JESÚS tiʼ sube juntiquil wiñic yom bʌ sujtel ti xcʌntʼan i chaʼan: «Cucu ti a wotot. Sujten majlel baqui an a piʼʌlob i subeñob pejtelel tsaʼ bʌ i mele Jehová ti a tojlel yicʼot bajcheʼ tsiʼ pʼuntayet». Tajol ti jimbʌ ora lʌcʼʌl añob ti jiñi tejclum Gadara, am bʌ tiʼ surlel jiñi mar chaʼan Galilea. Jiñi tʼan tac tsaʼ bʌ i yʌlʌ Jesús miʼ pʌs chaʼan i cʌñʌyʌch chaʼan joñonla mi lac mulan lac suben jiñi lac familiajob i cʼʌjñibal bʌ mi la cubin (Mar. 5:19).

Ti ili ora an cultura tac cheʼʌch bʌ woliʼ bej melob majlel i an baqui ñumen tsiquilto miʼ melob. Jin chaʼan, cheʼ bʌ an majqui miʼ sujtel tiʼ wiñic Jehová yom i suben jiñi i familiajob jiñi ñopol bʌ i chaʼan. Pero ¿bajcheʼ miʼ mejlel a mel? ¿Bajcheʼ maʼ mejlel ti cʼotel tiʼ pusicʼal jiñi a familiajob yambʌloʼ bʌ i ñopbal o mach bʌ añic miʼ ñopob Dios? Jiñi Biblia miʼ yʌqʼueñonla wen tac bʌ ticʼojel.

Ti jiñi ñaxam bʌ siglo, Andrés jiñʌch jiñi ñaxam bʌ tsaʼ bʌ i cʌñʌ chaʼan Jesús jiñʌch jiñi Mesías. ¿Majqui tsaʼ majli i suben ti ora? «Ñaxan tsiʼ taja Simón, jiñi i yeran, i tiʼ sube: ‹Tsaʼix lon c taja jiñi Mesías› (yom bʌ i yʌl: Cristo)». Ti wiʼil tsiʼ pʌyʌ majlel Pedro baʼan Jesús, i cheʼ bajcheʼ ili tsaʼ mejli ti sujtel jaʼel ti xcʌntʼan i chaʼan (Juan 1:35-42).

Cheʼ bʌ tsaʼix ñumi 6 jab cheʼ Pedro yaʼan ti Jope ti subenti chaʼan miʼ majlel ti Cesarea, tiʼ yotot Cornelio juntiquil i capitán soldadojob. Cheʼ bʌ Pedro yicʼot jiñi i piʼʌlob tsaʼ cʼotiyob, ¿majqui yaʼañobi? Jiñi relato miʼ yʌl: «Cornelio wolix i pijtañob i tsiʼ tempa i piʼʌlob yicʼot wem bʌ i yamigojob». Cheʼ bajcheʼ ili, Cornelio tsaʼ mejli i coltan jiñi i familia chaʼan miʼ mejlel i ñʌchʼtañob Pedro yicʼot chaʼan miʼ ñaʼtañob chuqui mi caj i melob (Hech. 10:22-33).

¿Chuqui mi laj cʌn tiʼ tojlel Andrés yicʼot Cornelio chaʼan bajcheʼ tsiʼ meleyob tiʼ tojlel i familia?

Añʌch chuqui tsiʼ meleyob tiʼ chaʼticlelob. Andrés tsiʼ colta i yeran chaʼan miʼ cʌn Jesús, i Cornelio tsiʼ tempa i familia chaʼan miʼ mejlel i ñʌchʼtañob Pedro. Pero mi juntiquilic tsiʼ xiqʼui i familia chaʼan miʼ sujtelob ti xñoptʼan. ¿Chuqui miʼ pʌsbeñonla iliyi? ¿Bajcheʼ miʼ mejlel lac lajiñob? Tajol miʼ mejlel lac suben jiñi lac familia junchajp muʼ bʌ i mejlel i mulañob, mi lac sʌclan bajcheʼ tac miʼ mejlel i cʌñob i sujmlel o mi la cʌqʼueñob i cʌn yambʌ Testigojob. Pero tiʼ pejtelel ora yom mi laj cʼajtesan chaʼan librejob chaʼan miʼ yajcañob chuqui yom i melob i mach yomic mi lac xicʼob. Chaʼan mi lac ñaʼtan bajcheʼ miʼ mejlel laj coltañob, laʼ laj qʼuel tiʼ tojlel jumpʼejl xñujpuñel ti Alemania: Jürgen yicʼot Petra.

