Laʼ la cʌqʼuen lac bʌ meta tac chaʼan mi la cʌqʼuen i ñuclel Jehová

Juntiquil wiñic romano bʌ wen am bʌ i ñaʼtʌbal tsaʼ bʌ chumle ti jiñi ñaxam bʌ siglo tsiʼ yʌlʌ: «Mi mach a wujilic baqui a wom majlel, maʼañic chuqui mi caj i coltañet». Ili tʼan tac añʌch chuqui miʼ pʌsbeñonla: Chaʼan an i sujmlel laj cuxtʌlel yom mi la cʌqʼuen lac bʌ meta tac.

Yaʼ ti Biblia mi lac taj i yejemplo lac piʼʌlob tsaʼ bʌ yʌqʼueyob i bʌ meta tac. Lʌcʼʌ cincuenta jab, Noé «tsiʼ mele jumpʼejl arca chaʼan miʼ coltan jiñi añoʼ bʌ tiʼ yotot». I jiñi xʼaltʼan Moisés «yaʼan i wut ti jiñi i majtan muʼ bʌ caj i yʌqʼuentel» (Hebreos 11:7, 26). Cheʼ jaʼel, Josué, jiñi tsaʼ bʌ ochi tiʼ qʼuexol Moisés, tsaʼ subenti ti Dios chaʼan miʼ yotsan jiñi israelitajob ti jiñi Lum tsaʼ bʌ wʌn subentiyob (Deuteronomio 3:21, 22, 28; Josué 12:7-24).

Ti jiñi ñaxam bʌ siglo, jiñi tʼan tac tsaʼ bʌ i yʌlʌ Jesús chaʼan «jiñi wen tʼan chaʼan bʌ Yumʌntel mi caj i sujbel tiʼ pejtelel pañimil» jiñʌch tsaʼ bʌ i colta jiñi apóstol Pablo chaʼan miʼ yʌqʼuen i bʌ meta tac (Mateo 24:14). Jesús tsaʼʌch i chʼejlesʌbe i pusicʼal Pablo ti jiñi tsaʼ bʌ i sube yicʼot tiʼ pʌsbe, i cheʼ jaʼel tsiʼ waʼchoco chaʼan miʼ chʼʌmben majlel i cʼabaʼ. Jin chaʼan tsaʼʌch mejli i waʼchocon congregación tac yaʼ ti Asia Menor yicʼot ti Europa (Hechos 9:15; Colosenses 1:23).

Tiʼ sujm, pejtelel i wiñicob Jehová an i yʌqʼueyob i bʌ meta tac i añʌch i yʌqʼueyob i ñuclel Jehová. ¿Bajcheʼ miʼ mejlel la cʌqʼuen lac bʌ meta tac ti chaʼan bʌ Jehová ili ora? ¿Chuqui tac ti meta miʼ mejlel lac yajcan i chuqui tac yom mi lac mel chaʼan mi lac taj?

¿Chuqui miʼ ñijcañonla chaʼan mi lac mel?

An cabʌl bajcheʼ miʼ mejlel la cʌqʼuen lac bʌ meta tac i cabʌl lac piʼʌlob miʼ melob. Pero jiñi i chaʼan tac bʌ Dios mach lajalic bajcheʼ i chaʼan tac bʌ pañimil. Cabʌl lac piʼʌlob miʼ yʌqʼueñob i bʌ meta tac chaʼan miʼ tajob cabʌl taqʼuin yicʼot chaʼan ñuc miʼ qʼuejlelob. I mi jiñʌch la com bʌ lac taj jaʼel, woli lac yajcan mach bʌ weñic. Pero mi jiñi lac meta jiñʌch mi lac melben i yeʼtel Dios, mucʼʌch cajel la cʌqʼuen i ñuclel (Mateo 6:33). Jiñi muʼ bʌ i ñijcañonla lac mel jiñʌch laj cʼuxbiya ti Dios yicʼot tiʼ tojlel lac piʼʌlob i miʼ coltañonla chaʼan xucʼul mi la cajñel ti Dios (Mateo 22:37-39; 1 Timoteo 4:7).

Jin chaʼan cheʼ bʌ mi la cʌqʼuen lac bʌ meta tac ti chaʼan bʌ Dios, yom mi laj qʼuel chaʼan tojʌch jiñi muʼ bʌ i ñijcañonla lac mel. Tiʼ sujm, anquese weñʌch jiñi muʼ bʌ i ñijcañonla lac mel, an i tajol maʼañic miʼ mejlel lac taj jiñi meta tac. ¿Bajcheʼ miʼ mejlel la cʌqʼuen lac bʌ meta mucʼʌch bʌ i mejlel lac taj?

