Jiñi Biblia tsiʼ qʼuextʌbeyob i pensar

¿CHUCOCH juntiquil xʼixic ñumeñix bʌ ti 60 i jabilel tsiʼ cʌyʌ i chʼujutesan melbil tac jach bʌ dios? ¿Chuqui tsiʼ yʌcʼʌ chaʼan juntiquil sacerdote sintoísta miʼ cʌy jiñi templo, i miʼ sujtel ti xñoptʼan? ¿Chuqui tsiʼ colta juntiquil xʼixic chaʼan maʼañic miʼ yubin i chʼijyemlel cheʼ tsaʼ majtan ajqʼui? Laʼ laj qʼuel chuqui miʼ yʌlob.

«Maʼañix mic chʼujutesan melbil tac jach bʌ dios» (ABA DANSOU)

JABIL CHEʼ TSAʼ CHʼOCʼA: 1938

PAÍS: BENÍN

YAN TAC BɅ: MIʼ WEN MULAN I CHʼUJUTESAN MELBIL TAC JACH BɅ DIOS

BAJCHEʼ QUILAL TI WAJALI: Tsaʼ quila pañimil ti jumpʼejl tejclum i cʼabaʼ So­Tchahoué, lʌcʼʌl bʌ baʼan jaʼ i wen jaʼlumil. Come maʼañic carretera tac, jiñi quixtañujob miʼ cʼʌñob lancha yicʼot cayuco. Jiñi i yeʼtelob jiñʌch chuch chʌy, miʼ cotsañob wacax, chivo, tiñʌmeʼ, chitam yicʼot mut tac. I cheʼ bʌ miʼ melob i yotot, miʼ cʌñob teʼ, jam i an i tajol ti ladrillo. Anquese wen pʼumpʼuñob mach wen añic xujchʼob cheʼ bajcheʼ ti ñuqui tejclum tac.

Cheʼ bʌ chutonto jiñi c papá tsiʼ chocoyon majlel ti jumpʼejl convento joñon yicʼot c chich chaʼan mi lon c chʼujutesan melbil tac jach bʌ dios cheʼ bajcheʼ ñʌmʌlob yaʼ ti tejclum. Ti wiʼil, tsaʼ c wen mulaj c chʼujutesan jiñi dios Dudua, i cʌmbil bʌ jaʼel bajcheʼ Oduduwa chaʼan bʌ jiñi tejclum yoruba. Tsaʼ c melbe jumpʼejl alʌ templo i yaʼ tsaʼ caji cʌqʼuen i majtan. Tsaʼ caji cʌqʼuen aceite loqʼuem bʌ ti palma, yame, puy, mut, paloma yicʼot yan tac bʌ añimal. Mic wen jisan c taqʼuin tac chaʼan mic mʌn tac iliyi.

BAJCHEʼQUI JIÑI BIBLIA TSIʼ QUEXTɅBEYON C PENSAR: Cheʼ bʌ tsaʼ caji c pejcan jiñi Biblia, tsaʼ j cʌñʌ chaʼan an jach juntiquil Dios, Jehová, i chaʼan maʼañic miʼ mulan cheʼ miʼ chʼujutesʌntel melbil tac jach bʌ dios (Éxodo 20:4, 5; 1 Corintios 10:14). I ti ora tsaʼ c ñaʼta chuqui yom bʌ mic mel. Tsaʼ c laj choco jiñi melbil tac jach bʌ dios yicʼot muʼ bʌ j cʼʌn c chʼujutesan. Tsaʼ j cʌyʌ c pejcan jaʼel jiñi poj yujiloʼ bʌ chuqui muʼ bʌ caj i yujtel yicʼot tsaʼ j cʌyʌ c mel qʼuiñijel tac baqui miʼ chʼujutesʌntel melbil tac jach bʌ dios.