Petra tsiʼ chaʼle estudio yicʼot jiñi i testigojob Jehová i tsiʼ chʼʌmʌ jaʼ. Jürgen soldado, i ti ñaxan maʼañic tsiʼ mulaj tsaʼ bʌ i mele Petra. Pero ti wiʼil tsiʼ qʼuele chaʼan jiñi i testigojob Jehová mucʼʌch i pʌsob jiñi i sujmlel am bʌ ti Biblia. Jin chaʼan tsiʼ yʌcʼʌ i bʌ jaʼel ti Jehová, i wʌle ancianojix ti congregación. ¿Chuqui yom mi lac mel miʼ yʌl chaʼan mi laj cʼotel tiʼ pusicʼal juntiquil lac familia am bʌ yambʌ i ñopbal?

Jürgen miʼ yʌl: «Mach a ñop a xicʼben i ñopob jiñi muʼ bʌ a ñop, mi yomicto cabʌl chuqui maʼ subeñob. Cheʼ bajcheʼ jiñi mucʼ jach caj i ñajtʼesañob i bʌ ti a tojlel. Ñumen wen cheʼ tsʼitaʼ tsʼitaʼ jach maʼ subeñob majlel jiñi i sujmlel. Coltañob jaʼel chaʼan miʼ cʌñob yambʌ hermanojob lajaloʼ bʌ i jabilel yicʼot o chuqui tac miʼ mulañob. Ili mucʼʌch i mejlel i coltañob».

Jiñi apóstol Pedro yicʼot jiñi i familia Cornelio ti orajach tsiʼ jacʼʌyob jiñi i sujmlel. Pero an yambʌ lac piʼʌlob ti jiñi ñaxam bʌ siglo tsaʼ bʌ ñumen jalʼayob.

Cabʌl i familia Jesús tsaʼʌch i ñopoyob tiʼ tojlel cheʼ bʌ tsiʼ chaʼle subtʼan. Jumpʼejl ejemplo, tajol jiñi apóstol Santiago yicʼot Juan i primojob, i Salomé, i mamá ili chaʼtiquilob, jiñʌch i tía. Cheʼ bajcheʼ mi lac pejcan ti Biblia, tajol yaʼʌch ochem jaʼel ti jiñi «yambʌ xʼixicob muʼ bʌ i cʼʌñob chuqui tac añob i chaʼan chaʼan miʼ cʌntañob» Jesús yicʼot jiñi i yapóstolob (Luc. 8:1-3).

Pero an yambʌ i familia maʼañic bʌ tsiʼ ñopoyob tiʼ tojlel ti ñaxan. Ti jumpʼejl bʌ qʼuin, cheʼ bʌ ñumeñix jumpʼejl jab tsiʼ chʼʌmʌ jaʼ, yonlel lac piʼʌlob tsiʼ tempayob i bʌ ti jumpʼejl otot chaʼan miʼ ñʌchʼtañob. Jiñi relato miʼ yʌl chaʼan «cheʼ bʌ jiñi i familia tsiʼ yubi chuqui woliʼ yujtel, tsiʼ yʌlʌyob: ‹Tsaʼix sojqui›, i tsaʼ majliyob i sʌclan chaʼan miʼ pʌyob sujtel». Ti wiʼil cheʼ bʌ jiñi i yerañob tiʼ subeyob baqui yom miʼ majlel, Jesús maʼañic tsiʼ jamʌ subu baqui mi caj i majlel. ¿Chucoch? Come «tiʼ sujm, jiñi i yerañob maʼañic miʼ pʌsob i ñopoñel tiʼ tojlel» (Mar. 3:21; Juan 7:5).

¿Chuqui mi laj cʌn chaʼan bajcheʼ tsiʼ mele Jesús tiʼ tojlel jiñi i familia? Maʼañic tsaʼ michʼa cheʼ bʌ tsaʼ subenti chaʼan tsaʼix sojqui. Cheʼ bʌ tsaʼix chaʼ chʼojyesʌnti, tsiʼ colta jiñi i familia come tsiʼ pʌsbe i bʌ Santiago, jiñi i yeran. Iliyi tsiʼ colta Santiago yicʼot jiñi yambʌ i yerañob chaʼan miʼ ñopob chaʼan Jesús jiñʌch jiñi Mesías. Ili i yerañob yaʼañob yicʼot jiñi apóstolob yicʼot jiñi yambʌ xucʼul bʌ xñoptʼañob cheʼ bʌ tsiʼ tempayob i bʌ ti jumpʼejl otot yaʼ ti Jerusalén i tsaʼ aqʼuentiyob jaʼel jiñi chʼujul bʌ espíritu. Ti wiʼil Santiago yicʼot Judas, yambʌ i yeran Jesús, tsaʼ aqʼuentiyob tiʼ wenta ñuc tac bʌ eʼtel (Hech. 1:12-14; 2:1-4; 1 Cor. 15:7).

