Jiñi Biblia tsiʼ qʼuextʌbeyob i pensar

¿BAJCHEʼ tsiʼ tajbe i sujmlel i cuxtʌlel juntiquil xchʼoc wen wocol bʌ tsiʼ ñusa cheʼ bʌ chutto? ¿Chuqui tsiʼ colta juntiquil wiñic muʼ bʌ i contrajin jiñi añoʼ bʌ i yeʼtel chaʼan maʼañix miʼ yotsan i bʌ ti wocol? Laʼ laj qʼuel chuqui miʼ yʌlob.

«Tsaʼ c mulaj cheʼ muqʼuic j cʼuxbintel» (INNA LEZHNINA)

JABIL CHEʼ TSAʼ CHʼOCʼA: 1981

PAÍS: RUSIA

YAN TAC BɅ: WEN WOCOL TSIʼ ÑUSA CHEʼ BɅ CHUTTO

BAJCHEʼ QUILAL TI WAJALI: Jiñi c papá c mamá xcojc, maʼañic miʼ yubiñob tʼan, i cheʼʌch tsaʼ quila pañimil jaʼel. Cʼʌlʌl cheʼ bʌ seis jaxto c jabilel tijicña tsaʼ c ñusa, pero cheʼ jiñi tsiʼ cʌyʌyob i bʌ jiñi c papá c mamá. Anquese chutonto mucʼʌch c chʼʌmben i sujm i wen cʼux tsaʼ cubi. Jiñi c papá yicʼot cuscun tsaʼ cʌleyob ti Troick, i joñon quicʼot c mamá tsaʼ majliyon lojon ti Cheliabinsk. Ti wiʼil tsaʼ chaʼ ñujpuñi jiñi c mamá. Pero jiñi c padrastro wen yujil lembal i ti bele ora miʼ jatsʼon lojon.

Ti 1993, jiñi cuscun tsaʼ chʌmi ti jaʼ. Wen cʼux tsaʼ lon cubi ti lon c pejtelel. Jiñi c mamá tsaʼ caji i jap lembal i tsaʼ caji i jatsʼon. Tsaʼ c mulaj cheʼ tijicñayic chumulon lojon. Tiʼ sujm tsaʼ c mulaj cheʼ muqʼuic j cʼuxbintel, pero mach cheʼiqui. Tsaʼ c sʌcla j coltʌntel ti cabʌl iglesia, pero maʼañic tsaʼ c taja.

BAJCHEʼ TSIʼ QʼUEXTA C PENSAR JIÑI BIBLIA: Cheʼ bʌ 13 c jabilel, juntiquil c piʼʌl ti clase i testigo bʌ Jehová tsaʼ caji i subeñon muʼ bʌ i yʌl jiñi Biblia. Tsaʼ c wen mulaj tiʼ tojlel Noé yicʼot Job, come tsiʼ melbeyob i yeʼtel Dios anquese tsiʼ ñusayob cabʌl wocol. Mach jalic tsaʼ ñumi i tsaʼ cajiyon ti estudio yicʼotob i tsaʼ c teche majlel ti tempa bʌ tac.

Cabʌl chuqui utsʼatax bʌ tsaʼ j cʌñʌ yaʼ tiʼ Tʼan Dios. Tsaʼ wen cʼoti tic pusicʼal cheʼ tsaʼ j cʌñʌ chaʼan Dios añʌch i cʼabaʼ (Salmo 83:18). Tsaʼ toj sajti c pusicʼal cheʼ tsaʼ j qʼuele chaʼan cheʼʌch woliʼ yujtel bajcheʼ miʼ yʌl jiñi Biblia chaʼan «jiñi cojix tac bʌ qʼuin» (2 Timoteo 3:1-5). I tsiʼ wen ñijca c pusicʼal jiñi pijtaya chaʼan mi caj i chaʼ tejchelob jiñi chʌmeñoʼ bʌ. Ñaʼtancula: ¡Mi caj c chaʼ qʼuel jiñi queran! (Juan 5:28, 29).

