¿Chucoch jiñi xʼixic yom miʼ qʼuel ti ñuc jiñi i ñoxiʼal?
¿Chucoch jiñi xʼixic yom miʼ qʼuel ti ñuc jiñi i ñoxiʼal?
«Jiñi i jol xʼixic jiñʌch jiñi wiñic» (1 COR. 11:3).
1, 2. a) Cheʼ bajcheʼ tsiʼ yʌlʌ Pablo, ¿baqui chucul jujuntiquil? b) ¿Baqui tac bʌ cʼajtiya mi caj lac jacʼ ti ili tema?
JIÑI apóstol Pablo tsiʼ yʌlʌ: «I jol pejtelel wiñic jiñʌch Cristo, [...] i jiñi i jol Cristo jiñʌch Dios», iliyi cheʼʌch tsiʼ waʼchoco Jehová (1 Cor. 11:3). Jesús tijicña tsiʼ jacʼbe i tʼan i Jehová, jiñi i Jol. Cheʼ jaʼel, jiñi wiñic yom miʼ jacʼben i tʼan Jesús. Cheʼ bajcheʼ Jesús tsiʼ pʌsʌ i cʼuxbiya, i yutslel yicʼot i pʼuntaya cheʼʌch yom miʼ mel jaʼel jiñi xñoptʼan tiʼ tojlel yambʌlob, ñumento tiʼ tojlel i yijñam.
2 Cheʼ jaʼel, ¿am ba baqui chucul jiñi xʼixic? Añʌch, Pablo tsiʼ yʌlʌ chaʼan «i jol jiñi xʼixic jiñʌch jiñi wiñic». ¿Bajcheʼ yilal yom miʼ qʼuel ili tʼan tac jiñi xʼixic xñoptʼan bʌ? ¿Muʼ ba mejlel i coltan jaʼel anquese i ñoxiʼal mach xñoptʼañic? ¿Yom ba i yʌl chaʼan jiñi xʼixic maʼañic chuqui yom miʼ yʌl o miʼ mel tiʼ ñujpuñel? ¿I chuqui yom miʼ mel chaʼan wen chuqui miʼ yʌjlel tiʼ tojlel?
«Mi caj c melben juntiquil i yaj coltaya»
3, 4. ¿Chuqui ti wenlel miʼ tajob cheʼ miʼ tsʼʌctesañob i yeʼtel am bʌ tiʼ familia?
3 Dios jiñʌch tsiʼ yʌlʌ majqui yom bʌ an tiʼ wenta i familia. Cheʼ bʌ Jehová tsiʼ mele jiñi wiñic, tsiʼ yʌlʌ: «Mach utsʼatic miʼ yajñel tiʼ bajñelil jini winic. Mi caj c melben i yaj coltaya chaʼan mi yajñel yicʼot». Cheʼ jiñi tsiʼ mele Eva, Adán wen tijicña cheʼ an juntiquil i piʼʌl yicʼot i yaj coltaya, i tsiʼ yʌlʌ: «Jiñʌch c bʌquel loqʼuem bʌ tic bʌquel yicʼot c bʌcʼtal loqʼuem bʌ tic bʌcʼtal» (Gn. 2:18-24). Adán yicʼot Eva i wentʌlel miʼ sujtelob ti toj bʌ tatʌlob chaʼan ti lac pejtelel.
4 Tiʼ caj chaʼan jiñi Adán yicʼot Eva tiʼ ñusʌbeyob i tʼan Jehová, tiʼ sʌtʌyob chaʼan miʼ mejlelob ti chumtʌl tiʼ pejtelel ora yaʼ ti Edén (pejcan Romanos 5:12). Pero maʼañic tsaʼ jili i cʼʌjñibal majqui waʼchocobil bʌ ti jiñi familia, i cʼʌlʌl wʌle majqui jach bʌ xñujpuñel miʼ jacʼ miʼ taj i ñʌchʼtʌlel yicʼot i tijicñʌyel. Jiñi xñujpuñelob lajal añob bajcheʼ Jesús, cheʼ bʌ yaʼan ti panchan chucul tiʼ Tat i «wen contento tiʼ tojlel tiʼ pejtelel ora» (Pr. 8:30). Tiʼ caj jiñi mulil, jiñi wiñic mach mejlic i tojʼesan ti wen jiñi i yijñam, mi jiñic jiñi xʼixic mi caj i mejlel i jacʼ ti toj. Pero mi jujuntiquil miʼ chaʼlen wersa i tsʼʌctesan i yeʼtel tiʼ familia mi caj i mejlel i yubiñob i tijicñʌyel tiʼ ñujpuñel.
