Jiñi Biblia tsiʼ qʼuextʌbeyob i pensar

¿CHUQUI tsiʼ ñijca juntiquil rastafari chaʼan miʼ qʼuextan bajcheʼ chumul yicʼot miʼ cʌy i tsʼaʼlen jiñi sʌcoʼ bʌ i pʌchʌlel? ¿Chucoch juntiquil chʼiton wen jontol bʌ tsiʼ cʌyʌ i mel mach tac bʌ weñic tiʼ cuxtʌlel? Laʼ laj qʼuel chuqui miʼ yʌlob.

«Tsaʼ j cʌyʌ c tsʼaʼlen jiñi sʌcoʼ bʌ i pʌchʌlel» (HAFENI NGHAMA)

I JABILEL: 34

PAÍS: ZAMBIA

YAN TAC BɅ: TI WAJALI RASTAFARI

BAJCHEʼ QUILAL TI WAJALI: Tiʼ caj jiñi guerra jiñi c mamá tsaʼ putsʼi loqʼuel ti Namibia i tsaʼ caji i coltan jiñi Organización del Pueblo de África del Suroeste (cʌmbilob jaʼel bajcheʼ SWAPO, ti inglés). Ili guerrillerojob miʼ contrajiñob jiñi yumʌl am bʌ ti Namibia ti jimbʌ ora. Jiñi c mamá tsaʼ cʼoti yaʼ baqui miʼ cʌntʌntel jiñi muʼ bʌ i putsʼelob am bʌ ti Zambia, i yaʼi tsaʼ quila pañimil.

Quince jab tsaʼ ajñiyon ti jiñi ajñibʌl tac i chaʼan bʌ jiñi Organización cʌmbil bʌ bajcheʼ SWAPO. Ili organización miʼ cʌntesañob jiñi xcolelob tiʼ chaʼan tac bʌ política yicʼot chaʼan miʼ tsʼaʼleñob jiñi sʌsʌcoʼ bʌ i pʌchʌlel.

Cheʼ bʌ 11 c jabilel com sujtel ti miembro ti jumpʼejl ñopbalʌl tsaʼ cʌlʌ, jin chaʼan tsaʼ majli c pejcan jiñi pastor am bʌ yaʼ ti iglesia baqui miʼ tempañob i bʌ católicojob, luteranojob, anglicanojob yicʼot yambʌlob. Pero tiʼ subeyon chaʼan mach yomic mic mel. Ili tsiʼ michʼesayon, jin chaʼan tsaʼ sujtiyon ti ateo. Cheʼ bʌ 15 c jabilel, tsaʼ caji j coltan jiñi cʌmbiloʼ bʌ bajcheʼ rastafari muʼ bʌ i yotsañob i bʌ ti política yicʼot ñopbalʌl tac. Tsaʼ c mele come mic mulan jiñi música reggae yicʼot chaʼan mij coltan jiñi iʼicʼoʼ bʌ i pʌchʌlel añoʼ bʌ ti África muʼ bʌ i toʼol ticʼlʌntelob. Tsaʼ caji c xiban c jol cheʼ bajcheʼ miʼ melob jiñi rastafarijob, tsaʼ caji c ñucʼ marihuana, tsaʼ j cʌyʌ j cʼux weʼel yicʼot tsaʼ caji j coltan jiñi iʼicʼoʼ bʌ i pʌchʌlel. Pero maʼañic tsaʼ j qʼuexta j cuxtʌlel i maʼañic tsaʼ cʌyʌ j qʼuel película tac am bʌ i chaʼan cabʌl tsʌnsa. I cheʼ jaʼel mic wen al tsucul tʼan tac.