Pero jiñi c mamá yicʼot jiñi c padrastro maʼañic tsiʼ mulayob, tsiʼ wersa subeyoñob chaʼan mij cʌy jiñi estudio yicʼot i testigojob Jehová. Pero maʼañic tsaʼ c jacʼʌ j cʌy come joñon mic wen mulan.

Wocolʌch tsaʼ c ñusa tic familia. I cheʼ jiñi, jiñi yambʌ quijtsʼin muʼ bʌ i yajñel yicʼoton ti tempa bʌ tac tsaʼ chʌmi ti jaʼ jaʼel. Pero jiñi Testigojob maʼañic tsiʼ wis cʌyʌyoñob. Tsiʼ wen pʌsbeyoñob jiñi cʼuxbiya, i tsaʼ cʼoti c ñaʼtan chaʼan jiñʌch jiñi i sujm bʌ ñopbalʌl. Jin chaʼan tsaʼ c chʼʌmʌ jaʼ bajcheʼ i testigo Jehová ti 1996.

WENLEL TAC TAJBIL BɅ C CHAʼAN: Añix seis jab ñujpuñemon quicʼot Dmitry, juntiquil wen bʌ wiñic. Ti lon c chaʼticlel mic chaʼlen lojon coltaya yaʼ ti sucursal chaʼan i testigojob Jehová ti San Petersburgo. Jiñi c mamá yicʼot c padrastro weñix tsaʼ caji i qʼuelob jiñi lon c ñopbal.

¡Wen tijicñayon mi cubin cheʼ tsaʼ mejli j cʌn Jehová! An i yʌqʼue i sujmlel j cuxtʌlel cheʼ mic melben i yeʼtel.

«Tsaʼ c melbe c bʌ cabʌl cʼajtiya tac» (RAUDEL RODRÍGUEZ RODRÍGUEZ)

JABIL CHEʼ TSAʼ CHʼOCʼA: 1959

PAÍS: CUBA

YAN TAC BɅ: TSIʼ CONTRAJI AÑOʼ BɅ I YEʼTEL

BAJCHEʼ QUILAL TI WAJALI: Tsaʼ coliyon ti La Habana (Cuba) ti jumpʼejl barrio pʼumpʼun bʌ, i yaʼi jiñi lac piʼʌlob miʼ wen jatsʼob i bʌ. Cheʼ bʌ xcolelonto tsaʼ c wen mulaj c ñopeʼ jatsʼ.

Come wem bʌ alumnojon, jiñi c papá c mamá tsiʼ mulayob i yotsañon ti universidad. Yaʼi tsaʼ caji c ñaʼtan chaʼan yom miʼ qʼuextʌyel jiñi política tic país i tsaʼ caji j contrajin jiñi añoʼ bʌ i yeʼtel. Quicʼot juntiquil c piʼʌl ti clase tsaʼ c wen jatsʼʌ lon juntiquil policía chaʼan mic chilben lon i juloñib, tsaʼ c wen lowbe lojon i jol. Jin chaʼan, tsaʼ ochiyon lojon ti cárcel i tsaʼ ajli chaʼan mi caj lon c tsʌnsʌntel. ¡An jaxto 20 c jabilel, i colelix c chʌmel!

Cheʼ bajñel ñupʼulon tsaʼ caji c ñaʼtan bajcheʼ mi caj c mel chaʼan maʼañic mic pʌs c bʌqʼuen cheʼ mi caj c tsʌnsʌntel. Pero tsaʼ caji c wen cʼajtiben c bʌ jaʼel ¿chucoch mi lac wen ticʼlʌntel? ¿Chaʼan jach ba mi la quilan wocol tsaʼ tiliyonla?

BAJCHEʼ TSIʼ QʼUEXTA C PENSAR JIÑI BIBLIA: Ti wiʼil maʼañix tsaʼ tsʌnsʌntiyon lojon, tsaʼ jax cʌjyiyon lojon treinta jab ti cárcel. Ti jimbʌ ora tsaʼ j cʌñʌyob jiñi i testigojob Jehová yaʼ bʌ ñupʼulob chaʼan tiʼ caj muʼ bʌ i ñopob. Tsaʼ toj sajti c pusicʼal cheʼ bʌ tsaʼ j qʼueleyob chaʼan chʼejlob yicʼot tijicñayob, mach michʼicñayobic chaʼan tsaʼ toʼol ñujpʼiyob anquese maʼañobic i mul.

