¿I sujm ba xñoptʼañob pejtelel muʼ bʌ i ñopob Cristo?

¿AWUJIL ba jaytiquil xñoptʼañob añob tiʼ pejtelel pañimil? Ti 2010, an lʌcʼʌ 2,300 millón xñoptʼañob toxbiloʼ bʌ ñumen ti 41 mil ñopbalʌl, i mach junlajalobic i cʌntesa yicʼot chuqui miʼ ñaʼtañob, cheʼʌch miʼ yʌl jiñi Atlas of Global Christianity. Come an cabʌl ñopbalʌl, an maʼañic bʌ miʼ ñaʼtañob chuqui yom bʌ miʼ ñopob. Tajol miʼ cʼajtibeñob i bʌ: ­«¿I sujm ba xñoptʼañob pejtelel muʼ bʌ i yʌlob chaʼan miʼ ñopob Cristo?».

Laʼcu lac ñaʼtan jumpʼejl ejemplo. Mi la com ochel ti jumpʼejl país, ¿jasʌl ba mi la cʌl majquiyonla yicʼot baqui chʼoyolonla? Maʼañic, yomʌch mi lac pʌs jumpʼejl pasaporte o yambʌ jun chaʼan miʼ ñopob lac tʼan. Cheʼʌch miʼ yujtel jaʼel tiʼ tojlel jiñi i sujm bʌ xñoptʼan, mach cojach yom miʼ yʌl chaʼan miʼ ñop Cristo, yomʌch an chuqui miʼ yʌcʼ ti cʌjñel. Laʼ laj qʼuel.

Jiñi tʼan cristiano, muʼ bʌ i yʌjlel jaʼel bajcheʼ xñoptʼan, tsaʼ caji ti cʼʌjñel cheʼ bʌ ti jabil 44, cheʼ ñumeñix cheʼ bʌ 10 jab tsaʼ chʌmi Jesús. Lucas, juntiquil tsaʼ bʌ i tsʼijbu jiñi Biblia, miʼ yʌl chaʼan «yaʼʌch ti Antioquía baqui tsaʼ ñaxan subentiyob ti cristianojob jiñi xcʌntʼañob cheʼʌch bajcheʼ yom Dios» (Hechos 11:26). Jin chaʼan jiñi xñoptʼañob xcʌntʼañobʌch i chaʼan Cristo. Pero ¿chuqui yom i yʌl cheʼ xcʌntʼañonla i chaʼan Jesús? Jiñi Diccionario Teológico del Nuevo Testamento miʼ yʌl: «Cheʼ mi lac tsajcan [Cristo] bajcheʼ xcʌntʼan i chaʼan, yom i yʌl chaʼan mi la cʌcʼ laj cuxtʌlel chaʼan mi lac jacʼben i tʼan tiʼ pejtelel ora». Ti yambʌ tʼan, jiñi i sujm bʌ xñoptʼan miʼ jacʼ pejtelel i cʌntesa Jesús.

¿Am ba xñoptʼañob ili ora mucʼʌch bʌ i jacʼbeñob i cʌntesa tac Jesús? ¿Chuqui tsiʼ yʌlʌ Jesús chaʼan mi caj i yʌcʼ ti cʌjñel jiñi xcʌntʼañob i chaʼan? Chaʼan maʼ ñaʼtan muʼ bʌ i yʌl jiñi Biblia, pejcan jiñi joʼpʼejl tema muʼ bʌ caj i tilel. Ti jujumpʼejl tema mi caj a qʼuel junchajp tsaʼ bʌ i yʌlʌ Jesús muʼ bʌ i yʌcʼ ti cʌjñel jiñi xcʌntʼañob i chaʼan. Mi caj laj qʼuel jaʼel bajcheʼ yilalob jiñi xñoptʼañob ti ñaxam bʌ siglo, i ti wiʼil mi caj laj qʼuel majqui bʌ xñoptʼañob ti ili ora cheʼʌch yilalob jaʼel bajcheʼ jiñi.