Jiñi xpejcaya juñob miʼ cʼajtibeñob i bʌ

¿Majqui woliʼ taj ti tʼan Pablo ti 2 Corintios 6:14 cheʼ bʌ tsiʼ yʌlʌ «mach bʌ xñoptʼañobic»?

Ti 2 Corintios 6:14, miʼ yʌl: «Mach laʼ tem laʼ bʌ laʼ wicʼotob jiñi mach bʌ xñoptʼañobic». Ilayi woli bʌ i taj ti tʼan Pablo jiñʌch jiñi quixtañujob mach bʌ i sujmic xñoptʼañob. Cheʼ bʌ jiñi apóstol Pablo miʼ cʼʌn jiñi tʼan mach bʌ xñoptʼañic o mach bʌ xñoptʼañobic chuculʌch ti yambʌ versículo tac am bʌ yaʼ ti Biblia.

Jumpʼejl ejemplo, Pablo tsiʼ tiqʼui jiñi xñoptʼañob come miʼ pʌyob majlel i yermañujob ti meloñibʌl, «¡tiʼ tojlel mach bʌ xñoptʼañobic!» (1 Corintios 6:6). Woli bʌ i tajtʌl ti tʼan ila jiñʌch añoʼ bʌ i yeʼtel ti meloñibʌl am bʌ ti Corinto. Ti jiñi i chaʼpʼejlel carta tsaʼ bʌ i tsʼijbube majlel Pablo jiñi añoʼ bʌ ti Corinto tsiʼ yʌlʌ chaʼan Satanás tsiʼ mʌctʌbeyob i ñaʼtʌbal jiñi mach bʌ xñoptʼañobic, jin chaʼan maʼañic tsaʼ cʼoti i cʌñob i sujmlel. Ili lac piʼʌlob an i pʌsʌyob chaʼan mach yomobic i melbeñob i yeʼtel Jehová, come ti jiñi ñaxan tac bʌ versículo, Pablo tsiʼ yʌlʌ: «Cheʼ bʌ juntiquil miʼ sujtel baʼan Jehová, miʼ locʼsʌntel jiñi pisil [mosol bʌ i chaʼañob]» (2 Corintios 3:16; 4:4).

An chaʼtiqui uxtiquil lac piʼʌlob muʼ bʌ i chʼujutesañob melbil tac jach bʌ dios (2 Corintios 6:15, 16). Pero iliyob mach tiʼ pejtelelic miʼ contrajiñob i wiñicob Jehová. An muʼ bʌ i pʌsob chaʼan yomʌch i cʌñob i sujmlel. An Testigojob mach bʌ xñoptʼañobic i yijñam o i ñoxiʼal i miʼ ñaʼtañob bej ajñel yicʼotob (1 Corintios 7:12-14; 10:27; 14:22-25; 1 Pedro 3:1, 2). Pablo miʼ wen cʼʌn ili tʼan «mach bʌ xñoptʼañobic» chaʼan miʼ yʌl jiñi mach bʌ ochemobic ti jiñi i sujmlel, jiñi muʼ bʌ i «ñopob lac Yum» (Hechos 2:41; 5:14; 8:12, 13).

Jiñi ticʼojel am bʌ ti 2 Corintios 6:14 ñucʌch i cʼʌjñibal chaʼan jiñi xñoptʼañob cheʼ bʌ an chuqui woliʼ ñaʼtan i melob, i cheʼ jaʼel miʼ wen cʼʌjñel tiʼ tojlel jiñi yomoʼ bʌ ñujpuñel (Mateo 19:4-6). Jiñi xñoptʼan tsaʼix bʌ i yʌcʼʌ i bʌ ti Jehová i tsaʼix bʌ i chʼʌmʌ jaʼ mi caj i cʼʌn i ñaʼtʌbal i maʼañic mi caj i sʌclan i piʼʌl ti jiñi mach bʌ xñoptʼañobic, come jiñi i melbal, jiñi yujil bʌ yicʼot chuqui ñopol bʌ i chaʼan mach lajalic bajcheʼ i chaʼan jiñi mach bʌ xñoptʼañic.

