• JABIL CHEʼ TSAʼ CHʼOCʼA: 1941

• PAÍS: BENÍN

• YAN TAC BɅ: CABɅL I YIJÑAM I MIʼ TSʼAʼLEN JIÑI I TESTIGOJOB JEHOVÁ

BAJCHEʼ QUILAL TI WAJALI:

Tsaʼ coliyon ti Cotonou, jumpʼejl colem tejclum am bʌ ti Benín. Jiñi c papá c mamá católicojob, pero maʼañic baʼ ora mi cajñel ti misa. Ti jimbʌ ora jiñi católicojob wen miʼ qʼuelob cheʼ cabʌl lac quijñam. Jin chaʼan tsaʼ c pʌyʌ chʌntiquil quijñam.

Ti 1970 tsaʼ tejchi jumpʼejl guerra yaʼ ti Benín. I tsaʼ c ñaʼta chaʼan chaʼañʌch i wenlel jiñi c país, jin chaʼan tsaʼ cotsa c bʌ ti jiñi guerra yicʼot ti política. Jiñi woliyoʼ bʌ ti guerra tsaʼ caji i tsʼaʼleñob jiñi i testigojob Jehová come maʼañic miʼ yotsañob i bʌ, i joñon tsaʼ caji j contrajiñob jaʼel. Cheʼ bʌ jiñi misionerojob tsaʼ chojquiyob loqʼuel yaʼ ti país ti 1976, tsaʼ c ñaʼta chaʼan maʼañix mi caj i chʌn cʼotelob.

BAJCHEʼ TSIʼ QʼUEXTA C PENSAR JIÑI BIBLIA:

Jiñi guerra tsaʼ ujti ti 1990, i ti orajach tsaʼ chaʼ cʼotiyob jiñi Testigojob, jin chaʼan tsaʼ c ñaʼta chaʼan yicʼotobʌch Dios. Ti jimbʌ ora tsaʼ j qʼuexta queʼtel. I yaʼi an juntiquil Testigo tsaʼ bʌ caji i subeñon muʼ bʌ i yʌl jiñi Biblia. Tsiʼ pejcʌbeyon versículo tac muʼ bʌ i pʌs chaʼan Jehová juntiquilʌch Dios yujil bʌ cʼuxbiya yicʼot toj bʌ pejtelel chuqui miʼ mel (Deuteronomio 32:4; 1 Juan 4:8). Tsaʼ c wen mulaj jiñi tsaʼ bʌ i subeyon, i tsaʼ c mulaj c ñumen cʌn, jin chaʼan tsaʼ c chʼʌmʌ jumpʼejl estudio.

Ti ora tsaʼ c teche majlel ti jiñi tempa bʌ tac. Tsaʼ c wen mulaj cheʼ tsaʼ j qʼuele chaʼan mucʼʌch i cʼuxbiñob i bʌ, i mach jiñic miʼ qʼuelob mi wen an lac taqʼuin o maʼañic, o bajcheʼ yilalonla. Cheʼ bʌ tsaʼ c ñumen ñochtayob tsaʼ j qʼuele chaʼan jiñobʌch jiñi i sujm bʌ xñoptʼañob (Juan 13:35).

Tsaʼ j cʌñʌ chaʼan yom mij cʌy jiñi Iglesia Católica chaʼan mic mejlel c melben i yeʼtel Jehová. Wocolʌch tsaʼ cubi come tsaʼ c bʌcʼña chuqui mi caj i yʌlob jiñi yambʌlob. Pero yicʼot i coltaya Jehová tsaʼ c sʌtʌ jiñi c bʌqʼuen i tsaʼ j cʌyʌ jiñi Iglesia.

Pero anto yambʌ chuqui yom mic tojʼesan. Yaʼ ti Biblia tsaʼ j cʌñʌ chaʼan Dios mach weñic miʼ qʼuel cheʼ cabʌl lac quijñam (Génesis 2:18-24; Mateo 19:4-6). Jin chaʼan tsaʼ ñujpuñiyon quicʼot jiñi ñaxam bʌ tsaʼ c pʌyʌ. Jiñi yambʌ uxtiquilob tsaʼ c chocoyob loqʼuel ti cotot, pero tsaʼʌch caji j coltañob ti chuqui i cʼʌjñibalob i chaʼan. Ti wiʼil, chaʼtiquilob tsaʼ sujtiyob tiʼ testigojob Jehová.

