel. Mux i yʌqʼuentelob chuqui tac utsʼat jini sʌcoʼ bʌ i pusicʼal. I Yumet bʌ Panchan yicʼot Pañimil, tijicña jini xucʼul bʌ i pusicʼal ti a tojlel» (Salmo 84:11, 12).

[Nota]

[Recuadro]

CʼAJTIYA TAC YOM BɅ MIʼ MELBENTEL JIÑI DOCTOROB

Mi mi caj a chaʼlentel ti operar o mi caj a wotsʌbentel tsʼac am bʌ i chaʼan tsʼitaʼ loqʼuem bʌ ti chʼichʼ, cʼajtin:

¿Luʼ yujiloʼ ba jiñi doctorob chaʼan i testigojon Jehová yicʼot chaʼan tsaʼix cʌlʌ chaʼan maʼañic mi caj c chʼʌm chʼichʼ, glóbulos rojos, glóbulos blancos, plaqueta yicʼot plasma?

Mi jiñi tsʼac muʼ bʌ caj a wʌqʼuentel an i chaʼan loqʼuem tac bʌ ti plasma, glóbulos rojos, glóbulos blancos, o plaqueta, cʼajtin:

Mi jiñi tsʼac tsaʼ mejli yicʼot jiñi chʌnchajp am bʌ i chaʼan jiñi chʼichʼ, ¿mejl baʼ wʌl chuqui tac an i chaʼan?

¿Bajcheʼ cʼamel mi caj cʌqʼuentel, i bajcheʼ mi caj c chʼʌm?

Mi mucʼʌch c chʼʌm, ¿chuqui ti wocol miʼ mejlel c taj?

Mi maʼañic miʼ mejlel c chʼʌm mi cubin, ¿am ba yambʌ tsʼac muʼ bʌ c mejlel ti aqʼuentel?

Cheʼ bʌ tsaʼix c ñumen ñaʼta chuqui yom bʌ mic mel, ¿jala miʼ mejlel c subeñet?