5. ¿Chucoch jiñi xñujpuñelob yom miʼ chʼʌmob ti ñuc jiñi ticʼojel am bʌ Romanos 12:10?
5 Chaʼan jiñi ñujpuñemoʼ bʌ tijicña miʼ yajñelob, ñuc i cʼʌjñibal cheʼ miʼ jacʼob jiñi ticʼojel aqʼuebil bʌ jiñi xñoptʼañob: «Yom mi laʼ cʼuxbin laʼ bʌ cheʼ bajcheʼ jiñi añoʼ bʌ ti jumpʼejl familia. Jatetla yom mi laʼ ñaxan qʼuel ti ñuc yambʌlob» (Rom. 12:10). Cheʼ jaʼel, yom miʼ chaʼleñob wersa i jacʼob ili tʼan: «Yom utsetla laʼ wicʼot yambʌlob, pʌsben laʼ bʌ pʼuntaya, i yom mi laʼ ñusʌben laʼ bʌ laʼ mul tiʼ pejtelel laʼ pusicʼal» (Efes. 4:32).
Cheʼ bʌ ti jumpʼejl xñujpuñel an juntiquil mach bʌ xñoptʼañic
6, 7. ¿Chuqui mi caj i taj jiñi ijñamʌl xñoptʼan bʌ mi mucʼʌch i qʼuel ti ñuc jiñi i ñoxiʼal mach bʌ xñoptʼañic?
6 An xñujpuñelob baqui juntiquil mach xñoptʼañic, i lʌcʼʌ tiʼ pejtelel ora jiñʌch jiñi wiñic. ¿Chuqui yom miʼ mel jiñi ijñamʌl xñoptʼan bʌ? Jiñi Biblia miʼ yʌl: «Ijñamʌlob, chucu laʼ bʌ tiʼ tojlel laʼ ñoxiʼal chaʼan mi maʼañic miʼ jacʼben i tʼan Dios miʼ sujtel ti xjacʼtʼan chaʼan laʼ melbal i mach chaʼañic laʼ tʼan, come tsiʼ qʼueleyob jiñi wem bʌ laʼ melbal yicʼot chaʼan mi laʼ qʼuelob ti ñuc» (1 Ped. 3:1, 2).
7 Cheʼ bajcheʼ mi laj qʼuel, jiñi i Tʼan Dios miʼ suben jiñi ijñamʌl xñoptʼan bʌ chaʼan miʼ qʼuel bajcheʼ i jol familia jiñi i ñoxiʼal, anquese mach xñoptʼañic. ¿Chuqui mi caj i taj mi cheʼʌch miʼ mel? Tajol jiñi i ñoxiʼal mi caj i cʼajtiben i bʌ chucoch jiñi i yijñam wen i melbal, mi cajel i mulan i cʌn jiñi i sujmlel i miʼ sujtel ti xñoptʼan.
8, 9. ¿Chuqui miʼ mejlel i mel jiñi ijñamʌl xñoptʼan bʌ mi jiñi i ñoxiʼal maʼañic miʼ jacʼ i sujmlel?
8 Pero, ¿chuqui miʼ yujtel mi jiñi i ñoxiʼal maʼañic miʼ jacʼ jiñi i sujmlel? Jiñi Tsʼijbujel miʼ suben jiñi ijñamʌl chaʼan anquese wocolʌch, laʼ i bej pʌs wen tac bʌ i melbal, bajcheʼ jiñi cʼuxbiya. Ti 1 Corintios 13:4 miʼ yʌl chaʼan jiñi cʼuxbiya yujil «pijt», ili yom i yʌl chaʼan miʼ lʌtʼben i sajtemal yambʌlob. Jin chaʼan, jiñi ijñamʌl yom miʼ bej lʌtʼ majlel jiñi wocol yicʼot cʼuxbiya i yicʼot i pijt, cheʼ jaʼel yom an i pecʼlel yicʼot i yutslel (Efes. 4:2). Wocolix i yʌlʌ jiñi chʼujul bʌ i yespíritu Dios, anquese an i wocol mi caj i mejlel i pʌs i melbal am bʌ i chaʼan juntiquil i wiñic Dios.