Cheʼ bajcheʼ ti ñaxam bʌ siglo, ili ora an lac familia tac ñumen jalto bʌ miʼ ñaʼtañob mi mucʼʌch caj i jacʼob jiñi i sujmlel. Laʼ laj cʌn tiʼ tojlel Roswitha, católica bʌ cheʼ bʌ jiñi i ñoxiʼal tsaʼ sujti tiʼ testigo Jehová ti 1978. Maʼañic tsiʼ mulaj jiñi tsaʼ bʌ i mele i ñoxiʼal come miʼ wen mulan jiñi i ñopbal. Pero ti wiʼil, tsiʼ qʼuexta jiñi i melbal. Tsiʼ qʼuele chaʼan jiñi i testigojob Jehová miʼ pʌsob jiñi i sujmlel, i tsiʼ chʼʌmʌ jaʼ ti 2003. ¿Chuqui tsiʼ colta? Junchajp jiñʌch cheʼ bʌ tsiʼ qʼuelbe wem bʌ i melbal jiñi i ñoxiʼal: Maʼañic miʼ michʼan cheʼ bʌ miʼ melben mach bʌ weñic, tsaʼʌch i wen colta chaʼan miʼ qʼuextan i melbal. ¿Chuqui ti ticʼojel miʼ yʌcʼ Roswitha? «Cabʌl chuqui miʼ mejlel lac taj cheʼ bʌ mucʼʌch lac wen pʌs lac pijt».

Monika tsiʼ chʼʌmʌ jaʼ ti 1974, i cheʼ bʌ ñumeñix 10 jab jiñi chaʼtiquil i yalobil tsaʼ sujtiyob ti Testigojob jaʼel. Jiñi i ñoxiʼal i cʼabaʼ Hans maʼañic tiʼ tsʼaʼlebeyob jiñi i ñopbal, pero jinto ti 2006 tsiʼ chʼʌmʌ jaʼ. ¿Chuqui ti ticʼojel miʼ yʌcʼob? «Chʌn pʌsʌ a xucʼtilel ti Jehová i mach a cʌy jiñi ñopol bʌ a chaʼan». Yambʌ tsaʼ bʌ i colta Hans jiñʌch cheʼ bʌ jiñi i familia tsiʼ chʌn pʌsbe cʼuxbiya. I tsiʼ chʌn ñaʼtayob chaʼan ti jumpʼejl bʌ qʼuin mucʼʌch caj i yochel tiʼ sujmlel.

Ti jumpʼejl bʌ qʼuin, Jesús tsiʼ laji jiñi i sujmlel bajcheʼ jaʼ muʼ bʌ i yʌcʼ cuxtʌlel mach bʌ añic miʼ jilel (Juan 4:13, 14). La com chaʼan jiñi lac familia miʼ japob ili jaʼ tsʌwan tsʌwam bʌ. Pero mach la comic chaʼan junjajtsʼ jach mi la cʌqʼueñob. Chaʼan miʼ mulañob o maʼañic miʼ mulañob yaʼ cʌyʌl ti bajcheʼ mi lac subeñob jiñi wen tʼan. Jiñi Biblia miʼ yʌl chaʼan «jini toj bʌ miʼ ñaʼtan tiʼ pusicʼal bajcheʼ yom miʼ jacʼ ti wen bʌ tʼan» yicʼot chaʼan «jini muʼ bʌ i chʼʌmben isujm miʼ cʌntan i yej. Wen yujil uts bʌ tʼan». ¿Bajcheʼ miʼ mejlel lac jacʼ ili tʼan tac? (Pr. 15:28; 16:23.)