Yom mi lac chaʼlen wersa chaʼan mi lac taj

Laʼ laj qʼuel bajcheʼ tsiʼ mele Jehová cheʼ bʌ tsiʼ mele ili pañimil. Cheʼ bʌ an chuqui miʼ yujtel i mel tsiʼ yʌlʌ: «Tsaʼ icʼa, tsaʼ sʌcʼa» (Génesis 1:5, 8, 13, 19, 23, 31). Ili miʼ pʌs chaʼan cheʼ bʌ an chuqui miʼ tech i mel, yujilʌch jiñi yom bʌ i taj i tiʼ tsʼʌctesa (Apocalipsis 4:11). Job tsiʼ yʌlʌ tiʼ tojlel Jehová: «Maʼanic majch miʼ xoyben i bijlel. Miʼ mel bajcheʼ jach yom i pusicʼal» (Job 23:13). Jehová wen tijicña tsiʼ yubi i bʌ cheʼ bʌ tsiʼ qʼuele pejtelel tsaʼ bʌ i mele i tsaʼʌch i yʌlʌ chaʼan wen utsʼatax (Génesis 1:31).

Ñuc i cʼʌjñibal cheʼ mi lac chaʼlen wersa mi la com chaʼan miʼ tsʼʌctiyel jiñi lac meta. ¿Bajcheʼ miʼ mejlel lac mel jiñi? Anquese ti ñaxan ila ti Pañimil maxto añic chuqui tac an yicʼot maxto weñic chuqui melbil tac, Jehová tsaʼ caji i qʼuel chaʼan wen utsʼatax mi caj i cʌytʌl yicʼot chaʼan mucʼʌch caj i yʌqʼuen i ñuclel. Joñonla jaʼel mi caj i coltañonla mi mucʼʌch lac ñaʼtan cheʼ bʌ tsʼʌctiyemix jiñi lac meta yicʼot jiñi wenlel muʼ bʌ lac taj. Jiñʌch tsaʼ bʌ ujti tiʼ tojlel Tony, diecinueve bʌ i jabilel, maʼañic tsaʼ ñajʌyi i chaʼan bajcheʼ yubil tsiʼ yubi cheʼ bʌ tsiʼ julaʼta jumpʼejl Betel am bʌ ti Europa occidental. Cʼʌlʌl ti jimbʌ ora maʼañic tsiʼ cʌyʌ i ñaʼtan bajcheʼ yubil chumtʌl yicʼot i melben i yeʼtel Jehová yaʼi. Tsaʼʌch i wen chaʼle wersa chaʼan miʼ taj ili meta. I wen tijicña tsiʼ yubi cheʼ bʌ ti wiʼil tsaʼ jacʼbenti jiñi i solicitud chaʼan miʼ chaʼlen eʼtel ti Betel.

Yambʌ muʼ bʌ caj i coltañonla jiñʌch cheʼ an la camigojob tsaʼix bʌ i tajayob jiñi meta la com bʌ lac taj. Jayson, am bʌ 30 i jabilel, maʼañic tsiʼ yubi i tijicñʌyel ti subtʼan cheʼ bʌ xcolelto, pero cheʼ bʌ tsaʼ ujti i qʼueljun tsaʼ ochi bajcheʼ precursor i tsaʼ caji i melben i yeʼtel Jehová tiʼ pejtelel ora. ¿Chuqui tsiʼ colta chaʼan miʼ mulan ochel bajcheʼ precursor? Jayson miʼ yʌl: «Jiñi tsaʼ bʌ i coltayon jiñʌch cheʼ tsaʼ caji c pejcan jiñi hermanojob precursoroʼ bʌ yicʼot cheʼ bʌ tsaʼ cajiyon ti loqʼuel ti subtʼan yicʼotob».