9 Pablo tiʼ tsʼijbu: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel» (Filip. 4:13). Cheʼ jaʼel, tiʼ coltaya jiñi chʼujul bʌ espíritu, jiñi ijñamʌl xñoptʼan bʌ miʼ mejlel i lʌtʼ jiñi wocol mach bʌ mejlic i bajñel lʌtʼ miʼ yubin. Jumpʼejl ejemplo, mi jiñi i ñoxiʼal mach weñic miʼ mel tiʼ tojlel, tajol jiñi i yijñam miʼ ñaʼtan i qʼuextʌben jiñi mach bʌ weñic tsaʼ melbenti. Pero jiñi Biblia miʼ subeñonla ti lac pejtelel: «Mach yomic mi laʼ qʼuextan chuqui mach bʌ weñic mi laʼ melbentel [...]. Come tsʼijbubil: «‹Joñon mi caj j qʼuextʌbeñob, joñon mi caj cʌqʼueñob i tojob i mul›, cheʼʌch miʼ yʌl Jehová» (Rom. 12:17-19). Cheʼ jaʼel miʼ yʌl: «Wen qʼuelela chaʼan maʼañic majqui miʼ chaʼ sutqʼuin chuqui miʼ tumbentel. Chaʼlenla wersa laʼ melben laʼ bʌ chuqui wen yicʼot melela tiʼ tojlel yambʌlob» (1 Tes. 5:15). Tiʼ sujm, jiñi chʼujul bʌ espíritu miʼ coltañonla lac mel jiñi mach bʌ mejlic lac bajñel mel, jin chaʼan ñuc i cʼʌjñibal mi laj cʼajtiben Dios.
10. ¿Chuqui tsiʼ mele Jesús tiʼ tojlel jiñi mach bʌ weñic tsiʼ qʼueleyob yicʼot tsaʼ bʌ i subeyob tʼan mach bʌ weñic?
10 Jesús tsiʼ cʌybeyonla wem bʌ ejemplo, laʼ laj qʼuel chuqui tsiʼ mele tiʼ tojlel jiñi mach bʌ weñic tsiʼ qʼueleyob yicʼot tsaʼ bʌ i subeyob mach tac bʌ weñic tʼan. Ti 1 Pedro 2:23 miʼ yʌl: «Cheʼ bʌ woliʼ pʼajob, maʼañic tsaʼ caji ti pʼajoñel jaʼel. Cheʼ bʌ woliʼ ñusan wocol, maʼañic tsaʼ caji ti chʼʌcoñel. Tsiʼ yʌcʼʌ i bʌ tiʼ wenta jiñi toj bʌ miʼ chaʼlen meloñel». Jiñi Biblia miʼ subeñonla chaʼan mi lac lajin Jesús yicʼot chaʼan maʼañic mi laj qʼuextan chuqui mi lac melbentel. Cheʼ jaʼel, miʼ subeñonla chaʼan mi lac pʌs lac pʼuntaya yicʼot lac pecʼlel. I miʼ subeñonla: «Pʌsʌla pʼuntaya yicʼot pecʼlel. Mach laʼ chaʼ sutqʼuin chuqui mach bʌ weñic mi laʼ melbentel» (1 Ped. 3:8, 9).
¿Maʼañic ba chuqui miʼ mejlel i mel yicʼot i yʌl jiñi xʼixic?
11. ¿Chuqui ñuc bʌ i yeʼtel an aqʼuebilob jiñi xʼixicob xñoptʼañoʼ bʌ?
11 Mi jin jiñi wiñic i jol jiñi familia, ¿yom ba i yʌl chaʼan jiñi xʼixic maʼañic chuqui miʼ mejlel i yoque al yicʼot i mel tiʼ familia? Maʼañic, Jehová an i yʌqʼue ñuc bʌ i yeʼtel jiñi wiñic yicʼot jiñi xʼixic. Ili miʼ tsictiyel come ti jiñi 144 mil muʼ bʌ caj i majlelob ti panchan chaʼan miʼ melob i yeʼtel yicʼot Cristo bajcheʼ rey yicʼot sacerdote, ochemob xʼixicob jaʼel (Gál. 3:26-29). Tsiquilʌch chaʼan Jehová tsiʼ yʌqʼue jaʼel jiñi xʼixic ñuc bʌ i yeʼtel tiʼ yorganización.