Jiñi ijñamʌl yom bʌ i yʌqʼuen i cʌn jiñi i ñoxiʼal jiñi ñopol bʌ i chaʼan «miʼ ñaʼtan tiʼ pusicʼal bajcheʼ yom miʼ jacʼ», yom i yʌl chaʼan miʼ ñaʼtan ti wen chuqui mi caj i yʌl i mach ti orajic miʼ chaʼlen tʼan. Mach yomic miʼ pʌs chaʼan ñumen ñuc miʼ qʼuel i bʌ o chaʼan ñumen toj. Cheʼ bajcheʼ jiñi, jiñi i tʼan mi caj i yʌcʼ tijicñʌyel yicʼot ñʌchʼtʌlel. I chaʼan miʼ pʌs chaʼan mucʼʌch «i chʼʌmben isujm» yicʼot «miʼ cʌntan i yej», jiñi ijñamʌl miʼ mejlel i cʼajtiben i bʌ: «¿Baqui ora miʼ mulan i chaʼlen tʼan jiñi c ñoxiʼal? ¿Chuqui tac miʼ mulan i yʌl? ¿Chuqui miʼ mulan i pejcan? ¿Jimba miʼ mulan jiñi ciencia, jiñi política o chaʼan bʌ alas? ¿Chuqui miʼ mejlel c mel chaʼan miʼ mulan i cʌn chaʼan bʌ Biblia i mic pʌsben chaʼan mij qʼuel ti ñuc bajcheʼ yubil miʼ yubin yicʼot chuqui miʼ ñaʼtan?».

Pero chaʼan mi laj cʼotel tiʼ pusicʼal jiñi lac familiajob mach bʌ Testigojobic, mach cojach yom mi lac tsʼitaʼ subeñob majlel jiñi ñopol bʌ lac chaʼan. Yomʌch mi lac mel jiñi muʼ bʌ la cʌl.

Jürgen, tsaʼix bʌ la cʌlʌ ti ñaxan, miʼ yʌl: «Chʌn pʌsʌ ti a cuxtʌlel chaʼan mucʼʌch a jacʼ muʼ bʌ i yʌl jiñi Biblia. Cheʼ bajcheʼ jiñi, jiñi lac familia mach bʌ Testigojic mi caj i qʼuel chaʼan i sujmʌch, anquese maʼañic miʼ jamʌ al». Hans, tsaʼ bʌ i chʼʌmʌ jaʼ cheʼ bʌ añix 30 jab i chʼʌmʌ jaʼ i yijñam, cheʼ miʼ yʌl jaʼel: «Yomʌch mi lac pʌs wem bʌ lac melbal. Jiñi mi caj i coltan jiñi lac familia mach bʌ Testigojic chaʼan miʼ qʼuel bajcheʼ woliʼ coltañonla jiñi i sujmlel». Jiñi lac familia yom miʼ qʼuel chaʼan jiñi muʼ bʌ lac ñop wolʌch i qʼuextañonla, pero chaʼañʌch chuqui wem bʌ, mach chaʼañic chuqui mach bʌ weñic.

Jiñi apóstol Pedro tsiʼ yʌqʼue ili wen tac bʌ ticʼojel jiñi hermanajob mach bʌ xñoptʼañobic i ñoxiʼal: «Ijñamʌlob, chucu laʼ bʌ tiʼ tojlel laʼ ñoxiʼal chaʼan mi maʼañic miʼ jacʼben i tʼan Dios miʼ sujtel ti xjacʼtʼan chaʼan laʼ melbal i mach chaʼañic laʼ tʼan, come tsiʼ qʼueleyob jiñi wem bʌ laʼ melbal yicʼot chaʼan mi laʼ qʼuelob ti ñuc. Mach jiñic yom ti laʼ chʼʌjlib jiñi cʼajpan tsiquil tac bʌ, bajcheʼ jiñi wen jalbil laʼ jol, laʼ chʼʌjlib melbil bʌ ti oro yicʼot wen lets tac bʌ i tojol laʼ pislel. Acʼʌla chaʼan jiñi laʼ wutsʼatlel muʼ bʌ i qʼuejlel jiñʌch am bʌ ti laʼ pusicʼal. Jin chaʼan, jiñi laʼ wutslel yicʼot laʼ ñʌchʼtʌlel jiñʌch yom bʌ ti laʼ chʼʌjlib, ili jiñʌch ñumen ñuc bʌ i cʼʌjñibal miʼ qʼuel Dios, cheʼ jaʼel ili chʼʌjlibʌl maʼañic miʼ jilel» (1 Ped. 3:1-4).