WENLEL TAC TAJBIL BɅ C CHAʼAN:

Anquese jiñi quijñam bej católica mucʼʌch i qʼuel ti ñuc cheʼ mic melben i yeʼtel Jehová, i miʼ yʌl chaʼan wʌleʼli ñumen wem bʌ ñoxiʼalon.

Ti ñaxan tsaʼ c ñaʼta chaʼan jiñi política jiñʌch muʼ bʌ caj i weñʼesan yaʼ baqui chumulon, pero mach cheʼiqui. Pero wʌle cujil chaʼan cojach jiñi i Yumʌntel Dios miʼ mejlel i tojʼesan pejtelel jiñi wocol (Mateo 6:9, 10). Mi cʌqʼuen wocolix i yʌlʌ Jehová cheʼ tsiʼ cʌntesayon baqui mic taj jiñi i sujm bʌ c tijicñʌyel.

• JABIL CHEʼ TSAʼ CHʼOCʼA: 1977

• PAÍS: BRASIL

• YAN TAC BɅ: JUNTIQUIL PASTOR

BAJCHEʼ QUILAL TI WAJALI:

Tsaʼ coliyon ti Itu, jumpʼejl tejclum am bʌ ti São Paulo (Brasil), baqui wen an jontolil.

Wen jontolon, mic chaʼlen tsʼiʼlel yicʼot mic chon droga. Pero tsaʼ cʼoti j qʼuel chaʼan jiñi miʼ mejlel i yʌcʼon ti ochel ti cárcel o mic tsʌnsʌntel. Jin chaʼan tsaʼ j cʌyʌ i tsaʼ ochiyon ti jumpʼejl Iglesia Pentecostal, ti wiʼil tsaʼ sujtiyon ti pastor.

Tsaʼ c ñaʼta chaʼan mi tsaʼ ochiyon ti Iglesia mi caj c mejlel j coltan yambʌ lac piʼʌlob, jin chaʼan tsaʼ c teche c ñusan jumpʼejl programa ti radio tsaʼ bʌ i wen acʼʌyon ti cʌjñel. Pero tsaʼ caji j qʼuel chaʼan jiñi Iglesia maʼañic miʼ ñaʼtañob bajcheʼ yom miʼ coltañob jiñi i wiñicob o chaʼan miʼ yʌqʼueñob i ñuclel Dios. Cojach miʼ ñaʼtañob jiñi taqʼuin. Jin chaʼan tsaʼ j cʌyʌ.

BAJCHEʼ TSIʼ QʼUEXTA C PENSAR JIÑI BIBLIA:

Cheʼ bʌ tsaʼ c teche estudio yicʼot jiñi i testigojob Jehová, tsaʼ cʼoti j qʼuel chaʼan mach lajalobic bajcheʼ jiñi yambʌ ñopbalʌl tac. An chaʼpʼejl chuqui tsaʼ c wen mulaj. Ñaxam bʌ, chaʼan mach muqʼuic jach i yʌlob chaʼan miʼ cʼuxbiñob Dios yicʼot jiñi lac piʼʌlob, mucʼʌch i pʌsob ti melbal. I chaʼpʼejlel, chaʼan maʼañic miʼ yotsañob i bʌ ti política yicʼot ti guerra (Isaías 2:4). Tsaʼ j qʼuele chaʼan tsaʼʌch c taja jiñi i sujm bʌ ñopbalʌl, jiñi chʼoʼchʼoc bʌ bij muʼ bʌ i pʌyonla majlel ti laj cuxtʌlel (Mateo 7:13, 14).

Tsaʼ c chʼʌmbe i sujm chaʼan añʌch chuqui yom mic tojʼesan tij cuxtʌlel chaʼan Dios utsʼat miʼ qʼuelon. Yom mic pʌs c pecʼlel i mi cʌqʼuen i yorajlel chaʼan mi cajñel quicʼot familia. Wocolʌch tsaʼ cubi, pero yicʼot i coltaya Jehová tsaʼʌch mejliyon. Jiñi quijñam wolix ti estudio, pero cheʼ bʌ tsiʼ qʼuele bajcheʼ woli c tojʼesan majlel c melbal toj sajtel i pusicʼal i tsaʼ caji i ñumen chaʼlen wersa. Mach jalic tsaʼ ñumi, tsaʼ cʌlʌ lojon chaʼan mi lon c sujtel tiʼ testigo Jehová. I lajal tsaʼ lon c chʼʌmʌ jaʼ.