12, 13. Alʌ jumpʼejl ejemplo muʼ bʌ i pʌs chaʼan ti wajali an xʼixicob tsaʼ bʌ i meleyob bajcheʼ xʼaltʼan.
12 Jumpʼejl ejemplo, yaʼ ti Biblia miʼ yʌl chaʼan ti wajali an xʼixicob tsaʼ bʌ i meleyob bajcheʼ xʼaltʼan. Ti Joel 2:28, 29, Jehová tsiʼ yʌlʌ: «Mi caj c choc tilel quEspíritu tiʼ tojlel pejtel winicob xʼixicob. Laʼ walobilob mi caj i chaʼleñob subtʼan [...]. Mi caj c choc tilel quEspíritu tiʼ tojlel laʼ winicob yicʼot laʼ criadajob».
13 Ti jiñi Pentecostés ti jabil 33, cheʼ bʌ 120 xcʌntʼañob i chaʼan Jesús tsiʼ tempayob i bʌ tiʼ chañelal jumpʼejl otot am bʌ ti Jerusalén, yaʼi añob wiñicob yicʼot xʼixicob, i Jehová tsiʼ choco jubel jiñi i yespíritu tiʼ tojlelob. Jin chaʼan, Pedro tsiʼ cʼʌñʌ jiñi tʼan tsaʼ bʌ i yʌlʌ jiñi xʼaltʼan chaʼan miʼ taj ti tʼan jiñi junmojt lac piʼʌlob. Ili «jiñʌch tsaʼ bʌ i wʌn alʌ jiñi xʼaltʼan Joel: ‹Dios miʼ yʌl: Cheʼ ti cojix tac bʌ qʼuin, mi caj c tʼox aqʼuen quespíritu majqui jach bʌ quixtañujob. Jiñi i yalobilob yicʼot i yixicʼalob mi caj i sujtelob ti xʼaltʼan [...], cheʼto jaʼel, ti jimbʌ qʼuin tac mi caj c tʼox aqʼueñob quespíritu jiñi wiñicob yicʼot xʼixicob caj eʼteloʼ bʌ, i mi caj i sujtelob ti xʼaltʼan» (Hech. 2:16-18).
14. ¿Chuqui ti eʼtel tsiʼ meleyob jiñi xʼixicob ti ñaxam bʌ siglo?
14 Ti jiñi ñaxam bʌ siglo, jiñi xʼixicob cabʌl chuqui tsiʼ meleyob, tsiʼ chaʼleyob subtʼan yicʼot cabʌl chuqui tsiʼ meleyob chaʼan miʼ coltañob jiñi eʼtel (Luc. 8:1-3). Jumpʼejl ejemplo, jiñi apóstol Pablo tsiʼ taja ti tʼan Febe, «juntiquil woli bʌ ti coltaya yaʼ ti congregación am bʌ ti Cencreas». Cheʼ jaʼel, cheʼ bʌ tsiʼ chocbeyob majlel i saludo jiñi xucʼuloʼ bʌ i piʼʌlob ti eʼtel, tsiʼ taja ti tʼan xñoptʼañob bʌ xʼixicoʼ bʌ bajcheʼ «Trifena yicʼot Trifosa, xʼixicob woli bʌ i chaʼleñob wersa chaʼan miʼ melbeñob i yeʼtel lac Yum». Cheʼ jiñi tsiʼ yʌlʌ: «Chaʼlebeñonla ti saludar Pérsida, jiñi cʼuxbibil bʌ lac chaʼan, come wen melbil i chaʼan i yeʼtel lac Yum» (Rom. 16:1, 12).
15. ¿Chuqui ti eʼtel woliʼ melob jiñi xʼixicob ti ili ora?