Pero ¿chuqui miʼ yʌjlel tiʼ tojlel jiñi woli jaxto bʌ i chʼʌm estudio i muqʼuix bʌ i yajñel ti tempa bʌ? ¿I chuqui miʼ mejlel la cʌl tiʼ tojlel juntiquil xsubtʼan maxto bʌ i chaʼle chʼʌmjaʼ? ¿Muʼ ba i cʌjñelob jaʼel bajcheʼ mach bʌ xñoptʼañobic? Maʼañic. Jiñi woli bʌ i jacʼob i sujmlel i woliʼ chaʼleñob wersa i lʌcʼtesañob i bʌ ti Jehová chaʼan miʼ cʼotelob ti chʼʌmjaʼ, maʼañic miʼ mejlelob ti cʌjñel bajcheʼ mach bʌ xñoptʼañobic (Romanos 10:10; 2 Corintios 4:13). Cheʼ bʌ Cornelio maxto chʼʌmʌlic i chaʼan jaʼ tsaʼ cʌjñi bajcheʼ juntiquil «wiñic muʼ bʌ i chʼujutesan Dios yicʼot miʼ bʌcʼñan» (Hechos 10:2).

Yaʼ ti 2 Corintios 6:14 maʼañic woliʼ taj ti tʼan jiñi xsubtʼan maxto bʌ chʼʌmʌlic i chaʼan jaʼ, ¿wem ba cheʼ juntiquil xñoptʼan chʼʌmʌlix bʌ i chaʼan jaʼ miʼ ñaʼtan ñujpuñel yicʼot juntiquil maxto bʌ i chaʼle chʼʌmjaʼ? Maʼañic. ¿Chucoch? Jiñi i jacʼbal mi lac taj ti jiñi ticʼojel tsaʼ bʌ i yʌqʼue Pablo jiñi xñoptʼañob mebaʼoʼ bʌ: «Librejix miʼ cʌytʌl chaʼan miʼ ñujpuñel yicʼot majqui jach yom, pero yom miʼ mel ti lac Yum» (1 Corintios 7:39). Cheʼ bajcheʼ miʼ yʌl jiñi ticʼojel, jiñi xñoptʼañob chʼʌmʌlix bʌ i chaʼañob jaʼ yom miʼ ñujpuñelob yicʼot jiñi ochemoʼ bʌ «ti lac Yum».

¿Chuqui yom i yʌl jiñi tʼan «ti lac Yum» i jiñi tʼan «ti Cristo»? Ti Romanos 16:8-10 yicʼot Colosenses 4:7, Pablo woliʼ taj ti tʼan jiñi quixtañujob ochemoʼ bʌ «ti Cristo» o «ti lac Yum». Cheʼ bʌ mi lac pejcan jiñi versículo tac, mi lac taj laj qʼuel chaʼan iliyob jiñobʌch jiñi xcoltayajob, utsʼat bʌ miʼ qʼuejlelob ti Cristo, cʼuxbibil bʌ hermanojob, xucʼuloʼ bʌ xʼeʼtelob yicʼot xyaj eʼtelob.

¿Jalaqui miʼ yochel juntiquil bajcheʼ «xyaj eʼtel ti lac Yum»? Jiñʌch cheʼ miʼ mel ti jumpʼejl i pusicʼal jiñi yom bʌ miʼ mel i maʼañix miʼ mel muʼ bʌ i bajñel mulan. Jesús miʼ yʌl: «Mi an majqui yom i tsajcañon, laʼ i cʌy i bajñel sʌclan i wenlel, laʼ i chʼʌm i teʼ chaʼan bʌ wocol i laʼ i chʌn tsajcañon» (Mateo 16:24). Cheʼ bʌ jiñi quixtañu miʼ yʌcʼ i bʌ ti Dios, miʼ tech i tsajcan Cristo yicʼot i melben i yeʼtel ti tsʼʌcʌl. Cheʼ jiñi miʼ chaʼlen chʼʌmjaʼ i miʼ cʼotel ti cʌjñel bajcheʼ i testigo Jehová. * Jin chaʼan jiñi ñujpuñel «ti lac Yum», yom i yʌl, chaʼan juntiquil Testigo miʼ ñujpuñel yicʼot testigojix bʌ, juntiquil xyaj eʼtel bʌ «i chaʼan Dios yicʼot i chaʼan lac Yum Jesucristo» (Santiago 1:1).