BAJCHEʼ TSIʼ QʼUEXTA C PENSAR JIÑI BIBLIA: Cheʼ ti 1995, cheʼ bʌ 20 c jabilel, tsaʼ caji c ñaʼtan chuqui mi caj c mel tij cuxtʌlel. Ti jimbʌ ora añix c wen pejca jiñi jun tac muʼ bʌ cʌqʼuentel chaʼan rastafari, i anquese miʼ taj ti tʼan jiñi Biblia, maʼañic miʼ ñijcan c pusicʼal chuqui miʼ yʌl. Jin chaʼan tsaʼ caji c bajñel pejcan.

Juntiquil camigo ochem bʌ jaʼel ti rastafari, tsiʼ yʌqʼueyon jun i chaʼan bʌ i testigojob Jehová. Ti orajach tsaʼ caji c tsajin majlel yicʼot jiñi Biblia. Ti wiʼil tsaʼ c pejca jiñi Testigojob, i tsaʼ caji i ñumen coltañoñob. Pero ti ñaxan tsaʼ j qʼuexta bajcheʼ chumulon cheʼ maxto c teche estudio yicʼotob.

Wocol tsaʼ cubi chaʼan mij cʌy jiñi cʼujts yicʼot lembal (2 Corintios 7:1). Tsaʼ j qʼuexta jiñi c pislel tac, tsaʼ c setʼe i tsutsel c jol, tsaʼ j cʌyʌ j qʼuel película chaʼan tsʌnsa yicʼot pornografía yicʼot tsaʼ j qʼuexta bajcheʼ mic chaʼlen tʼan (Efesios 5:3, 4). Cheʼ jaʼel tsaʼ j cʌyʌ c tsʼaʼlen jiñi sʌsʌcoʼ bʌ i pʌchʌlel (Hechos 10:34, 35). Pero chaʼan miʼ mejlel j cʌy c mel iliyi tsaʼ j cʌyʌ c ñʌchʼtan música muʼ bʌ i taj ti tʼan tsʼaʼleya yicʼot tsaʼ j cʌyʌ c ñochtan camigojob muʼ bʌ i pʌyoñob c mel mach bʌ weñic.

Cheʼ bʌ tsaʼ j cʌyʌ c mel mach tac bʌ weñic, tsaʼ c sʌcla jumpʼejl i Yotlel tempa bʌ i chaʼan i testigojob Jehová. Cheʼ jiñi tsaʼ caji c chʼʌm estudio i tsaʼ c chʼʌmʌ jaʼ. Pero jiñi c familia maʼañic tsiʼ mulaj. Jiñi c mamá tiʼ subeyon chaʼan mic mejlel ti majlel yicʼot yambʌ ñopbalʌl tac, pero chaʼan mach yicʼotic jiñi i testigojob Jehová. Juntiquil tiʼ familia c mamá am bʌ i yeʼtel ti política tsaʼ caji i subeñon chaʼan mach weñic woli bʌ c mel.

Anquese jiñi c familia tiʼ tsʼaʼleyoñob, tsaʼʌch mejli c lʌtʼ come tsaʼ caji c lajiben i ejemplo Jesús yicʼot tsaʼ c jacʼbe i cʌntesa tac. Cheʼ jaʼel, tsaʼ j cʌñʌ chaʼan jiñi i testigojob Jehová jiñʌch jiñi i sujm bʌ ñopbalʌl, come tsaʼ j qʼuele chaʼan jiñi i cʌntesajob loqʼuemʌch ti Biblia. Miʼ subeñob wen tʼan jiñi lac piʼʌlob come miʼ jacʼbeñob i tʼan Dios (Mateo 28:19, 20; Hechos 15:14). I maʼañic miʼ yotsañob i bʌ ti política (Salmo 146:3, 4; Juan 15:17, 18).

WENLEL TAC TAJBIL BɅ C CHAʼAN: An i wen coltayon cheʼ mic jacʼ muʼ bʌ i yʌl jiñi Biblia. Jumpʼejl ejemplo, cheʼ bʌ tsaʼ j cʌyʌ c ñucʼ marihuana, maʼañix tsaʼ toʼol caji c jisan c taqʼuin. Cheʼ jaʼel ñumen xucʼulix c pensar yicʼot cʼoqʼuix mi cubin c bʌ.