15 Ili ora yonlel xʼixicob muʼ bʌ i subob ñumel jiñi i chaʼan bʌ i Yumʌntel Dios (Mat. 24:14). Yonlel ili xʼixicob miʼ chaʼleñob subtʼan tiʼ pejtelel ora, misionerajob yicʼot betelitajob. Jiñi tʼan tsaʼ bʌ i yʌlʌ jiñi rey David woliyʌch i tsʼʌctiyel, «Jehová miʼ yʌcʼ i tʼan, jiñi xʼixicob muʼ bʌ subob jiñi wen tʼan lajalob bajcheʼ yonlel soldadojob» (Sal. 68:11, TNM). Cheʼ bajcheʼ mi laj qʼuel, Dios miʼ wen qʼuel ti ñuc jiñi eʼtel muʼ bʌ i mel jiñi xʼixicob cheʼ miʼ subob ñumel jiñi wen tʼan yicʼot chaʼan miʼ tsʼʌctiyel jiñi ñaʼtʌbil bʌ i chaʼan. Cheʼ bʌ añʌch baqui chucul juntiquil xʼixic, mach yomic i yʌl chaʼan maʼañic chuqui miʼ mejlel i mel yicʼot i yʌl.
Chaʼtiquil xʼixicob tsaʼ bʌ i yʌlʌyob chuqui miʼ ñaʼtañob
16, 17. ¿Bajcheʼ tsiʼ pʌsʌ Sara chaʼan jiñi xʼixicob añʌch chuqui miʼ mejlel i mel yicʼot i yʌlob ti jiñi i ñujpuñel?
16 Mi Jehová miʼ yʌqʼuen ñuc tac bʌ i yeʼtel jiñi xʼixicob, ¿mach ba weñʌch cheʼ jiñi wiñic miʼ cʼajtiben i coltaya i yijñam cheʼ bʌ an chuqui ñuc tac bʌ mi caj i mel? Yomʌch miʼ mel, yaʼ ti Tsʼijbujel miʼ tajtʌl ti tʼan xʼixicob tsaʼ bʌ i yʌlʌyob chuqui miʼ ñaʼtañob yicʼot añʌch bʌ chuqui tsiʼ meleyob anquese mach subebilobic tiʼ ñoxiʼal. Laʼ laj qʼuel chaʼpʼejl ejemplo.
17 Sara tsiʼ wen sube Abrahán chaʼan miʼ choc loqʼuel jiñi yambʌ i yijñam i cʼabaʼ Agar yicʼot jiñi i yalobil come maʼañic woliʼ qʼuelob ti ñuc Sara. Anquese «wen chʼijiyem i pusicʼal» Abrahán, Dios qʼuexelʌch chuqui woliʼ ñaʼtan, jin chaʼan tiʼ sube: «Mach a mel a pusicʼal chaʼan ili chʼiton yicʼot ili criada. Mele cheʼ bajcheʼ tsiʼ subeyet Sara» (Gn. 21:8-12). Abrahán tsiʼ jacʼbe i tʼan Jehová i tsiʼ mele cheʼ bajcheʼ tiʼ sube Sara.
18. ¿Baqui ora Abigail maʼañic tsiʼ cʼajtibe i ñoxiʼal cheʼ bʌ an chuqui yom i mel?
18 Wʌle, laʼ la cʌl tiʼ tojlel Abigail, i yijñam Nabal. Cheʼ bʌ David yicʼot i wiñicob woliʼ putsʼtañob jiñi rey Saúl, tsaʼ cʼotiyob tiʼ lum Nabal, baqui tsiʼ cʼajayob i yo i tsaʼto i cʌntʌbeyob i yañimal tac, i maʼañic tsiʼ cʼajtiyob i tojol. Pero jiñi wiñic wen tsʌts i pusicʼal yicʼot jontol. Cheʼ bʌ David tsiʼ choco majlel i wiñicob chaʼan miʼ cʼajtibeñob i bʌl i ñʌcʼ, maʼañic tsiʼ yʌqʼueyob i tsaʼ jach i yʌʼleyob, juntiquilʌch wiñic tonto bʌ i pusicʼal. ¿Chuqui tsiʼ mele Abigail cheʼ bʌ tsiʼ yubi chuqui tsaʼ ujti? Maʼañic chuqui tiʼ sube i ñoxiʼal, ti ora «tsiʼ chʼʌmʌ lujuncʼal caxlan waj yicʼot chaʼpʼejl i yajñib vino melbil bʌ ti pʌchi yicʼot joʼcojt tiñʌmeʼ ticʼanix bʌ yicʼot joʼcujch trigo, yicʼot joʼcʼal ti petsʼ tiquesʌbil bʌ tsʼusub yicʼot lujuncʼal ti petsʼ i wut higuera teʼ tiquinix bʌ», i tsaʼ yʌqʼue David yicʼot jiñi i wiñicob. ¿Wem ba chuqui tsiʼ mele? Tsaʼ bʌ ujti ti wiʼil miʼ pʌs chaʼan weñʌch. Jiñi Biblia miʼ yʌl chaʼan Jehová tsiʼ yʌcʼʌ ti bʌcʼ chʌmel Nabal, i ti wiʼil Abigail tsaʼ ñujpuñi yicʼot David (1 Sam. 25:3, 14-19, 23-25, 38-42).