Pedro tsiʼ yʌlʌ chaʼan jiñi ijñamʌl xñoptʼan bʌ miʼ mejlel i pʌs wem bʌ i melbal chaʼan miʼ coltan i ñoxiʼal. Jin chaʼan, juntiquil hermana i cʼabaʼ Christa an i chaʼle wersa chaʼan miʼ cʼotel tiʼ pusicʼal i ñoxiʼal cʼʌlʌl cheʼ bʌ tsiʼ chʼʌmʌ jaʼ ti 1972. Añix i chaʼle estudio yicʼot jiñi Testigojob, pero maxto añic i ñaʼta i melben i yeʼtel Jehová. Ajñemix ti tempa bʌ i weñʌch miʼ pejcan i bʌ yicʼot jiñi hermanojob, i jiñi hermanojob mucʼʌch i qʼuelob ti ñuc chaʼan jin an tiʼ wenta miʼ yajcan chuqui yom miʼ mel. ¿Chuqui miʼ mel Christa chaʼan miʼ cʼotel tiʼ pusicʼal?

Christa miʼ yʌl: «Mucʼʌch caj c bej ajñel ti jiñi bij muʼ bʌ i subeñon Jehová. Pero cheʼ jaʼel, woli c chaʼlen wersa chaʼan mij coltan jiñi c ñoxiʼal tic melbal i mach tic tʼañic jach. Cheʼ bʌ maʼañic miʼ ñusʌntel ti pʼis jumpʼejl principio, mic mel chuqui yom. Pero mucʼʌch j qʼuel ti ñuc chaʼan jiñʌch an tiʼ wenta chaʼan miʼ yajcan chuqui yom i mel i mic laj cʌyben tiʼ wenta Jehová».

Jiñi muʼ bʌ i yʌl Christa miʼ pʌs chaʼan ñuc i cʼʌjñibal chaʼan pʼisbilonla. Anquese mucʼʌch i melben i yeʼtel Dios, bajcheʼ jiñi tempa bʌ yicʼot jiñi subtʼan, mucʼʌch i chʼʌmben i sujm i ñoxiʼal jaʼel. Yujil chaʼan jiñi i ñoxiʼal mucʼʌch i pijtan chaʼan mucʼʌch i pʌsben cʼuxbiya yicʼot chaʼan miʼ yʌqʼuen i tiempo. Ti lac pejtelel yom mi lac chʼʌmbeñob i sujm jiñi lac familia mach bʌ Testigojobic. Jiñi Biblia miʼ yʌl: «Tiʼ pejtelel chuqui mi lac mel añʌch i yorajlel». Ili yom i yʌl chaʼan yomʌch mi lac ñusan tiempo la quicʼotob jiñi lac familia mach bʌ Testigojobic, ñumento la quicʼot jiñi lac ñoxiʼal o la quijñam. Cheʼ bʌ mucʼʌch lac mel iliyi, mi lac ñumen lʌcʼtesan lac bʌ tiʼ tojlelob i qʼuelbil chaʼan jiñi miʼ coltañob chaʼan mach i bajñelic miʼ yubiñob i bʌ, chocbilob o chaʼan maʼañic miʼ michʼañob (Ec. 3:1).

Holger, tsaʼ bʌ i chʼʌmʌ jaʼ i papá cheʼ bʌ añix 20 jab chʼʌmbilob i chaʼan jaʼ jiñi yambʌ i familia, miʼ yʌl: «Ñuc i cʼʌjñibal cheʼ bʌ jiñi lac familia miʼ ñaʼtan chaʼan mucʼʌch laj cʼuxbin yicʼot yomʌch mi lac tajob ti oración». Christa miʼ yʌl: «Mucʼʌch c chʌn ñop chaʼan ti jumpʼejl bʌ qʼuin jiñi c ñoxiʼal mi caj i ñop jiñi i sujmlel yicʼot mi caj i chʼujutesan Jehová». Tiʼ pejtelel ora yomʌch mi lac ñaʼtan chaʼan ti jumpʼejl bʌ qʼuin jiñi lac familia mach bʌ Testigojobic mucʼʌch caj i sujtelob ti xñoptʼan. Yomʌch mi lac chʌn chaʼlen wersa.

Jiñi la com bʌ jiñʌch chaʼan wen mi la cajñel la quicʼot jiñi lac familia, mi la cʌqʼueñob i cʌn jiñi i sujmlel yicʼot chaʼan miʼ cʼotelob tiʼ pusicʼal muʼ bʌ i yʌl jiñi Biblia. Chaʼan mi lac mel jiñi, laʼ lac chʌn pʌs la cutslel yicʼot laʼ lac pʌs chaʼan mucʼʌch laj qʼuelob ti ñuc (1 Ped. 3:15).