Cʼʌlʌl cheʼ bʌ chutonto com c tajben i sujmlel jiñi j cuxtʌlel, i wʌle tsaʼix c taja. Pero jiñi ñumen ñuc bʌ i cʼʌjñibal chaʼañon, jiñʌch cheʼ ñumen lʌcʼʌlix mi cubin c bʌ ti Dios (Santiago 4:8).

«Mach orajix mic michʼan» (MARTINO PEDRETTI)

I JABILEL: 43

PAÍS: AUSTRALIA

YAN TAC BɅ: XTSɅNSA YICʼOT XCHON DROGA TI WAJALI

BAJCHEʼ QUILAL TI WAJALI: Cheʼ bʌ alobonto mach junsujmic jach baqui tsaʼ chumleyon lojon, tsaʼ chumleyon lojon ti alʌ tejclum tac yicʼot ti colem tejclum tac. Wen cʼajalto c chaʼan cheʼ bʌ mic wen ñusan qʼuin quicʼot jiñi c primojob yicʼot c tiojob. Mic majlel lojon ti chuc chʌy, xʌnteʼel yicʼot mi lon c mel eʼtijib tac chaʼan bʌ xʌnteʼel.

Wen jontolon, come jiñi c papá yujil box, tsiʼ cʌntesayon ti jatsʼ cheʼ bʌ alobonto. Cheʼ bʌ xcolelonto tsaʼ caji c wen jap lembal ti cantina tac. Joñon yicʼot camigojob mic wen mulan lojon jatsʼ. Mic chaʼlen lojon jatsʼ yicʼot 20 lac piʼʌlob o ñumento, i mij cʼʌn lojon cuchillo yicʼot teʼ tac.

Chaʼan mic taj taqʼuin mic chon droga yicʼot mercancía tac muʼ bʌ i xujchʼiñob jiñi muʼ bʌ i chaʼleñob eʼtel yaʼ baqui miʼ cʼotel barco tac. Cheʼ jaʼel mic chaʼlen eʼtel yicʼot jiñi i yumoʼ bʌ droga, mic majlel j cʼajtibeñob i bet jiñi lac piʼʌlob i mij cʼʌn pistola chaʼan mi cʌqʼuentel jiñi taqʼuin. Joñon com sujtel ti juntiquil xtsʌnsa tsaʼ cʌlʌ. Jin chaʼan mic wen al: «Mic tsʌnsañob, o jin miʼ tsʌnsañoñob».

BAJCHEʼ TSIʼ QʼUEXTA C PENSAR JIÑI BIBLIA: Cheʼ bʌ alobonto tsaʼ cubi ti alol jiñi i testigojob Jehová. Pero jinto cheʼ ñumeñix ti 20 c jabilel tsaʼ j cʼajtibe c mamá majquiyob jiñi Testigojob. Tsaʼ jaxto ñumi chaʼpʼejl qʼuin i tsiʼ julaʼtayon lojon juntiquil Testigo i cʼabaʼ Dixon. Tsaʼ c wen chaʼle lon tʼan i tsiʼ pʌyʌyon majlel ti jumpʼejl i tempa bʌ. Cʼʌlʌl ti jimbʌ ora maʼañic cʌyʌl c chaʼan jiñi tempa bʌ, i añix ñumen 20 jab. Tsaʼ c wen mulaj cheʼ bʌ jujumpʼejl j cʼajtiya tac miʼ yʌqʼueñob i jacʼbal yicʼot jiñi Biblia.