Jiñi xʼixic muʼ bʌ i sʌclan i cʼuxbintel
19, 20. ¿Chuqui muʼ bʌ i yʌcʼ chaʼan wen chuqui miʼ yʌjlel tiʼ tojlel juntiquil xʼixic?
19 Jiñi Biblia utsʼatax chuqui miʼ yʌl tiʼ tojlel jiñi ijñamʌl muʼ bʌ i tsʼʌctesan yom bʌ Jehová. Yaʼ ti libro chaʼan Proverbios miʼ yʌl utsʼatax bʌ tʼan tiʼ tojlel jiñi wem bʌ xʼixic: «Yom ñumen miʼ cʼuxbintel bajcheʼ perla xajlel letsem bʌ i tojol. Jini i noxiʼal contento miʼ yʌqʼuen i chubʌʼan tiʼ wenta come mux i pʼojlesan. Jini xʼixic utsʼat miʼ coltan i ñoxiʼal tiʼ pejtelel i jabilel. Maʼanic miʼ yʌcʼ ti pʼumpʼun. Tsiquil an cabʌl i pusicʼal cheʼ muʼ ti tʼan. Tsiquil i yutslel i pusicʼal cheʼ miʼ chaʼlen cʌntesa. Miʼ chʌcʌ qʼuel bajcheʼ miʼ melob jini añoʼ bʌ tiʼ yotot. Maʼanic i tsʼuʼlel. Mach toʼol weʼelic jach woli. Cheʼ winicobix i yalobilob utsʼatax miʼ qʼuelob i ñaʼ. I ñoxiʼal jaʼel utsʼatax miʼ qʼuel i yijñam» (Pr. 31:10-12, 26-28).
20 ¿Chuqui muʼ bʌ i yʌcʼ chaʼan wen chuqui miʼ yʌjlel tiʼ tojlel juntiquil xʼixic? Proverbios 31:30 miʼ yʌl: «Anquese i tʼojol jax xʼixic lolom jach i tʼojlʌwel. Mach tiʼ pejtelelic ora an. Jini xʼixic muʼ bʌ i bʌcʼñan lac Yum mi caj i taj i cʼuxbintel ti isujm». Jiñi xʼixic xñoptʼan bʌ muʼ bʌ i bʌcʼñan Dios miʼ qʼuel ti ñuc jiñi am bʌ i yeʼtel tiʼ familia yicʼot ti congregación, jiñi Biblia miʼ yʌl chaʼan «jiñi i jol xʼixic jiñʌch jiñi wiñic i jol pejtelel wiñic jiñʌch Cristo i jiñi i jol Cristo jiñʌch Dios» (1 Cor. 11:3).
Laʼ laj qʼuel ti ñuc jiñi lac majtan am bʌ i yʌqʼueyonla Dios
21, 22. a) ¿Chucoch yomʌch miʼ yʌqʼueyob wocolix i yʌlʌ Dios jiñi ñujpuñemoʼ bʌ? b) ¿Chuqui mi caj i tajob mi mucʼʌch i jacʼob jiñi principio waʼchocobil bʌ i chaʼan Jehová? (Qʼuele jiñi recuadro).