WENLEL TAC TAJBIL BɅ C CHAʼAN:

Joñon quicʼot quijñam woli j cʌntesan lojon jiñi uxtiquil lon calobilob chaʼan miʼ lʌcʼtesañob i bʌ jaʼel ti Jehová. Tijicñayon lon tic familia. Mi cʌqʼuen wocolix i yʌlʌ Jehová cheʼ tsaʼ mejli j cʌn jiñi i sujmlel am bʌ ti Biblia. Jiñi Biblia miʼ qʼuextʌben i cuxtʌlel jiñi lac piʼʌlob, i joñon miʼ mejlel cʌl chaʼan cheʼʌchi.

• JABIL CHEʼ TSAʼ CHʼOCʼA: 1957

• PAÍS: AUSTRALIA

• YAN TAC BɅ: WOCOL JAX BAJCHEʼ TSIʼ ÑUSA CHEʼ BɅ CHUTTO

BAJCHEʼ QUILAL TI WAJALI:

Sietejon lojon i joñoñʌch jiñi chichʌl bʌ, tsaʼ coliyon ti Newcastle (Nueva Gales del Sur). Jiñi c papá wen jontol i miʼ jap lembal. I jiñi c mamá jontol jaʼel, miʼ wen aʼleñon yicʼot miʼ wen jatsʼon. Tiʼ pejtelel ora miʼ subeñon chaʼan maʼañic j cʼʌjñibal i chaʼan mi caj c majlel ti infierno. Jin chaʼan, mic wen chaʼlen bʌqʼuen.

Ti bele ora maʼañic mic majlel ti clase come jiñi c mamá miʼ lowon. Cheʼ bʌ 11 c jabilel, jiñi añoʼ bʌ i yeʼtel tsiʼ chiliyoñob. Tsiʼ pʌyʌyoñob majlel ti jumpʼejl convento, pero tsaʼ putsʼiyon loqʼuel cheʼ bʌ 14 c jabilel. Come mach comic chaʼ sujtel majlel ti cotot, tsaʼ cʌyleyon ti calle, ti jumpʼejl barrio am bʌ ti Sydney.

Cheʼ bʌ chumulon ti calle, tsaʼ caji j cʼʌn droga, tsaʼ caji c jap lembal, tsaʼ caji j qʼuel pornografía yicʼot tsaʼ caji c chon c bʌ. Ti jumpʼejl bʌ acʼʌlel, cheʼ bʌ mij cʌytʌl ti jumpʼejl club nocturno, tsaʼ c wen chaʼle bʌqʼuen. Tsaʼ cʼoti chaʼtiquil wiñicob i jiñi i yum jiñi club nocturno tsaʼ caji i yʌl chaʼan yom i choñon yicʼotob jiñi wiñicob. Anquese tsiʼ chocoyoñob majlel ti jumpʼejl cuarto, tsaʼ c luʼ taja cubin chaʼan mi caj i pʌyoñob majlel ti jumpʼejl barco cʼʌlʌl ti Japón chaʼan mic chaʼlen eʼtel ti jumpʼejl bar. Jin chaʼan tsaʼ tijpʼiyon loqʼuel ti ventana, tsaʼ putsʼiyon i tsaʼ c sʌcla j coltʌntel.

Tsaʼ c taja juntiquil wiñic cʼotem jach bʌ ti jiñi tejclum i tsaʼ c sube jiñi woli bʌ c ñusan, tsaʼ c ñaʼtan chaʼan mi caj i yʌqʼueñon taqʼuin. Jiñi wiñic tsaʼ jach i pʌyʌyon majlel tiʼ cuarto chaʼan mic tsʼʌmel yicʼot chaʼan miʼ yʌqʼueñon chuqui mij cʼux, i tsaʼ cʌyleyon ti chumtʌl yicʼot. Ti jumpʼejl jab, tsaʼ ñujpuñiyon lojon.