Wocolʌch tsaʼ cubi. Come añix cheʼ bʌ 60 jab cajel c chʼujutesan jiñi melbil tac jach bʌ dios. Cheʼ jaʼel, jiñi camigojob, c familia yicʼot jiñi chumuloʼ bʌ tic tʼejl maʼañic tsiʼ mulayob i tsiʼ wen wajleyoñob. Tsaʼ j cʼajtibe Jehová chaʼan miʼ coltañon c mel chuqui wen. ¡Tsiʼ wen coltayon jiñi Biblia baqui miʼ yʌl: «Jiñi i cʼabaʼ Jehová jiñʌch jumpʼejl wen tsʌts bʌ tsʼajc. Jiñʌch baqui miʼ taj i putsʼib jiñi toj bʌ, i miʼ taj i coltʌntel» (Proverbios 18:10, TNM).

Tsiʼ wen coltayon i tempa bʌ jiñi i testigojob Jehová come tsaʼ j qʼuele bajcheʼ miʼ pʌsbeñob i bʌ cʼuxbiya. Tsiʼ wen acʼʌ ti toj sajtel c pusicʼal chaʼan bajcheʼ miʼ chaʼleñob wersa i jacʼob jiñi mandar tac am bʌ ti Biblia. Tsaʼ c ñopo chaʼan jiñi testigojob jiñʌch i sujm bʌ ñopbalʌl.

WENLEL TAJBIL BɅ C CHAʼAN: Jiñi principio tac an i wen coltayon chaʼan wen mi cajñel quicʼot calobilob. Cheʼ jaʼel, lajal bajcheʼ tsiʼ locʼsʌbeyoñob jiñi j cuch wen al bʌ. Ti ñaxan, tsaʼ c wen jisa c taqʼuin chaʼan mic chʼujutesan melbil tac jach bʌ dios mach bʌ añic tsiʼ coltayon. Wʌle mic chʼujutesan Jehová, muʼ bʌ caj i laj jisan wocol tac (Apocalipsis 21:3, 4). Maʼañix chuculon ti jiñi melbil tac jach bʌ dios, mic chʼujutesan Jehová tiʼ pejtel c pusicʼal. Cʌntʌbilon i tijicña mi cubin c bʌ tiʼ tojlel.

«Tsaʼ c sʌcla Dios cʼʌlʌl cheʼ bʌ chutonto» (SHINJI SATO)

JABIL CHEʼ TSAʼ CHʼOCʼA: 1951

PAÍS: JAPÓN

YAN TAC BɅ: SACERDOTE SINTOÍSTA TI ÑAXAN

BAJCHEʼ QUILAL TI WAJALI: Tsaʼ coliyon ti jumpʼejl alʌ tejclum am bʌ ti Japón. Jiñi c tatob wen ochemob tiʼ ñopbal i tsiʼ cʌntesayoñob c chʼujutesan dios tac cʼʌlʌ cheʼ bʌ chutonto. Cʼʌlʌ ti jimbʌ ora muqʼuix c ñaʼtan chaʼan bʌ j coltʌntel yicʼot chaʼan com j coltan yambʌlob añoʼ bʌ i wocol tac. Cʼajal c chaʼan cheʼ bʌ juntiquil maestro tsiʼ cʼajtibeyon lon chuqui com lon c mel cheʼ bʌ ñucoñix lojon. Jiñi c piʼʌlob an tsaʼ bʌ i yʌlʌyob chaʼan yom weñoʼ bʌ i yeʼtel bajcheʼ científicojob. Pero cheʼ bʌ joñon tsaʼ cʌlʌ chaʼan com c melben i yeʼtel Dios, tsaʼ caji i wen tseʼtañoñob.

Cheʼ bʌ tsaʼ loqʼuiyon ti secundaria tsaʼ ochiyon ti jumpʼejl escuela chaʼan bʌ ñopbalʌl. Yaʼi tsaʼ j cʌñʌ juntiquil sacerdote sintoísta muʼ bʌ i pejcan jumpʼejl libro iʼicʼ bʌ cheʼ ujt i chaʼan. Joñon tsaʼix j qʼuele chuqui ti libro woliʼ pejcan, jin chaʼan cheʼ bʌ tsiʼ cʼajtibeyon mij cʌñʌ chuqui ti libro woliʼ pejcan, tsaʼ c jacʼʌ: «Jiñi Biblia». I tiʼ subeyon: «Majqui jach yom bʌ ochel ti sacerdote sintoísta yom miʼ pejcan ili libro».

