CABɅL ñopbalʌl ila ti pañimil an jach baqui yicʼot bajcheʼ ora miʼ melob oración. Pero ¿cheʼ ba miʼ yʌl jiñi Biblia?

I sujmʌch chaʼan mucʼʌch i yʌl baqui ora ñumen wen mi lac mel oración. Jesús tsiʼ yʌqʼue wocolix i yʌlʌ Dios cheʼ muʼto caj i cʼux i waj (Lucas 22:17). Jiñi xcʌntʼañob i chaʼan tsiʼ meleyob oración cheʼ bʌ tsiʼ tempayob i bʌ chaʼan miʼ chʼujutesañob Dios. Pero ili mach tsijibix. Cheʼix miʼ melob tiʼ sinagoga jiñi judíojob yicʼot ti templo yaʼ ti Jerusalén, yom bʌ tsiʼ yʌlʌ Dios jiñʌch chaʼan miʼ sujtel tiʼ «yotlel oración chaʼan pejtelel tejclum tac» (Marcos 11:17).

Dios miʼ mulan chaʼan jiñi i wiñicob miʼ tempañob i bʌ i juntemel miʼ melbeñob oración yicʼot chaʼan cheʼ miʼ melob cheʼ bajcheʼ miʼ yʌl jiñi principio tac am bʌ ti Biblia. Jiñi oración miʼ mejlel i coltañet chaʼan maʼ mel jiñi mach bʌ a bajñel ñaʼtayic a mel (Hebreos 13:18, 19). Jin chaʼan, jiñi i testigojob Jehová miʼ melob oración tiʼ pejtelel i tempabʌjob. Mi jatet a wom a ñʌchʼtan jiñi oración tac maʼ mejlel ti majlel yaʼ tiʼ Yotlel tempa bʌ lʌcʼʌl bʌ an baqui añet, yaʼ baqui miʼ tempañob i bʌ jiñi Testigojob.

Pero jiñi Biblia maʼañic miʼ yʌl mi an jach baqui yom mi lac mel oración yicʼot mi an jach i yorajlel. Miʼ yʌl chaʼan jiñi i wiñicob Dios tsiʼ meleyob oración baqui jach yicʼot bajcheʼ jach ora. Jesús tsiʼ yʌlʌ: «Cheʼ bʌ jatet mi caj a mel oración, ochen ti a cuarto, i cheʼ bʌ tsaʼix a ñupʼu, pejcan jiñi a Tat mucul jach bʌ an. I jiñi a Tat woli bʌ i mucul qʼuelet mi caj i tojbeñet» (Mateo 6:6).

¿Mach ba wen utsʼatic maʼ wubin cheʼ miʼ mejlel a pejcan jiñi Yumʌl bʌ ti panchan yicʼot pañimil i cheʼ a wujil chaʼan mi caj i ñʌchʼtañet, mach yʌlʌyic baqui añet o jala maʼ mel? Ili miʼ pʌs chucoch Jesús tiʼ sʌcla baqui i bajñel jach miʼ yajñel chaʼan miʼ mel oración. Ti jumpʼejl bʌ qʼuin, cheʼ bʌ an chuqui ñuc bʌ i cʼʌjñibal woliʼ ñaʼtan, jumpʼejl acʼʌlel tsiʼ mele oración (Lucas 6:12, 13).

Pero an wiñicob yicʼot xʼixicob xucʼuloʼ bʌ tsaʼ bʌ i cʼajtiyob i coltʌntel ti Dios cheʼ bʌ an chuqui woliʼ ñaʼtañob i mel o cheʼ woliʼ ñusañob jumpʼejl tsʌts bʌ wocol. Ñuc bʌ i cʼʌjñibal jiñʌch cheʼ tsiʼ cʼajtiyob i coltʌntel ti Dios, mach jiñic miʼ ti cʼam bʌ tʼan tsiʼ meleyob o maʼañic, miʼ bajñelob jach o mi yicʼotob yambʌlob. Jehová miʼ subeñonla: «Chʌn chaʼlenla oración» (1 Tesalonicenses 5:17). ¿Mach ba wen utsʼatic? Dios miʼ ñʌchʼtan jiñi i wiñicob, jiñʌch jayajl miʼ melob oración.

Pero cabʌl lac piʼʌlob maʼañic miʼ ñopob chaʼan ñuc i cʼʌjñibal jiñi oración. ¿Am baʼ ñaʼta jaʼel bajcheʼ iliyi?