BAJCHEʼ TSIʼ QʼUEXTA C PENSAR JIÑI BIBLIA:

Cheʼ bʌ woliyon ti estudio quicʼot jiñi i testigojob Jehová, tsaʼ cʼoti j cʌn chaʼan tiʼ mul Satanás an cabʌl jontolil, i jiñi tsiʼ wen michʼesayon come tsaʼ c lon ñaʼtan chaʼan Dios miʼ yʌqʼueñonla jiñi wocol tac. Pero tijicña tsaʼ cubi c bʌ cheʼ bʌ tsaʼ cʼoti j cʌn chaʼan Dios maʼañic miʼ choconla majlel ti infierno, cheʼ bajcheʼ tsaʼ cʌntesʌntiyon cheʼ bʌ chutonto.

Tsaʼ toj sajti c pusicʼal cheʼ bʌ tsaʼ j qʼuele chaʼan jiñi i testigojob Jehová mucʼʌch i chumtañob muʼ bʌ i yʌl jiñi Biblia. Anquese joñon wen tsʌts c pusicʼal, wen utsob yicʼoton i tsiʼ qʼueleyoñob ti ñuc.

Ñumen wocol bʌ tsaʼ cubi jiñʌch cheʼ mij cʌy c ñaʼtan chaʼan maʼañic j cʼʌjñibal i chaʼan mij cʌy c tsʼaʼlen c bʌ. Cheʼʌch tsaʼ c bej ubi c bʌ anquese añix ora tsaʼ c chʼʌmʌ jaʼ. Mucʼʌch j cʼuxbin Dios, pero tsaʼ c ñaʼta chaʼan maʼañic baʼ ora mi caj i cʼotel i cʼuxbiñon.

Cheʼ bʌ añix 15 jab tsaʼ c chʼʌmʌ jaʼ, tsaʼ luʼ qʼuextʌyi. Ti jumpʼejl discurso tsaʼ bʌ ñusʌnti yaʼ tiʼ Yotlel tempa bʌ chaʼan i testigojob Jehová, jiñi hermano tsiʼ pejca Santiago 1:23, 24. Ili versículo miʼ lajeʼ jiñi i Tʼan Dios bajcheʼ jumpʼejl espejo baqui miʼ mejlel laj qʼuel lac bʌ cheʼ bajcheʼ miʼ qʼuelonla Jehová. Tsaʼ cʼoti j qʼuel chaʼan machʌch cheʼic woli j qʼuel c bʌ cheʼ bajcheʼ miʼ qʼuelon Dios. Pero maʼañic tsaʼ c chʼʌmʌ ti ñuc, come tsaʼ caji c bej ñaʼtan chaʼan machʌch yomic miʼ cʼuxbiñon.

Cheʼ bʌ ñumeñix chaʼpʼej uxpʼejl qʼuin, tsaʼ c pejca jumpʼejl versículo tsaʼ bʌ i qʼuexta c pensar. Jiñʌch Isaías 1:18, baqui Jehová miʼ yʌl: «Laʼ cula, laʼ lac tem chaʼlen tʼan. Anquese wen chʌctsʼeran jini laʼ mul, lajal mi caj i sujtel bajcheʼ ñaʼal tsʌñal». Jehová woliʼ subeñon tsaʼ cubi: «Vicky, laʼ. Laʼ lac chaʼlen tʼan, laʼ lac tojʼesan jiñi a wocol. J cʌñʌyet, cujil jiñi a mul, j cʌñʌ a pusicʼal, pero mij cʼuxbiñet».

Ti jimbʌ acʼʌlel maʼañic tsaʼ mejliyon ti wʌyel. Muʼto c ñaʼtan chaʼan Dios maʼañic miʼ cʼuxbiñon, pero tsaʼ caji c wen ñaʼtan cheʼ bʌ Jesús tsiʼ yʌcʼʌ i cuxtʌlel. Tsaʼ cʼoti j qʼuel chaʼan Jehová an i wen pʌsʌ i pijt tic tojlel come miʼ wen cʼuxbiñon. Pero joñon lajal bajcheʼ woli c suben Jehová chaʼan jiñi i cʼuxbiya maʼañic miʼ mejlel i coltañon, i chaʼan mach jasʌlic jiñi i cuxtʌlel tsaʼ bʌ i yʌcʼʌ i Yalobil chaʼan miʼ ñusʌbeñon c mul. Tiʼ sujm, maʼañic woli j qʼuel ti ñuc jiñi i cuxtʌlel tsaʼ bʌ i yʌcʼʌ Jesús. Pero cheʼ tsaʼ caji c wen ñaʼtan tsaʼ bʌ i mele Jehová tic tojlel, tsaʼ cʼoti cubin chaʼan mucʼʌch i wen cʼuxbiñon.