Weñʌch cheʼ bʌ juntiquil lac piʼʌl woliʼ chʼʌm estudio yicʼot i testigojob Jehová yicʼot woliʼ colel majlel tiʼ chaʼan bʌ Dios. Pero maxto i yʌcʼʌ i bʌ ti Jehová i maxto i yʌcʼʌ i cuxtʌlel chaʼan miʼ melben i yeʼtel. Anto chuqui woliʼ mel chaʼan miʼ qʼuextan i cuxtʌlel i anto yambʌ yom bʌ miʼ qʼuextan chaʼan miʼ sujtel bajcheʼ juntiquil Testigo. Jin chaʼan, maxto añic chuqui yambʌ yom miʼ ñaʼtan bajcheʼ jiñi ñujpuñel.

¿Wem ba cheʼ juntiquil testigojix bʌ miʼ tech jumpʼejl noviazgo yicʼot juntiquil woliyʌch bʌ i chaʼlen wersa yilal ti jiñi estudio come miʼ ñaʼtan chaʼan cheʼ bʌ miʼ chʼʌmjaʼ mi caj i mejlelob ti ñujpuñel? Maʼañic. Come mach wen tsiquilic chucoch yom i chaʼlen chʼʌmjaʼ jiñi woli bʌ i chʼʌm estudio mi yujil chaʼan jiñi testigojix bʌ yom ñujpuñel yicʼot, i chaʼan jinto miʼ mejlelob ti ñujpuñel cheʼ bʌ miʼ chaʼlen chʼʌmjaʼ.

Juntiquil estudiante miʼ mejlel ti jumucʼ ajñel bajcheʼ xsubtʼan maxto bʌ chʼʌmʌlic i chaʼan jaʼ jinto miʼ colel majlel tiʼ chaʼan bʌ Dios i miʼ mejlel ti chʼʌmjaʼ. Jin chaʼan, jiñi tʼan ñujpuñel ti lac Yum añʌch i sujmlel. ¿Pero chuqui miʼ yujtel tiʼ tojlel juntiquil añix bʌ i jabilel chaʼan miʼ ñujpuñel i tsaʼ coli ti jumpʼejl familia testigojoʼ bʌ, añix ora an yaʼ ti congregación i muqʼuix i loqʼuel ti subtʼan, pero maxto i chʼʌmʌ jaʼ? Mi cheʼʌch bajcheʼ jiñi, ¿chucoch maxto i yʌcʼʌ i bʌ ti Jehová? ¿Chucoch miʼ bʌcʼñan? Anquese mach ochemic ti jiñi mach bʌ xñoptʼañobic, pero maʼañic «ti lac Yum».

Jiñi i ticʼojel Pablo chaʼan jiñi ñujpuñel chaʼañʌch lac wenlel (Isaías 48:17). Cheʼ bʌ jiñi woli bʌ i ñaʼtañob ñujpuñel tsaʼix i yʌcʼʌyob i bʌ ti Jehová, tsʌtsʌch baqui chucul chuqui woliʼ ñaʼtañob i mel. Lajalob i melbal yicʼot chuqui yomob, i jiñʌch muʼ bʌ caj i coltañob chaʼan wen miʼ yajñelob. Cheʼ jaʼel, cheʼ bʌ mi lac ñujpuñel «ti lac Yum» woli lac pʌs chaʼan xucʼulonla tiʼ tojlel Jehová, i jiñi miʼ yʌcʼ chaʼan mi lac taj bendición tac, come Dios miʼ pʌsben i xucʼtʌlel i pusicʼal jiñi xucʼul bʌ i pusicʼal tiʼ tojlel (Salmo 18:25).

[Nota]

[Foto]

«Maʼ pʌsben i xucʼtilel a pusicʼal jini xucʼul bʌ i pusicʼal»