Ti ora tsaʼ majli c mʌn jumpʼejl Biblia i tsaʼ cʌcʼʌ tic librero baqui mic taj j qʼuel. Pero come cabʌl chuqui yan tac bʌ yom mic pejcan, maʼañic mic tajben i yorajlel chaʼan mic pejcan jiñi c Biblia. Tsaʼ cʼoti i yorajlel cheʼ bʌ tsaʼ c chaʼle c bʌ ti graduar i tsaʼ caji c mel jiñi eʼtel bajcheʼ sacerdote sintoísta ti jumpʼejl templo. ¡Tsaʼʌch mejli c taj jiñi com bʌ!

Pero tsaʼ cʼoti j qʼuel chaʼan mach jiñic cheʼ bajcheʼ ñaʼtʌbil c chaʼan. Lʌcʼʌ tiʼ pejtelel jiñi sacerdotejob maʼañic miʼ qʼuelob ti ñuc jiñi quixtañujob. Yonlel mi añobicto i ñopoñel. Juntiquil am bʌ tiʼ wenta jiñi sacerdotejob tiʼ subeyon: «Mi a wom chaʼan wen maʼ wajñel alʌ jach chaʼan bʌ filosofía, mach a wʌl chaʼan bʌ ñopoñel».

Pejtelel iliyi tsiʼ yʌqʼueyon c chʼijyemlel anquese maʼañic tsaʼ j cʌyʌ yaʼ baqui añon tsaʼ caji j qʼuel yan tac bʌ ñopbalʌl. Pero tsaʼ jach caji i ñumen aqʼueñon c chʼijyemlel, tsaʼ c ñaʼta chaʼan mi jumpʼejlic ñopbalʌl miʼ pʌs chaʼan bʌ i sujmlel.

BAJCHEʼQUI JIÑI BIBLIA TSIʼ QUEXTɅBEYON C PENSAR: Ti 1988 tsaʼ j cʌñʌ juntiquil budista tsaʼ bʌ i subeyon chaʼan mic pejcan jiñi Biblia. Tsaʼ cʼajtiyi c chaʼan jiñi sacerdote sintoísta cheʼ bʌ tiʼ subeyon jaʼel bajcheʼ jiñi. Cheʼʌch tsaʼ caji c mel, i tsaʼ caji c pejcan jiñi Biblia, tsaʼʌch c wen mulaj i yaʼʌch mic sʌcʼan c wen pejcan.

Tsaʼ bʌ c pejca tsiʼ ñijcayon chaʼan mic melben oración Dios cheʼ bajcheʼ miʼ yʌl Mateo 6:9-13. Chaʼchaʼpʼejl hora mic chaʼ al ili oración anquese woliyon ti eʼtel yaʼ ti templo.

Cʼajal c chaʼan cheʼ bʌ mic pejcan majlel jiñi Biblia miʼ ñumen loqʼuel j cʼajtiya tac. Ti jimbʌ ora ñujpuñemoñix i cujil chaʼan jiñi testigojob miʼ yʌcʼob estudio come ti wajali tsiʼ julaʼtayob jiñi quijñam. Tsaʼ c pejca juntiquil xʼixic Testigo bʌ i cʌlʌxix cʼajtiya tsaʼ c melbe. Tsaʼʌch bʌ c ñumen mulaj jiñʌch cheʼ tsiʼ cʼʌñʌ jiñi Biblia chaʼan miʼ jacʼ jiñi j cʼajtiya tac. Ti wiʼil tsaʼ sʌcla juntiquil wiñic Testigo bʌ chaʼan miʼ yʌqʼueñon estudio.

Mach jalic tsaʼ ñumi i tsaʼ cajiyon ti majlel tiʼ tempabʌjob. Ti ñaxan maʼañic tsaʼ j qʼuele chaʼan yaʼañob Testigojob mach bʌ weñic tsaʼ c jacʼbeyob i tʼan ti ñaxan. Pero jiñi maʼañic tsiʼ mʌctayob chaʼan miʼ chaʼleñoñob ti saludar yicʼot chaʼan uts miʼ qʼueloñob.