Tsʼijbun baqui bʌ jiñi a meta

Ñuc i cʼʌjñibal cheʼ mi la cʌl jiñi tsaʼix bʌ lac ñaʼta lac mel. Salomón tsiʼ yʌlʌ chaʼan jiñi muʼ tac bʌ la cʌl miʼ mejlel i xicʼonla ti wem bʌ lac melbal (Eclesiastés 12:11). Cheʼ bʌ tsaʼix lac tsʼijbu jiñi la com bʌ lac taj mi caj i coltañonla chaʼan mi lac tsʼʌctesan. Ili miʼ coltañonla lac ñaʼtan chucoch Jehová tiʼ sube jiñi reyob ti Israel chaʼan miʼ tsʼijbuñob jumpʼejl copia i Mandar (Deuteronomio 17:18). Jin chaʼan, wen cheʼ mi lac tsʼijbun baqui bʌ jiñi lac meta i bajcheʼ mi caj lac tsʼʌctesan, yicʼot jumpʼejl lista chaʼan jiñi wocol tajol mejl bʌ lac taj i bajcheʼ mi caj lac mel chaʼan mi lac lʌtʼ. Cheʼ jaʼel, ñuc i cʼʌjñibal cheʼ mi lac ñaʼtan baqui bʌ tema yom mi lac chajpan lac bʌ, chuqui tac jiñi yom bʌ mi laj cʌn yicʼot majquiyob jiñi yom bʌ mi laj cʼajtibeñob i coltaya.

Juntiquil precursor especial i cʼabaʼ Geoffrey, añix bʌ cabʌl jab i chaʼleʼ subtʼan ti jumpʼejl país chaʼan Asia, an i qʼuele chaʼan cheʼ bʌ miʼ yʌqʼuen i bʌ meta tac añʌch i wen colta. Jiñi i yijñam tsaʼ chʌmi, pero ti wiʼil Geoffrey tsaʼ caji i yʌqʼuen i bʌ meta tsaʼ bʌ caji i coltan chaʼan miʼ chaʼlen wersa ti subtʼan. Tiʼ tsʼijbu chaʼan yom i taj uxpʼejl estudio ti jiñi uw i tsiʼ cʼajtibe i coltaya Jehová. Ti jujumpʼejl qʼuin miʼ qʼuel jiñi tsaʼix bʌ i mele i cheʼ bʌ ñumeñix diez qʼuin miʼ qʼuel jiñi tajbilix bʌ i chaʼan. ¿Tsaʼ ba mejli i tsʼʌctesan i meta? Tsaʼʌch, i tsaʼto mejli i taj chʌmpʼejl estudio.

Aqʼuen a bʌ meta tac mach bʌ jalic mejl a tsʼʌctesan

Tajol an meta tac maʼañic bʌ miʼ mejlel a taj maʼ wubin. Tony, tsaʼix bʌ lac taja ti tʼan, tsiʼ ñaʼta chaʼan maʼañic ba ora mi caj i mejlel ti majlel ti Betel come tsiʼ mele mach tac bʌ weñic yicʼot maxto i yʌcʼʌ i bʌ ti Jehová. Pero tsiʼ chaʼle wersa chaʼan miʼ mel cheʼ bajcheʼ miʼ mulan Jehová i cheʼ bajcheʼ jiñi miʼ mejlel i chʼʌmeʼ jaʼ. Cheʼ jiñi tsiʼ ñaʼta ochel bajcheʼ precursor auxiliar i ti wiʼil bajcheʼ precursor regular, jin chaʼan tiʼ tsʼijbu yaʼ ti calendario jalaqui mi caj i tech. Cheʼ bʌ añix bajcheʼ precursor regular tsiʼ qʼuele chaʼan mach wocolix chaʼan miʼ mejlel i tsʼʌctesan i meta chaʼan miʼ majlel ti Betel.

Chaʼan miʼ mejlel lac tsʼʌctesan jumpʼejl meta jal bʌ ti tajol, wen cheʼ mi lac tʼox ti alʌ meta tac mach bʌ wocolic ti tsʼʌctesʌntel, ili miʼ caj i coltañonla laj qʼuel bajcheʼ yilal woli lac majlel. Jiñʌch muʼ bʌ caj i coltañonla chaʼan yaʼ mi lac cʌcʼ lac ñaʼtʌbal ti jiñi la com bʌ lac taj. I cheʼ bʌ mi laj cʼajtiben ti oración Jehová chaʼan miʼ coltañonla ti jiñi lac meta, mi caj lac chaʼlen wersa chaʼan mi lac tsʼʌctesan. Jiñi apóstol Pablo tsiʼ yʌlʌ: «Chʌn chaʼlenla oración» (1 Tesalonicenses 5:17).