WENLEL TAC TAJBIL BɅ C CHAʼAN:

Wʌle, tijicñayoñix mi cubin c bʌ. Jiñi c ñujpuñel tsaʼix ñumen weñʼa. Tijicñayon chaʼan miʼ mejlel c suben yambʌlob chuqui tsaʼ bʌ c ñusa chaʼan miʼ coltañob. Ti jujumpʼejl qʼuin ñumen lʌcʼʌl mi cubin c bʌ ti Jehová.

• JABIL CHEʼ TSAʼ CHʼOCʼA: 1974

• PAÍS: RUSIA

• YAN TAC BɅ: MIʼ WEM MULAN JIÑI HEAVY METAL

BAJCHEʼ QUILAL TI WAJALI:

Tsaʼ coliyon ti jumpʼejl familia pʼumpʼum bʌ ti Vótkinsk, yaʼ baqui tsaʼ coli jaʼel jiñi compositor wen cʌmbil bʌ Piotr Ilič Chaikovski. Jiñi c papá an wen tac bʌ i melbal, pero miʼ wen jap lembal, jin chaʼan miʼ wen ujtel wocol ti cotot.

Mach weñic bʌ alumnojon, i tsaʼ cʼoti c ñaʼtan chaʼan maʼañic ba ora lajal mi caj c sujtel bajcheʼ jiñi yambʌ c piʼʌlob ti clase. Jin chaʼan tsaʼ j cʌyʌ c ñochtan jiñi yambʌlob come c bajñel jach com ajñel, i wen wocol mi cubin chaʼan mic majlel ti escuela. Jumpʼejl ejemplo, cheʼ bʌ an chuqui yom mic tsictesan yaʼ ti clase, wen wocol mi cubin chaʼan mic ñaʼtan bajcheʼ yom mi cʌl. Cheʼ bʌ añon ti secundaria i ujtelix mucʼ jumpʼejl jab, tiʼ tsʼijbuyob tic libreta ili tʼan: «Mach wen yujilic tʼan, maʼañic miʼ mejlel i yʌl chuqui miʼ ñaʼtan». Ili tʼan tsiʼ wen aqʼueyon c chʼijyemlel i tsiʼ yʌqʼueyon c ñaʼtan chaʼan maʼañic j cʼʌjñibal. Jin chaʼan tsaʼ caji j cʼajtiben c bʌ chuquito i cʼʌjñibal jiñi j cuxtʌlel.

Tsaʼ c teche c jap lembal cheʼ bʌ xcolelonto. I wen mi cubin c bʌ, pero cheʼ bʌ mic ñumel ti pʼis miʼ yʌcʼon ti pensar. Maʼañic mic tajben i sujmlel jiñi cuxtʌlel. Tsaʼ caji c ñumen ubin c chʼijyemlel, an i tajol mic loqʼuel ti cotot chaʼpʼej uxpʼejl qʼuin. I tsaʼto cʼoti c ñaʼtan chaʼan mic tsʌnsan c bʌ.

Tsaʼ c tajbe i loqʼui c wocol cheʼ bʌ añix 20 c jabilel: Jiñi heavy metal. Ili música miʼ yʌqʼueñon c pʼʌtʌlel, tsaʼ caji c ñochtan jiñi roquerojob, tsaʼ cʌcʼʌ ti colel c jol, tsaʼ c jochʼo c chiquin i cheʼ yilal tsaʼ caji c lʌp c pislel cheʼ bajcheʼob. Wen jontol tsaʼ sujtiyon i jiñi lac piʼʌlob miʼ bʌcʼñañoñob, tiʼ caj iliyi tsaʼ tejchi cabʌl wocol tic familia.

Wen qʼuexeloñix bajcheʼ yilalon. Tsaʼ c ñaʼta chaʼan jiñi música mi caj i yʌqʼueñon c tijicñʌyel, pero mach cheʼic tsaʼ ujti. I cheʼ bʌ tsaʼ cubi chaʼan jiñi xcʼayob muʼ bʌ c wen qʼuelob ti ñuc an chuqui tac mach bʌ weñic miʼ melob mach tijicñayic tsaʼ cubi c bʌ.