Ti jiñi tempa bʌ tac tsaʼ j cʌñʌ chaʼan Dios miʼ mulan chaʼan jiñi ñoxiʼalob miʼ qʼuelob ti ñuc i yijñam. Ti jimbʌ ora maʼañic mij qʼuel ti ñuc jiñi quijñam yicʼot jiñi chaʼtiquil calobilob come ñoj ochemonto ti jiñi queʼtel chaʼan bʌ sacerdote. Tsaʼ cʼoti j qʼuel chaʼan mucʼʌch c ñʌchʼtañob jiñi quixtañujob muʼ bʌ i cʼotelob yaʼ ti templo, pero jiñi quijñam mach cheʼic mic mel tiʼ tojlel.

Cheʼ bʌ tsaʼ caji c ñumen cʌn Dios, ñumen lʌcʼʌl añon tiʼ tojlel tsaʼ caji cubin. Cabʌl texto tsaʼ bʌ cʼoti tic pusicʼal, cheʼ bajcheʼ muʼ bʌ i yʌl Romanos 10:13: «Come ‹majqui jach miʼ cʼajtin coltaya tiʼ cʼabaʼ Jehová mi caj i coltʌntel›». Cʼʌlʌl cheʼ bʌ chutonto tsaʼ caji c sʌclan Dios, i ti ili ora tsaʼix c taja.

Mach tijicñayix mi cubin cheʼ woliyon ti eʼtel yaʼ ti templo. Ti ñaxan tsaʼʌch c wen cʼojoʼta chuqui miʼ cʼotel i ñaʼtan yambʌlob mi tsaʼ cʼoti j cʌy, pero tsaʼʌch c wʌn alʌ chaʼan mij cʌy mi tsaʼ c taja jiñi i sujm bʌ Dios. Tsaʼ c jacʼʌ muʼ bʌ i yʌl jiñi j conciencia, i tsaʼ loqʼuiyon yaʼ ti templo ti 1989 i tsaʼ c ñopo chaʼan Jehová maʼañic mi caj i bajñel cʌyon.

Wocolʌch chaʼan mij cʌy c mel jiñi. Jiñi añoʼ bʌ tiʼ wenta sacerdotejob tsiʼ wen subeyoñob chaʼan maʼañic mij cʌy. Pero jiñi ñumen wocol bʌ tsaʼ cubi jiñʌch chaʼan mic subeñob jiñi c tatob. Cheʼ bʌ majlelto mucʼon tiʼ yotot tsaʼ c wen chaʼle bʌqʼuen, tsiltsilñato coc. Jaysujtelic tsaʼ waʼleyon chaʼan mij cʼajtiben i coltaya Jehová ti oración.

Cheʼ bʌ tsaʼ cʼotiyon baʼan c tatob maxto comic c subeñob i tsaʼ ñumi cabʌl hora chaʼan mic subeñob. Tsaʼ c wen mele oración, pero ti wiʼil tsaʼ c sube jiñi c papá. Tsaʼ c sube chaʼan tsaʼ c taja jiñi i sujm bʌ Dios ti yambʌ ñopbalʌl, i chaʼan miʼ mejlel c melben jiñi i yeʼtel yom mij cʌy queʼtel chaʼan sacerdote. Maʼañic chuqui tsiʼ yʌlʌ wen chʼijyem tsiʼ yubi. I anto c familia tsaʼ bʌ cʼotiyob chaʼan miʼ qʼuextañob c pensar. Maʼañic majqui com cʌcʼ ti wocol, pero comʌch c melben i yeʼtel Jehová. Ti wiʼil, wen tsaʼ caji i qʼueloñob chaʼan tsaʼ bʌ c mele.

Tiʼ sujm mach cojach yom mij cʌy jiñi templo, yomʌch mic junyajl qʼuextan c pensar. Cabʌlʌch chuqui tsaʼ cʌyle tic pensar cheʼ bʌ sacerdotejon. Anquese tsaʼʌch c lon ñopo c ñajʌtesan cabʌlʌch chuqui muʼ bʌ i chaʼ aqʼueñon c ñaʼtan.