Tiʼ tsictesʌbeyoñob chaʼan Dios an chuqui chajpʌbil i chaʼan chaʼañonla. Tsiʼ pʌsbeyoñob yicʼot Biblia chaʼan Dios mi caj i sujtesan ti jumpʼejl paraíso ili Lum, baqui maʼañix jontolil i tijicña mi caj lac chumtʌl tiʼ pejtelel ora (Salmo 37:29).

Tsaʼ c wen mulaj woli bʌ i pʌsbeñoñob, pero mach lajaloñic bajcheʼob. Tsaʼ c ñaʼta chaʼan mach mejlic c tʌtsʼ c bʌ ti política yicʼot ti jiñi wocol tac. Jin chaʼan tsaʼ caji c bajñel pejcan jiñi Biblia. I cheʼ tsaʼ ujti c pejcan, tsaʼ j cʌñʌ chaʼan jiñob jach jiñi i testigojob Jehová weñob i melbal bajcheʼ jiñi ñaxam bʌ xñoptʼañob.

Cheʼ tsaʼ c pejca jiñi Biblia tsaʼ j cʌñʌ chaʼan yomʌch mij qʼuextan bajcheʼ yilalon. Yom mij cʌy tsucu tʼan tac, cʼujtsijel yicʼot maʼañix mij cotsan c bʌ ti política. Wocolʌch tsaʼ cubi, pero yicʼot i coltaya Jehová tsaʼʌch mejli j cʌy.

Wocol bʌ tsaʼ cubi jiñʌch chaʼan mij cʌy michʼajel. Muʼto c bej cʼajtiben i coltaya Jehová chaʼan mic ticʼ c bʌ. An cabʌl texto tsaʼ bʌ i coltayon, bajcheʼ Proverbios 16:32, muʼ bʌ i yʌl: «Jini mach bʌ orajic yujil michʼajel ñumen ñucʌch bajcheʼ ñuc bʌ soldado. Ñumen ñuc jini muʼ bʌ i ticʼ i bʌ bajcheʼ jini muʼ bʌ i chil tejclum ti guerra».

Ti 1991 tsaʼ c chʼʌmʌ jaʼ ti cárcel. Cheʼ bʌ ñumeñix jumpʼejl jab tsaʼ locʼsʌntiyon ti cárcel i tsaʼ chojquiyon majlel ti España come añob c familia yaʼi. Cheʼ bʌ tsaʼ cʼotiyon, tsaʼ majliyon ti tempa bʌ chaʼan i testigojob Jehová i wen tsiʼ pejcayoñob, lajal bajcheʼ wajalix i cʌñʌyoñob, cheʼ jaʼel tsiʼ wen coltayoñob.

WENLEL TAC TAJBIL BɅ C CHAʼAN: Wʌle wen tijicñayon i woli c melben i yeʼtel Dios quicʼot quijñam yicʼot quixicʼalob. Mic wen aqʼuen i yorajlel chaʼan mic pʌsbeñob yañoʼ bʌ muʼ bʌ i yʌl jiñi Biblia. An i tajol mic ñaʼtan cheʼ bʌ colel c chʌmel cheʼ chʼitoñonto. Mi cʌqʼuen wocolix i yʌlʌ Jehová come cuxulon yicʼot an c pijtaya. Wen comix chaʼan miʼ sujtel ti paraíso ili Pañimil, baqui maʼañix miʼ cajel wocol mi jiñicto chʌmel (Apocalipsis 21:3, 4).

[Comentario]

«Tsaʼ wen cʼoti tic pusicʼal cheʼ tsaʼ j cʌñʌ chaʼan Dios añʌch i cʼabaʼ»

[Foto]

Jiñi c ñoxiʼal yicʼot joñon mic wen mulan lon c subeñob wen tʼan jiñi xcojcob