Tsaʼ c chaʼ ñaʼta chaʼan mic tsʌnsan c bʌ, pero wʌle tiʼ sujmix. Pero maʼañic tsaʼ c mele come tsaʼ c ñaʼta jiñi c mamá, miʼ wen cʼuxbiñon i cabʌl chuqui an i mele tic tojlel. Maʼañic mic ñaʼtan chuqui yom mic mel: Mach comix chumtʌl, pero maʼañic miʼ mejlel c tsʌnsan c bʌ jaʼel.

Chaʼan maʼañic mic ñaʼtan jiñi c wocol tac, tsaʼ c teche c pejcan libro tac. I ti jumpʼejl libro miʼ taj ti tʼan juntiquil am bʌ i yeʼtel ti ñopbalʌl. Ti orajach tsaʼ c mulaj c melben i yeʼtel Dios jaʼel yicʼot chaʼan mij coltan yambʌ lac piʼʌlob. Tsaʼ c sube Dios pejtelel chuqui an tic pusicʼal, maʼañic baʼ c mele jiñi, pero tsaʼ j cʼajtibe chaʼan miʼ coltañon chaʼan mic tajben i sujmlel jiñi cuxtʌlel. I toj sajtel c pusicʼal cheʼ bʌ orajach tsaʼ caji cubin c ñʌchʼtʌlel. Pero ñumen toj sajtel c pusicʼal chaʼan tsaʼ bʌ ujti ti wiʼil, cheʼ bʌ an jaxto chaʼpʼejl hora i ñumel: Juntiquil i testigo Jehová tsaʼ cʼoti ti cotot i tiʼ subeyon jumpʼejl estudio loqʼuem bʌ ti Biblia. Jiñʌch i jacʼbal jiñi coración. Ti jimbʌ ora tsaʼ c tajbe i sujmlel jiñi cuxtʌlel.

BAJCHEʼ TSIʼ QʼUEXTA C PENSAR JIÑI BIBLIA:

Anquese wocolʌch tsaʼ cubi, tsaʼ c choco pejtelel chaʼan bʌ jiñi heavy metal. Pero tsaʼʌch bej cʌli tic jol jiñi música. Cheʼ bʌ mic ñumel ti jumpʼejl calle baqui miʼ ñijcañob jiñi música miʼ chaʼ tilel tic pensar chuqui mach tac bʌ weñic, jin chaʼan tsaʼ j cʌyʌ ñumel yaʼ ti calle come mach comic chaʼan iliyi miʼ bibʼesan jiñi wen tac bʌ chuqui woli j cʌn majlel. I cheʼ bʌ miʼ chaʼ tilel tic jol chuqui tsaʼ bʌ c ñusa ti wajali, mic wen chaʼlen oración. Cheʼʌch tsaʼ mejli cubin jiñi «i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl» (Filipenses 4:7).

Cheʼ bʌ woliyon ti estudio tsaʼ cʼoti j cʌn chaʼan jiñi xñoptʼañob yom miʼ subeñob yambʌlob chuqui ñopolob i chaʼan (Mateo 28:19, 20). I joñon tsaʼ c ñaʼta chaʼan maʼañic mi caj c mejlel c mel cheʼ bajcheʼ jiñi, pero mucʼʌch i yʌqʼueñon c tijicñʌyel jiñi woli bʌ j cʌn majlel. Cujil chaʼan jiñi yambʌ lac piʼʌlob yomʌch miʼ cʌñob jaʼel jiñi i sujmlel. Anquese an c bʌqʼuen tsaʼ c chaʼle wersa chaʼan mic suben yambʌlob chuqui woli bʌ j cʌn. I maʼañic tsaʼ c wis ñaʼta chaʼan iliyi mi caj i coltañon chaʼan mic sʌt c bʌqʼuen yicʼot chaʼan miʼ ñumen cʌlel tic pusicʼal woli bʌ j cʌn yaʼ ti Biblia.

WENLEL TAC TAJBIL BɅ C CHAʼAN:

Wʌle tijicña chumulon quicʼot quijñam i an j colta yambʌlob chaʼan miʼ cʌñob jiñi i sujmlel am bʌ ti Biblia, bajcheʼ jiñi c mamá yicʼot jiñi quijtsʼin. Cheʼ mic melben i yeʼtel Dios yicʼot mij coltan yambʌlob chaʼan miʼ cʌñob jaʼel, an i yʌqʼue i sujmlel j cuxtʌlel.