Pero añʌch chaʼchajp tsaʼ bʌ i coltayon chaʼan mic ñajʌtesan jiñi. Ñaxan, tsaʼ c laj tempa yicʼot tsaʼ c pulu jiñi tsaʼ bʌ j cʼʌñʌ ti jiñi ñopbalʌl. Tsaʼ c pulu libro tac, cuadro tac yicʼot yan tac bʌ lets bʌ i tojol. Yambʌ jiñʌch cheʼ tsaʼ c wen ñochta jiñi Testigojob. I coltaya jiñi Testigojob tsaʼʌch i coltayon chaʼan mic ñajʌtesan jiñi tsaʼ tac bʌ c mele.

WENLEL TAJBIL BɅ C CHAʼAN: Ti ñaxan maʼañic mic wen cʌntan jiñi familia, jin chaʼan i bajñel miʼ yubiñob i bʌ. Pero cheʼ bʌ tsaʼ c jacʼʌ jiñi ticʼojel am bʌ ti Biblia, ñumen lʌcʼʌl tsaʼ ajñi quicʼotob. Ti wiʼil, jiñi quijñam tsaʼ caji i melben i yeʼtel Jehová jaʼel. Ili ora, joñon quicʼot quijñam, jiñi chʼiton bʌ calobil yicʼot jiñi xchʼoc bʌ calobil yicʼot i ñoxiʼal mi lon c chʼujutesan jiñi i sujm bʌ Dios.

Cheʼ bʌ mic ñaʼtan chaʼan cheʼ bʌ chutonto tsaʼ c mulaj c melben i yeʼtel Dios yicʼot chaʼan mij coltan yambʌlob, mij qʼuel chaʼan wolʌch c mel jiñi. Maʼañic mic taj c tʼan chaʼan mic wen aqʼuen wocolix i yʌlʌ Jehová.

«Anto chuqui yom c chaʼan mi cubin» (LYNETTE HOUGHTING)

JABIL CHEʼ TSAʼ CHʼOCʼA: 1958

PAÍS: SUDÁFRICA

YAN TAC BɅ: CHOCBIL MIʼ YUBIN I BɅ

BAJCHEʼ QUILAL TI WAJALI: Tsaʼ quila pañimil ti jumpʼejl alʌ tejclum i cʼabaʼ Germiston, baqui an mina tac i mach wen añic jontolil. Jiñi c tatob tsiʼ ñaʼtayob chaʼan maʼañic mi caj i mejlel i cʌntañoñob, jin chaʼan tsiʼ majtan acʼʌyoñob ti jumpʼejl familia cheʼ bʌ an jaxto chaʼpʼejl semana quila pañimil. Cheʼ bʌ tsaʼ coliyon tsaʼ c ñaʼta chaʼan jiñi tsaʼ bʌ i cosayoñob yoque jiñobʌch c tatob. Pero cheʼ bʌ tsaʼ cubi chaʼan mach jiñobic, chocbilon tsaʼ cubi c bʌ. Tsaʼ cubi chaʼan maʼañic chuqui miʼ lʌcʼtesañon tiʼ tojlelob i chaʼan maʼañic mi caj i chʼʌmbeñob i sujm.

Cheʼ bʌ an jaxto 16 c jabilel, tsaʼ cajiyon ti majlel ti bar tac quicʼot camigojob chaʼan mi lon c chaʼlen son yicʼot chaʼan mi lon c ñʌchʼtan jiñi xcʼayob. I cheʼ bʌ 17 c jabilel, muqʼuix c ñucʼ cigarro. Cheʼ com sujtel bajcheʼ jiñi tiquin xatal bʌ xʼixicob muʼ bʌ i loqʼuelob tiʼ pat cigarro. I cheʼ bʌ añix 19 c jabilel, tsaʼ majliyob ti Johannesburgo chaʼan queʼtel. I mach jalic tsaʼ ñumi, tsaʼ caji c ñochtan mach bʌ weñic lac piʼʌlob mucʼoʼ bʌ ti tsucul tʼan, ti cʼujts yicʼot ti jap lembal tiʼ yujtibal tac semana.