21 Jiñi xñoptʼan ñujpuñemoʼ bʌ miʼ mejlel i yʌqʼueñob wocolix i yʌlʌ Jehová chaʼan jiñi i ñujpuñelob come jumpʼejlob i majtan. Junchajp chucoch yom miʼ melob jin cheʼ temel miʼ mejlelob ti ajñel, pero ñumen ñuc bʌ, jin cheʼ miʼ mejlel i comol melbeñob i yeʼtel Jehová (Rt. 1:9; Mi. 6:8). Tsaʼ bʌ i yʌcʼʌ jiñi ñujpuñel yujil chuqui i cʼʌjñibal i chaʼañob chaʼan wen miʼ yajñelob, jin chaʼan ñuc i cʼʌjñibal cheʼ cheʼʌch miʼ mejlel cheʼ bajcheʼ miʼ yʌl. Cheʼ jiñi «jiñʌch laʼ pʼʌtʌlel cheʼ tijicñayetla ti lac Yum», anquese an wocol tac ili ora (Neh. 8:10).
22 Jiñi wem bʌ ñoxiʼal miʼ cʼuxbin i yijñam cheʼ bajcheʼ miʼ cʼuxbin i bʌ, anquese jiñʌch i jol jiñi familia miʼ pʌs i cʼuxbiya yicʼot miʼ chʼʌm ti ñuc i yijñam. Jiñi ijñamʌl xñoptʼan bʌ, miʼ qʼuel ti ñuc jiñi i ñoxiʼal yicʼot miʼ coltan ti chuqui miʼ mel, cheʼ bajcheʼ jiñi mi caj i ñumen cʼuxbintel. Pero ñumen ñuc bʌ mi caj i yʌqʼueñob i ñuclel Jehová cheʼ weñʌch miʼ yajñelob tiʼ ñujpuñel.
¿Cʼajal baʼ chaʼan?
• ¿Chuqui yom i yʌl jiñi principio tsaʼ bʌ i yʌcʼʌ Jehová chaʼan majqui an tiʼ wenta jiñi familia?
• ¿Chucoch yomʌch miʼ qʼuelob i bʌ ti ñuc jiñi ñujpuñemoʼ bʌ?
• ¿Bajcheʼ yilal yom miʼ mel jiñi ijñamʌl xñoptʼan bʌ tiʼ tojlel i ñoxiʼal anquese mach xñoptʼañic?
• ¿Chucoch jiñi wiñic yomʌch miʼ cʼajtiben chuqui miʼ ñaʼtan i yijñam cheʼ an chuqui ñuc bʌ mi caj i mel?
[Cʼajtiya tac chaʼan estudio]
[Recuadro]
¿Chucoch yom mi laj qʼuel ti ñuc jiñi aqʼuebiloʼ bʌ i yeʼtel?
Jehová waʼchocobil i chaʼan majqui jiñi yom bʌ an i yeʼtel tiʼ pejtelel chuqui melbil i chaʼan, yaʼ ochem jiñi ángelob yicʼot joñonla. Cheʼ bajcheʼ iliyi miʼ coltañob chaʼan wen miʼ melbeñob i yeʼtel Dios i chaʼan temelob (Sal. 133:1).
Jiñi xñoptʼañob yajcʌbiloʼ bʌ chaʼan miʼ majlelob ti panchan yujilob chaʼan jiñi i Jolob jiñʌch Jesucristo (Efes. 1:22, 23). Jesús miʼ wen qʼuel ti ñuc i yeʼtel i Tat, jin chaʼan «mi caj i chuc i bʌ tiʼ tojlel Dios jaʼel, jiñi tsaʼ bʌ i yʌqʼue tiʼ wenta pejtelel chuqui an. Cheʼ bajcheʼ jiñi, cojach Dios mi caj i chaʼlen yumʌntel tiʼ pejtelel chuqui an» (1 Cor. 15:27, 28). Jin chaʼan, weñʌch cheʼ jiñi xñoptʼañob miʼ chaʼleñob wersa i jacʼbeñob i tʼan jiñi am bʌ i yeʼtel ti congregación yicʼot tiʼ familia (1 Cor. 11:3; Heb. 13:17). I cheʼ mucʼʌch i melob utsʼat miʼ qʼuejlelob ti Jehová yicʼot miʼ yʌqʼuentelob bendición (Is. 48:17).
[Foto]
Jiñi oración miʼ coltan jiñi ijñamʌl chaʼan miʼ pʌs wen tac bʌ i melbal tilem bʌ ti Dios
[Foto]
Jehová miʼ wen qʼuel ti ñuc cheʼ bʌ jiñi xʼixicob miʼ chaʼleñob coltaya chaʼan miʼ sujbel jiñi i Yumʌntel Dios