Tsaʼ cʌntesʌntiyon chaʼan Jehová Dios miʼ qʼuel ti ñuc jiñi lac piʼʌlob, jinto jaʼel jiñi maʼañic bʌ miʼ jacʼbeñob i tʼan (2 Pedro 3:9). Tsaʼ j cʌñʌ jaʼel chaʼan juntiquilʌch Tatʌl muʼ bʌ caj i cʌntañon anquese jiñi yambʌlob maʼañic miʼ melob. ¡Cheʼ jaʼel tsiʼ wen ñuqʼuesa c pusicʼal cheʼ tsaʼ j cʌñʌ chaʼan Dios mi caj i ñusan pejtelel c mul, come tsaʼ j cʌyʌ c mel jiñi mach bʌ weñic! Jiñi texto chaʼan Efesios 4:22-24 tsaʼ wen cʼoti tic pusicʼal. Yaʼi miʼ yʌl chaʼan yom mi laj cʌy jiñi ñoxix bʌ lac melbal i yom mi lac pʌs jiñi tsijiʼ bʌ lac melbal tsaʼ bʌ mejli cheʼ bajcheʼ yom Dios.

Wocol tsaʼ cubi chaʼan mij qʼuextan bajcheʼ chumulon. Mach wocolic mi cubin chaʼan mij cʌy jiñi droga tac, pero cheʼ mic chaʼ tempan c bʌ yicʼot camigojob mic chaʼ yajlel ti jiñi wocol. Tsaʼ cʼoti c ñaʼtan chaʼan maʼañic mi caj i mejlel j qʼuextan c melbal mi tsaʼ c chʌn tsajcayob, jin chaʼan tsaʼ j cʌyʌ c ñochtañob i tsaʼ majliyon ti chumtʌl ti yambʌ tejclum. Tsaʼ c jacʼʌ chaʼan chaʼtiqui uxtiquil camigojob miʼ majlel i cʌyoñob, pero tsaʼ caji i tech i yʌqʼueñoñob marihuana. Tsaʼ c subeyob chaʼan mi caj j cʌy jiñi vicio, i tsaʼ c tʼoxo lon c bʌ cheʼ tsaʼ cʼotiyon lojon tiʼ tiʼ jiñi tejclum. Ti wiʼil tsaʼ cubi chaʼan tsiʼ chaʼleyob xujchʼ ti jumpʼejl banco.

WENLEL TAC TAJBIL BɅ C CHAʼAN: Cheʼ bʌ tsaʼ j cʌyʌ c ñochtan jiñi camigojob mach wocolix tsaʼ j cubi chaʼan mij qʼuextan c melbal. Cheʼ jiñi tsaʼ c chʼʌmʌ jaʼ ti 1989 bajcheʼ Testigo. Ti wiʼil tsiʼ chʼʌmʌ jaʼ jiñi xchʼoc bʌ quijtsʼin, jiñi c papá yicʼot c mamá.

Wʌle añix diecisiete jab ñujpuñemon i añix uxtiquil calobilob. Miʼ mejlel j cʌl chaʼan mach orajix mic michʼan anquese mij cajbentel. Cheʼ jaʼel, tsaʼ j cʌñʌ j cʼuxbin jiñi lac piʼʌlob mach yʌlʌlic baqui chʼoyolob o chuqui ti tʼan yujilob (Apocalipsis 7:9). Maʼañic miʼ ñajʌyel c chaʼan jiñi tʼan tsaʼ bʌ i yʌlʌ Jesús tsaʼ bʌ tsʼʌctiyi tic tojlel: «Mi mucʼʌch laʼ chʌn ajñel tij cʌntesa tac, xcʌntʼañetla c chaʼan tiʼ sujm, mi caj laʼ cʌn jiñi i sujmlel, i jiñi i sujmlel mi caj i yʌqʼuetla ti cojlel» (Juan 8:31, 32).

[Comentario]

Chaʼan mij cʌy c tsʼaʼlen yambʌlob tsaʼ j cʌyʌ c ñʌchʼtan música muʼ bʌ i taj ti tʼan tsʼaʼleya

[Comentario]

Joñon yicʼot camigojob mic wen mulan lojon jatsʼ. Mic chaʼlen lojon jatsʼ yicʼot 20 lac piʼʌlob o ñumento, mij cʼʌn lojon cuchillo yicʼot teʼ tac