CABɅL lac piʼʌlob miʼ ñaʼtañob chaʼan jiñi oración maʼañic i cʼʌjñibal. Pero jiñi Biblia mach cheʼic miʼ yʌl (Lucas 22:40; Santiago 5:13). Jiñi oración miʼ mejlel i wen coltañonla, miʼ coltañonla chaʼan mi lac lʌcʼtesan lac bʌ ti Dios yicʼot chaʼan wen mi la cajñel. ¿Bajcheʼ?

Laʼcu lac ñaʼtan cheʼ bʌ jiñi alobob miʼ yʌqʼuentelob i majtan, ¿chuqui miʼ subentelob tiʼ papá i mamá? Chaʼan yom miʼ subeñob wocolix i yʌlʌ jiñi tsaʼ bʌ i yʌqʼueyob i majtan, mach cojach chaʼan yom miʼ qʼuelob ti ñuc. ¿Chucoch ñuc i cʼʌjñibal? Come cheʼ mi lac subeñob wocolix i yʌlʌ, ñumento mi laj qʼuel ti ñuc jiñi tsaʼ bʌ i meleyob. Cheʼʌch miʼ yujtel jaʼel cheʼ mi lac pejcan Dios ti oración. Laʼ laj qʼuel bajcheʼ miʼ coltañonla ili oración tac.

Oración chaʼan mi la cʌqʼuen wocolix i yʌlʌ Dios. Cheʼ mi la cʌqʼuen wocolix i yʌlʌ Dios chaʼan pejtelel chuqui wem bʌ an lac taja, mi lac ñumen acʼ lac pensar ti jiñi bendición tac am bʌ i yʌqʼueyonla. Cheʼ bajcheʼ jiñi, mi lac ñumen qʼuel ti ñuc muʼ bʌ lac melbentel, ñumen tijicñayonla yicʼot wen chuqui mi lac ñaʼtan (Filipenses 4:6).

Ejemplo: Jiñi oración tsaʼ bʌ i mele Jesús chaʼan miʼ yʌqʼuen wocolix i yʌlʌ i Tat cheʼ tsaʼʌch i ñʌchʼta (Juan 11:41).

Oración chaʼan mi laj cʼajtin i ñusʌntel lac mul. Cheʼ mi laj cʼajtiben Dios chaʼan miʼ ñusʌbeñonla lac mul miʼ coltañonla chaʼan mi la cubin i ñʌchʼtʌlel lac pusicʼal. Cheʼ jaʼel, miʼ cʼotel laj cʌn chuquiyes jiñi wem bʌ yicʼot jiñi mach bʌ weñic, mi laj cʌy lac mel jiñi mach bʌ weñic i mi lac chʼʌmben i sujm chucoch ñuc i cʼʌjñibal cheʼ mi lac jacʼben i Tʼan Dios.

Ejemplo: Jiñi oración tsaʼ bʌ i mele David cheʼ bʌ tsiʼ chaʼ ñaʼta i bʌ chaʼan jiñi tsaʼ bʌ i mele (Salmo 51).

Oración chaʼan mi laj cʼajtin laj coltʌntel yicʼot lac ñaʼtʌbal. Miʼ coltañonla lac ñumen pʌs lac pecʼlel, come miʼ cʼajtesʌbeñonla chaʼan pʼisbil jach muʼ bʌ i mejlel lac mel i chaʼan yom mi laj cʼajtiben i coltaya jiñi lac Tat am bʌ ti panchan (Proverbios 3:5, 6).

Ejemplo: Jiñi oración tsaʼ bʌ i mele Salomón cheʼ bʌ tsiʼ cʼajtibe Dios chaʼan miʼ coltan yicʼot miʼ yʌqʼuen i ñaʼtʌbal chaʼan miʼ mejlel i chaʼlen yumʌntel yaʼ ti Israel (1 Reyes 3:5-12).

Oración chaʼan cabʌl chuqui mi lac pensarin. Cheʼ bʌ an chuqui woli lac wen pensarin, yom mi lac suben Dios chuqui jiñi am bʌ ti lac pusicʼal chaʼan mi lac taj lac ñʌchʼtʌlel. I cheʼ mi lac mel bajcheʼ jiñi, mi laj cʌn chaʼan yom mi lac sʌclan laj coltʌntel ti Jehová (Salmo 62:8).

Ejemplo: Jiñi oración tsaʼ bʌ i mele jiñi rey Asá cheʼ woliʼ contrajintel ti jumpʼejl pʼʌtʌl bʌ tejclum (2 Crónicas 14:11).

Oración chaʼan jiñi yomoʼ bʌ coltʌntel. Cheʼ mi lac mel iliyi mach joñon jachla mi lac ñaʼtan lac bʌ, cheʼ jaʼel mi lac pʌs wen tac bʌ lac melbal bajcheʼ jiñi pʼuntaya.

Ejemplo: Jiñi oración tsaʼ bʌ i mele Jesús tiʼ tojlel jiñi xcʌntʼañob i chaʼan (Juan 17:9-17).

Oración chaʼan mi laj cʌqʼuen i ñuclel Dios. Cheʼ mi laj qʼuel ti ñuc Jehová yicʼot mi laj cʼuxbin ñumento mi caj laj cʌqʼuen i ñuclel chaʼan jiñi wen tac bʌ i melbal yicʼot chuqui utsʼatax bʌ melbil tac i chaʼan. Ili oración miʼ ñumen lʌcʼtesañonla ti Dios, jiñi lac Tat am bʌ ti panchan.

Ejemplo: Jiñi oración tsaʼ bʌ i mele David cheʼ tsiʼ yʌqʼue i ñuclel Dios chaʼan jiñi melbil tac bʌ i chaʼan (Salmo 8).

Pero ñumen anto jiñi wenlel tac muʼ bʌ lac taj cheʼ mi lac mel oración, mi lac taj «jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl» (Filipenses 4:7). Tiʼ sujm, cheʼ mi la cubin lac ñʌchʼtʌlel ti ili pañimil, jiñʌch jiñi ñumen ñuc bʌ. ¡Muʼto i coltañonla chaʼan laj cʼocʼlel! (Proverbios 14:30). Pero ¿bajcheʼ mi lac taj jiñi ñʌchʼtʌlel? ¿Cheʼ jach ba mi lac bajñel taj, o an chuqui yom mi lac mel?