Mach yomic mi lac lujbʼan

Anquese mi lac wen chajpan lac bʌ yicʼot mi lac wen chaʼlen wersa, an i tajol maʼañic miʼ mejlel lac tsʼʌctesan jiñi lac meta. Jiñʌch tsaʼ bʌ ujti tiʼ tojlel Juan Marcos cheʼ bʌ jiñi apóstol Pablo maʼañic tsiʼ pʌyʌ majlel ti jiñi i chaʼyajlel i xʌmbal bajcheʼ misionero (Hechos 15:37-40). Marcos añʌch chuqui tsiʼ cʌñʌ ti jimbʌ ora i tsaʼʌch i qʼuexta i meta chaʼan miʼ chʌn melben i yeʼtel Jehová. Ti wiʼil, Pablo tsiʼ yʌlʌ chuqui wem bʌ tiʼ tojlel Marcos, i tsaʼ mejli ti ajñel yicʼot jiñi apóstol Pedro ti Babilonia (2 Timoteo 4:11; 1 Pedro 5:13). Tajol jiñi ñumen ñuc bʌ tsaʼ bʌ i mele jiñʌch cheʼ tiʼ tsʼijbu i juñilel Marcos baqui tsiʼ taja ti tʼan jiñi tsaʼ tac bʌ i ñusa Jesús.

Tajol joñonla jaʼel añʌch chuqui miʼ mʌctañonla chaʼan mi lac tsʼʌctesan jiñi lac meta. Pero mach lujbʼaconla, laʼ laj qʼuel jiñi añix bʌ lac mele yicʼot laʼ laj qʼuel chuqui yom mi lac mel chaʼan mi lac tsʼʌctesan jiñi lac meta. Cheʼ bʌ an chuqui miʼ mʌctañonla, ñuc i cʼʌjñibal mi lac chaʼlen wersa yicʼot maʼañic mi laj lujbʼan. Jiñi rey Salomón tiʼ tsʼijbu: «Acʼʌ tiʼ wenta lac Yum chuqui a wom a mel. Cheʼ jini mux i jolontesan chuqui maʼ ñaʼtan a mel» (Proverbios 16:3).

Tiʼ sujm, tajol añʌch chuqui miʼ mejlel i mʌctañonla lac tsʼʌctesan lac meta, cheʼ bajcheʼ jiñi cʼamʌjel o mi an ti lac wenta laj cʌntan lac familia. Pero mach yomic miʼ ñajʌyel lac chaʼan jiñi la com bʌ: Jiñʌch laj cuxtʌlel mach bʌ añic miʼ jilel, mach yʌlʌyic miʼ woli lac pijtan chumtʌl ila ti pañimil o ti panchan (Lucas 23:43; Filipenses 3:13, 14). ¿Chuqui miʼ coltañonla lac taj? Jiñi apóstol Juan tiʼ tsʼijbu: «Jiñi muʼ bʌ i mel chuqui yom Dios cuxul miʼ yajñel tiʼ pejtelel ora» (1 Juan 2:17). Anquese tiʼ caj jiñi lac wocol tac an meta tac maʼañic bʌ miʼ mejlel lac tsʼʌctesan yom cʼajal lac chaʼan chaʼan ñuc i cʼʌjñibal cheʼ mi lac bʌcʼñan Dios yicʼot mi lac jacʼben i tʼan (Eclesiastés 12:13). Jiñi meta tac miʼ coltañonla chaʼan yaʼ jach an lac ñaʼtʌbal ti melol i yeʼtel Dios. Jin chaʼan, laʼ la cʌqʼuen lac bʌ meta tac yicʼot laʼ lac tsʼʌctesan chaʼan mi la cʌqʼuen i ñuclel Dios.

[Recuadro]

¿Chuqui ti meta mejl a wʌqʼuen a bʌ?

○ Pejcan jiñi Biblia ti jujumpʼejl qʼuin

○ Pejcan jiñi revista Lac Tsictesʌbentel yicʼot ¡Jamʌx a wut!

○ Ñumen weñʼesan bajcheʼ maʼ mel oración

○ Ñumen pʌsʌ jiñi melbalʌl tac muʼ bʌ i yʌcʼ jiñi espíritu

○ Ñumen chaʼlen subtʼan

○ Ñumen weñʼesan bajcheʼ maʼ chaʼlen cʌntesa

○ Ñumen weñʼesan bajcheʼ maʼ chaʼlen subtʼan ti teléfono, ti baqui jach yicʼot ti choñoñibʌl tac