Pero mucʼʌch c wen mel ejercicio yicʼot mic chaʼlen alas bajcheʼ fútbol yicʼot yan tac bʌ. Tsaʼ c chaʼle wersa chaʼan wen mic mel jiñi queʼtel i wen tsaʼ cʌjñiyon chaʼan jiñi computadora tac. Wen bajcheʼ chumul lon, i maʼañic mij cʼojoʼtan chaʼan bʌ taqʼuin i yonlel miʼ yʌlob chaʼan wem bʌ xʼeʼtelon. Pero tiʼ sujm mach cheʼiqui, mach tijicñayoñic, cujil chaʼan anto chuqui yom c chaʼan mi cubin.

BAJCHEʼQUI JIÑI BIBLIA TSIʼ QUEXTɅBEYON C PENSAR: Pero cheʼ bʌ tsaʼ caji c chʼʌm estudio, tsaʼ j cʌñʌ chaʼan Jehová miʼ cʼuxbiñonla, jin chaʼan tsiʼ cʌybeyonla jiñi i Tʼan. Jiñi Biblia lajalʌch bajcheʼ jumpʼejl carta tsaʼ bʌ i cʌybeyonla chaʼan mi lac tojʼesan jiñi lac bijlel (Isaías 48:17, 18). Tsaʼ j cʌñʌ chaʼan mi com c jacʼ jiñi muʼ bʌ i yʌl jiñi Biblia, yom mij qʼuextan j cuxtʌlel.

Tsaʼ bʌ caji c ñaxan mel, tsaʼ c sʌcla yambʌ camigojob. Cheʼ bajcheʼ miʼ yʌl Proverbios 13:20 «Jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal. Jini muʼ bʌ i piʼleñob majlel jini mach bʌ weñobic i pusicʼal miʼ yutsi pʼojlel i mul». Tsaʼ c jacʼʌ ili ticʼojel i cheʼ bʌ tsaʼ j cʌyʌ jiñi yambʌ camigojob, tsaʼ caji c sʌclan jiñi testigojob bajcheʼ camigojob.

Pero ñumen wocol bʌ tsaʼ cubi jiñʌch chaʼan mij cʌy jiñi cigarro. Cheʼ bʌ tsaʼ c chaʼle wersa chaʼan mij cʌy jiñi, tsaʼ cʼʌjquiyon cheʼ bʌ 14 kilo. Wen wocolʌch tsaʼ cubi jiñi, i tsaʼ ñumi cheʼ bʌ 10 jab chaʼan mic chaʼ yajʼan. Anquese wocolʌch cujil chaʼan yom mij cʌy jiñi cigarro. Tsaʼ c wen melbe oración Jehová i jiñʌch tsaʼ bʌ i coltayon chaʼan mij cʌy.

WENLEL TALBIL BɅ C CHAʼAN: Ñumen cʼoqʼuix bajcheʼ añon. Cheʼ jaʼel tijicñayon yicʼot am bʌ c chaʼan. Maʼañix mic sʌclan jiñi tijicñʌyel muʼ bʌ i poj acʼ jiñi wem bʌ eʼtel o cheʼ bʌ maʼ wen cʌjñel ti pañimil. Joñon quicʼot c ñoxiʼal tijicñayon lon cheʼ mij cʌntesan lon yambʌlob chaʼan bʌ jiñi Biblia. I an mejlem j coltan uxtiquil c piʼʌloʼ bʌ ti eʼtel chaʼan miʼ melbeñob i yeʼtel Jehová. Yambʌ, cheʼ bʌ cuxulobto jiñi c tatob tsaʼ bʌ i lotoyoñob, tsaʼ mejli c subeñob jiñi pijtaya chaʼan bʌ jiñi chaʼ tejchel cheʼ bʌ sujtemix ti jumpʼejl paraíso ili pañimil.

Come wen lʌcʼʌlʌch añon quicʼot Jehová mach chocbiloñix mi cubin c bʌ, waʼli yaʼix ochemon ti jiñi familia am bʌ i chaʼan Jehová wʌʼ ti pañimil, baqui mic taj c ñaʼ, c tat yicʼot querañob (Marcos 10:29, 30).

[Foto]

Ti jiñi i testigojob Jehová tsaʼ j qʼuele bajcheʼ miʼ pʌsbeñob i bʌ cʼuxbiya

[Foto]

Templo baqui tsaʼ c chaʼle eʼtel bajcheʼ sacerdote sintoísta